Galuega 17:16–34

“O i Tatou Uma Lava o Fanau a le Atua”

A o faatalitali mo ana soa faifeautalai e faatasi ma ia i Atenai, sa matua popole lava le Aposetolo o Paulo ona o tagata o Atenai o ni tagata e ifo i tupua ma e le malamalama i le natura moni o le Atua. Ina ia fesoasoani i tagata Atenai ia malamalama ma faalatalata atili atu i le Atua, sa aoao atu ai e Paulo le talalelei a Iesu Keriso i sunako ma nofoaga o maketi. Ona valaaulia lea e le au faifilosofia ia Paulo e faamatala “lenei aoaoga fou” (Galuega 17:19) i se nofoaga e ta’ua o le Mauga o Areopako. Sa aoao atu e Paulo le au faifilosofia i le natura moni o le Atua ma molimau atu i lo latou sootaga paia ma Ia. O lenei lesona e mafai ona fesoasoani ia te oe e lagona ai le taua o lou faasinomaga o se atalii/afafine o le Atua.  

O le faatuatuaina o tagata aoga. Ia faatuatuaina le tomai o au tagata aoga e faataunuu ai la latou matafaioi a o latou suesueina, aoaoina atu, ma faaaogaina aoaoga faavae ma mataupu faavae o le talalelei.

Sauniuniga a le tagata aoga: Valaaulia tagata aoga e fai se lisi o upu po o faaupuga e sili ona faamatalaina ai i latou ma mafaufau pe o fea o upu po o faaupuga e sili ona taua ia i latou.

Gaoioiga e ono Mafai Ona Aoao Ai

O a’u o se atalii/afafine o le Atua

Mafaufau e usu faatasi ma tagata aoga le “O le Atua lo’u Tama” (Viiga, nu. 184) a o lei amataina le lesona.

Faalogologo i le viiga “O le Atua lo’u Tama” (Viiga, nu. 184) i le polokalama o le Potutusi o le Talalelei po o le ChurchofJesusChrist.org. Pe matamata le vitio “Child of God” (2:54), o loo maua i le ChurchofJesusChrist.org. A o e faalogologo pe usuina le viiga, mafaufau loloto i le taua o le savali o lenei viiga.

O a upu po o fasifuaitau mai lenei viiga ua e iloa e taua? Aisea?

2:54

Na valaaulia e Elder Donald L. Hallstrom o le Fitugafulu, i tatou e mafaufau loloto i le savali o le “O A’u o se Atalii o le Atua”:

O lenei viiga faapelepele o se tasi e masani ona lagiina soo i lenei Ekalesia. Ae o le fesili taua e faapea, o tatou iloaina moni ea lea viiga? Ua tatou iloaina i o tatou mafaufau, loto ma o tatou agaga? Pe o o tatou mātua faalelagi o lo tatou faasinomaga muamua lea ma aupito sili ona maoae?

(Donald L. Hallstrom, “O A’u o se Atalii o le Atua,” Ensign po o le Liahona, Me 2016, 26)

Mafaufau e tusi i luga o le laupapa ia fesili nei, lea na sii mai i le saunoaga a Elder Hallstrom. Tuu atu i tagata aoga se taimi e mafaufau loloto ai i fesili. Valaaulia tagata aoga naunautai e faasoa mai pe faapefea ona latou iloa o i latou o fanau a le Atua. Ia faaeteete e aua le faamaasiasi i tagata aoga o e atonu o loo fesiligia pea lo latou talitonuga ma le sootaga ma le Atua.

O fesili nei ua fetuutuunai mai le saunoaga a Elder Hallstrom ma e mafai ona taliina i se tali “ioe” po o le “leai”. A o e taliina nei fesili, faamatala pe aisea na e taliina ai fesili taitasi i le ala na e faia ai.

O e matua iloa moni o oe o se atalii/afafine o le Atua?
O e iloaina i lou mafaufau, loto, ma le agaga?
Pe o e vaai ia te oe lava o se atalii/afafine o le Atua ae e te lei faailoaina oe lava o se isi lava mea?

I le faagasologa o lenei lesona, mafaufau i au tali i fesili na muamua atu ma po o a mea o ta’u mai e au tali e uiga i ou lagona e faatatau i le Tama Faalelagi. Saili musumusuga mai lou Tama Faalelagi, e ala i le Agaga Paia, ina ia fesoasoani ai ia te oe ia malamalama atili i lou faasinomaga paia o se atalii/afafine o le Atua ma lagonaina Lona alofa tele mo oe.

Ua talai atu Paulo i Atenai

Sa talai atu le Aposetolo o Paulo i Atenai i le taimi o lana malaga lona lua faafaifeautalai. Sa tele manatu, filosofia, ma talitonuga eseese o tagata i Atenai. Na vaai Paulo o tagata sa “tuuina atu atoa i le ifo i tupua” ( Galuega 17:16), o lona uiga sa latou tapuai i mea e ese mai nai le Atua. O lea sa talai atu ai Paulo i aso uma e uiga ia Iesu Keriso ma Lona Toetu. Ona aumaia ai lea o Paulo i le Mauga o Areopako, lea sa valaaulia ai o ia e lauga atu i luma o se vaega o le au filosofia (tagai i le Galuega 17:17–21).

Faitau le Galuega 17:22–23, ma vaavaai pe na faapefea ona faatomua mai e Paulo lana savali. E mafai foi ona e matamata i le vitio “We Are the Offspring of God” (4:26) mai le faailotaimi 0:00 seia oo i le 1:54, o loo maua i le ChurchofJesusChrist.org.

4:26

O le a se mea e mafai e tusitusiga o i luga o le fatafaitaulaga lea na taua e Paulo ona ta’u mai e uiga i le talitonuga o tagata Atenai i le Atua?
E faapefea ona faatusatusa lenei tusitusiga i mea o loo aoao mai e tusitusiga paia e uiga i le Atua?

Sa talitonu tagata Atenai anamua i le tele o atua ese ma sa fausia faatagata ma malumalu e faamamaluina ai i latou. O le fatafaitaulaga na fausia “mo le atua e le iloa” ( Galuega 17:23), sa ono fai ma taumafaiga a tagata Atenai e faamalie i se atua e le mailoa po o se isi lava atua e le o iloa sona igoa.

Mafaufau e faaali atu i tagata aoga le ata (o le a aofia mulimuli ane i le lesona) o se vasega seminare i luga o le Mauga o Areopako. O ni faatafunaga o loo iloa atu i le pito i tua o se faataitaiga o malumalu na fausia e faamamaluina ai atua o Eleni.

O a nisi o malamalamaga sese masani ua e matauina i le lalolagi i aso nei e uiga i le Atua ma le tatou sootaga ma Ia?
Afai e te mauaina le avanoa e aoao atu ai se tasi e le tele sona iloa e uiga i le Tama Faalelagi, o le a se mea e te manao ia latou iloa e uiga ia te Ia?

Tuu atu i tagata aoga se taimi ia lava e faauma ai le gaoioiga lenei e tagata taitoatasi, i ni paga, pe i ni vaega toalaiti. A o suesue tagata aoga, mafaufau e lisi numera o fuaiupu 24–31 i luga o le laupapa. Valaaulia tagata aoga e o mai i le laupapa ma tusi i autafa o le fuainumera o fuaiupu taitasi se upumoni se tasi pe sili atu na latou mauaina i fuaiupu taitasi. E mafai ona valaaulia tagata aoga e faasoa mai pe o a upumoni e sili ona anoa ia i latou ma pe aisea.

Faitau le Galuega 17:24–31 ma fai se lisi o upumoni na aoao mai e le Aposetolo o Paulo e uiga i le natura moni o le Atua ma lou sootaga ma Ia. Mafaufau e faaigoa lau lisi “O Le Atua Moni Soifua ma Lo’u Sootaga ma Ia.” Manatua o loo i ai se faaliliuga a Iosefa Samita mo le fuaiupu27 (tagai i le Galuega 17:27, vaefaamatalaga e). A uma ona fai lau lisi, tali le fesili lenei:

O le a le upumoni mai lau lisi e sili ona anoa ia te oe, ma aisea?

O i tatou o le fanau a le Atua

O se tasi o upumoni atonu na e iloaina mai i aoaoga a Paulo e faapea “o le fanau a le Atua i tatou” ( fuaiupu 29).

E faapefea ona ese le avea ma se atalii/afafine o le Atua mai le na o le avea ma se tasi o Ana foafoaga?

Sa molimau Peresitene M.Russell Ballard o le Korama a Aposetolo e Toasefululua, e uiga i le taua o le upumoni “o i tatou o le fanau a le Atua.”

O le mea moni o le faavae o matua faalelagi e le na o sa’u upumoni po o sau upumoni. O le upumoni e faavavau. Ua tusia i mataitusi lapopoa, iloga, ma tetele. O le malamalama ai i lenei upumoni—malamalama moni i ai ma taliaina—e suia ai olaga. E tuuina atu ai ia te oe se faasinomaga tulaga ese e leai se tasi e mafai ona aveesea mai ia te oe. Ae e sili atu nai lo lena, e tatau ona e maua ai se lagona maoae o le taua ma se lagona o lou aoga e le gata. Ma le mea mulimuli, ua tuuina atu ai ia te oe se faamoemoega paia, mamalu, ma agavaa i le olaga.

(M. Russell Ballard, “Children of Heavenly Father” [faigalotu a le Iunivesite o Polika Iaga, Mati. 3, 2020], 2, speeches.byu.edu)

O le a se suiga e mafai ona faia i lou olaga ma i faaiuga e te faia i lou iloa ai o oe moni lava “o le fanau a le Atua”?
O a ni ou aafiaga na fesoasoani ia te oe e malamalama atili ai i lou faasinomaga paia o se atalii/afafine o le Atua?

Ina ia vaai i se faataitaiga o le auala na aafia ai se tasi tamaitai i le malamalama i lona faasinomaga paia, matamata i le vitio “Am I a Child of God?” (10:24), o loo maua i le ChurchofJesusChrist.org, mai le faailotaimi 3:24 seia oo i le 5:23.

2:3

A uma ona tuuina atu i tagata aoga se taimi e mafaufau loloto ai ma tali i fesili nei, valaaulia tagata aoga naunautai e faasoa mai a latou tali i le vasega. Mafaufau e tuuina atu se molimau e uiga i upumoni sa aoaoina.

O le a se mea na e aoaoina pe lagonaina e uiga i lou faasinomaga paia i le asō e te manao e te manatuaina?
O a faatinoga ua e lagona e tatau ona e faia e faavae i luga o mea ua e aoaoina?
O le a se mea e mafai ona e faia e maua ai tali i au fesili o loo i ai pea e uiga i lou sootaga ma le Atua?

Talatalaga ma Faamatalaga o Talaaga

E mafai faapefea e le Tusi a Mamona ona faamalosia lo’u sootaga ma le Atua?

O Peresitene Russell M. Nelson, na folafola mai:

E tupu se mea mamana pe a saili atu se atalii/afafine o le Atua ia iloa atili e uiga ia te Ia ma Lona Alo Pele. E leai se isi vaipanoa o loo manino ma mamana atili ai le aoaoina o na upumoni nai lo le Tusi a Mamona.

(Russell M. Nelson, “O Le Tusi a Mamona: Faamata e Faape’i Lou Olaga e aunoa ma Lea?,” Ensign po o le Liahona, Nov. 2017, 61)

Aisea e taua tele ai le malamalama i lo’u faasinomaga moni o se atalii/afafine o le Atua?

Na aoao mai e Elder Brian K. Taylor o le Fitugafulu, mea nei:

Sa aoaoina Mose e uiga i lona tupuaga paia e ala i le talanoa faafesaga’i ma le Alii. I le mavae ai o lena aafiaga, “Sa alu ane Satani ma faaosooso,” ma le faaōleōle, ae pulunaunau malosi e faasese le faasinomaga o Mose, “ua fai mai: Mose e, le atalii o le tagata, ifo mai ia te a’u. Ma sa … vaai atu Mose ia Satani ma fai atu: O ai oe? Aua faauta, o au o se atalii o le Atua” [Mose 1:12–13, ua faaopoopoina le faamamafa].

O lenei taua tele i le faasinomaga paia o loo mumu malosi pea, a o faateteleina pea aupega taufaasese a Satani ua faamoemoe e faaumatia ai lo tatou talitonuga ma le malamalama e uiga i lo tatou sootaga ma le Atua. O le mea e faafetai ai, ua faamanuiaina i tatou i se vaaiga manino ma le malamalama i lo tatou faasinomaga moni mai le amataga. …

O le iloaina ai o lo tatou Tama e suia ai mea uma, aemaise o o tatou loto, a o faamautu mai e Lona Agaga agamalu lo tatou faasinomaga moni ma le taua tele i Lana silafaga. E savali faatasi le Atua ma i tatou i luga o le ala o feagaiga a o tatou saili atu ia te Ia e ala i aioiga i le agaga tatalo, suesueina o tusitusiga paia, ma tauiviga usiusitai.

(Brian K. Taylor, “O A’u ea o se Atalii o le Atua?,” Ensign po o le Liahona, Me 2018, 12, 14)

O Peresitene Dieter F. Uchtdorf o le Au Peresitene Sili, sa molimau mai e uiga i lo tatou faasinomaga moni o ni afafine ma atalii o le Atua i le vitio “Our True Identity” (3:38), o loo maua i le ChurchofJesusChrist.org.https://www.churchofjesuschrist.org/media/video/2010-04-0020-our-true-identity ?lang=eng

2:3

Galuega Faatino Faaopoopo e Aoao Mai Ai

Mulimuli i le faataitaiga a Iesu Keriso o le tapuai i le Tama

E pei ona aoao mai le Aposetolo o Paulo e uiga i le natura moni o le Atua, sa ia fautuaina foi tagata Atenai ia aua nei tapuai atu i le Tama Faalelagi i ni auala le talafeagai (tagai i le Galuega 17:23–30). O Iesu Keriso o le faataitaiga tonu atoatoa lea o le auala e tapuai ai i le Atua. Mafaufau e faamanatu i le vasega pe na faapefea na amanaia pea ma viia e le Faaola i taimi uma le Tama Faalelagi ma oo ina gauai atu foi Lona finagalo i le finagalo o le Tama. Vaevae fuaitau o mau nei ia tofu ai tagata aoga ma valaaulia i latou e faailoa mai mea ua latou aoao mai ia Iesu Keriso e uiga i le tapuai atu i le Tama Faalelagi. Valaaulia tagata aoga e faasoa mai mea na latou maua ona talanoaina lea o auala eseese e mafai ona tatou tapuai ma molimau atu ai i le Tama Faalelagi i o tatou olaga i aso taitasi.