Veprat e Apostujve 10, Pjesa 2

Parimet e Marrjes së Zbulesës

Një Atë Qiellor i dashur i bekoi Kornelin dhe Pjetrin me zbulesë për t’i ndihmuar ata të kuptonin më mirë vullnetin e Tij. Ndërsa vepruan sipas zbulesës që morën, ata u bekuan me më shumë dritë dhe njohuri. Ky mësim mund të të ndihmojë ta rritësh kuptueshmërinë tënde rreth mënyrës se si Ati Qiellor mund të ta zbulojë vullnetin e Tij.

Ftesë që nxënësit të bëjnë pyetje. Ftesa që nxënësit të bëjnë pyetje gjatë gjithë mësimit, mund t’ju ndihmojë ta përshtatni mësimin sipas nevojave të nxënësve dhe ta bëni temën më të përshtatshme për ta.

Përgatitja e nxënësve: Ftojini nxënësit të përcaktojnë nevojat ose shqetësimet në jetën e tyre për të cilat do të donin të merrnin zbulesë.

Veprimtari të Mundshme të të Mësuarit

Dërgimi i një mesazhi të rëndësishëm

Ftoni një vullnetar të dalë përpara klasës. Jepini këtij nxënësi detyrën e përcjelljes së mesazhit “Ati Qiellor ju do” te nxënësit e tjerë pa folur. Nxënësi mund të shkruajë, të bëjë me gjeste ose të përdorë çdo formë tjetër komunikimi përveç të folurit.

Përfytyro sikur të duhet t’i japësh një mesazh të rëndësishëm dikujt që nuk është me ty.

• Cilat janë disa mënyra se si ti mund t’ia përcjellësh mesazhin atij?

• Cilat janë disa mënyra se si Ati Qiellor mund të të japë mesazhe të rëndësishme?

Ati Qiellor ka shumë mesazhe të rëndësishme për t’ua treguar fëmijëve të Tij. Disa mesazhe janë për të gjithë, ndërkohë që të tjera janë të personalizuara vetëm për ty. Ati Qiellor komunikon me individët nëpërmjet zbulesës personale. Ndërsa e studion këtë mësim, kërko mënyra se si Perëndia mund të zbulojë mesazhet e Tij të rëndësishme që ti të jesh në gjendje ta dallosh zbulesën kur vjen.

Ati Qiellor ia zbulon vullnetin e Tij Pjetrit si dhe Kornelit

Përsërit historinë e Kornelit dhe Pjetrit te Veprat e Apostujve 10:1–28, 44–48 (shih edhe mësimin “Veprat e Apostujve 10, Pjesa 1”). Ndërsa e përsërit, kërko mënyrën se si ata arritën ta kuptonin atë që Ati Qiellor po u zbulonte atyre.

Nxënësit mund të përsëritin nga Veprat e Apostujve 10 si klasë, duke lexuar rrëfimin dhe duke ndaluar herë pas here për të treguar atë që po mësojnë. Përndryshe, nxënësit mund të punojnë në dyshe, ku një nxënës përqendrohet te përvoja e Kornelit ( vargjet 1–8, 44–48) dhe tjetri përqendrohet te përvoja e Pjetrit ( vargjet 9–28, 44–48). Ndërsa përsëritin, nxënësit mund t’ia tregojnë njëri-tjetrit atë që gjejnë.

• Çfarë mësove rreth zbulesës nga ky rrëfim?

Dëgjojini me kujdes përgjigjet e nxënësve dhe jini të përgatitur të bëni pyetje të frymëzuara që ndjekin ecurinë.Merreni parasysh t’i ftoni nxënësit t’i shkruajnë të vërtetat në tabelë. Disa të vërteta rreth zbulesës që nxënësit mund të përcaktojnë, përfshijnë Ati Qiellor e zbulon të vërtetën e Tij rresht pas rreshti dhe Ati Qiellor mund të na bekojë me zbulesë tjetër ndërsa ne e ndjekim zbulesën që marrim. Nxënësit mund edhe t’i shënojnë këto të vërteta në ditarin e tyre të studimit ose në shkrimet e shenjta.Merreni parasysh të tregoni një përvojë vetjake dhe t’i ftoni nxënësit të tregojnë përvoja që i ilustrojnë të vërtetat e përcaktuara.

• Çfarë mund të mësosh rreth Atit Qiellor nga të vërtetat për zbulesën që përcaktove?

• Çfarë bekimesh dhe të vërtetash Pjetri dhe Korneli mund të mos kishin arritur t’i merrnin nëse nuk do të kishin vepruar nisur nga ajo që morën?

Rresht pas rreshti

Përshtatini diskutimet vijuese nisur nga ajo çfarë nxënësit tashmë kuptojnë rreth kësaj të vërtete. Nëse disa nxënës kanë tashmë një njohuri të mirë të kësaj të vërtete, merreni parasysh t’i ftoni ata t’ua mësojnë atë nxënësve të tjerë.

Nxënësit mund të përfitojnë nga leximi i vargut nga 2 Nefi 28:30 dhe të diskutojnë rreth mënyrës se si Pjetri dhe Korneli morën zbulesë rresht pas rreshti.

Një e vërtetë e ilustruar në këtë rrëfim është që Ati Qiellor e zbulon këtë të vërtetë rresht pas rreshti (shih te 2 Nefi 28:30).

Vër re që as Korneli dhe as Pjetri nuk e morën menjëherë të gjithë informacionin që Perëndia kishte për ta. Kornelit i tha engjëlli që të kërkonte Pjetrin dhe “ai do të të thotë çfarë duhet të bësh” ( Veprat e Apostujve 10:5–6). Pasi Pjetri mori vegimin e tij, ai ishte “me mëdyshje ç’kuptim mund të kishte vegimi që kishte parë” ( Veprat e Apostujve 10:17). Ai nuk e kuptoi plotësisht kuptimin e vegimit derisa u takua me Kornelin.

Plaku Dejvid A. Bednar, i Kuorumit të Dymbëdhjetë Apostujve, përshkroi se çfarë kuptimi mund të ketë kjo për ne. Lexo thënien vijuese.

“Shtimi shkallë-shkallë i dritës që rrezatohet nga dielli që lind, është si të marrësh nga Perëndia një mesazh ʻrresht pas rreshti, parim pas parimiʼ ( 2 Nefi 28:30). Më së shpeshti, zbulesa vjen me shtesa të vogla përgjatë kohës dhe dhurohet në pajtim me dëshirën, denjësinë dhe përgatitjen tonë. … Kjo mënyrë zbulese pritet të jetë më shumë e zakonshme sesa e rrallë.”

(Dejvid A. Bednar, “Shpirti i Zbulesës”, Ensign ose Liahona, maj 2011, f. 88.)

• Si mund të jetë bekim që Ati Qiellor na jep zbulesë shkallë-shkallë dhe jo të gjithën njëherazi?

• Cilat tipare si të Krishtit mund të na ndihmojë ky model të zhvillojmë?

Të vepruarit sipas zbulesës

Për shkak se Korneli dhe Pjetri vepruan sipas zbulesave që morën në fillim, ata u bekuan me një kuptueshmëri më të plotë. Kjo ilustron një të vërtetë tjetër që gjendet te Veprat e Apostujve 10 : Ati Qiellor do të na bekojë me zbulesë tjetër ndërsa ndjekim zbulesën që marrim.

Plaku Ronald A. Rasband, i Kuorumit të Dymbëdhjetë Apostujve, shpjegoi rëndësinë e të vepruarit sipas zbulesës nga Ati Qiellor. Shih materialin filmik “Shpirti i Shenjtë na Udhëzoftë”, që gjendet në ChurchofJesusChrist.org [https://www.churchofjesuschrist.org/study/general-conference/2017/04/let-the-holy-spirit-guide?lang=alb], nga kodi kohor 14:41 deri në 15:19 ose lexo thënien vijuese.

“Nëse tregojmë vëmendje ndaj nxitjeve që na vijnë, ne do të rritemi në shpirtin e zbulesës dhe do të marrim gjithnjë e më shumë këndvështrim dhe drejtim prej Shpirtit. Zoti ka thënë: ʻVëre besimin tënd në atë Shpirt që drejton për të bërë mirëʼ [ Doktrina e Besëlidhje 11:12 ].

E marrshim me seriozitet thirrjen e Zotit: ʻMerrni zemër, sepse unë do t’ju udhëheq përgjatë udhësʼ [ Doktrina e Besëlidhje 78:18 ]. Ai na udhëheq nëpërmjet Frymës së Shenjtë. Jetofshim pranë Shpirtit, duke vepruar me të shpejtë ndaj nxitjeve tona të para, duke e ditur se ato vijnë prej Perëndisë.”

(Ronald A. Rasband, “Shpirti i Shenjtë na Udhëzoftë”, Ensign ose Liahona, maj 2017, f. 96.)

• Si mund ta përgatitësh veten për të marrë zbulesë?

Zbulesë për jetën tënde

• Çfarë ke mësuar rreth zbulesës që mund të të ndihmojë në rrethanat e tua vetjake?

• Çfarë zbulese të ka dhënë Ati Qiellor sipas së cilës të duhet të veprosh dhe si mund të veprosh sipas saj?

• Çfarë ke mësuar që mund të të ndihmojë të shohësh dashurinë e Atit Qiellor për ty?

Komente dhe Informacion për Rrethanat

Si mund ta dalloj zbulesën përmes Frymës së Shenjtë?

Çfarë duhet të bëj nëse nuk e ndiej se marr zbulesë nga Ati Qiellor, edhe kur e kërkoj atë?

Plaku Dejvid A. Bednar, i Kuorumit të Dymbëdhjetë Apostujve, shpjegoi:

“Në shumë prej pasigurive dhe sfidave që hasim në jetën tonë, Perëndia kërkon që ne të bëjmë më të mirën, të veprojmë e të mos detyrohemi të veprojmë (shih 2 Nefi 2:26) dhe t’i mirëbesojmë Atij. Ne mund të mos shohim engjëj, të dëgjojmë zëra qiellorë apo të marrim mbresa shpirtërore tronditëse. Shpeshherë mund të vazhdojmë përpara duke shpresuar e duke u lutur – por pa siguri absolute – që të jemi duke vepruar sipas vullnetit të Perëndisë. Por, kur i nderojmë besëlidhjet tona dhe zbatojmë urdhërimet, kur mundohemi gjithnjë e më rregullisht të bëjmë mirë e të bëhemi më të mirë, ne mund të ecim me vetëbesimin që Perëndia do t’i drejtojë hapat tanë.”

(Dejvid A. Bednar, “Shpirti i Zbulesës”, Ensign ose Liahona, maj 2011, f. 90.)

Çfarë zakonesh apo veprimesh mund të më pengojnë të marr zbulesë?

Plaku Dejvid A. Bednar, i Kuorumit të Dymbëdhjetë Apostujve, pohoi:

“Në shkrimet e shenjta ndikimi i Frymës së Shenjtë shpeshherë përshkruhet si ʻzë i qetë i ulëtʼ ( 1 Mbretërit 19:12 ; 1 Nefi 17:45 ; shih edhe 3 Nefi 11:3) dhe ʻzë i një butësie të përsosurʼ ( Helamani 5:30). Për arsye se Shpirti neve na pëshpërit me të butë dhe brishtësi, është e lehtë të kuptohet përse duhet t’i shmangim informacionet e papërshtatshme, pornografinë dhe substancat e sjelljet varësuese. Këto mjete të kundërshtarit mund ta dëmtojnë e në fund ta asgjësojnë aftësinë tonë për të dalluar e për t’iu përgjigjur mesazheve të imta të Perëndisë të dërguara prej Shpirtit të Tij.”

(Dejvid A. Bednar, “Shpirti i Zbulesës”, Ensign ose Liahona, maj 2011, f. 88.)

Çfarë mund të bëj që ta rrit aftësinë time për të marrë zbulesë?

Presidenti Dallin H. Ouks, i Presidencës së Parë, pohoi:

“Vazhdimi i mëtejshëm i shërbimit dhe i punës nga ana jonë është një mënyrë e rëndësishme që të kualifikohemi për zbulesë. Gjatë studimit tim të shkrimeve të shenjta, unë kam vënë re se zbulesa më e madhe tek fëmijët e Perëndisë vjen kur ata janë në lëvizje, jo ndërkohë që janë të ulur në mjedisin e tyre duke pritur që Zoti t’u tregojë hapin e parë që duhet të ndërmarrin. …

Ne do të marrim nxitje të Shpirtit kur të kemi bërë gjithçka që mundemi, kur të jemi jashtë në diell duke punuar në vend që të ulemi në hije duke u lutur për drejtimin lidhur me hapin e parë që duhet të ndërmarrim. Zbulesa vjen kur fëmijët e Perëndisë janë në lëvizje.

Prandaj bëjmë gjithçka mundemi. Më pas ne e presim Zotin për zbulesën e Tij. Ai ka afatin e Tij kohor.”

(Dallin H. Oaks, “In His Own Time, In His Own Way”, Ensign, gusht 2013, f. 22, 24.)

Veprimtari Plotësuese të të Mësuarit

Shembuj të të tjerëve që marrin zbulesë

Merreni parasysh t’i ftoni nxënësit të përcaktojnë shembuj nga shkrimet e shenjta të njerëzve të tjerë që kanë marrë zbulesë (shihni për shembull, 1 Nefi 4:6–18 ; Enosi 1:1–18 ; Alma 5:43–47). Kërkojuni nxënësve të renditin shembuj në tabelë. Ata mund të zgjedhin më pas një shembull, ta gjejnë atë në shkrimet e shenjta dhe ta studiojnë atë, duke kërkuar ide rreth zbulesës nga Ati Qiellor.

• Krahasojeni rrëfimin që zgjodhët me përvojat e Kornelit dhe Pjetrit. Çfarë ngjashmërish vutë re? Çfarë dallimesh?