Veprat e Apostujve 11, 15

Shpëtimtari e Drejton Kishën e Tij përmes Zbulesës

Jezusi u tha Apostujve të Tij se ungjilli do t’u predikohej të gjitha kombeve. Megjithatë, kjo gjë do të kërkonte ndryshime të vështira për traditat judease të mbajtura për shumë kohë. Me Ngritjen e Jezusit në qiell, këto ndryshime duhet të bëheshin përmes zbulesës. Ky mësim ka për qëllim të thellojë njohuritë e tua rreth mënyrës se si Shpëtimtari e drejton Kishën e Tij përmes zbulesës ndaj profetit dhe apostujve të Tij.

Marrja e vendimit se çfarë të jepet mësim. Zakonisht do të ketë më shumë material në një bllok të shkrimeve të shenjta sesa mund të diskutohet në mënyrë kuptimplote në një orë mësimore. Studiojini plot lutje shkrimet e shenjta dhe programin mësimor për të dalluar se cilat të vërteta doktrinore dhe parime janë më të rëndësishmet për nxënësit tuaj që t’i përcaktojnë, kuptojnë dhe vënë në zbatim.

Përgatitja e nxënësve: Ftojini nxënësit të lexojnë nga Udhëzuesi për Shkrimet e Shenjta, “Zbulesë”, scriptures.ChurchofJesusChrist.org dhe të vijnë të përgatitur për të treguar atë çfarë kuptojnë rreth mënyrës se si Zoti ua zbulon vullnetin e Tij profetëve të Tij.

Pyetja e një shoku

Përfytyro sikur një shok që nuk është i besimit tënd, mëson rreth besimit tënd në profetët dhe apostujt bashkëkohorë. Megjithëse shoku yt beson te profetët dhe apostujt e Biblës, ai e ka të vështirë ta pranojë idenë që Perëndia punon përmes tyre sot. Ai të pyet: “Si u flet Jezusi profetit dhe apostujve?”

• Sa i sigurt je në aftësinë tënde për t’iu përgjigjur kësaj pyetjeje?

• Çfarë do t’i thoshe shokut tënd?

Ndërkohë që ka disa mënyra për t’u përgjigjur, Veprat e Apostujve 11 dhe 15 ilustrojnë dy mënyra se si Jezu Krishti e drejton Kishën e Tij përmes zbulesës.

Zbulesë dhënë profetit

Pas vegimit të Pjetrit dhe përvojës me Kornelin (shih te Veprat e Apostujve 10), ai udhëtoi drejt Jerusalemit dhe ua dha mësim këto të vërteta të sapozbuluara udhëheqësve të tjerë të Kishës.

Mund të jetë e dobishme t’u kërkoni nxënësve të punojnë në dyshe për të përsëritur shpejt vegimin e Pjetrit dhe përvojën me Kornelin te Veprat e Apostujve 10 . Një alternativë tjetër do të ishte ta ftoni një nxënës të përmbledhë rrëfimin për klasën.

Pasi mbërriti në Jerusalem, Pjetri ia tregoi vegimin dhe përvojën e tij Kornelit (shih te Veprat e Apostujve 11:1–18).

Lexo te Veprat e Apostujve 11:4–18 , duke kërkuar mënyrën se si ti e sheh Perëndinë që udhëheq Kishën.

• Çfarë mëson nga ky rrëfim rreth mënyrës se si Zoti e drejton Kishën e Tij?

Merreni parasysh t’i ftoni nxënësit t’i drejtohen asaj çfarë mësuan në leximet e përgatitjes së nxënësve. Ndihmojini nxënësit të kuptojnë që zbulesa erdhi drejtpërdrejt te profeti, Apostulli me më shumë kohë në detyrë, përmes një vegimi.

Merreni parasysh ta paraqitni ose ta shkruani të vërtetën vijuese në tabelë:

Nga përvoja e Pjetrit mësojmë se Jezu Krishti e drejton Kishën e Tij me anë të zbulesës për profetin e Tij, Apostullin me më shumë kohë në detyrë.

• Si të ka ndihmuar njohja e kësaj të vërtete të forcosh dëshminë tënde për Jezu Krishtin dhe profetin e Tij?

• Përse beson se Kisha sot po udhërrëfehet nga zbulesa dhënë profetit të Zotit?

Zbulesë përmes këshillave

Një shembull tjetër i mënyrës se si Shpëtimtari ua jep zbulesën profetëve dhe apostujve të Tij është i ilustruar te Veprat e Apostujve 15 .

Misionarët Pali dhe Barnaba mësuan dhe pagëzuan shumë johebrenj. Disa të krishterë judeas erdhën në Antioki dhe dhanë mësim që meshkujt johebrenj të kthyer në besim duhet të zbatonin ligjin e Moisiut duke u rrethprerë përveçqë të jetonin ungjillin e dhënë mësim nga Jezu Krishti dhe Apostujt e Tij (shih te Veprat e Apostujve 15:1, 5 ; shih gjithashtu Udhëzuesin për Shkrimet e Shenjta, “ Rrethprerje ”, scriptures.ChurchofJesusChrist.org).

Lexo te Veprat e Apostujve 15:2 për të parë se si Pali dhe Barnaba u munduan ta zgjidhnin problemin.

• Si mendon, përse Pali dhe Barnaba kërkuan udhërrëfim nga udhëheqësit e Kishës në Jerusalem?

Një e vërtetë që ilustrohet te Veprat e Apostujve 15 është që duke u këshilluar së bashku dhe duke kërkuar zbulesë nga Perëndia, udhëheqësit e Kishës marrin frymëzim për probleme të vështira. Ndërsa Pjetri dhe udhëheqës të tjerë të Kishës u këshilluan së bashku, ata morën udhërrëfim nga Perëndia. Ata dërguan letra ku i informonin anëtarët e Kishës për vendimin e tyre të frymëzuar për të mos kërkuar rrethprerje për johebrenjtë e kthyer në besim dhe ata përfshinë një ftesë për t’iu bindur urdhërimeve të tjera.

Këshilli është një grup njerëzish që mblidhen bashkë për të diskutuar çështje me rëndësi dhe mënyrën se si t’u përgjigjen atyre. Për të kuptuar më shumë rreth mënyrës se si funksionon një këshill në Kishë, lexo sa vijon nga Manuali i Përgjithshëm:

“Udhëheqësi [i këshillit] i nxit anëtarët të flasin hapur dhe sinqerisht. Rrethanat, moshat, përvojat dhe këndvështrimet e ndryshme të anëtarëve të këshillit e pasurojnë këshillin. Anëtarët tregojnë sugjerimet e tyre dhe dëgjojnë njëri-tjetrin me respekt. Ndërsa ata kërkojnë të dinë vullnetin e Perëndisë, mund të mbizotërojë një frymë frymëzimi dhe uniteti.”

(Manuali i Përgjithshëm: Shërbimi në Kishën e Jezu Krishtit të Shenjtorëve të Ditëve të Mëvonshme, 4.4.3, ChurchofJesusChrist.org)

• Si do ta përmblidhje atë se çfarë është një këshill në Kishë?

Jepeni informacionin vijues si fletushkë për nxënësit ose paraqiteni atë në tabelë.

Këshilli i Jerusalemit

Lexo te Veprat e Apostujve 15:6–15, 22–28 , duke kërkuar prova për pjesët e ndryshme të një këshilli. Kopjoje tabelën e mëposhtme në ditarin tënd të studimit. Në kolonën djathtas, shkruaj fjalë ose fraza nga vargjet që përkojnë me frazat në kolonën majtas.

Funksionon nën çelësat e priftërisë
I përqendruar në të mirën e individëve dhe familjeve
Lejon që anëtarët e këshillit të shprehen
Çon në unitet

Udhëheqësit e sotëm i përdorin gjithashtu këshillat për të ftuar udhërrëfimin e Zotit në çështjet e Kishës. Presidenti Rasëll M. Nelson tregoi sa vijon:

“Kur mblidhemi si Këshill i Presidencës së Parë dhe i Kuorumit të Të Dymbëdhjetëve, dhomat tona të mbledhjeve bëhen dhoma zbulese. Shpirti është i pranishëm në mënyrë të dukshme. Teksa ndeshemi me çështje të ndërlikuara, një proces emocionues shpaloset ndërkohë që secili Apostull shpreh lirisht mendimet dhe pikëpamjen e tij. Edhe pse mund të ndryshojmë në këndvështrimet tona fillestare, dashuria që ndiejmë për njëri-tjetrin, është e pandryshueshme. Uniteti ynë na ndihmon të dallojmë vullnetin e Zotit për Kishën e Tij.

Në mbledhjet tona, shumica nuk sundon kurrë! Ne e dëgjojmë plot lutje njëri-tjetrin dhe flasim me njëri-tjetrin derisa jemi të njëzëshëm. Më pas kur kemi arritur të jemi tërësisht të një zëri, ndikimi bashkues i Frymës së Shenjtë është tepër rrëqethës! Ne provojmë atë që Profeti Jozef Smith e dinte kur dha mësim: ʻNga uniteti i ndjenjës ne marrim fuqi nga Perëndiaʼ [Mësimet e Presidentëve të Kishës: Jozef Smithi (2009), f. 421]. Asnjë anëtar i Presidencës së Parë ose i Kuorumit të Të Dymbëdhjetëve nuk do t’ia lërë kurrë vendimet për Kishën e Zotit gjykimit të vet më të mirë!”

(Rasëll M. Nelson, “Zbulesë për Kishën, Zbulesë për Jetën Tonë”, Ensign ose Liahona, maj 2018, f. 95.)

Ky mund të jetë një çast i mirë për t’i lejuar nxënësit të bëjnë çdo pyetje që mund të kenë rreth mënyrave se si Zoti e drejton Kishën e Tij. Shih “ Zbulesë ” në Udhëzuesin për Shkrimet e Shenjta (scriptures.ChurchofJesusChrist.org) dhe materialin te pjesa “Komente dhe Informacion për Rrethanat” e këtij mësimi për ide të dobishme.

• Si do të përgjigjeshe në situatën në fillim të mësimit në të cilën një shok pyet se si Jezu Krishti iu flet profetit dhe apostujve?

• Në çfarë mënyrash njohja e të vërtetave të përcaktuara në këto shkrime të shenjta ndikon në mënyrën se si ndihesh rreth profetit dhe udhëheqësve të tjerë të Kishës?

• Si mund të ndikojë njohuria që Jezu Krishti e drejton Kishën e Tij në këto mënyra në raport me atë se si ti i sheh vendimet e marra nga profeti dhe apostujt sot?

• Në cilat këshilla mund të marrësh pjesë gjatë jetës tënde?

• Çfarë mund të bësh për ta ndihmuar një këshill që të marrë zbulesë?

Sipas nxitjes, dëshmo për të vërtetat e dhëna në këtë mësim.

Komente dhe Informacion për Rrethanat

Zbulesë dhënë udhëheqësve të Kishës

Në bisedën e tij “Doktrina e Krishtit”, Plaku D. Tod Kristoferson, i Kuorumit të Dymbëdhjetë Apostujve, përdori rrëfimet e shënuara te Veprat e Apostujve 11 dhe 15 për të dhënë mësim rreth zbulesës së dhënë udhëheqësve të e Kishës. Merreni parasysh të studioni të gjithë bisedën ose të shihni materialin filmik vijues nga kodi kohor 06:10 deri në 11:34.

Cilët janë disa shembuj të zbulesës së vazhdueshme?

Plaku Kuentin L. Kuk, i Kuorumit të Dymbëdhjetë Apostujve, dha mësim rreth zbulesës që merret për Kishën. Shih “Bekimi i Zbulesës së Vazhdueshme të Dhënë Profetëve dhe i Zbulesës Vetjake për ta Udhërrëfyer Jetën Tonë” nga kodi kohor 04:55 deri në 06:42, që është në dispozicion në ChurchofJesusChrist.org [https://www.churchofjesuschrist.org/study/general-conference/2020/04/52cook?lang=alb].

Plaku Kuk dha gjithashtu mësim se profeti dhe apostujt marrin frymëzim nga Shpirti dhe zbulesë të drejtpërdrejtë nga Shpëtimtari. Shih “Përgatituni që të Takoni Perëndinë” nga kodi kohor 13:37 deri në 14:15 [https://www.churchofjesuschrist.org/study/general-conference/2018/04/prepare-to-meet-god?lang=alb].

Si mund të funksionojnë këshillat në një familje?

Presidenti M. Rasëll Ballard, i Kuorumit të Dymbëdhjetë Apostujve, dha mësim rreth këshillave në familje në bisedën e tij “Këshillat e Familjeve” (Ensign ose Liahona, maj 2016, f. 63–65).

Veprimtari Plotësuese të të Mësuarit

Të rinjtë marrin pjesë në këshilla

Shumë të rinj e të reja kanë pasur ose do të kenë mundësinë të marrin pjesë në këshilla si pjesë e thirrjes së tyre në një klasë ose presidencë të kuorumit. Ftojini nxënësit të diskutojnë përvojat e pjesëmarrjes që kanë pasur në këto këshilla dhe mënyrën se si ajo çfarë mësuan në këtë mësim mund t’i ndihmojë ata ndërsa këshillohen me të tjerët në thirrjet e tyre.

Si mund të vijë zbulesa vetjake nëpërmjet këshillës?

Ftojini nxënësit të bëjnë një listë të disa vendimeve të rëndësishme që duhet të marrin tani dhe në të ardhmen. Bëjuni nxënësve pyetje si këto: Si mund t’ju ndihmojë këshillimi me të tjerët të gjeni udhërrëfim të frymëzuar rreth marrjes së këtyre vendimeve? Cilët janë njerëzit me të cilët mund të këshilloheni rreth këtyre vendimeve? Disa burime përfshijnë prindërit dhe anëtarët e familjes (shih M. Rasëll Ballard, “Këshillat e Familjeve”, Ensign ose Liahona, maj 2016, f. 63–65), udhëheqësit e Kishës dhe Zotin (shih Alma 37:37).

Merreni parasysh të tregoni thënien vijuese nga Plaku Kuentin L. Kuk, i Kuorumit të Dymbëdhjetë Apostujve: “Shumë prej jush, të rinj të çmuar, mund të mos keni një përfytyrim të qartë se kush jeni dhe kush mund të bëheni. Megjithatë, ju jeni në pragun e vendimeve më të rëndësishme që do të merrni në jetë. Ju lutemi, këshillohuni si me prindërit, ashtu edhe me peshkopin tuaj për zgjedhje të rëndësishme që keni përpara. Lejojeni peshkopin të jetë shoku dhe këshilltari juaj” (“Peshkopët – Barinj Mbi Tufën e Zotit”, Liahona, maj 2021, f. 60). Ftojini nxënësit të shkruajnë rreth mënyrës se si mund ta përdorin parimin e këshillimit për të ftuar udhërrëfimin e Jezu Krishtit në jetën e tyre.

Mënyra se si shkrimet e shenjta ftojnë zbulesë në këshillat drejtuese të Kishës

Nxënësit mund të pyeten rreth mjeteve të tjera me anë të të cilave vjen zbulesa. Merreni parasysh t’u kërkoni nxënësve të lexojnë nga Veprat e Apostujve 15:13–18 . Cilave burime të autoritetit iu referua Jakobi?

Plaku D. Tod Kristoferson, i Kuorumit të Dymbëdhjetë Apostujve, dha mësim: “Diskutimet në këshill do të përfshijnë shpesh një peshim të veprave standarde të shkrimeve të shenjta, mësimet e udhëheqësve të Kishës dhe praktikat e mëparshme. Por në fund, ashtu si në Kishën e Dhiatës së Re, synimi nuk është thjesht marrëveshja e përgjithshme mes anëtarëve të këshillit, por zbulesa nga Perëndia. Ky është një proces që përfshin edhe arsyen edhe besimin për të mësuar mendjen dhe vullnetin e Zotit” (“Doktrina e Krishtit”, Ensign ose Liahona, maj 2012, f. 88). Nxënësit mund të lexojnë te Veprat e Apostujve 10:28 , duke kërkuar mënyrën se si përmenden si marrëveshja edhe zbulesa nga Perëndia.