Iloilo Lou Aoaoina 6

Mataio 26–28; Mareko 14–16; Luka 22–24; Ioane 13–21

Young men and young women attend an early morning seminary class in Argentina.

O lenei lesona ua faamoemoe e fesoasoani ia te oe e iloilo ai sini na e faatutuina ma lou tuputupu a’e patino na e mauaina i le gasologa o lou suesueina o le Feagaiga Fou.

Faaaogaina o ni metotia faafaiaoga eseese. E tele lava ina sili atu le pisi o tagata aoga pe a faaaoga e faiaoga ni metotia faafaiaoga eseese. Ia naunau e faaaoga metotia fou ma sauni e fai ni fetuunaiga i le taimi o le lesona pe afai ua faalefia auai tagata aoga pe foliga mai foi e le o fesoasoani se gaoioiga ia i latou e taunuu ai i taunuuga moomia.

Sauniuniga a le tagata aoga: Valaaulia tagata aoga e mafaufau i o latou aafiaga i le suesueina o le afa muamua o le Feagaiga Fou ma le galuega a Iesu Keriso. Faamalosiau i tagata aoga e o mai saunia ma se mea na latou aoaoina pe lagonaina maiEvagelia e fa (Mataio, Mareko, Luka, ma Ioane) e taua ia i latou.

Gaoioiga E Mafai Ona Aoao Mai Ai

Ua faamoemoeina lenei lesona e fesoasoani i tagata aoga e iloilo sini na latou faatutuina, o lo latou gafatia e faamatala aoaoga i le Feagaiga Fou, ma pe o suia faapefea o latou uiga, manaoga, ma gafatia o le ola i le talalelei. O le suesuega a le vasega i le Mataio 26–28; Mareko 14–16; Luka 22–24; Ioane 13–21 atonu sa faamamafaina ai isi upumoni nai lo upumoni o loo i gaoioiga o loo mulimuli mai. Afai o lea, e mafai ona fetuunai gaoioiga e faaaofia ai na upumoni.

Alofa i le Atua ma lou loto atoa

Afai na maua e le vasega se avanoa e toe manatunatu ai i lo latou alolofa i le Atua a o latou suesueina le Mataio 22 ma le Ioane 14:15, e mafai ona fesoasoani lenei gaoioiga i le vasega e iloilo ai pe na faapefea ona latou tuputupu a’e ma faateleina lo latou alolofa mo le Atua.

Tusi se fatu i luga o le laupapa. Valaaulia se tagata aoga naunautai e faasoa mai se mea se tasi na latou aoaoina pe lagonaina e uiga ia Iesu Keriso ua faateleina ai lo latou alolofa mo Ia. Fautuaina le tagata aoga muamua e filifili se tagata aoga lona lua e faasoa mai se isi mea latou te fiafia i ai e uiga i le Faaola. Faaauau le gaoioiga lenei faatasi ma tagata aoga e filifili nisi tagata aoga seia oo ina maua e tagata aoga uma se avanoa e faasoa mai ai. Lisi tali a tagata aoga e uiga i lo latou alolofa mo Iesu Keriso i totonu po o le faataamilo i le fatu i luga o le laupapa.

Atonu e manaomia e tagata aoga sina taimi e mafaufau ai e uiga i a latou tali i fesili nei. Valaaulia tagata aoga e tusi i lalo a latou tali, ona fai atu lea i tagata o le vasega e naunau e faasoa mai.

Na faapefea e le aoao atili e uiga i le alofa o le Tama Faalelagi ma Iesu Keriso mo oe ona faaosofia ai oe e taumafai e alofa atili ia i Laua?
Na faapefea ona fesoasoani lou malamalama i lo La‘ua alofa mo oe e faateleina ai lou alofa mo isi tagata?

Manatua na aoao mai le Faaola tatou te faaali atu le alofa ia te Ia e ala i le tausia o poloaiga (tagai i le Ioane 14:15). Na saunia e Iesu Keriso le faataitaiga atoatoa o le faaalia o le alofa i le Tama Faalelagi e ala i le usiusitai i poloaiga uma (tagai i le Ioane 14:31).

Ina ua e suesueina le Ioane 14:15, atonu na e tusia i lau apitalaaga e uiga i ou manaoga e tausi poloaiga ma ou faamoemoega, po o au mafuaaga, mo le faia o lena mea. Afai o lea, toe faamanatu mea na e tusia.

Tuu atu i tagata aoga se taimi e manatunatu ai i fesili nei. Atonu e le talafeagai le valaaulia o tagata aoga e faasoa mai ni tali patino. Peitai, e mafai ona valaaulia tagata aoga e faasoa mai ni manatu faalauaitele e faatatau i fesili.

O a ni ou lagona e uiga i ou manaoga ma faamoemoega o i ai nei e tausia poloaiga ina ia faaalia ai lou alofa mo le Tama Faalelagi ma Iesu Keriso? Faatusatusa ou manaoga ma faamoemoega i le taimi nei i le mea sa e i ai i le amataga o le tausaga.
O a ni suiga ua e matauina i lou alofa mo le Tama Faalelagi ma Iesu Keriso a o e suesueina le Feagaiga Fou? Afai ua e matauina ni suiga, o le a sou manatu i se mea na taitai atu ai i nei suiga?
Pe o i ai nisi suiga faaopoopo e te lagona e manaomia ona e faia ina ia faaali atu ai pe faateleina ai lou alofa mo le Tama Faalelagi ma Iesu Keriso?

Togiola a Iesu Keriso: Faamata e faape’i lou olaga pe ana leai?

O le faamoemoega o lenei gaoioiga o le tuu atu lea i tagata aoga o le avanoa e iloilo ai lo latou malamalama ma le manaomia o le Togiola a Iesu Keriso.

Mafaufau e faaali atu se ata e pei o lea a o mafaufau loloto tagata aoga i a latou tali. O le faaaogaina o ata i le vasega e mafai ona fesoasoani i tagata aoga e taulai ai o latou manatu.

Mafaufau i mea ua e aoaoina e uiga i le taulaga togiola a Iesu Keriso mai le Feagaiga Fou. Mafaufau loloto mo sina taimi po o le a le uiga o Iesu Keriso ma Lana taulaga togiola ia te oe lava ia. Mafaufau pe faape’i lou olaga e aunoa ma nei tulaga.

Illustration of Jesus praying in the Garden of Gethsemane as he performs the Atonement.

O lea la ua e faaaluina se taimi e mafaufau loloto ai, tusifaamaumau nisi o ou manatu e ala i le tali i fesili nei. Ia aofia ai faamatalaga anoa i au tali, ma ia aofia ai fuaitau o mau na faia se aafiaga ia te oe e uiga i le taulaga a Iesu Keriso.

Mata e ese faapefea lou olaga pe ana le mafatia le Faaola mo oe i Ketesemane ma maliu mo oe i luga o le satauro i Kalevaria?
Mata e ese faapefea lou olaga pe ana faapea e le faatoilaloina e Iesu Keriso le oti e ala i Lona Toetu mamalu?
O le a le mea o le a tupu i le ata o le faaolataga a le Tama Faalelagi e aunoa ma le taulaga togiola a Iesu Keriso?

O Peresitene M. Russell Ballard, Sui Peresitene o le Korama o Aposetolo e Toasefululua sa aoao mai:

E faafetaia ai, i le faataunuuina ma le lototele e Iesu Keriso o lenei taulaga i Ierusalema anamua. … Ae peitai sa puapuagatia Iesu ma le loto i ai ina ia mafai ona maua e i tatou uma le avanoa e toe faamamaina ai—e ala i le faatuatua ia te Ia, salamo i a tatou agasala, ia papatisoina e ala i le pule sao o le perisitua, mauaina o le meaalofa faamama o le Agaga Paia e ala i le faamauga, faapea ma le taliaina o isi sauniga uma e talafeagai ai. A aunoa ma le Togiola a le Alii, e leai ma se tasi o nei faamanuiaga e avanoa mai mo i tatou, ma e le mafai ona tatou agavaa ma saunia e mau i le afioaga o le Atua.

(M. Russell Ballard, “O le Togiola ma le Taua o le Agaga e Tasi,” Ensign po o le Liahona, Me 2004, 85)

Faasoaina atu o le tala lelei o Iesu Keriso

O le gaoioiga lenei ua mamanuina e fesoasoani ai i tagata aoga e toe faamanatu ma aotele o latou aafiaga i le suesueina o Evagelia e fa.

O lea la ua e tomanatu i le taua o le taulaga togiola a Iesu Keriso, faitau le saunoaga lenei a Peresitene Russell M. Nelson.

O le upu evagelia o lona uiga o le “tala lelei.” O le tala lelei o le Alii o Iesu Keriso ma Lana feau o le faaolataga. Ua faatusa e Iesu le talalelei i Lana misiona ma Lana galuega i le olaga nei.

(Russell M. Nelson, “Faifeautalai Matutua ma le Talalelei,” Ensign po o le Liahona, Nov. 2004, 81)

Atonu e i ai ni faataitaiga talitutusa o tusiga na faia i luga o le polokalama o le Gospel Living lea e mafai ona faaali atu i tagata aoga e fesoasoani ai ia i latou e amata ona fatuina ni a latou lava tusiga.

O le a se tala fiafia e te manao e faasoa atu i isi e uiga ia Iesu Keriso ma Lana misiona paia? Vaai faalemafaufau e faapea, o loo faalauiloa e le Ekalesia se faatosinaga faaleagafesootai e faateleina ai le silafia e uiga i le soifuaga ma aoaoga a Iesu Keriso o loo tusifaamaumauina i Evagelia e fa. O loo talosagaina e le Ekalesia ni tusiga faaleagafesootai mo le faalauiloa.

Tusi se faamatalaga puupuu e faamatala ai lau tala lelei e uiga ia Iesu Keriso. Mafaufau i se mea na e aoaoina mai Evagelia (Mataio, Mareko, Luka, ma Ioane) e taua ia te oe ma ua fesoasoani e te lagona ai le latalata atili atu ia Iesu Keriso. Mo se faataitaiga, e mafai ona e filifilia se mea na aoao mai e Iesu, o se vavega na Ia faia, o se faataoto, o se tala i le ala na Ia fegalegaleai ai ma isi, o se uiga na Ia faaalia, po o se vaega o Lana taulaga togiola, maliu, ma le Toetu. Afai e te lagona le lagolelei, atonu e te manao e tuu lau tala lelei i luga o polokalama faaleagafesootai pe faasoa atu i se isi tagata. Ia aofia ai faamatalaga auiliili nei i lau tusiga:

Fai se ulutala po o se autu mo lau tusiga.
Faamatala pe faapefea ona taua le tala lelei o le Faaola ia te oe ma fesoasoani e te lagona ai le latalata atili atu ia te Ia.
Ia aofia ai se fuaitau patino o mau mai i Evagelia (Mataio, Mareko, Luka, po o Ioane).
Ia aofia ai lau molimau ma le auala e mafai ai e lenei tala lelei ona manuia ai isi.

Mafaufau e valaaulia ni nai tagata aoga o naunau mai e faasoa mai a latou tusiga i le vasega.