Galuega 22–26

O le Molimau a Paulo

I le feagai ai ma tuuaiga sese ma le agaleaga faaletino, sa lei faafiti ai Paulo. Pe noatia i filifili pe aumaia i luma o taitai ma tupu, sa faasoa atu ma le faamaoni e Paulo lana molimau mamana ia Iesu Keriso ma Lana talalelei. O lenei lesona ua faamoemoe e fesoasoani ia te oe e atiina ae ai se naunautaiga sili atu e mulimuli i le faataitaiga a Paulo i le molimau atu ia Iesu Keriso ma Lana talalelei i lou olaga i aso taitasi. 

Valaaulia tagata aoga e molimau atu i aoaoga faavae ma mataupu faavae: Fesoasoani ia malamalama tagata aoga “o le faasoaina atu o le molimau e le gata ina faamanuiaina ai le tagata o loo tuuina atu le molimau ae e mafai foi ona faamalosia ai le faatuatua ma molimau a isi. … O [se molimau] e mafai ona avea o se faamatalaga o mea ua iloa e se tagata e moni, e tautalagia ma le faamaoni ma le tautinoga maumaututu. E mafai ona avea o se faamautinoaga faigofie o lagona o se tagata e uiga i se aoaoga faavae po o se mataupu faavae o le talalelei ma le suiga na ia faia i lona olaga” (Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], 33).

Sauniuniga a le tagata aoga: Valaaulia tagata aoga e mafaufau loloto ma o mai saunia e faasoa mai se aafiaga na aafia ai i latou i le molimau a se isi tagata.

Gaoioiga e ono Mafai Ona Aoao Ai

Faasoaina o molimau

Faamanatu i tagata aoga le valaaulia i le sauniuniga a le tagata aoga mo lenei lesona a o latou tali atu i fesili nei.

I se faauigaga faalelotu po o le faaleagaga, o le molimau atu po o le tuuina atu o le molimau e masani lava ona faasino i le faasoa atu o talitonuga patino o le malamalama faaleagaga e pei ona tuuina mai e le Agaga Paia (tagai i le Taiala i Tusitusiga Paia, “ Molimau atu ” ma le “ Molimau ”).

O anafea na e lagonaina ai le mana o le faasoaina atu o lau lava molimau po o le faalogo i se isi tagata o faasoa mai a latou molimau? Na faapefea ona aafia ai oe e lenei mea?
O le a lou naunau e faasoa atu lau molimau i isi? Aisea e ono le mautonu ai se tagata e faasoa a latou molimau?
O a ni fesili ma ni atugaluga o ia te oe e uiga i le molimau atu i isi e uiga i ou talitonuga?

I le lesona lenei, o le a e suesue ai i le molimau a Paulo e uiga i le Faaola ma le ala na faia ai e le Faaola se aafiaga i le olaga o Paulo. O le a e aoao ai foi pe na faapefea ona tali atu isi i le molimau a Paulo. A o e suesue, mafaufau pe mafai faapefea e le Faaola ona faamanuia lou olaga a o e naunau e faasoa atu lau molimau e uiga ia te Ia ma Lana talalelei, e tusa lava po o le a le malosi e te manatu o i ai lau molimau.

O le molimau a le Aposetolo o Paulo

E ui i le sasaina, fetogiina, ma le faafalepuipuiina sese, ae sa faasoa atu pea lava pea e Paulo lana molimau ia Iesu Keriso ma Lana talalelei. A o e faitau i le tala a Paulo, faataitai ona vaai faalemafaufau i le mea o loo tupu i le faamatalaga.

Atonu o se avanoa lelei lea e faamanatu atu ai i tagata aoga le aoga o le vaai faalemafaufau. Fautuaina i latou e vaai faalemafaufau faapea sa latou i ai i le taimi o le tala. A o latou faitau, e mafai ona latou pu’e [i o latou mafaufau] vaaiga, leo, ma lagona atonu na latou mauaina.

O fuaitau nei o loo i ai ni vaega o le molimau a Paulo ma tali a i latou o e na faalogo ia te ia. Filifili se tasi o fuaitau e faitau, ma mafaufau pe mata e faapefea ona aafia ai oe i lana molimau pe ana faapea sa e i ai iina.

Mafaufau e faaali atu faamatalaga nei mo le vasega. Afai e faatapulaa le taimi o le vasega, atonu e fesoasoani le faamamafa atu faapea e le manaomia e tagata aoga ona faitau uma molimau e tolu.

O le molimau a Paulo	O le tali atu i ai a tagata
Sa noatia Paulo i filifili ina ua pue faapagotaina o ia i Ierusalema. Sa faatagaina o ia e lauga atu i tagata a o tu i fafo atu o le Olo o Anetonia. Faitau le Galuega 22:6–16	Galuega 22:22–24
Sa pue faapagotaina Paulo i fafo o le malumalu i Ierusalema ona aumaia lea i luma o taitai Iutaia. Sa fesiligia o ia e nei taitai Iutaia ma tuuina atu i le falepuipui. O le kapeteni Roma o le sa pue faapagotaina Paulo na iloa se taupulepulega faalilolilo i se vaega o tagata Iutaia e fasioti ia Paulo, o lea na ia auina atu ai loa Paulo i Kaisareia. I Kaisareia, sa faatagaina ai Paulo e molimau e tusa ma ona moliaga i luma o le kovana Roma o Filiki. Faitau le Galuega 24:10–16	Galuega 24:22–27
Ina ua mavae le lua tausaga i le falepuipui, sa avane Paulo i luma o le kovana fou ma tauanau malosi atu mo se avanoa e molimau atu ai i luma o Kaisara. Sa fuafua le Tupu o Akeripa e faalogo i le molimau a Paulo a o lei malaga atu o ia i Roma. Faitau le Galuega 26:1–3, 13–23	Galuega 26:24–31

A uma ona faamaea e tagata aoga se tasi o faitauga atofaina o loo i luga, mafaufau e valaaulia i latou e faasoa tatala mai ni uunaiga patino mai a latou suesuega a o lei faia le gaoioiga lenei.

I lau api faamaumau mo suesuega, tusi i lalo mea sa e aoaoina. Ia mautinoa o aofia ai faamatalaga nei:

O a ni mea patino na tulaga ese ia te oe e uiga i le molimau a Paulo ia Iesu Keriso ma Lana talalelei?
O le a se mea na faagaeetia ai oe e uiga ia Paulo i nei fuaiupu?
Aisea e te talitonu ai na maua e Paulo le lototele ma le malosi e molimau atu ai ia Keriso i ia tulaga faigata?
Aisea e te manatu e taua ai le faasoa atu o le molimau e tusa lava pe ono teena e isi?

A o faasoa mai e tagata aoga a latou tali, faalogo ma le toto’a mo mataupu faavae moni, ma tusi i luga o le laupapa. O se tasi o mataupu faavae e mafai ona i ai o le o soo o Iesu Keriso latou te faasoa atu ma le lototoa a latou molimau.

Faitau le faamatalaga lenei, ma mafaufau loloto pe mafai faapefea ona fesoasoani ia te oe ia maua le lototele e molimau atu ai e pei ona sa faia e Paulo.

E ui o le faamamafaina o le faasoaina atu o a tatou molimau i isi e le manaomia ai ona atoatoa ma e ono manaomia ona faataitai pea, o Elder Dieter F. Uchtdorf o le Korama a Aposetolo e Toasefululua, na faasoa maia nei malamalamaga.

I soo se auala lava e foliga o se amioga ma se aga masani ia te oe, faasoa atu i tagata pe aisea e taua ai Iesu Keriso ma Lana Ekalesia ia te oe. …

Ia e malamalama e le o sau galuega le liuaina o tagata. O le matafaioi lena a le Agaga Paia. O lau matafaioi o le faasoa atu o mea o loo i totonu o lou loto ma ola e tusa ai ma ou talitonuga.

(Dieter F. Uchtdorf, “Galuega Faafaifeautalai: Faasoaina Atu o Mea o Loo i totonu o Lou Loto,” Ensign po o le Liahona, Ape. 2019, 17)

Fai ni koluma se lua i lau api faamaumau mo suesuega. I le tasi koluma, mafaufau ma tusifaamaumau ai lau molimau patino, e aofia ai aafiaga patino na faamalosia ma tapue ai lau molimau i le Tama Faalelagi, Iesu Keriso, ma le Laua talalelei. I le isi koluma, tusi ai soo se manatu ma lagona e uiga i le ala e mafai ai ona e faasoa atu lenei molimau i isi i lou olaga i aso taitasi, e pei ona sa faia e Paulo.

Mafaufau e faasoa atu (ma tuu atu i tagata aoga e faasoa mai) molimau faapea foi ma mafaufauga, lagona, ma manatu e uiga i le molimau atu i auala masani. A o e faia ia mea, faamamafa atu le faataitaiga a le Faaola i le faasoaina atu o Lana molimau. E mafai ona faia lenei mea a o lei talanoaina pe ina ua uma foi ona talanoaina fesili nei.

O a ni auala na avea ai le Faaola ma se faataitaiga o le faasoa atu o le molimau e tusa lava po o le a le tali atu a isi? (tagai i le Mataupu Faavae ma Feagaiga 138:25–26).
Atonu e te lagona le faalotolotolua po o le popole e uiga i le molimau atu i le Faaola. E mafai faapefea ona fesoasoani ia te oe le mafaufau i lagona o le Faaola e uiga i au taumafaiga e molimau atu mo Ia?

Talatalaga ma Faamatalaga o Talaaga

O fea e mafai ona ou aoao atili ai e uiga po o le a le mea e tau o le molimau ma pe faapefea ona faamalosia la’u lava molimau?

Mo se fesoasoani ia malamalama po o le a le molimau ma pe faapefea ona faamalosia lau lava molimau, faitau le tusiga i Autu o le Talalelei “Molimau” (topics.ChurchofJesusChrist.org).

Mo ni faataitaiga i le ala na faamalosia ai e isi a latou molimau, mafaufau e matamata le vitio “Increase Your Testimony” (4:59), o loo maua i le ChurchofJesusChrist.org.

Aisea e taua ai ona ou lototoa i la’u molimau?

O Elder Quentin L. Cook o le Korama a Aposetolo e Toasefululua, na aoao mai:

O le “lototoa i le molimau ia Iesu” [ Mataupu Faavae ma Feagaiga 76:79 ] o le suega faigofie ma taua lea i le va o i latou o e o le a mauaina faamanuiaga o le malo selesitila ma i latou e o i le malo maualalo ifo o le terasitila. …

O le lototoa i a tatou molimau ia Iesu o se maa-laalaa lea e agai atu i le agavaa mo le alofa tunoa o le Faaola ma le malo selesitila.

(Quentin L. Cook, “Totoa i le Molimau ia Iesu,” Ensign po o le Liahona, Nov. 2016, 43)

E mafai faapefea ona ou faasoa atu la’u molimau i auala masani ma le le tau aotauina?

Mo ni faataitaiga i le auala e faasoa atu ai lau molimau i auala masani ma le le tau aotauina, mafaufau e matamata le vitio “Sharing Your Beliefs” (2:02), o loo maua i le ChurchofJesusChrist.org. E mafai foi ona e mafaufau e saili i le itulau i upega tafailagi “Faasoa Atu le Talalelei: Faasoa Atu i luga o Upega Tafailagi,” o loo maua i le ChurchofJesusChrist.org, pe faitau le tala “Ministering Principles: How to Share Testimony More Naturally” (Ensign, Mat. 2019, 8–11).

Galuega Faatino Faaopoopo e Aoao Mai Ai

We Believe in Christ: Personal Testimony

O le aafiaga o le molimau a Paulo ia Iosefa Samita

Mafaufau e fesoasoani i le vasega ia malamalama i le aafiaga o le molimau a Paulo i le faitauina o lagona o Iosefa Samita e uiga ia Paulo e pei ona faasoa mai i le Iosefa Samita—Talafaasolopito 1:21–25 . Aisea na lagona ai e Iosefa se sootaga ia Paulo? O le a sou manatu na faapefea ona faamalosia Iosefa i le molimau a Paulo? O a ni auala e fesootai ai aafiaga o Paulo ia te oe i aso nei? O a nisi o auala e mafai ona fesoasoani ai le molimau ma aafiaga a Paulo ia te oe?

//media.ldscdn.org/webvtt/scripture-and-lesson-support/new-testament-presentations-cur/1996-06-21-lesson-38-paul-a-chosen-vessel-en.vtt

O fesootaiga i le Sau, Mulimuli Mai ia te Au

O leSau, Mulimuli Mai ia te Au mo lenei vaiaso o loo faamamafa mai ai le upumoni faapea “o soo o Iesu Keriso e faasoa atu ma le lototoa a latou molimau” (tagai i le “Iulai 31–Aokuso 6. Galuega 22–28: ‘O Se Auauna ma se Molimau,’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2023). E valaaulia ai tagata uma e mafaufau i avanoa e faasoa atu ai a latou molimau. Mafaufau e fesili i le vasega pe na latou faia lenei mea ma valaaulia i latou na faia e faasoa mai o latou aafiaga. Afai e lei faia e tagata aoga lenei mea, faamanatu atu ia i latou o le a latou maua se avanoa e faia ai lenei mea i a latou suesuega o le Sau, Mulimuli Mai ia te Au .