Lluka 1:1–38

“Me Perëndinë Asgjë S’është e Pamundshme”

Engjëlli Gabriel erdhi te Maria për të njoftuar lindjen e Jezu Krishtit. Ai dëshmoi se “me Perëndinë asgjë s’është e pamundshme” (Lluka 1:37). Përgjigjja besnike e Marias mund t’ju ndihmojë të mësoni se si t’i përgjigjeni vullnetit të Zotit me besim më të madh tek Ai.

Ftojini nxënësit që të veprojnë. Nxënësit mësojnë teksa marrin pjesë aktivisht në procesin e të mësuarit dhe e jetojnë ungjillin. Teksa jepni mësim, gjeni mënyra që nxënësit të marrin pjesë në përvojën e të mësuarit. Teksa veprojnë me besim, nxënësit do të bëhen më të kthyer në besim te Shpëtimtari dhe ungjilli i Tij.

Përgatitja e nxënësve: Ftojini nxënësit të përsiatin pyetjen e mëposhtme:

• Çfarë di për Atin Qiellor dhe Jezu Krishtin që të ndihmon ta vendosësh besimin tënd tek Ata?

Veprimtari të Mundshme të të Mësuarit

Ftojini nxënësit t’i përgjigjen pyetjes vijuese. Merrni parasysh t’i ftoni nxënësit të shkruajnë përgjigjet e tyre në tabelë.

• Kush do të thoje se janë gratë më me ndikim në jetën tënde?

Tregoni një fotografi të Marias, si ajo që gjendet në fillim të mësimit.

Në këtë mësim, ju do të mësoni më shumë për Marien, nënën e Jezu Krishtit.

• Si mendon, pse Maria duhet të konsiderohet një nga gratë më me ndikim në historinë e botës?

Jeta dhe misioni i Maries u profetizuan shumë vjet para lindjes së saj. Studioji profecitë e mëposhtme për Marien, duke kërkuar ato që të mësojnë për të.

• 1 Nefi 11:14–15, 18

• Mosia 3:8

• Alma 7:10

• Çfarë mësove për Marien nga këto shkrime të shenjta?

Hyrje tek Ungjilli sipas Llukës

Rrëfimi i Maries që mëson se ajo do të ishte nëna e Jezu Krishtit është shënuar në Ungjillin sipas Llukës.

Njihini nxënësit me Ungjillin sipas Llukës. Një mënyrë për ta bërë këtë është duke përmbledhur paragrafin e mëposhtëm.

Mund të jetë gjithashtu e dobishme të jepni disa nga informacionet në pjesën “Komente dhe Informacion për Rrethanat” nën titullin “Pse ta studiojmë Ungjillin sipas Llukës?”

Lluka ishte një mjek (shih Kolosianëve 4:14) dhe “një lajmëtar i Jezu Krishtit” ( Joseph Smith Translation, Luke 1:1 [te Lluka 1:1, poshtëshënimi a te Bibla në anglisht]). Shumë ngjarje nga jeta e Shpëtimtarit gjenden vetëm tek Ungjilli sipas Llukës, duke përfshirë njoftimin e engjëllit ndaj Maries se ajo do të ishte nëna e Birit të Perëndisë. Kjo ngjarje njihet si Lajmërimi.

Teksa e studion këtë rrëfim dhe shembullin besnik të Maries, kushtoji vëmendje asaj që mëson dhe nxitjeve shpirtërore që merr.

Engjëlli Gabriel i shfaqet Marias

Lexoje vargun te Lluka 1:26–37 , duke kërkuar hollësi në lidhje me njoftimin e engjëllit për Marien.

• Cilat hollësi nga njoftimi të bënë më shumë përshtypje?

• Çfarë pyetjesh ke për ato që lexon?

Një e vërtetë që mund të kesh vënë re nga ky rrëfim është se me Perëndinë asgjë s’është e pamundshme.Presidenti Rasëll M. Nelson tregoi një nga mënyrat se si kjo e vërtetë gjen zbatim për ty:

“Do t’ju kërkohet të pranoni detyra sfiduese dhe të bëheni një mjet në duart e Zotit. Dhe Ai do t’jua mundësojë juve që ta arrini të pamundurën.”

(Rasëll M. Nelson, “Të Bërit Mijëvjeçaristë të Vërtetë” [takim shpirtëror mbarëbotëror për të rinjtë në moshë madhore, 10 janar 2016], broadcasts.ChurchofJesusChrist.org)

Merreni parasysh t’i shkruani në tabelë përgjigjet e nxënësve për pyetjen e parë nga pyetjet e mëposhtme. Nëse është e nevojshme, ndihmojini ata të mendojnë për mënyra të ndryshme se si mund t’i përgjigjen kësaj pyetjeje, duke përfshirë mposhtjen e veseve të këqija ose mëkateve, të qenit dashamirës, përhapjen e ungjillit tek të tjerët, përmbushjen e përgjegjësive në Kishë, shërbimin në një mision dhe mënyra të tjera.

• Çfarë mund të të kërkojë Zoti të bësh që mund të duket e pamundur?

• Pse këto gjëra ndonjëherë duken të pamundura për t’u përmbushur?

Ndonjëherë kur përballemi me detyra që duken të pamundura për t’u përmbushur, mund të jetë e dobishme të shohim shembujt e të tjerëve që u janë përgjigjur besnikërisht rrethanave të tyre të vështira.

Lexoje vargun te Lluka 1:38 , dhe kërko mënyrën si u përgjigj Maria pasi mësoi se do të ishte nëna e Jezusit.

• Çfarë të ndihmon përgjigjja e Marias që të kuptosh për të?

• Cilat të vërteta mendon se do ta ndihmonin një person që të besonte te Zoti po ashtu si Maria, edhe kur diçka që kërkon Zoti mund të duket e pamundur?

Nëse nxënësit do të përfitonin nga studimi i shembujve shtesë të njerëzve që u përgjigjën me besim ndaj rrethanave të tyre në dukje të pamundura, merreni parasysh t’u jepni nxënësve kohë që të gjejnë një shembull të tillë në shkrimet e shenjta. Mund të jetë e dobishme t’i drejtoni ata te rrëfime të tilla si Nefi duke marrë fletët prej tunxhi (shih 1 Nefi 3–4), Moisiu që ndan Detin e Kuq (shih Eksodi 14:10–31) ose një rrëfim tjetër në shkrimet e shenjta.

Shfaqni ose jepuni nxënësve një kopje të pjesës tjetër të thënies së Presidentit Nelson.

Mendoni për diçka që Zoti të ka kërkuar të bësh që mund të duket e pamundur. Teksa lexon më shumë nga thënia e Presidentit Nelson, kërko gjëra të veçanta që mund të bësh për të të ndihmuar të arrish të pamundurën:

Si do ta arrish të pamundurën? “Duke bërë çfarëdo gjëje të nevojshme për ta forcuar besimin tuaj te Jezu Krishti me anë të rritjes së kuptueshmërisë suaj për doktrinën e dhënë mësim në Kishën e Tij të rivendosur dhe me anë të kërkimit me ngulm të së vërtetës. … Kur ju kërkohet të bëni gjëra të pamundura, do të jeni në gjendje të bëni një hap përpara me besim e ngulm të paepur dhe do ta bëni me gëzim gjithçka që është në fuqinë tuaj për t’i përmbushur qëllimet e Zotit.

Do të keni ditë kur do të jeni krejtësisht të shkurajuar. Pra, lutuni për guximin që të mos dorëzoheni!”

(Rasëll M. Nelson, “Të Bërit Mijëvjeçaristë të Vërtetë” [takim shpirtëror mbarëbotëror për të rinjtë në moshë madhore, 10 janar 2016], broadcasts.ChurchofJesusChrist.org)

Ftojini nxënësit t’i shënojnë përgjigjet e tyre për pyetjet e mëposhtme në ditarët e tyre të studimit. Mbajeni citimin e Presidentit Nelson të shfaqur ndërsa ata shkruajnë që të mund t’i referohen. Pasi të kenë pasur kohë të mjaftueshme për të shkruar, ftojini disa vullnetarë t’ia tregojnë përgjigjet e tyre klasës.

• Për cilin veprim nga thënia e Presidentit Nelson do të doje të ishe më i/e mirë?

• Si mendon se përmirësimi në këtë fushë mund të të ndihmojë të arrish atë që duket e pamundur në jetën tënde?

Komente dhe Informacion për Rrethanat

Pse ta studiojmë Ungjillin sipas Llukës?

Disa nga tregimet më të njohura të krishterimit janë të pashoqe në Ungjillin sipas Llukës: rrethanat në lidhje me lindjen e Gjon Pagëzorit (shih Lluka 1:5–25, 57–80); tregimi tradicional i Krishtlindjes (shih Lluka 2:1–20); historia e Jezusit si një djalë 12-vjeçar në tempull (shih Lluka 2:41–52); shëmbëlltyra të tilla si samaritani i mirë (shih Lluka 10:30–37); djali plëngprishës (shih Lluka 15:11–32) dhe pasaniku dhe Llazari (shih Lluka 16:19–31); historia e dhjetë lebrosëve (shih Lluka 17:11–19); dhe rrëfimi i Zotit të ringjallur duke ecur pranë dishepujve të Tij në rrugën për në Emaus (shih Lluka 24:13–32).

Karakteristika të tjera të pashoqe janë përfshirja në librin e Llukës të mësimeve të Gjon Pagëzorit që nuk gjenden në Ungjijtë e tjerë (shih Lluka 3:10–14); theksi i tij te shpirti plot lutje i Jezu Krishtit (shih Lluka 3:21 ; 5:16 ; 9:18, 28–29 ; 11:1); dhe përfshirja prej tij e thirrjes, trajnimit dhe punës misionare të Të Shtatëdhjetëve (shih Lluka 10:1–22). Për më tepër, Lluka është i vetmi shkrues i Ungjillit që shënon se Shpëtimtari derdhi gjakun e Tij në Gjetseman dhe se një engjëll i shërbeu Atij (shih Lluka 22:43–44).

Lluka 1:26.

Kush ishte engjëlli Gabriel?

Profeti Jozef Smith (1805–1844) dha mësim për identitetin e engjëllit Gabriel:

“Noeu … [është] Gabrieli; ai qëndron pas Adamit në autoritetin në Priftëri; ai u thirr nga Perëndia në këtë detyrë dhe ishte ati i të gjithëve që jetonin në kohën e tij, dhe atij iu dha autoriteti.”

(Mësimet e Presidentëve të Kishës: Jozef Smith [2009], f. 108.)

Lluka 1:27.

Çfarë do të thotë se Maria ishte “e fejuar me … Jozef[in]”?

Në Izraelin e lashtë, kur bihej dakord për martesë, dasma përbëhej nga dy faza: fejesa (i quajtur gjithashtu premtimi i marrjes për grua; shih Mateu 1:18) dhe ceremonia e dasmës. Ndonëse çiftet e fejuara konsideroheshin ligjërisht si burrë dhe grua (shih Ligji i Përtërirë 22:23–24), midis kohës së fejesës dhe ceremonisë së dasmës, përforcohej një kod i rreptë dëlirësie (shih Mateu 1:18–25 ; shih gjithashtu New Testament Student Manual[2014], f. 13).

Lluka 1:30–35.

Çfarë dimë për shtatzëninë që i ndodhi si mrekulli Maries?

Kur Maria pyeti se si mund të bëhej nëna e Jezusit, “përderisa unë nuk njoh burrë“ ( Lluka 1:34), Gabrieli thjesht e informoi atë se do të mbulohej nga hija e Frymës së Shenjtë dhe se fëmija e saj do të ishte Biri i Perëndisë (shih Lluka 1:35). Shkrimet e tjera të shenjta që i referohen ngjizjes së Jezu Krishtit gjithashtu theksojnë se Ai është Biri i Perëndisë por nuk zbulojnë se si ndodhi kjo mrekulli (shih Mateu 1:18–20 ; 1 Nefi 11:14–15, 18–21 ; Alma 7:10).

Veprimtari Plotësuese të të Mësuarit

Lluka 1:5–25

. Bekimet e Perëndisë vijnë në kohën e Tij dhe në mënyrën e Tij

Kërkojuni nxënësve të mendojnë për një bekim ose një përgjigje nga Perëndia që ata po presin ose shpresojnë.

Ftojini nxënësit ta studiojnë rrëfimin e Zakarias dhe Elizabetës te Lluka 1:5–25 , duke kërkuar mësimet që mund të mësojnë për kohën e Zotit.

Pasi nxënësit t’i kenë studiuar këto vargje, ftojini të tregojnë ato që kanë mësuar. Merreni parasysh të përdorni pyetje të tilla si sa më poshtë për ta përmirësuar diskutimin:

• Çfarë mendoni se mësuan Zakaria dhe Elizabeta për Zotin nëpërmjet përvojës së tyre të përshkruar në këto vargje?

• Çfarë mësoni nga ky rrëfim për atë që mund të bëni ndërsa prisni një bekim ose një përgjigje nga Perëndia?

• Çfarë shembujsh të tjerë të mirëbesimit në vullnetin dhe kohën e Zotit mund të mendoni për jetën tuaj ose nga rrëfimet në shkrimet e shenjta?

• A ka pasur raste në jetën tuaj kur Zoti iu përgjigj një lutjeje por jo në mënyrën apo kohën që prisnit?