Atamai i Aoaoga Faavae: 1 Peteru 4:6

“[Na] Folafola Atu Foi le Talalelei i e ua Maliliu”

The resurrected Jesus Christ preaching to spirits in the Spirit World.

I lau suesuega o le 1 Peteru 4, na e aoao ai faapea na faatuina e le Faaola le galuega faafaifeautalai i le lalolagi o agaga ina ia mafai ai e fanau uma a le Tama Faalelagi ona maua se avanoa e maua ai le faaolataga. O lenei lesona e mafai ona fesoasoani ia te oe e tauloto ai le mau faasino o le atamai i aoaoga faavae ma le fasifuaitau autu o le mau mo le 1 Peteru 4:6. E mafai foi ona fesoasoani ia te oe e faamatala ai le aoaoga faavae o loo aoaoina i lena fuaitau. Ona e maua lea o le avanoa e faaaoga ai lena aoaoga faavae ma mataupu faavae o le mauaina o le malamalama faaleagaga i se tulaga faataitai masani.

O le aoaoina o tagata aoga i mataupu faavae o le mauaina o le malamalama faaleagaga. O le a sili atu ona aoga le atamai i aoaoga faavae pe afai e iloa ma malamalama tagata aoga i mataupu faavae o le mauaina o le malamalama faaleagaga. Fesoasoani i tagata aoga ia malamalama ma toefaamanatu e le aunoa nei mataupu faavae.

Sauniuniga a le tagata aoga: Valaaulia tagata aoga e mafaufau loloto ma saunia e faasoa mai o latou lagona a o latou faatinoina papatisoga ma faamauga i le malumalu pe faia isi galuega o talafaasolopito o aiga mo o latou tuaa ua maliliu.

Gaoioiga e ono Mafai Ona Aoao Ai

O lenei lesona o le atamai i aoaoga faavae ua mamanuina ia aoao pe a uma le lesona “1 Peteru 3:18–22; 4:1–6,” o le lesona e faamatala ai le uiga mo le fuaitau o le atamai i aoaoga faavae 1 Peteru 4:6. Afai e manaomia ona tuu lenei lesona o le fuaitau o le atamai i aoaoga faavae i se isi vaiaso, ia mautinoa e aoao le lesona faatatau talafeagai o lena foi vaiaso.

Tauloto ma faamatala

Valaaulia se tagata aoga e tusi i luga o le laupapa se ata faigofie o le ata o le faaolataga. Ona fai atu lea o nisi o fesili nei e iloilo ai le malamalama o le tagata aoga i le fuafuaga ma pe faapefea ona aoao atu le talalelei. Ina ia faaauai tagata aoga e le masani ona volenitia e tautatala, o fesili nei e mafai ona tuuina atu o se suega puupuu ona talanoaina lea o se vasega.

Sa aoaoina fanau uma a le Atua i le talalelei i le muai olaga. O le a le mea na tupu ia i latou o e na taliaina le talalelei e ala i le filifilia o le fuafuaga a le Atua? O le a le mea na tupu ia i latou na teenaina?
E faapefea ona aoaoina le talalelei iinei i le lalolagi?

Faaaoga fesili nei e lua e fesoasoani ai i tagata aoga e faailoa mai le mau faasino o le atamai i aoaoga faavae ma le fasifuaitau autu o le mau.

O le a le mea e tupu ia i latou o e e le maua lava le avanoa e aoao ai ia Iesu Keriso pe maua sauniga faatagaina o le perisitua i lenei olaga?
O fea e mafai ona tatou faitau i ai e uiga i lenei mea i le Feagaiga Fou?

Mafaufau e faaaoga lenei gaoioiga tauloto:

Tuu atu i tagata aoga taitasi se fasipepa, ma valaaulia le vasega e tusi le mau faasino atoa ma le fasifuaitau autu o le mau i le pito i luga o le pepa: “ 1 Peteru 4:6 : ‘O le talalelei [sa] folafola atu foi ia i latou o e ua maliliu.’” Faatonu i latou e gaugau le pito i luga o le pepa e ufiufi ai mea sa latou tusia ona toe tusi lea o le mau faasino ma le fasifuaitau, e aveese ai upu e tolu i le fa ma numera o la latou filifiliga. Fai atu i tagata aoga e faafesuiai a latou pepa ma se tasi e latalata atu ia i latou.

Fai atu i tagata aoga e faailoa mai upu ma fuainumera e le‘i taina i luga o a latou pepa fou. Ona faatonu lea o i latou e gaugau le pepa e ufiufi ai a latou tusitusiga ma toe tusi le mau faasino ma le fasifuaitau, o le taimi la lenei ua aveese ai upu po o fuainumera e ono i le valu. Fai atu ia i latou e toe pasi le pepa i le tagata muamua ona faailoa mai lea o upu o loo misi i luga o le latou uluai pepa, toe gaugau le pepa mo le taimi mulimuli, ma tusi atoa le mau faasino ma le fasifuaitau mai i o latou mafaufau.

Faataitai le faaaogaaga

I le lesona ua mavae atu, sa e aoaoina ai le upumoni lenei mai le 1 Peteru 4:6 : Ua folafola atu le talalelei i e ua maliliu ina ia latou maua avanoa lava e tasi e pei o i latou o e ua faalogo i le talalelei i le olaga nei.

Faaaoga le ata faataitai lenei e faataitai ai le faaaogaina o lenei upumoni ma mataupu faavae o le mauaina o le malamalama faaleagaga.

Ata Faataitai: Vaega 1

Vaai faalemafaufau e i ai sau uo e igoa ia Iasoni o loo feiloai ma faifeautalai. Ua talosaga Iasoni tou te o faatasi i le seminare e aoao atili ai e uiga i le talalelei. I lona aso muamua i le seminare, na fai atu ai lou faiaoga i le vasega e toefaamanatu ma se paga ia mataupu faavae o le mauaina o le malamalama faaleagaga. Ua liliu atu Iasoni ia te oe ma fesili, “O a mataupu faavae o le mauaina o le malamalama faaleagaga?”

E faapefea ona e muai faailoa atu ia Iasoni ia mataupu faavae o le mauaina o le malamalama faaleagaga? (Mafaufau e toefaamanatu palakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022) pe a e manaomia le fesoasoani i le taliina o lenei fesili.)

Ata Faataitai: Vaega 2

Mulimuli ane i lena vaiaso, na feiloai ai Iasoni ma faifeautalai i lo outou fale. Ua e fesoasoani i faifeautalai e aoao atu e uiga i uluai mataupu faavae ma sauniga o le talalelei, e aofia ai le faatuatua ia Iesu Keriso ma le papatisoga e ala i le faatofuina mo le faamagaloga o agasala. Ua faaaoga e faifeautalai le Ioane 3:5 e aoao atu ai o le papatisoga e ala i le pule tatau o le perisitua e tatau ai ina ia faaolaina ai i le malo o le lagi. Ua mafaufau Iasoni i lena mea mo sina taimi, ona foliga faanoanoa itiiti lea. Sa fesili se tasi o faifeautalai pe aisea ua faanoanoa ai o ia, ma sa tali Iasoni, “E lei papatisoina lava lo‘u tamamatua, ae o ia o se tamalii lelei tele o le sa fai mai i taimi uma sa ia manao e ola i se olaga lelei ina ia mafai ai ona alu o ia i le lagi. Pe o le a ia oo ea i ai?” Ua e faia se tatalo le leoa, ole atu i le Tama Faalelagi pe mafai faapefea ona e fesoasoani ia Iasoni. O le manatu e faaaoga mataupu faavae o le mauaina o le malamalama faaleagaga ma le aoaoga faavae o loo aoao mai i le 1 Peteru 4:6 ua oo mai i lou mafaufau.

E faalagolago i le toatele ma le taimi o le vasega, e mafai e tagata aoga ona faaaoga a latou tali e faia ai se tala-faatino e aoao ai Iasoni. I se isi foi faiga, e mafai ona atofa atu i tagata aoga se tasi o mataupu faavae o le mauaina o le malamalama faaleagaga ona talanoaina lea ma se paga po o se vaega toalaiti pe mafai faapefea ona fesoasoani lena mataupu faavae ia Iasoni. A uma ona latou talanoaina, e mafai ona latou lipoti atu i le vasega pe tuu i ni vaega taitoatolu e faasoa mai o latou manatu i tagata o le vasega o e na suesueina isi mataupu faavae e lua.

Otooto pe mafai faapefea ona e faaaogaina mataupu faavae e tolu o le mauaina o le malamalama faaleagaga ma le aoaoga faavae o loo aoao mai i le 1 Peteru 4:6 e fesoasoani ai ia Iasoni ia ona maua tali i lana fesili ma lagonaina le filemu e uiga i lona tamamatua. A uma ona otooto atu, saunia se tali mo Iasoni. Mafaufau po o a fesili o le a e fai atu e fesoasoani ai ia te ia ia iloa ma lagonaina le moni o le aoaoga faavae. Ia mautinoa e aofia ai mataupu faavae uma e tolu o le mauaina o le malamalama faaleagaga ma le aoaoga faavae o loo aoao mai i le 1 Peteru 4:6 i lau tali.

Afai e manaomia, e mafai ona e faaaogaina nisi po o fesili uma nei e taiala ai oe.

E mafai faapefea ona e fesoasoani ia Iasoni ia maua se vaaiga e faavavau? O le a se mea e te ta‘u atu ia Iasoni e uiga i le Tama Faalelagi ma Iesu Keriso e mafai ona tuuina atu ia te ia le filemu e uiga i lona tamamatua?
E faaopoopo ai i le 1 Peteru 4:6 , o a nisi o punaoa mamana filifilia e mafai ona e faasoa atu ia Iasoni e fesoasoani ai ia te ia ia lagona le faamoemoe e ala ia Iesu Keriso? E faapefea ona e faaaogaina nei fuaitau e fesoasoani ai ia Iasoni ia iloa le upumoni?
O le a se foliga o le faatino i le faatuatua i le tulaga o Iasoni? O le a se mea atonu e te valaaulia o ia na te faia?
O a ni aafiaga na e maua i le faia o galuega faalemalumalu po o talafaasolopito o aiga mo ou tuaa e mafai ona e faasoa atu ia Iasoni?
O le a se mea o le a e molimau atu ai e fesoasoani ai i lau uo?

Toefaamanatu le atamai i aoaoga faavae

Fesoasoani i tagata aoga e toefaamanatu le tusi faasino ma le fasifuaitau autu o le mau mo le 1 Peteru 4:6 i se lesona o i luma. O se tasi lenei o auala e faatino ai lenei mea:

Tusi mataitusi 1, P, 4:6, N, F, A, A, L, T, I, E, U, O i se koluma i luga o le laupapa. Valaaulia tagata aoga e faailoa mai upu o le tusi faasino o le atamai i aoaoga faavae ma le fasifuaitau autu o le mau mai nei mataitusi muamua. A uma loa ona faailoa mai upu uma, toe fai faatasi o se vasega le tusi faasino ma le fasifuaitau autu.