Marrja e Njohurisë Shpirtërore, Pjesa 1

Veproni me Besim

A young man holding scriptures and pondering.

Njëri nga qëllimet e zotërimit doktrinor është të të ndihmojë të mësosh dhe zbatosh parimet e marrjes së njohurisë shpirtërore për t’u bërë më shumë si Jezu Krishti. Ky mësim synon të të ndihmojë ta kuptosh dhe vësh në zbatim parimin e veçantë të veprimit me besim te Jezu Krishti kur të dalin sfida dhe pyetje të vështira.

Përcaktoni ritmin. Shmangeni shpenzimin e një kohe të tepërt me pjesën e parë të mësimit dhe më pas ngutjen me pjesën e mbetur. Teksa përgatiteni, llogaritni sa kohë do t’ju duhet për t’i ndihmuar nxënësit të angazhohen me secilën pjesë të mësimit.

Përgatitja e nxënësve: Kërkojuni nxënësve të reflektojnë mbi përvojat e tyre kur përballen me një sfidë të vështirë ose me pyetje që nuk marrin zgjidhje lehtë (ose nga jeta e tyre ose nga jetët e të tjerëve). Këto mund të përfshijnë gjëra si një pyetje shpirtërore pa përgjigje ose një sprovë të vështirë. Ftojini nxënësit të përsiatin për mënyrën se si u janë përgjigjur apo si do t’i përgjigjeshin këtyre situatave.

Shënim: Do të ishte shumë mirë që ta jepni këtë mësim nga fillimi i vitit shkollor. Nëse ky mësim jepet në kohë tjetër gjatë vitit, merrni parasysh të jepni mësim në vend të tij një mësim për zotërimin doktrinor që nxënësit mund të mos e kenë bërë gjatë kohës kur nuk kishte shkollë.

Veprimtari të Mundshme të të Mësuarit

Kur dalin sfida dhe pyetje të vështira

Ftojini nxënësit që kanë marrë pjesë në veprimtarinë e përgatitjes së nxënësve të marrin parasysh tregimin, si të jetë e përshtatshme, e përvojave që mund të kenë pasur me përballjen e sfidave dhe pyetjeve të vështira. Merrni parasysh t’i përdorni përvojat e tyre në vend të skenarëve më poshtë.

Gjatë vdekshmërisë, ne të gjithë hasim sfida dhe pyetje të vështira që mund të mos jenë të lehta për t’u zgjidhur. Lexojini skenarët e mëposhtëm ndërsa mendoni për përvoja të ngjashme që i keni pasur ju apo dikush që njihni.

Një i ri ka shumë pyetje rreth rregulloreve të Kishës dhe fillon të pyesë veten a është Kisha njëmend e vërtetë.

Një e re shikon një publikim në rrjetet sociale që e vë në dyshim doktrinën e Kishës. Tani ajo fillon të pyetë veten për atë doktrinë.

Një e re përsiat nëse lutjet marrin vërtet përgjigje pasi i vëllai vuan dhe vdes nga një sëmundje e pashërueshme, pavarësisht nga lutjet dhe bekimet në emër të tij.

Cilat janë disa nga mënyrat e ndryshme se si njerëzit mund të zgjedhin të përgjigjen kur përballen me sfida të vështira ose pyetje si këto?

Nxënësit mund të përfitojnë nga kryerja e vetëvlerësimeve të mëposhtme si ushtrime me shkrim në ditarët e tyre të studimit. Merrni parasysh të shfaqni paragrafin e mëposhtëm për ta parë nxënësit.

Gjeni një çast për të reflektuar mbi përvojat tuaja me përballjen me sfida dhe pyetje të vështira. Mund të jetë e dobishme të mendoni për pyetjet e mëposhtme: A keni pasur sukses në gjetjen e përgjigjeve? Çfarë ju ka ndihmuar të gjeni paqen? Çfarë nuk ka funksionuar?

Merreni parasysh shënimin madje edhe shfaqjen e përgjigjeve të nxënësve ndaj pyetjes tjetër. Nëse nxënësit i kanë ndarë tanimë këto nga përgatitja e tyre si nxënës, merrni parasysh kapërcimin e kësaj pyetjeje. Këtyre përgjigjeve mund t’u referoheni sërish në fund të mësimit.

Cilat janë disa prej pyetjeve ose sfidave që keni (ose që kanë njerëz të tjerë që njihni) që nuk zgjidhen lehtë?
Përse mendoni se Ati Qiellor na lejon të kemi pyetje të pazgjidhura në vend që të na i japë gjithmonë përgjigjet?

Kur dalin pyetje, është e rëndësishme të kujtoni se Zoti na nxit të bëjmë pyetje dhe të kërkojmë përgjigje (shih Mateu 7:7–8 ; Jakobi [Bibël] 1:5–6 ; Doktrina e Besëlidhje 42:61). Bërja e pyetjeve dhe kërkimi i përgjigjeve është një pjesë thelbësore e përpjekjes sonë për të mësuar të vërtetën, e ndjekur nga zbatimi dhe të jetuarit me ato që kemi mësuar gjatë përpjekjes sonë për t’u bërë më shumë si Shpëtimtari dhe Ati ynë Qiellor.

Tri parime që mund të na udhëheqin teksa kërkojmë t’i zgjidhim pyetjet ose çështjet dhe ta rritim kuptueshmërinë tonë për të vërtetën e përjetshme përfshijnë:

Veproni me besim.
Shqyrtojini konceptet e pyetjet me një këndvështrim të përjetshëm.
Kërkoni kuptueshmëri të mëtejshme nëpërmjet burimeve të caktuara në mënyrë hyjnore.

Të tria këto parime mund të jenë të rëndësishme për t’u përdorur kur përballeni me pyetje dhe shqetësime që nuk zgjidhen lehtë ose kur viheni para sprovave.

Veproni me besim

Ky mësim synon të të ndihmojë të kuptosh parimin e mëposhtëm: teksa veprojmë me besim, Zoti na jep paqe dhe forcë kur kërkojmë përgjigje për pyetjet dhe shqetësimet tona.

Përgjigjju për pyetjen vijuese në ditarin tënd të studimit.

Si mendon, çfarë do të thotë të veprosh me besim?

Thelloje kuptueshmërinë tënde mbi faktin se çfarë do të thotë të veprosh me besim duke plotësuar veprimtarinë e mëposhtme të të mësuarit. Mund të jetë e dobishme të studiosh me dikë tjetër që të mund ta ushtrosh shpjegimin sipas kuptueshmërisë sate dhe të mësosh nga të tjerët.

Çfarë do të Thotë të Veprosh me Besim?

Lexoni pjesën te Dokumenti Bazë i Zotërimit Doktrinor (2022) “Marrja e Njohurisë Shpirtërore”, paragrafët 1–2 dhe 5–7 dhe thënien vijuese nga Plaku Nil L. Andersen, i Kuorumit të Dymbëdhjetë Apostujve. Teksa studion, kërko çfarë do të thotë të veprosh me besim dhe çfarë mund të të ndihmojë për ta vënë në zbatim këtë parim kur ke pyetje.

“Besimi nuk bie mbi ne nga rastësia, as nuk qëndron me ne nga e drejta e parabirnisë. … Besimi te Jezu Krishti është një dhuratë nga qielli që vjen kur ne zgjedhim të besojmë dhe kur e kërkojmë e mbahemi tek ai. … E ardhmja e besimit tuaj nuk vjen nga rastësia, por nga zgjedhja. …

Besimi nuk kërkon kurrë një përgjigje për çdo pyetje, por kërkon sigurinë dhe guximin që të shkojmë përpara, ndonjëherë duke e pranuar: ʻUnë nuk di çdo gjë, por di mjaftueshëm që të vazhdoj në udhën e dishepullimitʼ.

Zhytja e vetes në dyshime të vazhdueshme, e ushqyer me përgjigje nga ata që janë pa besim dhe jo besnikë, e dobëson besimin e një njeriu te Jezu Krishti dhe Rivendosja. ‘Dhe njeriu natyror nuk i rrok gjërat që janë të Frymës së Shenjtë; sepse për të janë marrëzi.’ [1 Korintasve 2:14]. …

Megjithëse zjarri juaj fillestar i besimit mund të jetë i vogël, zgjedhjet e drejta sjellin mirëbesim më të madh te Perëndia dhe besimi juaj rritet.”

(Nil L. Andersen, “Besimi Nuk Vjen nga Rastësia, por nga Zgjedhja”, Ensign ose Liahona, nëntor 2015, f. 65–67.)

Përse mendon se është e rëndësishme të veprojmë me besim kur kemi pyetje dhe shqetësime?
Çfarë mësove nga këto lexime mbi faktin se çfarë do të thotë të veprosh me besim?

Përpara veprimtarisë tjetër, merreni parasysh t’u jepni nxënësve mundësinë të diskutojnë dhe t’i mësojnë njëri-tjetrit se çfarë kanë studiuar, çfarë u ka bërë më shumë përshtypje dhe çfarë pyetjesh kanë. Ata mund të marrin parasysh sa më poshtë:

Cilat karakteristika dhe tipare të Atit Qiellor dhe Jezu Krishtit e rritin mirëbesimin dhe besimin tënd tek Ta? Si mund të të ndihmojë njohuria ose besimi në këto gjëra për Atin Qiellor dhe Jezu Krishtin që të veprosh me besim?
Cilat janë disa veprime që mund të ndërmarrësh teksa përpiqesh fort të veprosh me besim kur përballesh me pyetje apo sfida të vështira?
A ka burime të tjera për të cilat je në dijeni që mund ta ndihmojnë dikë tjetër të mësojë se si të veprojë me besim?

Silli ndër mend pyetjet dhe sfidat e vështira me të cilat po përballesh ose shqyrto skenarët në fillim të mësimit. Me një prej këtyre në mendje, ushtro zbatimin e asaj që ke mësuar për të vepruarit me besim duke u përgjigjur me sa më shumë hollësi që të mundesh ndaj pyetjeve të mëposhtme.

Cila është sfida apo pyetja që ke zgjedhur të ushtrosh për të vepruar me besim?
Cilat janë dy apo tri mënyrat me të cilat mund të veprojë dikush me besim në këtë situatë?
Çfarë mund ta bënte të vështirë në këtë situatë të vepruarit me besim te Jezu Krishti? Si mund t’i kapërcesh këto sfida?
Çfarë do të doje të mbaje mend konkretisht për Atin Qiellor dhe Jezu Krishtin teksa ndodhesh në këtë situatë? Si mund të të ndihmojë mbajtja mend e këtyre gjërave?

Merreni parasysh t’i lejoni nxënësit të japin përgjigjet e tyre në klasë, duke përfshirë dëshmitë e tyre rreth asaj që u ka mësuar Fryma e Shenjtë gjatë mësimit për të vepruarit me besim. Informojini nxënësit që gjatë gjithë kohës në seminar, ata do të vazhdojnë të kenë mundësi për ta ushtruar vënien në zbatim të këtij parimi. Ftojini ata të fillojnë apo të vazhdojnë ta ushtrojnë këtë parim në jetën e tyre.

Komente dhe Informacion për Rrethanat

A është gabim të kemi pyetje rreth ungjillit?

Presidenti Diter F. Uhtdorf, i Presidencës së Parë, dha mësim rreth vlerës së pyetjeve të sinqerta:

“Është e natyrshme të kemi pyetje – fara e kërkimit të çiltër shpesh është çelur dhe është rritur në një dushk të madh të të kuptuarit. Ka pak anëtarë të Kishës të cilët, në një kohë apo në një tjetër, nuk janë munduar me pyetje serioze ose të ndjeshme. Një nga qëllimet e Kishës është të ushqejë dhe kultivojë farën e besimit – ndonjëherë edhe në tokën plot rërë të dyshimit dhe pasigurisë. Besimi është të shpresosh për gjëra që nuk shihen, por të cilat janë të vërteta.

Prandaj, vëllezërit dhe motrat e mia të dashura – miqtë e mi të dashur – ju lutem, së pari kini dyshim te dyshimet tuaja përpara se të keni dyshim te besimi juaj. Ne kurrë nuk duhet ta lejojmë dyshimin që të na mbajë të burgosur dhe të na largojë nga dashuria hyjnore, paqja dhe dhuratat që vijnë nëpërmjet besimit te Zoti Jezu Krisht.”

(Diter F. Uhtdorf, “Ejani, Bashkohuni me Ne”, Ensign ose Liahona, nëntor 2013, f. 23.)

Si mund ta rrit aftësinë time për të vepruar me besim?

Presidenti Rasëll M. Nelson dha mësim për një proces që mund të ndërmarrim për ta rritur besimin tonë:

“Besimi ynë rritet çdo herë që ushtrojmë besimin tonë në Të. Kjo është domethënia e të mësuarit me anë të besimit.

Për shembull, kurdo që kemi besimin të jemi të bindur ndaj ligjeve të Perëndisë – edhe kur opinionet e përhapura na nënçmojnë – ose sa herë i rezistojmë argëtimit ose ideologjive që përlëvdojnë shkeljen e besëlidhjeve, ne po ushtrojmë besimin tonë, i cili nga ana tjetër e rrit besimin tonë.”

(Rasëll M. Nelson, “Përqafojeni të Ardhmen me Besim”, Ensign ose Liahona, nëntor 2020, f. 75.)

Skenarë nga jeta reale të individëve që veprojnë me besim

Merreni parasysh ta shihni këtë material filmik, duke kërkuar se çfarë mund të mësoni nga këta individë që mund t’ju ndihmojë të veproni me besim kur keni pyetje ose sfida të vështira.

Përse nuk duhet të kem frikë nga pyetjet e pazgjidhura?

Veprimtari Plotësuese e të Mësuarit

Kërkimi i përgjigjeve ndaj pyetjeve

Për t’i ndihmuar nxënësit të kuptojnë më mirë se përse Ati Qiellor na lejon të rritemi duke na lejuar të kërkojmë përgjigje ndaj pyetjeve tona, merreni parasysh shfaqjen e shembujve të faqeve të internetit që përmbajnë një faqe “Pyetje që Bëhen Rëndom” (PBR). Ndihmojini nxënësit të kuptojnë se qëllimi i një faqeje PBR është që të ofrojë përgjigje të shpejta, që gjenden lehtë ndaj problemeve të mundshme.

Përse mendoni se Ati Qiellor nuk na i jep menjëherë të gjitha përgjigjet ndaj pyetjeve tona ashtu siç na i jep një faqe PBR?