Iloiloga 16 o le Atamai i Aoaoga Faavae

Tauloto Mau Faasino ma Fasifuaitau Autu o Tusitusiga Paia

O le manatuaina o fuaitau o mau atoa ma mea o loo aoaoina mai ai e mafai ona fesoasoani ia te oe i le tele o auala. O lenei lesona ua faamoemoe e fesoasoani ia te oe e tauloto ai nisi o mau faasino o mau mo le atamai i aoaoga faavae ma fasifuaitau autu o mau o le Feagaiga Fou.

O le faaaogaina o ituaiga faiga eseese e faaauai ai tamaiti aoga. O le faaaogaina o ni auala eseese faafaiaoga e mafai ona fesoasoani i tamaiti aoga e aoao atili ai ma le mataalia. Fetuunai anomea o le lesona ina ia fia auai i ai tamaiti aoga ma sili atu ai ona fesoasoani ia i latou i le aoaoina.

Sauniuniga a le tamaitiiti aoga: Valaaulia tamaiti aoga e faitau se tasi pe lua o fuaitau o le atamai i aoaoga faavae sa latou suesueina. Lu’i i latou e tauloto le mau faasino ma le fasifuaitau autu o le mau pe, afai e mafai, le fuaitau atoa o le atamai i aoaoga faavae.

Gaoioiga e ono Mafai Ona Aoao Ai

O se lesona o le fuaitau o le atamai i aoaoga faavae atonu e manaomia ona aoao atu e suitulaga i lenei lesona toefaamanatu. Tagai i le faasologa faatulagaina o lesona ua saunia e le faatonu po o le taitai faamaopoopo o le eria po o le risone ina ia mautinoa o lesona taitasi o fuaitau o le atamai i aoaoga faavae o le a aoaoina a o faagasolo ia vasega seminare.

• Aisea e ono e taulotoina ai nisi o mea nei: upu o pese, se faasologa o ni mea e fai, po o faamatalaga e uiga i tagata taaalo po o tagata faafiafia?

• O a nisi faataitaiga o mea e te taulotoina? Aisea e te taulotoina ai nei mea?

Mafaufau e faasoa atu se faataitaiga patino o le taulotoina o se mea ma mafuaaga ua alai ona e taulotoina.

• O a nisi o mafuaaga e tauloto ai mau o tusitusiga paia?

Faitau i le faamatalaga lenei a Elder Richard G. Scott (1928–2015) o le Korama a Aposetolo e Toasefululua, pe matamata le vitio “He Lives,” o loo maua i le ChurchofJesusChrist.org, mai le faailotaimi 5:27 seia oo i le 6:05. Vaavaai mo ni faamanuiaga se tolu pe sili atu e mafai ona tuuina mai e mau ua taulotoina.

Ou te fautuaina e te taulotoina mau e pai atu i lou loto, ma faatumulia ai lou agaga i le malamalama. A faaaoga tusitusiga paia i le ala na finagalo le Alii e faamaumauina ai, o loo i ai ia i latou le mana moni lea e le mafai ona fesootai mai pe a toe tau faaupuina. O nisi taimi a i ai se manaoga taua i lo’u olaga, ou te toe faamanatuina i lou mafaufau ia mau ia na tuuina maia ia te au le malosi. E i ai le mafanafana tele, taitaiga, ma le mana lea e tafe mai i tusitusiga paia, ae maise lava i fetalaiga a le Alii.

(Richard G. Scott, “He Lives,” Ensign, Nov. 1999, 87–88)

• O a nisi o faamanuiaga ua e maua mai le taulotoina o mau po o fasifuaitau autu mai tusitusiga paia?

• Na faapefea e le taulotoina o afioga a le Alii o loo tusia i tusitusiga paia ona fesoasoani e te lagona ai le latalata atili atu i le Tama Faalelagi ma Iesu Keriso?

Afai e manaomia e tamaiti aoga se fesoasoani faaopoopo ina ia malamalama ai i faamanuiaga o le taulotoina o mau, mafaufau e faasoa atu le tusiga “Why Memorize Scriptures?” (Jared R. Moon, New Era, Sept. 2014, 17).

Kata e aoao ai

O se tasi o auala e tauloto ai mau faasino o mau ma fasifuaitau autu o le faaaoga lea o kata faamanatu. Ina ia fatuina ni kata e aoao ai, gaugau faaafa ma toe faaafa se fasi pepa ina ia maua ai ni vaega se fa. Tatala le pepa, ma oti i luga o laina na gagau ai ina ia maua ai ni kata faamanatu se fa.

Afai e manaomia, sui mau faasino nei ma fasifuaitau autu i mau faasino ma fasifuaitau autu o fuaitau o le atamai i aoaoga faavae na suesueina e tamaiti aoga.

Tusi mau faasino nei i le itu e tasi o kata e aoao ai taitasi. I le isi itu, tusi ai le fasifuaitau autu o tusitusiga paia.

Mau Faasino	Fasifuaitau Autu o Tusitusiga Paia
Efeso 1:10	“I le tisipenisione o le atoaga o taimi, o le a mafai ona ia faapotopoto faatasi ai mea uma ia Keriso.”
Efeso 2:19–20	O le Ekalesia o loo ua “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.”
2 Tesalonia 2:1–3	“O Le aso o Keriso … o le a le oo mai, seia muai ona taunuu o le tete’a ese.”
2 Timoteo 3:15–17	“O tusi paia … e mafaia ona faapoto ai ia te oe e iu ai i le faaolataga.”

Ia fatufatuai ni auala e fesoasoani ia te oe e tauloto ai. Filifili se tasi o manatu nei pe fatu sou lava manatu.

• Suesue oe lava ia: Uu kata faamanatu ina ia mafai ona e vaai atu i le na o le mau faasino po o le fasifuaitau autu o mau. Taumafai e tali i le fasifuaitau autu o le mau po o le mau faasino talafeagai. Toe fai pea mo ni nai taimi i mau faasino taitasi ma fasifuaitau talafeagai.

• Iloiloga i feau tusitusi: Lafo i se feau tusitusi se mau faasino i au uo i lau vasega seminare ma vaai po o ai e toe tali atu i le fasifuaitau autu talafeagai sao.

• Gaoioiga faafetaui: Fai paga ma se isi tagata o le vasega po o se tagata o le aiga. Fai i se tasi tagata ia faaū i luga a latou kata faamanatu o i ai le mau faasino ae o le isi tagata ia faaū i luga le fasifuaitau autu o le mau. Faafetaui le fasifuaitau autu o mau i le mau faasino fesootai e ala i le tuu o le kata faamanatu o i ai le fasifuaitau autu o mau i luga o le kata faamanatu o i ai le mau faasino.

• Faaaoga le polokalama: Faaaoga le polokalama o le Atamai i Aoaoga Faavae e fesoasoani i le taulotoinao mau.

Mafaufau e vaevae tamaiti aoga i vaega taitoafa. Valaaulia vaega taitasi e faaaoga se seti e tasi o kata faamanatu ma vaevae lenei seti i tagata o le vaega. Faitau se fasifuaitau autu o se mau i le vasega. Ona tatau lea i le tamaitiiti aoga i vaega taitasi o loo i ai le kata faamanatu o i ai le mau faasino e fetaui i ai ona tamo’e e ave le kata faamanatu lea i le faiaoga. Lui vaega taitasi e aumai le kata faamanatu sa’o i le faiaoga i totonu o se taimi faatapulaaina (mo se faataitaiga, o le lima sekone). Fautuaina tamaiti aoga e fesoasoani i isi tagata o a latou ‘au. E mafai foi ona valaaulia tamaiti aoga e fesuiai kata faamanatu ma se isi tagata i le latou vaega e fesoasoani ai ia i latou e aoao uma mau faasino ma fasifuaitau autu o mau.

Filifili se tasi o fuaitau o le atamai i aoaoga faavae.

• Aisea o le a e manao ai e tauloto lenei fuaitau po o le fasifuaitau autu o le mau?

• E mafai faapefea ona fesoasoani ai e faalolotoina lou malamalama ia Iesu Keriso ma Lana talalelei?

Afai e i ai se taimi o totoe, e mafai e tamaiti aoga ona fai ni kata faamanatu mo isi mau faasino ma fasifuaitau autu o mau.