Galuega 27–28

Mulimuli i le Perofeta

Ina ua uma ona faasalaina, sauaina, ma faafalepuipui sese i Ierusalema ma Kaisareia, sa talosaga le Aposetolo o Paulo e apili lona faamasinoga i luma o Kaisara i Roma. A o agai atu o ia i Roma, sa fetaiai Paulo ma i latou sa latou faatasi ma ni afā matautia, malepelepe le vaa, ma isi faigata. I nei tulaga, sa tuuina atu ai e Paulo ni fautuaga musuia ma ni lapataiga ina ia saogalemu ai tagata uma. O lenei lesona ua faamoemoe e fesoasoani ia te oe e lagona ai le taua o le mulimuli i fautuaga a le perofeta.

O le malamalama i anotusi o mau. O le malamalama ai i le anotusi o mau e saunia ai tagata aoga ia iloa savali a tusitala musuia. A malamalama tagata aoga i le faamoemoega musuia o le tusitala, ua sili atu ona latou saunia e maua mataupu faavae ma aoaoga faavae moni e tulaga ese le talafeagai ma o latou manaoga taitoatasi.

Sauniuniga a le tagata aoga: Valaaulia tagata aoga e suesue nisi o aoaoga i le taimi nei a perofeta o aso nei. Mo se faataitaiga, e mafai ona latou faitau pe matamata i se lauga o le konafesi aoao talu ai nei, faitau se tala tusia mai se perofeta po o se aposetolo i le mekasini o le Mo Le Malosi o le Autalavou , pe faitau ni nai mataupu i le tamaitusi Mo Le Malosi o le Autalavou: O Se Taiala mo le Faia o Filifiliga (2022). Valaaulia tagata aoga e mafaufau loloto pe o a ni o latou lagona e uiga i le tali atu i fautuaga a perofeta.

Gaoioiga e ono Mafai Ona Aoao Ai

Mulimuli i le perofeta

Faitau faamatalaga nei o fautuaga po o lapataiga faaperofeta e maua mai le tamaitusi Mo Le Malosi o le Autalavou (2022).

Mafaufau e faaali atu faamatalaga o fautuaga po o lapataiga e pei o nei mai le Mo Le Malosi o le Autalavou (tamaitusi, 2022) pe aumai ni kopi o lenei tamaitusi. O loo maua foi i luga o le polokalama o le Gospel Library.

“Fai lau vaega e fai ai lou fale o se nofoaga e mafai ai e tagata uma ona lagonaina le alofa o le Faaola” (itulau 12).

“Ua ia te oe mafuaaga faaletino ma faaleagaga e saili ai ma fiafia i le aoaoina. O le aotauina o se … vaega o lau sini e faavavau ia avea atili e faapei o le Tama Faalelagi” (itulau 31).

“Aloese mai soo se mea e tauemua mea paia po o mea e le mama. Aua e te auai i soo se mea e faanenefuina ai lau faamasinoga po o le nofouta i le Agaga” (itulau 18).

“Ua e faaalia e te faatauaina le upumoni a o e saili e … tu atu ma le lototoa mo le mea ua e iloa e sa’o—e tusa lava pe tatau ona e tu na o oe” (itulau 31).

O a ni uiga eseese ua e vaaia o faaalia e tagata e uiga i le mulimuli ai i fautuaga a perofeta? Aisea e ono filifili ai nisi o talavou e le gauai i fautuaga a perofeta? O a nisi o mea e ono tutupu ona o le le mulimuli i fautuaga a perofeta?

Mafaufau loloto pe faapefea ona e tali patino atu i le fautuaga ma le taitaiga a le perofeta. A o e suesueina le Galuega 27, saili musumusuga mai le Tama Faalelagi e ala i le Agaga Paia e maua ai uunaiga o le a fesoasoani e faamalosia ai lau tautinoga e mulimuli i fautuaga a le perofeta a le Alii.

O le fautuaga faaperofeta a Paulo

A o agai atu o ia i Roma e apili lana mataupu i luma o Kaisara, sa tuuina atu ai e Paulo ia fautuaga ma lapataiga ina ia saogalemu le au malaga i la latou faigamalaga.

Faamae’a le gaoioiga lenei e ala i le faitauina muamua o faamatalaga i le pito i luga o sikuea taitasi. Ona faitau lea o fuaiupu o loo avatu faatasi ai i le Galuega27 . Aotele le tala i le ogatotonu o pusa taitasi e ala i le tusia o se ata faigofie po o le tusia o se aotelega o upu ma faatinoga a Paulo. Ia mautinoa foi e faaaofia ai le tali atu o tagata i fautuaga a Paulo.

Tuu atu i tagata aoga le pepa tufa lenei. Mafaufau e tuu atu tagata aoga e galulue taitoalua pe i ni vaega toalaiti ma atofa atu ia i latou poloka eseese o mau. I se isi foi faiga, e mafai ona tuufaatasi ni tagata aoga se toafa, ma tofia i tagata taitasi se poloka mau e ese e faitau ma tusi se ata pe fai se aotelega. A maea, valaaulia tagata aoga e faaali ma faasoa atu a latou galuega ma talanoaina fesili nei i a latou vaega pe ma le vasega atoa.

O le malaga a Paulo i Roma

Sa aumai e fitafita Roma ia Paulo ma isi pagota i luga o se vaa pe a ma le 300 tagata na i ai. Sa telegese, faigata, ma matautia le latou faigamalaga ona sa faia a ua leva ona amata le tau toulu, i le taimi e agi soo ai afa malolosi. Faitau le Galuega 27:9–13	I le taimi o se afa matautia, sa faia ni taumafaiga e fonofono ai le vaa ma faamāmā le uta. Faitau le Galuega 27:20–26
Ina ua mavae aso e 14 o le afa matautia, sa latou taumafai ai se faiga matua faigata lava e tulaueleele ai. Sa lafo e seila le taula ma sa mananao e lafoai le vaa ona sa latou manatu o le a fatia i luga o maa. Faitau le Galuega 27:30–36	Ina ua mavae le faamāmāina atili o le vaa, sa latou taumafai loa e tuta le vaa. Faitau le Galuega 27:41–44

• O le a sou manatu e faapefea ona e tali atu i aoaoga a Paulo pe ana faapea sa e i ai i luga o le vaa? Aisea?

• O a upumoni na e aoaoina mai mea ua e suesueina?

Fesoasoani i le vasega e faailoa mai upumoni sa latou aoaoina mai aoaoga a Paulo. Atonu o nisi o nei mataupu faavae e faapea afai tatou te le amanaiaina lapataiga ma fautuaga a auauna a le Alii, ua tatou tuuina lea o i tatou lava i se tulaga matautia ma afai tatou te usitaia fautuaga ma lapataiga a auauna a le Alii, ona faataunuuina lea e le Alii o Ana folafolaga ia i tatou.

• O le a se mea ua e iloa e uiga i perofeta e tuuina atu ia te oe le talitonuga mautinoa i a latou fautuaga ma aoaoga?

Ua aoao mai le Alii e faapea, e ala mai i le perofeta o le a tatou faalogo ai i Lona siufofoga (tagai i le Mataupu Faavae ma Feagaiga 1:37–38) ma o Ana lapataiga o le a tele ina oo mai e ala mai i Ana perofeta filifilia (tagai i le Mataupu Faavae ma Feagaiga 1:1–4). I o tatou aso, tatou te lagolagoina uma uso o le Au Peresitene Sili ma le Korama a Aposetolo e Toasefululua i le avea ai o ni perofeta, tagatavaai, ma talifaaaliga. Faaaoga sina taimi e mafaufau loloto ai pe aisea e aapa mai ai le Alii ia i tatou e ala mai i perofeta ma le mea ua faaalia e lenei mea e uiga i Ona lagona ia i tatou.

• O le a se mea ua e aoaoina e uiga i le Alii mai fautuaga ma lapataiga o loo Ia tuuina mai e ala mai i Ana perofeta?

• O a ni aafiaga ua e iloa po o isi foi e te iloa i le filifili ai pe mulimuli pe fulitua i fautuaga mai le perofeta?

Valaaulia tagata aoga e faasoa mai o latou manatu.

Mo le gaoioiga lenei, e mafai e tagata aoga ona toe faamanatu ma faaaoga a latou sauniuniga mo lenei lesona. Mafaufau pe faapefea ona maua e tagata aoga ia fautuaga mai perofeta. Fuafua pe o le a manaomia ona aumai ni kopi pepa o punaoa i le vasega pe mafai foi e tagata aoga ona maua i auala faaeletonika.

Faaaoga ni nai minute e saili ai ma suesue i fautuaga po o lapataiga lata mai nei ua tuuina mai e le Alii ia i tatou e ala mai i Ana perofeta. O nisi nofoaga e saili ai e ono aofia ai lauga o konafesi aoao talu ai nei, o le mekasini o le Mo Le Malosi o le Autalavou , po o le tamaitusi Mo Le Malosi o le Autalavou (2022). E mafai ona e faaaofia ai saunoaga mai perofeta na tuuina atu i le amataga o le lesona.

• E faapefea ona avea lenei fautuaga mai le perofeta a le Alii ma faamaoniga o le tausiga, popolega, ma le alofa mutimutivale o le Alii ia te oe?

• Afai ua e mulimuli i lenei fautuaga i lou olaga, ua faapefea ona faamanuiaina oe e le Tama Faalelagi ona o lou usiusitai?

• Afai e i ai ni auala ua e le amanaiaina ai pe le usitaia ai lenei fautuaga, aisea e ono valaaulia ai oe e se Faaola alofa e amata ona mulimuli i lenei fautuaga? E mafai faapefea ona faaleleia ai lou olaga?

Mafaufau e valaaulia tagata aoga e faasoa mai le fautuaga na latou suesueina ma o latou manatu ma lagona e uiga i ai.

O le mulimuli ai i fautuaga faaperofeta i lou olaga

• O a nisi o mafuaaga e te faafetai ai mo fautuaga ma lapataiga faaperofeta i lou olaga?

Saili musumusuga mai le Tama Faalelagi e ala i le Agaga Paia e fesoasoani ia te oe ia iloa auala e faaali atu ai e le Alii e fiafia o Ia i lou usiusitai i Ana perofeta, faapea foi ma auala e mafai ona Ia uunaia ai oe ia faaleleia atili oe lava. Tusi i lalo mafaufauga ma uunaiga e oo mai i lou mafaufau, ma tautino atu e mulimuli ai. Atonu e aoga le faasoa atu o ou lagona i se tagata o le aiga o mafana le lua mafutaga po o se taitai faatuatuaina o le Ekalesia ma valaaulia i latou e fesoasoani ia te oe e mulimuli i na uunaiga.

Mafaufau e faaiu i le molimau e uiga i le faamanuiaga ma le taua o le mulimuli i fautuaga ma lapataiga a perofeta a le Alii.

Manatu ma Talaaga o Faamatalaga

E faapefea e le mulimuli i fautuaga a perofeta ona aafia ai au?

Na aoao mai e Peresitene Henry B. Eyring o le Au Peresitene Sili mea nei:

O le filifiliga e aua nei taliaina fautuaga faaperofeta e suia ai lava le faavae o loo tatou tutu ai i luga. O le a matuai sili lava ona matautia. O le le mafai ona taliaina o fautuaga faaperofeta e faaitiitia ai lo tatou malosiaga e taliaina ai fautuaga musuia i le lumanai. O le taimi sili lava sa ao ona faia ai le faaiuga e fesoasoani ia Noa e fau le vaa o le taimi muamua lava na ia fai atu ai. O taimi uma sa ia fai atu ai i le mavae ai o lena taimi muamua, o taimi taitasi foi e toilalo ai e tali atu na faaitiitia ai le lagonagofie o le Agaga. Ma o taimi uma lava sa foliga mai o lana talosaga sa sili atu ona faavalevalea, ina seia oo i le taimi ua sau ai le timu. Ae oo atu i lena taimi ua tuai.

O taimi uma i lo’u olaga na ou filifili ai e faatuai ona mulimuli i se fautuaga musuia pe filifili faapea e le aofia ai au, sa oo ina ou iloa ai sa ou tuuina au lava i se ala e pagatia ai. O taimi uma lava na ou faalogo ai i fautuaga a perofeta, ma lagonaina i se tatalo e faamautu ai, ma mulimuli i ai, na ou iloa ai lo’u agai atu i le saogalemu.

(Henry B. Eyring, “Finding Safety in Counsel,” Ensign, Me 1997, 25)

Ona e agalelei tele le Alii, ua Ia valaauina ai Ana auauna e lapataia tagata e uiga i tulaga matautia. O lena valaau e lapatai atu ua atili faigata ma sili atu ona taua ona o le mea moni e faapea o lapataiga e aupito sili ona aoga ua faatatau lea i mea matautia ia e le i mafaufau i ai tagata o ni mea ua moni.

(Henry B. Eyring, “A Voice of Warning,” Ensign, Nov. 1998, 32)

Galuega 27:9 . O le a le uiga o le “o lea ua mavae atu le anapogi”?

“O le anapogi” atonu sa faasino i le aso paia o Iutaia e ta’ua o le Aso o le Togiola, lea e faailoga ai le amataga o le vaitau lea e masani ona faapea e le saogalemu ai ona malaga i le Sami o Metitirani ona o afa fulifao. O le Aso o le Togiola e masani ona faia i le faaiuga o Setema po o le amataga o Oketopa.

Galuega 27:28 . O le a le umi o le “gafa”?

O le gafa o le mamao mai le tamaimai lima aupito umi o le tasi lima i le tamaimai lima aupito umi o le isi lima pe a faaloaloa lima. O le gafa e tutusa ma le fa kupita.

Gaoioiga Faaopoopo e Aoao Ai

Galuega 28 . E mafai e le Atua ona liliu tofotofoga i ni faamanuiaga

Mafaufau e valaaulia tagata aoga e suesue i aafiaga eseese a Paulo o loo faamaumauina i le Galuega 28:1–6 ; 28:7–14 ; 28:16–24 ; ma le 28:30–31 ina ia fesoasoani ia latou malamalama i le upumoni e faapea afai ua tatou faamaoni, e mafai ona fesoasoani le Atua ia i tatou e liliu tofotofoga i ni faamanuiaga mo i tatou ma isi, e pei ona maua i le Galuega 28 . E mafai e tagata aoga ona vaavaai i nisi o luitau eseese na feagai ma Paulo ma le ala na ia tumau faamaoni ai. O a nisi o luitau o loo tofotofoina ai le faatuatua o le autalavou i aso nei? O le a se faamaoniga o faaalia ai o loo faaauau pea ona liliu e le Atua ia tofotofoga i ni faamanuiaga?