1 Korinito 15:29

“Ona o Le a Ea Ua Papatisoina Ai i Latou ma sui o e ua Oti?”

O le toatele o le Au Paia i Korinito sa auai i papatisoga mo o latou tuaa ua maliliu, peitai o nisi sa lei talitonu i le Toetutu o e ua maliliu. Sa fesoasoani Paulo ia i latou ia iloa tatou te faia sauniga mo e ua maliliu ma le faatuatua o le a faatuina i tatou uma e Keriso e toe ola ai i le Toetu. O lenei lesona ua faamoemoe e fesoasoani ia te oe e te manao ai ma fuafua e auai ma le anoa atili i galuega o talafaasolopito o aiga ma le malumalu.

Tuuina atu o avanoa mo le faaaogaina. O le faamoemoega o le aotauina o le talalelei o le fesoasoani lea i tagata aoga e mafaufau ma lagona se manao e ola i le talalelei a Iesu Keriso ona faatino ai lea o o latou manaoga. Tuu atu i tagata aoga ni avanoa i le vasega e fuafua ai e faaaoga upumoni latou te aoaoina i o latou olaga. A latou faia ni fuafuaga e faaaoga ai mea ua latou aoaoina, e faalauteleina e tagata aoga lo latou tomai e ola ai i upumoni na aoaoina i le lesona.

Sauniuniga a le tagata aoga: Valaaulia tagata aoga e o mai saunia e faasoa mai o latou gafa o le aiga pe faamatala se tala e uiga i se tuaa e lei maua le talalelei pe mauaina sauniga o le faaolataga ma le faaeaga.

Gaoioiga E Ono Mafai Ona Aoao Ai

O le taua o molimau

O le gaoioiga lenei ua faamoemoe e avea o se auala e fiafia ma malie e fesoasoani ai i tagata aoga e mafaufau e uiga i le sootaga i le va o le toetutu ma galuega e faia i le malumalu mo i latou ua maliliu. Afai e tatau ai, fetuunai ia seti muamua e lua o ata taitoalua ina ia talafeagai faaleaganuu ma auai atoatoa ai tagata aoga.

Iloilo seti nei e tolu o ata taitoalua. Mafaufau totoa i le sootaga i le va o ata e lua i seti taitasi.

Seti muamua

Aufaipese a le Tapeneko, konaseti o le “Elijah”, Me 2007

Seti e lua

Seti e tolu

• E faapefea ona e faamatalaina i se tasi le sootaga i le va o le tuugamau avanoa o le Faaola ma malumalu o aso nei?

Ina ua iloa e le Aposetolo o Paulo e faapea o nisi o tagata i Korinito sa aoao atu faapea e leai se toetu, sa ia ta‘u atu ua uma ona faia e le Au Paia se mea na molimau mai i le moni o le toetu.

Faitau le 1Korinito 15:29, ma vaavaai mo le faiga na faasino i ai e Paulo.

• E faapefea ona e toe faaupuina i au lava upu mea o loo aoao mai e Paulo i le fuaiupu 29 ?

• E faapefea ona avea papatisoga mo e ua maliliu o se molimau i le Faaola, Lana Togiola, ma le Toetu?

Afai e manaomia e tagata aoga se fesoasoani i le taliina o le fesili na muamua atu, mafaufau e tuu atu ia i latou ni faamatalaga mai le vaega o le “Manatu ma Talaaga o Faamatalaga” i le faaiuga o le lesona lenei.

Papatisoga mo e ua maliliu

O se tasi upumoni e mafai ona tatou aoao mai le 1 Korinito 15:29 e faapea o i latou o e maliliu e aunoa ma le papatisoga e mafai lava ona maua lenei sauniga taua e ala i galuega e faia i malumalu.

Mafaufau e valaaulia tagata aoga o e sa faia le gaoioiga sauniuni a le tagata aoga e faasoa mai e uiga i e pele ia i latou o e na maliliu e aunoa ma le papatisoga. Mafaufau e fesili atu i tagata aoga e mafaufau pe na faapefea ona avea pe e mafai foi faapefea ona aafia nei tagata i papatisoga mo e ua maliliu.

Na aoao mai Peresitene Gordon B. Hinckley (1910–2008) e uiga i le auala e mafai ai e le auai i galuega o le malumalu ona fesootai ai i tatou ma Iesu Keriso:

Ou te manatu o galuega e fai ma sui mo e ua maliliu e taulalata atu i le taulaga puluvaga a le Faaola lava Ia nai lo nisi lava galuega ou te iloaina. E tuuina atu ma le alofa, e aunoa ma se faamoemoe mo se taui, pe toe totogi po o se isi lava mea faapena. Oka se mataupu faavae mamalu [faeasaite i Birmingham, Egelani, 29 Aok. 1995].

(Peresitene Gordon B. Hinckley, “Excerpts from Recent Addresses of President Gordon B. Hinckley,” Ensign, Ian. 1998, 73)

• E faapefea e le auai ai i papatisoga ma isi galuega o le malumalu mo e ua maliliu ona fesoasoani ia i tatou ia avea atili ai e pei o le Faaola?

Faaloloto lou malamalama

Mafaufau faapea i le aoga i se tasi aso, ua e talanoaina ma au uo a outou fuafuaga mo le faaiuga o le vaiaso. Fai mai se tasi o uo ua fiafia o ia e alu i le malumalu e faia papatisoga mo e ua maliliu faatasi ma isi talavou i lana uarota. O se isi uo, o Kaya, ua i ai se vaaiga le mautonu i ona foliga ma fesili atu, “Papatisoga mo e ua maliliu? O a na mea?”

• O le a sou mautinoa i le taliina o lenei fesili i se auala e mafai ai e Kaya ona malamalama?

Faaalu sina taimi e faaloloto ai lou malamalama i le sauniga o le papatisoga mo e ua maliliu e ala i le filifilia o se tasi po o le sili atu o punaoa nei e suesue ai pe saili foi mo au lava punaoa. A o e suesue ai, vaavaai mo ni mea e mafai ona e faasoa atu i se tasi e pei o Kaya o se ua manao ia malamalama atili i lenei faiga.

Fuafua manaoga o tagata aoga. Nai lo le tuuina atu o punaoa nei mo tagata aoga e suesue ai, atonu e aoga le tuu atu ia i latou e saili ma maua punaoa e i latou lava, lea e mafai ona fesoasoani ia i latou e faataitai ai le sailia o punava faatuatuaina o faamatalaga.

E mafai foi ona aoga i tagata aoga le suesueina o punaoa faaopoopo i le vaega o “Manatu ma Talaaga o Faamatalaga” i le faaiuga o le lesona lenei.

• Taiala mo Autu, “ Papatisoga mo e ua Maliliu,” scriptures.ChurchofJesusChrist.org, pe tagai i le “Papatisoga mo e ua maliliu” i lalo o le “ Papatisoga, Papatiso,” Taiala i Tusitusiga Paia, scriptures.ChurchofJesusChrist.org

• Autu o le Talalelei, “Tala Faasolopito Mo Aiga,” topics.ChurchofJesusChrist.org

• Leah Barton, “Three Facts about Temple Baptisms,” New EraSete. 2019, 22–23

E faaopoopo i le fesili atu i tagata aoga e faasoa mai mea na latou aoaoina mai a latou suesuega, mafaufau foi e tuuina atu ia i latou ni avanoa e faataitai ai ona faamatala le aoaoga faavae o le papatisoga mo e ua maliliu i se tasi e pei o Kaya e le masani i lenei sauniga. E mafai ona faia lenei mea e ala i se tala faatino po o le tuu atu i tagata aoga e tusi a latou faamalamalamaga ma faasoa mai mea na latou tusia. Mafaufau e valaaulia tagata aoga e galulue i ni paga po o ni vaega toalaiti ina ia mafai ai e le toatele ona maua le avanoa e faamalamalama, faasoa, ma molimau atu ai. O manatu nei e mafai ona faaaoga i a latou faamalamalamaga:

• O le mea ua faaalia e le sauniga o le papatisoga mo e ua maliliu e uiga i lagona o lo tatou Tama Faalelagi ma Lona Alo, o Iesu Keriso, e uiga ia i tatou taitoatasi.

• O ou lava aafiaga i le auai ai i lenei sauniga.

Faatino mea ua e aoaoina

Mafaufau i ou lava aafiaga patino mai talafaasolopito o aiga ma galuega o le malumalu. Mafaufau totoa po o le a se mea na anoa ai nei aafiaga ma soo se faafitauli na feagai ma oe. Ona fatu lea o se fuafuaga faigofie, ma patino ia oe lava ia e uiga i le auala o le a e faaaogaina ai mea sa e aoaoina ma lagonaina i le aso. Mo se faataitaiga, atonu e te mafaufau e fai se fuafuaga e faatatau i le auai i le malumalu, mauaina o se pepa faataga o le malumalu, faaaogaina o le FamilySearch e sue ai igoa o ou tuaa o e manaomia ona maua le sauniga o le papatisoga, faia o se mea ina ia atili anoa ai ou aafiaga i le malumalu, po o le mafaufau i se tasi o ou lava manatu musuia. Mulimuli i uunaiga a le Agaga Paia e fatu ai se fuafuaga e tonu mo oe. Faamaumau lau fuafuaga i lau api talaaga mo suesuega.

Manatu ma Talaaga o Faamatalaga

E faapefea ona fesootai le papatisoga mo e ua maliliu ia Iesu Keriso ma Lona Toetu?

Na aoao mai Elder D. Todd Christofferson o le Korama a Aposetolo e Toasefululua:

O lo tatou naunau ina ia faaolaina e ua maliliu faapea ma le taimi ma punaoa o loo tatou faaaogaina mo lena tautinoga, i mea uma lava, ua o se faaaliaina o a tatou molimau e uiga ia Iesu Keriso. Ua avea o se faamatalaga e matua mamana faapei ona mafai ona tatou faia e uiga i Lana amio ma [Lana] misiona paia. Ua molimau ai, muamua, i le Toetu o Keriso; [ma] lona lua, o le le gata mai o Lana Togiola. …

Tatou te papatiso mo e ua maliliu aua ua tatou iloa o le a toetutu i latou.

(D. Todd Christofferson, “The Redemption of the Dead and the Testimony of Jesus,” Ensign, Nov. 2000, 10)

Pe na faatino e tagata o le Ekalesia a Keriso i taimi o le Feagaiga Fou ia papatisoga mo e ua maliliu?

Na faia sui papatisoga ina ua mavae le toetu o Iesu. Na pau le fuaitau o le Tusi Paia o loo tau mai ai papatisoga e sui mo e ua maliliu o le 1 Korinito 15:29, e ui ina tautino mai e isi tusiga anamua e faapea o le papatisoga mo e ua maliliu sa faia e uluai tagata Kerisiano.

“Na aoao mai e Iesu Keriso e faapea o le papatisoga e tatau ina ia maua ai le ola e faavavau (tagai Ioane 3:5). O Paulo lava ia na papatisoina ma ia aoao mai e faapea e ala mai i lenei sauniga taua e mafai ai ona tatou ‘savavali i le ola fou’ ( Roma 6:4 ; tagai foi i le Galuega 9:18). Peitai e faitau miliona fanau a le Tama Faalelagi ua maliliu e aunoa ma se malamalama ia Iesu Keriso pe mauaina foi sauniga e tatau ai o le papatisoga. O le faasinoga a Paulo i le papatisoga mo e ua maliliu ua fautuaina mai ai e faapea o tagata anamua o le Ekalesia sa iloaina le fuafuaga a le Atua e faaolaina ai e ua maliliu (tagai foi Ioane 5:25, 28 ; 1 Peteru 3:18–19 ; 4:6)” (Tusi Lesona a le Tagata Aoga o le Feagaiga Fou [2014], 385).

O anafea na amata ai e tagata o le Ekalesia a Keriso i aso e gata ai ona faia papatisoga mo e ua maliliu?

Ina ia faalogo i le talafaasolopito o le faatinoga a le Ekalesia toefuataiina o papatisoga mo e ua maliliu, mafaufau e matamata le vitio “Glad Tidings: The History of Baptisms for the Dead” (6:55), e maua i le ChurchofJesusChrist.org.

O fea e mafai ona ou aoao atili ai e uiga i le papatisoga mo e ua maliliu?

“What Are Baptisms for the Dead?” (1:22), o loo maua i le ChurchofJesusChrist.org

“Two Apostles Lead a Virtual Tour of the Rome Italy Temple” (11:31; matamata mai le faailo taimi 1:23 i le 4:13)

Gaoioiga Faaopoopo e Aoao Ai

Auai i galuega o le malumalu ma talafaasolopito o aiga

Ina ia fesoasoani e musuia tagata aoga e auai i galuega o le malumalu ma talafaasolopito o aiga, mafaufau e valaaulia tagata aoga e suesue le lauga “O Le a Liliu Atu Loto o Fanau i o Latou Tama” (Ensign po o le Liahona, Nov. 2011, 24–27) na saunia e Elder David A. Bednar o le Korama a Aposetolo e Toasefululua. O a nisi o valaaulia ua tuuina mai e Elder Bednar i le autalavou? Aisea ua ia tuuina mai ai na valaaulia? O a faamanuiaga e oo mai i le auai i galuega o le malumalu ma talafaasolopito o aiga? A le o lea, o le vitio “Spiritual Dynamite” (2:41), o loo maua i le ChurchofJesusChrist.org, e mafai foi ona faaali atu.