Galuega 17:1–14

Suesue i Tusitusiga Paia

Pe na i ai se taimi na e mafaufau ai pe aisea e taua tele ai le suesue i tusitusiga paia? O nisi o aafiaga na oo ia Paulo ma ana soa i le malaga faafaifeautalai lona lua a Paulo ua faaalia ai le mana o le afioga a le Atua e mafai ona i ai ia i tatou. O lenei lesona e mafai ona fesoasoani ia te oe e lagona ai se naunautaiga sili atu ia maua faamanuiaga o le suesue i tusitusiga paia i aso taitasi.

Uunai le suesue i tusitusiga paia i aso taitasi. O suesuega faaletagata lava ia o tusitusiga paia i aso taitasi e maua ai se avanoa faifai pea mo faiaoga ma tagata aoga e aoao ai le talalelei, atiina ae molimau, ma lagona le siufofoga o le Alii. Vaavaai mo avanoa masani i le vasega e uunaia ai le suesue i tusitusiga paia i aso taitasi. O le tuuina atu i tagata aoga o avanoa e faasoa mai ai mea o loo latou aoaoina e mafai ona faaosofia ai isi e auai foi i le suesueina o tusitusiga paia i aso taitasi.

Sauniuniga a le tagata aoga: Valaaulia tagata aoga e o mai saunia e faasoa mai se mea anoa na latou maua talu ai nei i a latou suesuega o tusitusiga paia i aso taitasi.

Gaoioiga e ono Mafai Ona Aoao Ai

Malamalamaga mai au suesuega o tusitusiga paia

Valaaulia tagata aoga e manatunatu i a latou suesuega lata mai nei o tusitusiga paia ma faasoa mai ni malamalamaga anoa ua latou maua. Mafaufau e faaaoga fesili nei e taiala ai lenei talanoaga. Atonu e aoga le faamanatu vave i tagata aoga i le amataga o le lesona le sini o le suesueina o tusitusiga paia ua latou faatuina mo i latou lava i le seminare. O le a latou maua se avanoa e iloilo ai a latou sini i le faaiuga o le lesona.

• O a nisi o malamalamaga e uiga ia Iesu Keriso ma Lana talalelei ua e maua mai lau suesuega lata mai nei o tusitusiga paia?

• O a nisi o fuaiupu po o tala na e suesueina talu ai nei na taua ia te oe? Aisea?

• Afai e fesili atu se uo ia te oe pe aisea e te manatu ai e taua le suesue pea lava pea i tusitusiga paia, e faapefea ona e tali atu i ai?

O faataitaiga o le aoga o tusitusiga paia

O nisi o aafiaga na maua e Paulo i le taimi o lana malaga lona lua faafaifeautalai ua faapupula mai ai le aoga o le suesueina o tusitusiga paia. Tusi le ulutala lenei i lau api faamaumau mo suesuega: O le ala e mafai ai e le suesueina o tusitusiga paia ona faamanuiaina ai lo’u olaga. A o e suesue ai i lenei aso, vaavaai mo ni malamalamaga e mafai ona e lisiina i lalo o lenei ulutala.

Mafaufau e tusi foi le ulutala lenei i luga o le laupapa ma faaopoopo i le lisi a o faagasolo le lesona.

Afai o maua, faaaoga Faafanua o le Tusi Paia, nu. 13, “ O Malaga Faafaifeautalai a le Aposetolo o Paulo,” e sue ai Tesalonia ma isi nofoaga na malaga i ai Paulo i le taimi o lana malaga lona lua faafaifeautalai.

Faitau le Galuega 17:1–4 ma vaavaai mo mea na faia e Paulo a o faatasi ai ma tagata Iutaia i Tesalonia.

• O le a sou manatu i le mea e taua i taumafaiga a Paulo?

• O le a se mea ua fesoasoani ai lenei tala ia te oe e te malamalama ai e uiga i le taua o tusitusiga paia?

O le savali a Paulo i tagata Iutaia i Tesalonia ua faamanatu mai ai ia i tatou o loo molimau mai tusitusiga paia ia Iesu Keriso ma Lana misiona paia (tagai i le Ioane 5:39). Mafaufau e faaopoopo le upumoni lea i le lisi o i lau api faamaumau mo suesuega.

Na aoao mai e Elder D. Todd Christofferson o le Korama a Aposetolo e Toasefululua mea nei e uiga i le faamoemoega o tusitusiga paia. Atonu e te manao e matamata i le vitio “The Blessings of Scripture” mai le faailotaimi 10:49–11:21 pe faitau le faamatalaga o loo i lalo.

I le taunuuga, o le faamoemoega tutotonu o tusitusiga paia uma o le faatumuina lea o o tatou agaga i le faatuatua i le Atua le Tama, ma Lona Alo o Iesu Keriso—o le faatuatua o loo soifua i La’ua; o le faatuatua i le fuafuaga a le Tama mo lo tatou tino ola pea ma le ola e faavavau; o le faatuatua i le Togiola ma le Toetu o Iesu Keriso, lea e faagaoioia ai lenei fuafuaga mo le fiafia, o le faatuatua e avea le talalelei a Iesu Keriso ma auala tatou te ola ai, ma le faatuatua e oo ina iloa “le Atua moni e toatasi, atoa ma Le [ua Ia] auina mai, o Iesu Keriso lea ( Ioane 17:3).”

(D. Todd Christofferson, “O Le Faamanuiaga o Tusitusiga Paia,” Ensign po o le Liahona, Me 2010, 34)

• O le fea o faamanuiaga na ta’ua e Elder Christofferson ua e oo i ai e ala i au suesuega o tusitusiga paia?

• O a nisi o fuaiupu o tusitusiga paia ua faateleina ai lou faatuatua i le Tama Faalelagi ma Iesu Keriso? Na faapefea ona fesoasoani upumoni o loo aoao mai i nei fuaiupu ia te oe e faateleina ai lou faatuatua?

E ui o le toatele o tamaitai ma alii o Tesalonia na talitonu ma liua e ala i aoaoga a Paulo, ae o isi sa faapotopoto se au fouvale i se taumafaiga e pue faapagotaina Paulo ma Sila (tagai i le Galuega 17:4–5). Sa mafai e Paulo ma Sila ona sosola ese mai le au fouvale ma o atu i le aai lata ane o Perea, lea sa faaauau ai pea le la talaiga.

Faitau le Galuega 17:10–12, ma vaavaai pe na faapefea ona talia Paulo ma Sila e tagata o Perea. Mafaufau e maka ia upu ma fasifuaitau ua e lagona e taua.

• Na faapefea ona fesoasoani le suesueina o tusitusiga paia i aso taitasi i nei tagata?

O se upumoni e tasi e mafai ona faailoa mai i lenei tala e faapea: o le suesueina e le aunoa i tusitusiga paia e mafai ona saunia ai i tatou ia iloa ma talitonu i le upumoni. Mafaufau e faaopoopo le upumoni lea i le lisi o i lau api faamaumau mo suesuega.

Ina ia fesoasoani i le vasega ia malamalama atili i lenei upumoni, mafaufau e fesili atu:

• O a nisi o faataitaiga o ni auala e mafai ai ona faaaogaina lenei upumoni i tulaga e ono feagai ma oe i lou olaga?

Afai e manaomia e tagata aoga se fesoasoani, mafaufau e faaaoga tulaga nei:

Mafaufau pe mafai faapefea e le suesueina e le aunoa o tusitusiga paia ona fesoasoani ia te oe i tulaga nei:

• Ua faamatala mai e se tasi o ou faiaoga i le aoga se manatu faavae e feteenai ma ou talitonuga.

• O nisi o au uo ua uunaia oe e auai i amioga e le tusa ai ma ou tulaga faatonuina i le faapea atu, “A tau lava na o le faa-tasi, e le afaina lea.”

• I le konafesi aoao, ua aoao mai ai e se Aposetolo se mea e faatautee ai i tifiga o i ai nei i le lalolagi.

O isi faamanuiaga o le suesue i tusitusiga paia

O upumoni ua e iloa mai le Galuega 17 ua faapupula mai ai na o ni nai faamanuiaga e mafai ona tatou maua e ala i le suesueina o tusitusiga paia.

Faaaoga ni nai minute e suesue ai nisi po o fuaitau uma o mau nei, ma vaavaai mo nisi faamanuiaga e mafai ona tatou maua mai le Atua e ala i le suesueina o Ana afioga ma upu a Ana perofeta, e pei ona maua i tusitusiga paia. Faaopoopo atu ou malamalamaga i le lisi o i lau api faamaumau mo suesuega.

Mafaufau e vaevae le vasega i ni vaega ma atofa atu se fuaiupu i vaega taitasi. Valaaulia tagata aoga mai vaega taitasi e faaopoopo o latou malamalamaga mai le fuaitau sa latou suesueina i le lisi o i luga o le laupapa.

• 1 Nifae 15:24

• 2 Nifae 32:3

• Iakopo 2:8

• Helamana 3:29–30

• Iosefa Samita—Mataio 1:37

• O le a se mea e tulaga ese mai ia te oe mai le lisi na e fatuina?

• O le fea o faamanuiaga mai lau lisi e sili ona e manao e maua i le taimi nei? Aisea?

• O le a se mea e mafai ona e faia ia avea ai lau suesuega o tusituiga paia ma se aafiaga e sili ona aoga ma paia?

• O a faamanuiaga ua e maua e ala i le suesueina e le aunoa o afioga a le Atua o loo i tusitusiga paia?

Mafaufau e faasoa atu se aafiaga patino ma se molimau e uiga i faamanuiaga na maua mai i le suesueina e le aunoa o tusitusiga paia.

Fai se fuafuaga

I le avea ai ma se vaega o lou auai i le seminare, ua valaaulia ai oe e fatu se sini e faatatau i lau suesuega o tusitusiga paia i aso taitasi. Faaaoga sina taimi e iloilo ai lou alualu i luma e faatatau i lenei sini ma faia ni fetuunaiga manaomia e fesoasoani ai ia te oe ia faamanuiaina atili a o e agai i luma.

Faaaoga fesili nei e fesoasoani ai i tagata aoga e iloilo lo latou alualu i luma:

• O le a le sini o le suesueina o tusitusiga paia na e fatuina mo oe lava?

• E faapefea ona fesoasoani lenei sini ia te oe ia maua ai se aafiaga sili atu ona anoa i suesuega a le tagata lava ia o tusitusiga paia?

• O a ni fetuunaiga o manaomia ona e faia?

Fautuaina tagata aoga e faaauau pea ona alualu i luma i a latou suesuega o tusitusiga paia. Mafaufau i ni auala i le faagasologa o le tausaga e faamanatu ai ia i latou a latou sini suesue ma ia faamalo atu ia i latou mo lo latou alualu i luma.

Talatalaga ma Faamatalaga o Talaaga

O a nisi faamanuiaga e mafai ona maua mai le suesueina o tusitusiga paia i aso taitasi?

I le saunoa ai e uiga i le faitauina o le Tusi a Mamona i aso taitasi, o Peresitene Russell M. Nelson, na folafolaina mai mea nei:

O’u uso e ma tuafafine pele, ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga sili atu ona lelei i—aso uma. Ou te folafola atu pe a outou mafaufau loloto ai i mea tou te suesueina, o le a matala pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e punouai oe lava ia i le Tusi a Mamona i aso taitasi, e mafai ona puipuia oe mai mea leaga o le aso, e faapea foi le mala tinalima o ponokalafi ma isi vaisu faagase-mafaufau.

(Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?,” Ensign po o le Liahona, Nov. 2017, 62–63)

O Peresitene Dallin H. Oaks, sa faatusatusaina ia tusitusiga paia i se Urima ma le Tumema e mafai ona tatou faaaogaina e maua ai faaaliga mai le Alii:

Tatou te le tau faamamafaina le manatu pe a tatou faapea ane o tusitusiga paia e mafai ona avea o se Urima ma le Tumema e fesoasoani ai ia i tatou taitoatasi ia maua faaaliga patino mo le tagata lava ia.

Ona tatou te talitonu o le faitauina o tusitusiga paia e mafai ona fesoasoani ia i tatou e maua ai faaaliga, ua fautuaina i tatou e faitau pea lava pea ia tusitusiga paia. Mai lea auala, tatou te tau atu ai i le mea o loo finagalo ai lo tatou Tama Faalelagi ina ia tatou iloa ma faia i o tatou lava olaga i le taimi nei. O se tasi lena o mafuaaga e talitonu ai le Au Paia o Aso e Gata Ai i le suesueina o tusitusiga paia i aso taitasi.

(Dallin H. Oaks, “Scripture Reading and Revelation,” Ensign, Ian. 1995, 8)

Galuega Faatino Faaopoopo e Aoao Mai Ai

Lafoai le lalolagi

Ina ia fesoasoani i le vasega e faia le sootaga i le va o le suesueina o tusitusiga paia ma le mauaina o upu a perofeta soifua, mafaufau e faitau faatasi ma le vasega le Galuega 17:5–7 ma talanoaina fesili nei:

• Aisea e te manatu ai na lagona e tagata Iutaia lē talitonu o aoaoga a Paulo e uiga i le Faaola “ua faatupu le fouvale i le lalolagi uma” ( Galuega 17:6)?

• E mafai faapefea e le suesueina e le aunoa o tusitusiga paia ona saunia lou mafaufau ma lou loto ia maua aoaoga a perofeta soifua?

• O a nisi o eseesega aupito tetele i le va o aoaoga a le Faaola e ala i perofeta soifua ma talitonuga ma aganuu a le lalolagi i aso nei?

Galuega 17:11 . “Ua latou talia le upu ma le fiafia tele”

Mafaufau e faaaoga sina taimi e talanoaina ai le Galuega 17:10–12, ma taulai atu i le saunia o tagata o Perea e talia le talalelei.

A o lei suesueina nei fuaiupu, atonu e aoga le valaaulia o volenitia e faaaoga taga e faataitai ai pe faape’i le saunia e faatino ni galuega faapitoa, e pei o le sapoina o se polo, tamoe i se tuuga, taumafa i se meaai, sii i luga se mea mamafa, po o le eliina o se pu. Mafaufau e valaaulia se tagata aoga se toatasi pe sili atu e faaali mai pe faape’i foliga pe a sauni se tagata e aoao le talalelei e faaaoga ai na o tagafaatino. E mafai e le isi vaega o le vasega ona taumafai e mate le mea o loo tupu.

Ona mafai lea ona valaaulia tagata aoga e fai se lisi o faatinoga, uiga faaalia, po o amioga e ono ta’u mai ai ua saunia se tagata e aoaoina le talalelei. Ona sosoo ai lea, valaaulia le vasega e faitau le Galuega 17:10–12, ma vaavaai mo mea na fesoasoani i tagata o Perea e saunia ai e talitonu ma talia aoaoga a Paulo ma Sila.