Lluka 1:39–79

Gëzohuni dhe Lavdërojeni Perëndinë

Mary visiting her cousin Elisabeth, who is also expecting a child.

Ndërsa ishte shtatzënë me Jezusin, Maria vizitoi kushërirën e saj, Elizabetën dhe u gëzua me të për mirësinë e Perëndisë. Ky mësim do të të japë mundësi të njohësh mirësinë e Perëndisë dhe të japësh lavdërimet e tua për të.

Përgatitja e nxënësve: Ftojini nxënësit të vijnë në klasë të përgatitur për të thënë një rresht nga një himn që nxjerr në pah mirësinë e Perëndisë.

Veprimtari të Mundshme të të Mësuarit

Si mendon, pse këndojmë himne për Atin Qiellor dhe Jezu Krishtin si pjesë e adhurimit tonë ndaj Tyre?
Cili është një himn apo një rresht nga një himn që nxjerr në pah mirësinë e Tyre?

Nëse nxënësit kanë nevojë për ndihmë, merreni parasysh të renditni disa himne që mund të lexojnë dhe nxitini të kërkojnë një frazë që nxjerr në pah mirësinë e Perëndisë. Ftojini nxënësit të tregojnë atë që gjetën.

Gjej një çast për të menduar se çfarë ndien për Atin Qiellor dhe Jezu Krishtin. Reflekto mbi arsyet që duhet t’i lavdërosh Ata dhe se sa shpesh i shpreh ndjenjat e tua rreth Tyre në një mënyrë të caktuar.

Në këtë mësim, do të kesh mundësinë të mendosh më shumë rreth arsyes dhe mënyrës se si mund ta lavdërosh Perëndinë dhe të gëzohesh për jetën dhe misionin e Jezu Krishtit.

Maria dhe Elizabeta gëzohen së bashku për mirësinë e Perëndisë

Ndërsa Maria ishte shtatzënë me Jezusin, ajo shkoi për të vizituar Elizabetën, kushërirën e saj të moshuar, shtatzënia e së cilës ishte gjithashtu një mrekulli. Pas ardhjes së Marisë, foshnja e Elizabetës, që do të ishte Gjon Pagëzori “nga gëzimi kërceu në barkun e [Elizabetës]” ( Lluka 1:44). Kjo nisi një bashkëbisedim midis Marisë dhe Elizabetës në të cilën Maria u gëzua dhe lavdëroi Perëndinë.

Merreni parasysh t’i ftoni nxënësit ta lexojnë grupin tjetër të vargjeve në mënyrë të pavarur, duke kërkuar gjëra me të cilat mund të lidhen.

Lexo te Lluka 1:46–55 . Ndërsa i studion fjalët e Marisë, ndalu dhe reflekto mbi kuptimin e fjalëve ose frazave specifike. Bërja e ndalesave dhe reflektimi mund të ftojnë frymëzim nga Fryma e Shenjtë për të të ndihmuar t’i kuptosh më thellësisht shkrimet e shenjta. Për shembull, mund të bësh një ndalesë te fjalët “ultësinë” ose “shërbëtores” në vargun 48 . Këto fjalë mund të japin ide për përulësinë dhe nderimin e Marisë ndaj Perëndisë. Fjalët në këtë varg mund të të ndihmojnë të shohësh se Perëndia i njeh dhe i do fëmijët e Tij pavarësisht nga rrethanat e tyre. Nëse është e dobishme, merr parasysh të kërkosh kuptimin e fjalëve që nuk i kupton duke përdorur një fjalor ose Udhëzuesin për Shkrimet e Shenjta, që është në dispozicion në ChurchofJesusChrist.org.

Për cilat fjalë bëre një ndalesë që të mendoheshe? Çfarë mësove?

Për cilat fjalë ose fraza ke ende pyetje?

Ndihmojini nxënësit të ndihen rehat për të shprehur atë që gjetën ndërsa i ftoni gjithashtu të kërkojnë ndihmë për të kuptuar fjalë ose fraza të vështira. Për shembull, nëse nxënësit kanë pyetje në lidhje me fjalën “druajnë [frikë]” te Lluka 1:50 , merrni parasysh ta kërkoni atë tek Udhëzuesi për Shkrimet e Shenjta.Kjo mund t’i ndihmojë nxënësit të kuptojnë se “të kesh frikë Perëndinë është të ndiesh nderim e admirim për të dhe t’u bindesh urdhërimeve të tij” (Udhëzuesi për Shkrimet e Shenjta, “ Frikë ”, scriptures.ChurchofJesusChrist.org).

Çfarë të vërtetash rreth Perëndisë mëson nga dëshmia e Marisë?

Nxënësit mund të përcaktojnë shumë të vërteta në vargjet që studiuan, duke përfshirë disa nga sa vijon:

Ne mund të ngazëllehemi nga njohuria se kemi një Shpëtimtar ( Lluka 1:47)

Zoti është i pushtetshmi dhe mund të bëjë gjëra të mëdha ( Lluka 1:49)

Perëndia është i mëshirshëm ndaj atyre që e nderojnë dhe i binden Atij ( Lluka 1:50)

Perëndia përul krenarët dhe ngre të përulurit ( Lluka 1:52)

Kur kemi uri shpirtërore, Zoti mund të na mbushë ( Lluka 1:53)

Perëndia i përmbush premtimet e Tij ( Lluka 1:54)

Merrni parasysh t’i ftoni nxënësit të shkruajnë në tabelë të vërtetat që mësuan nga lavdërimet e Marisë.

Ne mund të gëzohemi për mirësinë e Perëndisë

Një e vërtetë që mund të mësojmë nga përvoja e Marisë është se ndërsa e marrim parasysh ndikimin e Perëndisë në jetën tonë, ne mund të gëzohemi.

Si mendon, pse njohja e bekimeve të Perëndisë në jetën tënde mund të të ndihmojë të ndiesh gëzim?

Plaku Dejll G. Renland, i Kuorumit të Dymbëdhjetë Apostujve, tregoi se si e ka bekuar kujtimi i mirësisë së Perëndisë.

“Teksa kam menduar për dhuratat nga Ati ynë Qiellor dhe nga Jezu Krishti, unë kam arritur të njoh dashurinë e Tyre të pafundme dhe dhembshurinë e Tyre të cilën nuk arrijmë dot ta kuptojmë, për të gjithë fëmijët e Atit Qiellor [shih 2 Nefi 26:33 ]. Kjo njohuri më ka ndryshuar mua dhe do t’ju ndryshojë edhe ju.”

(Dejll G. Renland, “Kini Parasysh Mirësinë Dhe Madhështinë e Perëndisë”, Ensign ose Liahona, maj 2020, f. 44.)

Ndihmojini nxënësit të reflektojnë mbi bekimet dhe arsyet e tyre për t’i shprehur dashuri Perëndisë. Jepuni nxënësve kohë të mendojnë për mënyra domethënëse për të lavdëruar Atin Qiellor dhe Jezu Krishtin dhe për t’i mbajtur ato shënim në ditarët e tyre të studimit.

Plotësoji hapat e mëposhtëm për të të ndihmuar të njohësh bekimet e Atit Qiellor dhe ta lavdërosh Atë për mirësinë e Tij.

Hapi 1:

Paraqitini pyetjet e mëposhtme ose lexojini ato me zë të lartë, duke u dhënë nxënësve kohë për reflektim.

Reflekto mbi përgjigjet e tua për pyetjet e mëposhtme.

Cilat janë disa bekime nga Ati Qiellor për të cilat je më shumë mirënjohës/e?
Çfarë të ndihmojnë këto bekime të kuptosh për Atin Qiellor dhe Jezu Krishtin?
Kur ke ndier gëzim për shkak të njohjes së bekimeve të Perëndisë për ty ose dikë që e njeh?
Cila histori apo cili varg nga shkrimet e shenjta të ndihmon të dëshirosh ta lavdërosh Perëndinë?

Hapi 2: Zgjidh se si do ta lavdërosh Perëndinë. Këtu janë disa ide që nga të cilat mund të zgjedhësh:

Të shkruash një poezi ose këngë.
Të vizatosh një figurë.
Të bësh një lutje mirënjohjeje.
T’i japësh dëshminë tënde dikujt.
Të shkruash në një ditar personal.
T’i shprehësh ndjenjat e tua për Perëndinë në rrjetet sociale.

Ti gjithashtu mund të kesh një ide tënden. Pasi ta kesh bërë zgjedhjen, fillo të veprosh. Nëse nuk është e mundur të fillosh tani, shkruaj një plan të hollësishëm të asaj që do të bësh. Për shembull, nëse do të bësh një lutje mirënjohjeje, mund të shkruash se kur dhe ku do të lutesh dhe për çfarë mund të shprehësh mirënjohje. Mund t’ia shprehësh idetë e tua një prindi ose udhëheqësi/eje të Kishës që mund të të kujtojë ta zbatosh planin.

Jepuni nxënësve kohë për të filluar zbatimin e planeve të tyre. Nëse është e mundur, nxënësit mund të japin përvojat e tyre në fund të kësaj ore mësimore ose në një mësim të ardhshëm.

Komente dhe Informacion për Rrethanat

Lluka 1:46–55 . Pse Maria po e lavdëron Zotin?

Vargjet 46–55 te Lluka 1 njihen tradicionalisht si Kënga e Marisë. Këto lavdërime e lidhin lindjen e Jezu Krishtit me të kaluarën e shenjtë të Izraelit. Fjalët kremtojnë mëshirën e Zotit duke arritur edhe një herë të bekojë dhe nderojë popullin e Tij – veçanërisht “të përulurit” ( Lluka 1:52).

Lluka 1:53 . Si i mbush Zoti “me të mira të uriturit”?

Plaku Xhefri R. Holland, i Kuorumit të Dymbëdhjetë Apostujve, na mësoi rreth ftesës së Shpëtimtarit për të ardhur tek Ai dhe për t’u mbushur:

“Unë lutem këtë mëngjes që të gjithë ata që janë të uritur dhe të etur, dhe nganjëherë duke u endur, ta dëgjojnë këtë ftesë nga Ai që është Buka e Jetës, Burimi i Ujit të Gjallë, Bariu i Mirë i të gjithëve ne, Biri i Perëndisë: ‘Ejani tek unë, o ju të gjithë të munduar dhe të rënduar, … ju do të gjeni prehje për shpirtrat tuaj’ [ Mateu 11:28–29 ]. Me të vërtetë, Ai i mbush “me të mira të uriturit”, siç dëshmoi nëna e vet Maria [ Lluka 1:53 ]. Ejani, dhe ushqehuni nga tryeza e Zotit me atë që dëshmoj se është Kisha e Tij e vërtetë dhe e gjallë, e udhëhequr nga një profet i vërtetë dhe i gjallë.”

(Jeffrey R. Holland, “He Hath Filled the Hungry with Good Things”, Ensign, nëntor 1997, f. 66.)

Çfarë mund të ndodhë kur e kujtojmë mirësinë e Perëndisë?

Plaku Din M. Dejvis, i Të Shtatëdhjetëve, na mësoi sa vijon për atë që ndodh kur e dallojmë se si po na bekon Perëndia:

“Çdo ditë, por veçanërisht në ditën e Shabatit, ne kemi mundësinë e jashtëzakonshme të përjetojmë mrekullinë dhe çudinë e qiellit dhe t’i ofrojmë lavdet tona Perëndisë për mirësinë e bekuar dhe mëshirën e Tij të jashtëzakonshme. …

Kur adhurojmë, zemra jonë i thërret në lavde Perëndisë sonë të bekuar, në mëngjes, drekë e darkë.

Ne e përlëvdojmë dhe e nderojmë Atë vazhdimisht – në shtëpitë tona të mbledhjeve, banesat, tempujt dhe në të gjitha punët tona.

Kur adhurojmë, ne ia hapim zemrën tonë fuqisë shëruese të Shlyerjes së Jezu Krishtit.

Jeta jonë bëhet shenja dhe shprehësia e adhurimit tonë.”

(Din M. Dejvis, “Bekimet e Adhurimit”, Ensign ose Liahona, nëntor 2016, f. 94–95.)

Veprimtari Plotësuese të të Mësuarit

Zakaria lavdëroi Perëndinë

Përveç leximit të fjalëve të lavdërimit nga Maria, nëna e Jezusit, merreni parasysh t’i ftoni nxënësit të mësojnë nga fjalët e thëna nga Zakaria, babai i Gjon Pagëzorit. Nxënësit mund të lexojnë te Lluka 1:68–79 , duke kërkuar se si Zakaria e lavdëroi Perëndinë. Disa nga klasa mund t’i lexojnë fjalët e Marisë ndërsa të tjerët lexojnë fjalët e Zakarisë. Më pas nxënësit mund t’i tregojnë njëri-tjetrit atë që mësuan.

“O Come, O Come, Emmanuel” [“O Eja, O Eja, Emanuel”]

Mesazhi i këngës “O Come, O Come, Emmanuel” [“O Eja, O Eja, Emanuel”]është se Izraeli duhet të gëzohet për Jezu Krishtin që vjen për të shpëtuar popullin e Tij. Merreni parasysh ta paraqitni ose siguroni tekstin e këngës dhe të dëgjoni një interpretim muzikor. Ndoshta një nxënës mund ta luajë këngën me një instrument muzikor ose klasa mund të shikojë një material filmik si “O Come, O Come, Emmanuel (The Piano Guys)” [“O Eja, O Eja, Emanuel (Djemtë e Pianos)”] (05:27), që është në dispozicion në ChurchofJesusChrist.org. Ftojini nxënësit të përsiatin arsyet pse gëzohemi që Jezu Krishti erdhi në tokë.