Luka 24:1–12, 36–48
O Le Toetu o Iesu Keriso
Ina ua mavae le falelauasiga o le Faaola, sa aumai e soo faamaoni mea manogi i le tuugamau. Nai lo le mauaina o le tino maliu o le Faaola, sa latou maua se tuugamau avanoa. Na tautino mai e agelu ua toetu mai le Alii. Mulimuli ane i lena afiafi, ina ua faapotopoto faatasi le au soo, sa Ia afio ane ma faaali atu ia i latou Lona tino toetu. O lenei lesona e mafai ona fesoasoani ia te oe e faateleina ai lou malamalama i le Toetu o le Faaola ma le auala e aafia ai lou olaga.
O le faaaogaina o ata. E mafai ona fesoasoani ata i tamaiti aoga e vaai faalemafaufau, faavasega, ma malamalama ai i mau, aemaise pe a faaaoga ata e faaosofia ai se talanoaga. A faaaoga se ata, ia mautinoa e lagolago ai le faamoemoega o le lesona ae le o le tata’ieseina mai ai.
Sauniuniga a le tamaitiiti aoga: Valaaulia tamaiti aoga e manatunatu i ma mafaufau e lisi mea ua latou iloa e uiga i le toetu ma pe aisea e taua patino ai le Toetu o le Faaola ia i latou lava.
Gaoioiga e ono Mafai Ona Aoao Ai
O Le Toetu o Iesu Keriso
Iloilo le ata o le tuugamau avanoa o Iesu Keriso o loo maua i le amataga o lenei lesona, ma mafaufau loloto i au tali i fesili nei.
-
O le a le uiga o lenei ata ia te oe?
Mafaufau i mea ua e iloa e uiga i le Toetu ma lona aafiaga i lou olaga e ala i le taliina o fesili nei i lau api faamaumau suesuega. O le a e maua se avanoa e toe iloilo ai nei fesili i le faaiuga o lau suesuega i le aso.
Mafaufau e faaali atu fesili nei mo tamaiti aoga e tali mai i ai. O le a faasino atu tamaiti aoga i nei lava fesili pe a mavae o latou aafiaga i lenei lesona e toe manatunatu ai i lo latou malamalama faateleina. O le mea lea, atonu latou te mananao e tali i totonu o a latou api faamaumau suesuega.
-
O a ni mea ua e iloa e uiga i le toetu?
-
E faapefea ona aafia oe lava i lou malamalama ma ou talitonuga e uiga i le Toetu o le Faaola?
Afai na auai tamaiti aoga i le sauniuniga a le tamaitiiti aoga, valaaulia i latou e vaai ma faasoa mai lena faamatalaga i le taimi lea (pe afai o latou lagolelei e fai).
Ina ua maea ona ofofua atu e Iesu Keriso Lona soifua i luga o le satauro, sa ave ifo loa Lona tino ma afifi i se ie lino mama ma tuuina i totonu o se tuugamau. Ina ua mavae le Sapati, sa toe foi atu Maria le Makatala ma nisi o tamaitai faatuatua i le tuugamau i le taeao po (tagai Luka 24:10 ; Ioane 20:11–18)).
Faitau le Luka 24:1–12, ma vaavaai mo mea na latou tau i ai ma aoaoina a o i ai i le tuugamau o le Faaola.
-
O le a sou manatu i mea na mafaufau i ai ma lagonaina e le au soo ina ua mavae mea sa latou vaaia ma faalogoina?
E lei pine ona mavae lenei aafiaga, sa faaali atu Iesu Keriso i ni soo se toalua i le ala i Emau (tagai Luka 24:13–32). Sa laua toe foi atu i Ierusalema e faasoa atu lo la aafiaga i le au Aposetolo (tagai Luka 24:33–35).
I se lesona o lumanai, o le a suesue ai e tamaiti aoga nisi tala e uiga i molimau taitoatasi o le Toetu o Iesu Keriso. I le lesona lenei, afai o le a manuia le vasega mai le suesue auiliili atili i le tala i le faaali atu o Iesu i le ala i Emau i le Luka 24:13–35, mafaufau e faaaoga le gaoioiga faaopoopo e aoao ai o le “Auala i Emau” mai le lesona “Mataio 28; Luka 24; Ioane 20.”
Faitau le Luka 24:36–48, ma vaavaai mo le mea na tupu ina ua faapotopoto soo o Iesu e talanoaina le faaali mai o le Faaola toetu.
E mafai foi ona e mafaufau e matamata le vitio “The Risen Lord Appears to the Apostles” (2:19), o loo maua i le ChurchofJesusChrist.org.
-
O le a se mea e tulaga ese ia te oe i nei fuaiupu mai afioga a le Faaola i Ona soo?
Atonu e fesoasoani le fai atu o ni fesili faaopoopo e pei o nei: Aisea e te manatu ai o le a valaaulia i latou e le Faaola e vaai ia te Ia ma pa‘i atu ia te Ia a o lei Ona faasoa atu Lana savali ia i latou? O le a sou manatu o le a se mea na lagonaina pe aoaoina e Ona soo mai lenei aafiaga?
-
Aisea e te manatu ai o nisi o muai fetalaiga a le Faaola ia i latou o le “Ia outou manuia”? ( Luka 24:36).
-
O le a se mea ua e aoaoina mai nei fuaiupu e uiga i le po o ai le Faaola ma le mea e finagalo o Ia ia malamalama i ai Ona soo?
Faateleina lou malamalama i le Toetu o le Faaola
O se tasi o upumoni tatou te aoao mai nei fuaiupu e faapea E i ai se tino toetu o Iesu Keriso o aano ma ivi.
-
O le a le uiga o le toetu?
Afai e manaomia e tamaiti aoga se fesoasoani i le faamatalaina o le uiga o le toetu, e mafai ona faasoa atu le faauigaga o loo i lalo.
O le toetu, “o le toe tuufaatasia lea o le tino faaleagaga ma le tino faaletino o aano ma ivi pe a mavae le oti,” ua mafai mo i tatou taitoatasi ona o Iesu Keriso (Taiala i Tusitusiga Paia, “ Toetu,” scriptures.ChurchofJesusChrist.org). Ona o Lana Togiola ma le Toetu, o le Faaola ua mafai ai e i tatou taitoatasi ona nonofo faatasi ma avea e faapei o Ia.
Mafaufau loloto i soo se fesili o ia te oe e uiga i le Toetu o le Faaola ma lona uiga i lou olaga. O nisi o fesili atonu o loo ia te oe e uiga i le aoaoga faavae o le Toetu o le Faaola o loo lisiina atu lea i lalo. Mafaufau e faamaumau nei fesili i totonu o lau tusi faamaumau suesuega.
-
Aisea e taua ai le i ai o se tino o aano ma ivi o Iesu Keriso?
-
O le a le taua o le Toetu o le Faaola i lo’u olaga?
Fesoasoani i tamaiti aoga ia malamalama i le taua o le aoao e fai fesili e ala i le fai atu o fesili tulitatao e pei o le “E mafai faapefea e le malamalama i le tali i lena mea ona aafia ai oe?” “E ono mafai faapefea e le faaaluina o se taimi e mafaufau loloto ai ma tusi fesili ona aafia ai lau suesuega?” ma le “E ono mafai faapefea e le faia o lenei fesili ona aafia ai lau sootaga ma Iesu Keriso?”
Ia uunaia tamaiti aoga ina ia fatufatuai i lo latou taulimaina o nei fesili. O se tasi o auala atonu o le valaaulia lea o tamaiti aoga e mafaufau e tusi a latou fesili e fai ai se suega puupuu e mafai ona faafesuiai ma isi e sue ai tali.
O se tasi o auala e maua ai tali i a tatou fesili o le suesue lea i mea na aoao mai e perofeta ma aposetolo a le Alii. O nisi nei o aoaoga mai ia Elder D. Todd Christofferson o le Korama a Aposetolo e Toasefululua. A o e suesue i nei upu, vaavaai mo tali i nisi o au fesili. Mafaufau foi e suesue soo se upu faaopoopo a auauna faauuina a le Alii e mafai ona fesoasoani ia te oe.
Mafaufau mo sina taimi i le taua o le Toetu i le taliina ai loa o le faasinomaga moni o Iesu le Nasareta ma finauga tetele ma fesili faalefilisofia o le olaga. Afai e moni lava na toetu Iesu, o lona uiga e mautinoa lava o Ia o se tagata paia. E leai se tagata ola ua i ai ia te ia lava se mana e toe faaolaina ai o ia nai le oti. Ona sa toetu o Ia, e le mafai ai la ona faapea o Iesu ua na o se kamuta, se faiaoga, se aoao, po o se perofeta. Ona sa toetu o Ia, e ao la ona avea ai Iesu ma se Atua, o le Alo lava e Toatasi na Fanaua o le Tama.
O lea, o mea sa Ia aoaoina e moni; e le mafai ona taupepeloina le Atua.
O lea, o Ia o le Foafoa o le lalolagi, e pei ona Ia fetalai mai.
O lea, e moni le lagi ma seoli, e pei ona Ia aoao mai.
O lea, e i ai se lalolagi o agaga lea sa Ia asiasi i ai ina ua mavae Lona maliu.
O lea, o le a Ia toe afio mai, e pei ona folafolaina e agelu, ma “nofotupu patino i luga o le fogaeleele” [ Mataupu Faavae o le Faatuatua 1:10 ].
O lea, o le a i ai se toetutu ma se faamasinoga mulimuli mo tagata uma.
(D. Todd Christofferson, “O Le Toetu o Iesu Keriso,” Ensign po o le Liahona, Me 2014, 113)
Afai e lava le taimi, mafaufau e matamata le vitio “He Lives—Celebrate Easter Because Jesus Christ Lives” (2:26) a o e sauni e tali fesili nei. O loo maua lenei vitio i le ChurchofJesusChrist.org.
-
O le a se mea e te faaopoopo atu i au tali i fesili o loo i le amataga o le lesona?
-
E faapefea ona e faamatalaina po o le a le toetu i se tasi e le masani i lenei aoaoga?
-
E faapefea e le malamalama i le Toetu o le Faaola ona aafia ai lou talisapaia ma le alofa mo Iesu Keriso?
Mafaufau e tuu atu ia i latou o e lagolelei e faasoa mai e faailoa mai mea sa latou aoaoina pe lagonaina a o latou suesue, ma faaiu i le molimau i le Toetu o le Faaola ma lona aafiaga i o tatou olaga i aso nei.
Talatalaga ma Faamatalaga o Talaaga
Aisea e taua ai le Toetu o Iesu Keriso ia te au?
I lana saunoaga “O Le A Se Mea Ua Faia e lo Tatou Faaola mo i Tatou?” Na aoao mai ai Peresitene Dallin H. Oaks o le Au Peresitene Sili i le ala e aafia ai i tatou taitoatasi i le Toetu o le Faaola (Liahona, Me 2021, 75–77).
Gaoioiga Faaopoopo e Aoao Ai
“O aoaoga o le Tusi a Mamona”
Mafaufau e faamamafa atu le matafaioi taua a le Tusi a Mamona e faia i le faaopoopo atu i lo tatou malamalama i le toetu. Valaaulia tamaiti aoga e saili i mau e pei o le Mosaea 15:19–20 ; Mosaea 16:7–9 ; Alema 11:40–44 ; ma le Mamona 9:13, ma vaavaai mo mea ua latou aoaoina e uiga i le toetu. Mafaufau e tuu atu i tamaiti aoga e faasoa mai mea na latou maua, ma faailoga mea na semanu tatou te le iloa e uiga i le Toetu e pe ana leai le meaalofa o le Tusi a Mamona.