2 Korinito 8–9

Tausia o e Matitiva

E alofa tele Iesu Keriso mo fanau uma a le Tama Faalelagi ma valaaulia i tatou e auai faatasi ma Ia i le tausiga o e matitiva ma e manaomia le fesoasoani. Sa valaaulia e Paulo le Au Paia i Korinito e mulimuli i le faataitaiga a le Faaola e ala i le ositaulagaina o mea latou te maua e tausia ai e matitiva. O lenei lesona e mafai ona fesoasoani ia te oe e mulimuli ai i le faataitaiga a Iesu Keriso e ala i le faasoa atu o mea ua e maua ia i latou o e manaomia le fesoasoani.

Fatuina o se siosiomaga saogalemu mo le aoaoina. Taumafai e aveese mea e ono faalavelave i le suesueina ma le mafaufau loloto i tusitusiga paia. Na aoao mai e Peresitene Boyd K. Packer(1924–2015) o le Korama a Aposetolo e Toasefululua e faapea “e sili atu ona faigofie ona maua musumusuga i mea e i ai le filemu” ma o le “faaaloalo na te valaaulia faaaliga” (“Reverence Invites Revelation,” Ensign, Nov. 1991, 21–22).

Sauniuniga a le tagata aoga: Valaaulia tagata aoga e vaavaai i aitema o loo lisi i luga o le pepa o Sefuluai ma Isi Taulaga ma ia saunia e faasoa mai po o a uiga o aitema eseese. E mafai foi ona latou faia soo se fesili ia i latou e uiga i lenei pepa.

Gaoioiga E Ono Mafai Ona Aoao Ai

O se luitau tele naua

Mafaufau e faaali atu le faamatalaga lenei e lei uma lelei ma valaaulia tagata aoga e faasoa mai ni luitau e mafai ona tusia i le avanoa. Faamalo i tagata aoga mo tali latou te tuuina mai, e tusa lava pe e lei faaaogaina e Elder Holland i lenei saunoaga.

Sa saunoa Elder Jeffrey R. Holland o le Korama a Aposetolo e Toasefululua e uiga i se luitau tele naua. Mafaufau i ni nai luitau e mafai ona faatumu tonu ai le avanoa i le upusii lenei.

I le faasolo mai ai i le talafaasolopito, o le ____________ o se tasi o luitau silisili ma sili ona taatele i soifuaga o tagata. O ona aafiaga manino lava e masani ona faaletino, ae o faatamaiaga faaleagaga ma faalelagona na te aumaia atonu e sili atu ona matua ogaoga.

(Jeffrey R. Holland, “Pe Le o i Tatou Uma Ea o Ni Tagata Aisi?” Ensign po o le Liahona, Nov. 2014, 40)

O le luitau na taua e Elder Holland o le “mativa,” o le tulaga lea o le utiuti po o le leai o se tupe, oloa, po o mea e maua e fesoasoani ai. O le upu mativa e mafai foi ona faasino i le le lava o mea tatou te manaomia i le tele o vaega o o tatou olaga, e aofia ai le tulaga faaletino, faalelagona, faaleagafesootai, po o le faaleagaga.

• O a nisi o luitau o feagai ma i latou e itiiti ifo mea latou te maua nai lo isi tagata?

• E mafai faapefea e nei luitau ona aafia ai le faalelagona ma le faaleagaga faapea foi ma le faaletino o se tasi?

A o e suesue i le asō, ia mafaufau i manatu ma lagona e ono auina mai ia te oe e le Tama Faalelagi e ala i le Agaga Paia e tusa ai ma auala e mafai ona Ia faaaogaina ai oe e fesoasoani ai i isi o loo manaomia le fesoasoani.

E pei ona tusia i le 2 Korinito 8:1–8, sa valaaulia e le Aposetolo o Paulo le Au Paia i Korinito e mulimuli i le faataitaiga a tagata o le Ekalesia i Maketonia o e sa foai atu ma le agaalofa e tausia ai e matitiva. Ona ia famaumauina lea o le tele o aoaoga taua e uiga i le tausiga o e matitiva i le ala a le Faaola

O le faataitaiga a Iesu Keriso

Sa faasoa mai e Paulo le faataitaiga a le Faaola e uunaia ai i tatou e saunia mea e manaomia e isi e ala i le alofa faamaoni.

Faitau le 2 Korinito 8:9, ma vaavaai mo le faataitaiga le manatu faapito a Iesu Keriso i le tausia ai o i tatou.

• O le a sou manatu o le a le uiga o le tala a Paulo ina ua ia tusia faapea na mativa Iesu ina ia mafai ai ona faatamaoaigaina i tatou?

O se tasi o mataupu faavae e mafai ona tatou aoaoina mai i le tusi a Paulo e faapea a o tatou malamalama i mea uma sa faia e le Faaola mo i tatou, o le a faateleina lo tatou naunau e foai atu i isi.

O le taua o le tausia o i latou e manaomia le fesoasoani o loo aoaoina atoa i tusitusiga paia, e aofia ai i le Tusi a Mamona. Faitau aoaoga nei a Paulo, faatasi ai ma fuaitau e o faatasi ma le Tusi a Mamona, ma vaavaai mo mea o loo aoao mai e nei fuaitau e uiga i le tausia o isi. Mafaufau e faafesootai fuaitau.

Atonu o se avanoa lelei lea e faamanatu atu ai i tagata aoga e uiga i le tomai o le suesueina o tusitusiga paia o le faafesootaiina o fuaiupu.

Mafaufau e valaaulia tagata aoga e suesue fuaitau nei i ni vaega toalaiti, faatasi ma tagata aoga taitoatasi e suesue i se vaega e ese mai ma lipoti mea sa latou aoaoina i le vaega.

• Manao e foai atu: 2 Korinito 8:12 ; Mosaea 4:24

• O le a le tele o le foai : 2 Korinito 9:6 ; Alema 1:30

• Uiga faaalia i le foai atu: 2 Korinito 9:7 ; Moronae 7:6–8

• Lotofaafetai i le Atua: 2 Korinito 9:11–15 ; Mosaea 4:19–21

• O le a sou manatu i le mea e finagalo le Alii e ao ona tatou faia i le asō ina ia ola ai i mea o loo aoao mai i fuaitau taitasi o mau?

Sa faamalamalama mai e Elder Dale G. Renlund o le Korama a Aposetolo e Toasefululua le ala e mafai ai e le agalelei o le Tama Faalelagi ma Iesu Keriso ona suia i tatou.

Ua tofusia i tatou uma ona mauaina ni meaalofa e le mafai ona tatou saunia mo i tatou lava, meaalofa mai lo tatou Tama Faalelagi ma Lona Alo Pele, e aofia ai le faaolataga e ala i le taulaga togiola a Iesu Keriso. Ua tatou mauaina le ola i lenei lalolagi; o le a tatou maua le ola faaletino i le olaga a sau; ma le faaolataga ma le faaeaga e faavavau—pe afai tatou te filifili i ai—o ia mea uma ua auala mai ona o le Tama Faalelagi ma Iesu Keriso.

Soo se taimi lava tatou te faaaogaina ai, faamanuiaina ai, pe mafaufau foi i nei meaalofa, e ao ona tatou mafaufau i le taulaga, agalelei, ma le alofa o ē na foaiina mai. O le faaaloalogia o e na foai mai e sili atu nai lo lo tatou lagonaina o le loto faafetai. O le manatunatu i a La’ua meaalofa e mafai ma e ao ona suia ai i tatou.

(Dale G. Renlund, “Mafaufau i le Agalelei ma le Silisiliese o le Atua,” Ensign po o le Liahona, Me 2020, 42)

• E mafai faapefea e le manatunatu i le agalelei o le Tama Faalelagi ma Iesu Keriso ona suia i tatou?

Tausiga o e matitiva i o tatou aso

Sa faamatala e Peresitene Russell M. Nelson ni auala se lua mai le anoano o isi auala ua faaaoga ai e le Faaola Lana Ekalesia toefuataiina e fesoasoani ai i e matitiva i le lalolagi atoa i o tatou aso. Faitau le faamatalaga lenei pe atonu foi e te manao e matamata i le “The Second Great Commandment” (faailo taimi 6:15 i le 8:51), o loo maua i le ChurchofJesusChrist.org.

O Le Poloaiga Lona Lua ma le Sili

Ua tuuina mai e Peresitene Nelson ni faataitaiga o le ala o faataunuu ai e le Ekalesia ma ona tagata le poloaiga sili lona lua a le Alii ia alofa atu i o tatou tuaoi e ala i taumafaiga agaalofa.

Ua foai atu ai e le Latter-day Charities [o se lala mo Feasoasoaniga a le Ekalesia] le silia ma le lua piliona tala o foai e fesoasoani mo i latou e manaomia le fesoasoani i le lalolagi atoa. O lenei fesoasoani ua ofoina atu ia i latou e le afaina pe i ai ni o latou sootaga ma le ekalesia, tagatanuu, ituaiga, ituaiga faaleitupa, itupa, po o talitonuga faaupufai.

E le na o le pau lena. Ina ia fesoasoani i tagata o le Ekalesia a le Alii o e o pagatia, tatou te alolofa ma ola ai i le tulafono mai anamua o le anapogi [tagai i le Isaia 58:3–12 ]. Tatou te fia aai ina ia fesoasoani ai i isi o loo fia aai. E tasi le aso i masina taitasi, tatou te le aai ai ae foai atu le tau o lena meaai (ma faasili atu) e fesoasoani ai ia i latou o manaomia le fesoasoani.

(Russell M. Nelson, “O le Poloaiga Sili Lona Lua,” Ensign po o le Liahona, Nov. 2019, 97–98)

Mafaufau e faaali atu faataitaiga o vitio i le vaega o “Manatu ma Talaaga o Faamatalaga” o le lesona o galuega faatino na faia e Iesu Keriso e ala i foai i Lana Ekalesia.

Ma le isi, mafaufau e faailoa atu i tagata aoga le upega tafailagi latterdaysaintcharities.org ma tuu atu ia i latou se taimi e suesue ai mo ni nai minute i le vasega.

• O le a se mea e tulaga ese ia te oe e uiga i le saunoaga a Peresitene Nelson?

• E faapefea ona e faamatalaina le anapogi ma taulaga anapogi i se tasi e le masani i ai?

Mafaufau e faaali atu se pepa o Sefuluai ma Isi Taulaga ma valaaulia tagata aoga o e na faamaeaina sauniuniga a le tagata aoga e faasoa mai ni auala eseese ua saunia e le Faaola mo e matitiva e ala i a tatou foai tautupe.

A o lei faasoa mai e tagata aoga tali i fesili nei, faamamafa atu o le tausiga o e matitiva e le aofia ai i taimi uma le na o le tuuina atu o tupe.

• E faaopoopo atu i le tuuina atu o foai tautupe i le Ekalesia, o a isi auala e mafai ona tatou fesoasoani ai i le Alii e tausia ai i latou e manaomia le fesoasoani? O ai se tagata ua avea ma se faataitaiga lelei mo oe i lenei mataupu faavae?

O le a le mea e finagalo le Atua ia te oe e ao ona e faia?

Sa faamalamalama mai e Elder Jeffrey R. Holland o le Korama a Aposetolo e Toasefululua lo tatou manaomia ona ole atu i le Atua mo le taitaiga e fesoasoani ai ia i latou o siomia i tatou.

Ou te le iloa tonu pe o le a se tulaga e tatau ona faataunuu taitoatasi ai a outou matafaioi ia i latou o e le fesoasoani pe ua le mafai ona fesoasoani ia i latou lava. Ae ou te iloa o loo silafia e le Atua, ma o le a Ia fesoasoani ma taiala outou i ni galuega agaalofa e tusa ai o ni soo moni pe afai o outou mananao ma le magafagafa ma tatalo ma saili mo ni auala e tausi ai se poloaiga ua Ia tuuina mai pea lava pea ia i tatou.

(Jeffrey R. Holland, “Pe Le o i Tatou Uma Ea O Ni Tagata Aisi?,” Ensign po o le Liahona, Nov. 2014, 41)

Mafaufau e faasoa atu se tala patino e uiga i le ala e faaaoga ai e le Atua Ana fanau e auauna atu ai ia i latou o e le tagolima.

Fai se fuafuaga e faatino ai mafaufauga ma lagona atonu na e mauaina i le asō e fesoasoani ai ia i latou o siomiaina oe. Afai e te lei mautinoa po o ai e finagalo le Tama Faalelagi e te fesoasoani i ai pe faapefea foi ona fesoasoani ia i latou, tatalo mo le taitaiga ma vaavaai mo avanoa e auauna atu ai ia i latou o siomia oe, e aofia ai tagata o lou lava aiga. O le a tali mai le Atua i au tatalo i Lana lava ala ma le taimi.

Manatu ma Talaaga o Faamatalaga

E faapefea ona faaaoga foai i le Ekalesia a le Faaola e fesoasoani ai i le mativa i aso nei?

Asiasi i le upegatafailagi latterdaysaintcharities.org e aoao ai tali i lenei fesili ma isi fesili.

Matamata le vitio “A Child’s First Breath” (3:13), o loo maua i le ChurchofJesusChrist.org.

A Child's First Breath

O aoaoga faamasani i le faatinoga o le fesoasoani i pepe e fananau mai ia manava, o se tasi lea o taumafaiga o fesoasoaniga alofa o loo i lalo o le faamalu o le polokalama uelefea a le Ekalesia.

Matamata le vitio “Boys’ Home” (3:20), o loo maua i le ChurchofJesusChrist.org.

Boys' Home

Ua faipaaga le LDS Charities ma le Food for the Poor e tiliva atu meaai, lavalava, ma meataalo i tamaiti i le Dominican Republic.

Matamata le vitio “A Thousand Days” (4:32), o loo maua i le ChurchofJesusChrist.org.

O Aso e Afe

E ala i le eliina o vaieli ma puna i atunuu o Aferika ua pagatia i lamala, o loo fesoasoani ai Le Ekalesia a Iesu Keriso o le Au Paia o Aso e Gata Ai e tuuina atu le ola maloloina ma le fiafia i alalafaga atoa.

E mafai faapefea ona ou fesoasoani ia i latou o siomia au i auala e ese mai le foai atu o tupe?

Sa faasoa mai e Sister Bonnie L. Oscarson, o le sa avea muamua ma Peresitene Aoao o Tamaitai Talavou, se tasi mai le tele o manatu:

Au uo talavou e, e mafai ona ou faamautinoa atu o le a i ai lava se tasi i sauniga uma a le Ekalesia e te auai ai o loo tuuatoatasi, o loo feagai ma ni luitau ma manaomia se uo, pe o ia lagona e le o faitaulia. Ua ia te oe se mea taua e saofaga atu i sauniga ma gaoioiga uma, ma e finagalo le Alii e te vaavaai solo i lau tupulaga ona auauna atu lea e pei ona Ia faia.

(Bonnie L. Oscarson, “O Manaoga i o Tatou Luma,” Ensign po o le Liahona, Nov. 2017, 26)

Na faamalamalama mai e le Perofeta o Iosefa Samita (1805–44):

[O se sui o le Ekalesia] e na te fafagaina i latou o fia aai, faaofu ē lē lavalavā, tausia fafine ua oti a latou tane, soloia loimata o e matuaoti, faamafanafana i e mafatia, pe o i totonu o lenei ekalesia, po o se isi, pe le auai foi i se lotu, po o fea lava e maua ai i latou.

(Aoaoga a Peresitene o le Ekalesia: Iosefa Samita [2007], 426)

Gaoioiga Faaopoopo e Aoao Ai

Taitai o le Ekalesia i le lotoifale

Mafaufau e valaaulia se epikopo i le lotoifale po o se peresitene o le Aualofa e faasoa atu i tagata aoga pe faapefea ona faaaoga tupe o le taulaga anapogi a le Faaola e faamanuia ai i latou e manaomia le fesoasoani.

Faataitai pe faapefea ona foai atu tupe

Mafaufau e faaali atu se pepa foai ma se teutusi o Sefuluai ma Isi Taulaga ma valaaulia se tagata aoga e faamatala mai po o fea e maua ai pepa foai, pe faapefea ona faatumu, ma po o ai e tuuina atu i ai a latou foai. Mafaufau foi e fesoasoani i tagata aoga ia malamalama pe faapefea ona foai atu i luga o upega tafailagi i le donations.ChurchofJesusChrist.org.

O le tausia o e manaomia le fesoasoani o se vaega o le galuega o le faaolataga ma le faaeaga

Tagai i le vaega 1.2.2 i le Tusitaulima Aoao, ma talanoaina pe aisea ua avea ai le tausiga o i latou e le tagolima o se vaega o le galuega o le faaolataga ma le faaeaga. E mafai ona e fai atu fesili e pei o le “Aisea e te manatu ai e manaomia ona tatou tausia i latou e manaomia le fesoasoani pe afai e ao ona faasaoina ma faaeaina i tatou? O le a sou manatu e faapefea e le tausiga o i latou e le tagolima ona fesoasoani e aveesea ai papupuni i lo latou alualu i luma faaleagaga?”