Iloilo Lou Aoaoina 7

Galuega 1–28

O loo fiafia tamaitai talavou lava latou i Kana.

O lenei lesona ua faamoemoe e fesoasoani ia te oe e iloilo ai sini na e faatuina faatasi ai ma le aoaoina ma le tuputupu ae na e mauaina mai au suesuega o le Feagaiga Fou.

Sauniuniga a le tagata aoga: Valaaulia tagata aoga e o mai saunia e faasoa mai ni faataitaiga mai le Tusi o Galuega a tagata o e na liua ia Iesu Keriso.

Gaoioiga E Ono Mafai Ona Aoao Ai

O lenei lesona ua faamoemoe e fesoasoani i tagata aoga e iloilo ai sini ua latou faatutuina, o lo latou agavaa e faamatalaina ai aoaoga i le Feagaiga Fou, po o le auala ua suia ai o latou uiga faaalia, naunautaiga, ma le agavaa e ola ai i le talalelei. O le suesuega a le vasega i le Galuega 1–28 sa ono faamamafaina ai isi upumoni e ese mai lo o upumoni i nei gaoioiga. Afai o lea, e mafai ona fetuunai ia gaoioiga ina ia aofia ai na upumoni.

O loo maua autu iloilo faaopoopo i le vaega o le “Gaoioiga Faaopoopo e Aoao Ai”.

Pe mafai ona suia tagata?

Mafaufau faapea ua ta’u atu e lau uo ia te oe e i ai mea e manao o ia e suia e uiga ia te ia lava, ae na te le manatu e mafai ona ia faia na suiga.

E faapefea ona e tali atu i ai?
E faapefea ona aafia lou olaga i le iloa ai e mafai ona e suia e ala i le Togiola a Iesu Keriso?

Faamanatu i tagata aoga a latou sauniuniga mo le vasega.

Toe mafaufau i tala mai le tusi o Galuega o loo faapupula mai ai le ala e mafai ai e tagata ona suia mo le lelei sili atu a o latou o mai ia Keriso ma avea ma Ona soo.

Afai e manaomia, mafaufau e toe faamanatu se tasi pe sili atu o faataitaiga nei.

Tagata na liliu i le Ekalesia: Galuega 2:14, 36–47
O le eunuka Aitiope: Galuega 8:26–40
Saulo (o lē na avea ma Paulo): Galuega 9:1–22
Konelio: Galuega 10:1–8, 24–25, 44–48
O le leoleo o le falepuipui o loo leoleoina Paulo ma Sila: Galuega 16:25–36

I le faaaogaina o se tasi o nei faataitaiga po o se isi mai le tusi o Galuega, saunia se tali i lau uo e le talitonu e mafai ona suia o ia. Ia aofia ai mea nei:

Faamaoniga o se tagata po o tagata ua suia i le fesoasoani a le Faaola.
O le ala na fesoasoani ai le Faaola ma auauna na Ia auina mai i le liuaina.
O le mea na faia e le tagata po o tagata e faalagolago ai i le Alii ma Ana auauna.

Faalogo a o faasoa mai e tagata aoga a latou tali i ni paga taitoalua pe i ni vaega laiti. Afai latou te manaomia ni faatonuga faaopoopo e uiga i le liua ia Iesu Keriso, mafaufau e faitau faatasi vaega o le Galuega 9:3–20 ma valaaulia tagata aoga e sue ni auiliiliga e fesoasoani ia latou malamalama ai pe mafai faapefea e tagata ona suia e ala i le fesoasoani a le Faaola.

Mafaufau loloto i lou lava liua ia Iesu Keriso. Mafaufau i valaaulia e sui pe faaleleia na e lagonaina mai le Alii a o e suesue ai i le tusi o Galuega. Tali fesili nei i totonu o lau api talaaga mo suesuega.

Faaali atu fesili nei mo tagata aoga e vaai i ai a o tusitusi i a latou api talaaga.

O le a se mea ua e iloa e uiga ia Iesu Keriso e faaosofia ai oe ia alofa ma mulimuli atoatoa atili ia te Ia?
I le aluga o le masina ua tuanai, o a ni suiga ua e lagonaina e ala i musumusuga a le Agaga Paia e ao ona e fai? Na faapefea ona e tali atu?
Na faapefea ona faamanuiaina oe e le Tama Faalelagi mo au taumafaiga? O le a se mea na e faia na pito i tele ai le eseesega?
O le a, pe afai o i ai se pogai, ua faafaigata ai ona talia valaaulia e sui ma faaleleia? E mafai faapefea ona e sailia se fesoasoani faaopoopo mai le Tama Faalelagi?

Faaauau ona e saili mo musumusuga mai le Tama Faalelagi e ala mai i le Agaga Paia a o e suesueina lenei lesona. Taumafai e faailoa mea e finagalo o Ia e te faia e suia ai ma liua atili ai ia Iesu Keriso. Filifili se tasi o gaoioiga nei e faamaea ao e tomanatu i le auala e faalatalata atili atu ai ia Keriso.

Gaoioiga A: O uluai mataupu faavae ma sauniga o le talalelei a Iesu Keriso

I le [tusi o] Galuega, e toatele tagata na maua le fesoasoani faalelagi e suia ma liua atili ai ia Iesu Keriso e ala i le mauaina o uluai mataupu faavae ma sauniga o le talalelei.

O le Taiala i Tusitusiga Paia o loo faamalamalama mai ai le ala e fesoasoani ai nei mataupu faavae ma sauniga ia i tatou ia liua ia Iesu Keriso.

O le salamo, papatisoga mo le faamagaloga o agasala, o le mauaina o le Agaga Paia e ala i le faaee atu o lima, ma le faatuatua faifai pea i le Alii o Iesu Keriso ua faaatoatoaina ai le liuaina. O le a suia se tagata natura i se tagata fou faapaiaina ma mama, ua toe fanaufouina ia Keriso Iesu ( 2 Kor. 5:17 ; Mosaea 3:19).

(O Le Taiala i Tusitusiga Paia, “ Liliuga, Liliu Maiscriptures.ChurchofJesusChrist.org)

Toe manatunatu i le tala na e filifilia lea na faapupula mai ai se tasi ua suia e ala i le fesoasoani a le Alii.

O le a le matafaioi a uluai mataupu faavae ma sauniga o le talalelei i lo latou liua?
Na faapefea e uluai mataupu faavae ma sauniga o le talalelei ona fesoasoani ia te oe po o isi ia liua atili ai i le Faaola?

Mafaufau faapea ua fesili atu faifeautalai i le lotoifale mo sau fesoasoani i se tasi o loo latou aoaoina. Latou te mananao ia te oe e faasoa mai pe mafai faapefea e uluai mataupu faavae ma sauniga o le talalelei ona fesoasoani e faamalosia le liua ia Iesu Keriso ma valaaulia Lana fesoasoani e faia suiga manaomia i o tatou olaga. Tusi se faamalamalamaga mo lenei tagata e peiseai o loo e talanoa sa’o ma i latou. Faaaoga se tasi pe sili atu o faataitaiga mai le [tusi o] Galuega ma soo se aafiaga patino e te lagona o le a aoga.

Tuu atu i tamaiti aoga se taimi e tusi ai i lalo o latou manatu. Ona valaaulia lea o i latou e tuu atu a latou faamalamalamaga i se paga. Savalivali solo ma faalogo i a latou faamalamalamaga. Afai e manaomia e tamaiti aoga nisi aoaoga e uiga i uluai mataupu faavae ma sauniga o le talalelei, mafaufau e faaaoga fuaitau nei: Galuega 19:1–7 ; 2 Nifae 31:13–21 ; 3 Nifae 27:13–22 .

Gaoioiga E: Suesuega o tusitusiga paia ma le liliuga

O se tasi o faatinoga taua e mafai ona tatou faia e faamalosia ai lo tatou liua ia Iesu Keriso o le suesue e le aunoa i tusitusiga paia. Mafaufau pe faapefea e tala nei mai le tusi o Galuega ona faaalia ai le taua o le suesueina o tusitusiga paia i le liuaina.

Filipo ma le tagata Aitiope: Galuega 8:26–40

Paulo ma le Au Paia i Tesalonia ma Perea: Galuega 17:1–14

Mafaufau loloto pe na faapefea ona fesoasoani le suesueina o tusitusiga paia i lou liua i le Faaola.

Manatu faapea na talosagaina oe e lou taitai o Alii Talavou po o Tamaitai Talavou e fesoasoani i le autalavou i lau uarota po o le paranesi e suesue i tusitusiga paia ma faamalosia ai lo latou liua ia Iesu Keriso. O le a se punaoa e mafai ona e fatufatuina e faamalosiau ai i latou? Faaaoga ni nai minute e faatulaga ai lau punaoa i lau api talaaga mo suesuega. E mafai ona faapea o se vitio, se tala tusia, se lauga, se upega tafailagi, po o se isi punaoa.

O lau punaoa e mafai ona aofia ai soo se tasi o mea nei:

O se faataitaiga mai le [tusi o] Galuega po o se isi tusi o tusitusiga paia o loo faaalia ai le taua o le suesueina o tusitusiga paia.
O se faataitaiga po o se mamanu o tomai tau tusitusiga paia e te faaaogaina e fesoasoani ia te oe, po o se faamatalaga o le auala e te faaaogaina e suesue ai.
O se faamatalaga o se aafiaga na fesoasoani ai le suesueina o tusitusiga paia ia te oe po o se tasi e te iloa e liua atili ai i le Faaola.
O lau molimau patino i le mana o le suesueina o tusitusiga paia.

Valaaulia tagata aoga e fai mea nei i a latou api faamaumau mo suesuega.

Saili le fesoasoani a le Tama Faalelagi e ala i le Agaga Paia a o e tusia i lalo soo se faatinoga e te lagona e tatau ona e faia ina ia liua atili ai ia Iesu Keriso. O le a fesoasoani le Faaola ia te oe a o e taumafai e mulimuli i nei uunaiga. Mafaufau e faasoa atu ou uunaiga i se matua po o se taitai faatuatuaina o le Ekalesia. Fai atu ia i latou e fesoasoani mai ia te oe ina ia mulimuli ai i nei uunaiga.

Fautuaina le vasega e faatino uunaiga na latou maua mai le Tama Faalelagi e ala i le Agaga Paia. Molimau atu o le a fesoasoani le Atua ia i latou a o latou saili e mulimuli i na uunaiga.

Gaoioiga Faaopoopo e Aoao Ai

Galuega 10 – 11 ; Galuega 15 ; Galuega 27 . Faaaliga

Mafaufau e iloilo mea ua iloa e tagata aoga e uiga i le ala e oo mai ai faaaliga i taitai o le Ekalesia. Valaaulia i latou e iloilo faamatalaga na latou tusia mai lesona o loo aofia ai le Galuega 10 ; 11 ; 15 ; ma le 27 . Tuu atu i tagata aoga se avanoa e faatulaga ma folasia ai o latou manatu. O se tasi o auala o le tuu atu lea i tagata aoga e tusi se tusiga puupuu mo le mekasini o le Mo le Malosi o le Autalavou o loo faamalamalama mai ai auala e maua ai faaaliga mo le Ekalesia atoa ma pe aisea e taua ai ona malamalama i nei upumoni.

O le mauaina o le filemu ia Keriso e ala i puapuaga

Valaaulia tagata aoga e toe manatu i tagata taitoatasi mai le [tusi o] Galuega sa mafai ona maua le filemu ia Keriso e ui i puapuaga, e pei o Peteru ma Ioane i le Galuega 5:40–42, Setefano i le Galuega 6 – 7, Peteru ma isi tagata o le Ekalesia i le Galuega 12:1–19, po o Paulo i le Galuega 22 – 28 . Valaaulia tagata aoga e faasoa mai ni aafiaga pe na faapefea ona latou maua le filemu ia Keriso i taimi o puapuaga. E mafai ona latou faailoa mai faatinoga mai tala i le [tusi o] Galuega ma aafiaga patino e mafai ona fesoasoani ia i latou e feagai ai ma tofotofoga i le lumanai. Valaaulia i latou e saili musumusuga mai le Tama Faalelagi e ala i le Agaga Paia ma fai se fuafuaga mo mea o le a latou faia i taimi o nei tofotofoga i le lumanai e maua ai le filemu ia Keriso.