Iloilo Lou Aoaoina 9

1 Korinito 8–16 ma le 2 Korinito

O lenei lesona ua faamoemoe e fesoasoani ia te oe e iloilo ai sini ua e faatuina, ma le tuputupu ae patino na e mauaina i le taimi o au suesuega o le Feagaiga Fou.

Fesoasoani i tagata aoga e iloilo lo latou aoaoina. Tuu atu i tagata aoga se avanoa e iloilo ai lo latou aoaoina. O se tasi auala o le valaaulia lea o i latou e manatunatu i sini ua latou faatutuina e ola ai i le talalelei a Iesu Keriso. A o manatunatu tagata aoga, o le a latou iloa le mea e manaomia ona latou faaleleia ma le mea ua uma ona latou faaleleia. Uunaia tagata aoga e valaaulia le fesoasoani a le Agaga ina ia mafai ona latou lagonaina le faamoemoe ma iloa pe mafai faapefea ona latou faaauau pea ona aoao.

Sauniuniga a le tagata aoga: Valaaulia tagata aoga e toe faamanatu auala na latou taumafai ai e faaaoga mataupu faavae sa latou aoaoina mai le 1Korinito 8–16 ma le 2 Korinito .

Gaoioiga E Ono Mafai Ona Aoao Ai

O lenei lesona ua faamoemoe e fesoasoani i tagata aoga e iloilo sini na latou faatutuina, o lo latou gafatia e faamatala aoaoga i le Feagaiga Fou, ma pe o suia faapefea o latou uiga, manaoga, ma gafatia o le ola ai i le talalelei. O le suesuega a le vasega o le 1 Korinito 8–16 ma le 2 Korinito e ono faamamafaina ai isi upumoni nai lo o upumoni i nei gaoioiga. Afai o lea, e mafai ona fetuunai gaoioiga e faaaofia ai na upumoni.

I lenei lesona o le a e maua ai le avanoa e iloilo ai lou aoaoina ma le auala na e faaaogaina ai mataupu faavae o loo aoaoina i le 1 Korinito 8–16 ma le 2 Korinito . O le iloiloina o lou aoaoina e mafai ona fesoasoani ia te oe e faavasega ai pe faapefea e le suesueina o tusitusiga paia ona fesoasoani ia te oe ia avea atili e faapei o le Faaola.

Iloilo au sini

Mafaufau e amata le vasega e ala i le luiina o tagata aoga e mate mai pe fia itulau ua lolomiina o tusitusiga paia o loo i ai i le Tusi Paia, Tusi a Mamona, Mataupu Faavae ma Feagaiga, ma le Penina Tau Tele ua tuufaatasia. A uma ona mate mai tagata aoga, valaaulia i latou e faaopoopo faatasi le aofai moni o itulau ua faitauina e iloa ai po o ai e sili ona latalata i ai lana mate.

Mate mai pe fia itulau ua lolomiina o tusitusiga paia o loo i ai i le Tusi Paia, Tusi a Mamona, Mataupu Faavae ma Feagaiga, ma le Penina Tau Tele ua tuufaatasia.

• Aisea e te manatu ai ua tuuina mai e le Alii ia i tatou le tele o itulau o tusitusiga paia?

• E faapefea ona e faaalia le loto faafetai mo Lana upu?

Na faamalamalama mai e Elder D. Todd Christofferson o le Korama a Aposetolo e Toasefululua le mafuaaga ua saunia ai e le Alii le tele o Ana afioga i tusitusiga paia. Faitau le faamatalaga lenei pe matamata i le “The Blessings of Scripture” (3:03), o loo maua i le ChurchofJesusChrist.org.

Mafaufau i le tele o o tatou faamanuiaga i le mauaina ai … o se aofaiga faapena o tusitusiga paia. Ma e le gata i lena, ae o alii, tamaitai, ma tamaiti taitoatasi ua mafai ona maua ma suesueina a latou lava kopi patino o nei tusitusiga paia, i la latou lava gagana. … E moni, e faatasi ai ma lenei faamanuiaga, ua ta’u mai e le Alii ia i tatou le sili atu ona manaomia o lo tatou faaaogaina pea lava pea o tusitusiga paia nai lo se isi lava taimi muamua. Ia tumau pea lava pea lo tatou fiafia i afioga a Keriso ia e ta’u maia ia i tatou mea uma e tatau ona tatou faia (tagai i le 2 Nifae 32:3).

(D. Todd Christofferson, “O Le Faamanuiaga o Tusitusiga Paia,” Ensign po o le Liahona, Me 2010, 35)

• Aisea e te manatu ai ua “sili atu lo tatou manaomia o tusitusiga paia i le taimi [nei] nai lo se isi taimi ua mavae”?

• O a manaoga patino e faamalieina e tusitusiga paia i lou olaga, po o a manaoga e mafai ona latou faamalieina?

Faaalu se minute e manatunatu ai i lau suesuega patino o tusitusiga paia. Feutagai ma le Tama Faalelagi e uiga i le auala o loo faamalieina ai e au suesuega o tusitusiga paia ou manaoga ma pe afai e manaomia ona e faia ni fetuunaiga. Atonu e manaomia ona e tumau atili i au suesuega o tusitusiga paia i aso taitasi pe faateleina le loloto o le malamalama e te maua mai au suesuega. Tusi i lalo soo se fetuunaiga e te lagona e tatau ona e faia. Mafaufau e fesili atu i lou aiga, lou faiaoga seminare, po o se taitai o le Ekalesia e fesoasoani ia te oe i au sini o le suesueina o tusitusiga paia.

Faalagolago i le Faaola ma saili Lana fesoasoani

Ina ua tusi atu Paulo i le Au Paia i Korinito, sa ia taulai atu i auala e faamanuia ma fesoasoani ai Iesu Keriso ia i tatou. O nisi o faataitaiga e aofia ai le fesoasoani ia i tatou e sosola ese mai faaosoosoga (tagai i le 1 Korinito 10:13), fesoasoani ia i tatou e atiina ae le alofa mama (tagai i le 1 Korinito 13), faatuina o i tatou mai le oti e ala i le Toetu (tagai 1 Korinito 15), valaaulia i tatou ina ia faalelei ma Ia (tagai i le 2 Korinito 5:16–21 ; 7:1–10), ma faamalosia i tatou e onosaia ma le faamaoni luitau (tagai i le 2 Korinito 11 – 12).

Faaalu ni nai taimi e toe faamanatu ai fuaitau o mau na e makaina po o faamatalaga na e faia i le 1 Korinito 8–16 ma le 2 Korinito na fesoasoani ia te oe e aoao e uiga i le Faaola pe faalagolago ai ia te Ia.

Saunia se savali e 3 i le 5-minute e uiga i auala e fesoasoani ai Iesu Keriso ia te oe. Ia faaaofia ai mea nei:

• o se tasi pe sili atu fuaitau o mau mai le 1 Korinito 8–16 po o le 2 Korinito sa anoa ia te oe

• o se faamatalaga o mea ua aoao mai e na fuaitau e uiga i ala e fesoasoani ma faamalosia ai oe e le Faaola

• o se aafiaga mai lou olaga po o se faataitaiga i tusitusiga paia a Iesu Keriso o loo fesoasoani i le ala o loo aoao mai i na fuaitau

• pe mafai faapefea ona e valaaulia isi ia maua le fesoasoani ma le malosi o le Faaola

Mafaufau e valaaulia ni nai volenitia e faasoa mai a latou savali i le vasega. I se isi itu, e mafai e tagata aoga ona fefaasoaai ma se paga. Uunaia tagata aoga e faasoa a latou savali i le aiga po o le Lotu.

Talafaasolopito o aiga ma galuega faalemalumalu ma le Toetu

Gaioioga A: Auai i galuega o talafaasolopito o aiga ma galuega faalemalumalu

Afai e lei aoaoina le lesona i le 1 Korinito 15:29 pe sa lei valaauliaina tagata aoga e fatu se fuafuaga ina ia auai atili i galuega o talafaasolopito o aiga ma galuega faalemalumalu, mafaufau e faamisi le gaoioiga A.

Afai e foliga mai e le iloa e tagata aoga le auala e faaaoga ai le FamilySearch.org po o le polokalama o le FamilySearch, mafaufau e tuu atu ia i latou se taimi o le vasega e suesue i ai. E mafai ona latou vaavaai mo se tuaa ua maliu sa latou iloaina patino po o se tasi e mafai ona latou talanoa e uiga i ai. Fesoasoani i tagata aoga e manatunatu i le uiga o le Toetu o le Faaola i tuaa latou te mauaina.

Talu ai nei, atonu na e suesueina le 1 Korinito 15:29 . Mafaufau pe faapefea e le Toetu o le Faaola ona aafia ai ou tuaa. Matamata i le vitio lenei a o e manatunatu.

A o e suesueina le 1 Korinito 15:29 , atonu na e fatuina se fuafuaga e auai i galuega o talafaasolopito o aiga ma galuega faalemalumalu. Afai na e faia, faaalu sina taimi e iloilo ai lau fuafuaga ma manatunatu i faatinoga na e faia e faatino ai lena fuafuaga. Afai e te lei faia, mafaufau e fai se fuafuaga i le taimi nei pe mafai faapefea ona e fesoasoani i ou tuaa ia olioli i faamanuiaga uma o le talalelei a Iesu Keriso.

Mafaufau e faaali atu faatonuga nei ina ia mafai ona vaai i ai tagata aoga a o latou mafaufau loloto ma tusitusi. A ua lava le taimi, valaaulia ni tagata aoga e naunau e faasoa mai o latou manatu.

Lipoti i lau fuafuaga.

Afai na e faia se fuafuaga, faasoa atu po o le a le mea na lelei ma po o a faafitauli na e feagai ai. Pe o i ai ni fetuunaiga e te lagona e finagalo le Tama Faalelagi e te faia? O le a faapefea ona fesoasoani na fetuunaiga ia te oe?

Afai e te lei faia se fuafuaga, faasoa atu se mea e te manao e fai atoa ma lona faapogai. O le a sou manatu o le a faapefea ona aafia oe ma isi i lau fuafuaga a o e faatinoina?

Tali se fesili e tasi o fesili nei:

• E faapefea e lou auai i talafaasolopito o aiga ma galuega faalemalumalu ona faaalia ai lou faamoemoe mo le Toetu?

• Na faapefea e le auai i talafaasolopito o aiga ma galuega faalemalumalu ona fesoasoani e te lagona ai le latalata atili i le Tama Faalelagi ma avea atili ai e faapei o Iesu Keriso?

Gaoioiga E: Faamatala le aoaoga faavae o le Togiola a le Faaola

Fesoasoani i tagata aoga e iloilo lo latou tomai e faamatala ai le aoaoga faavae o le Togiola a le Faaola e ala i le talanoaina o nisi o fesili nei. Valaaulia le Agaga Paia e taiala i lenei talanoaga.

• Aisea ua avea ai le Toetu o le Faaola ma se vaega taua o Lana Togiola?

• O le a se mea ua e suesueina i le 1 Korinito 8–16 po o le 2 Korinito e uiga i le Toetu ua fesoasoani ai ia te oe?

• O a filifiliga e te manatu o le a ese i o tatou olaga pe afai tatou te le talitonu i se Toetu moni [o le tino ma le agaga]?

• Aisea e te loto faafetai ai ua ofoina mai e Iesu Keriso ia i tatou le mana e manumalo ai i le oti? E mafai faapefea ona e faaalia lena loto faafetai?