Atamai i Aoaoga Faavae: 1 Korinito 15:20–22

“E Faapea Ona Faaolaina Uma Ia Keriso”

O se tasi o atavali o Maria na vaai i le Keriso toetu. O le tuugamau o loo i tua atu, ua vaaia Maria o laei enaena, o loo u mai lona tua. Ua vaaia Keriso ma faailoga i ona lima, o laei i se ofutalaloa paepae.

I se lesona talu ai, sa e aoaoina ai e faapea ona o le Toetu o le Faaola, o le a faapea foi ona toetutu uma ai fanau a le Tama Faalelagi (tagai 1 Korinito 15:20–22). O lenei lesona o le a fesoasoani ia te oe e tauloto ai mau tauloto faaleaoaoga faavae ma le fasifuaitau autu i le 1 Korinito 15:20-22, faamatala le aoaoga faavae o le Toetu, ma faaaoga mataupu faavae o le mauaina o le malamalama faaleagaga i se tulaga masani faale-olaga.

Sauniuniga a le tagata aoga: Valaaulia tagata aoga e mafaufau loloto i aafiaga latou te iloa ina ua maliu ai se tasi e pele ia i latou. Fai atu ia i latou e o mai saunia e talanoaina luitau i nei aafiaga ma pe mafai faapefea e le faatuatua ia Iesu Keriso ona fesoasoani ia i latou o feagai ma nei luitau.

Gaoioiga E Ono Mafai Ona Aoao Ai

O lenei lesona o le atamai i aoaoga faavae ua fuafuaina e aoao atu pe a maea le lesona o le “1 Korinito 15:13-28,” o le lesona faatatau mo le fuaitau o le atamai i aoaoga faavae o le 1 Korinito 15:20-22 . Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ma le lesona o le vaiaso foi lena.

Tauloto ma faamatala

Na aoao mai e Peresitene Gordon B. Hinckley (1910–2008) e faapea “o mea uma e tutupu i le talafaasolopito o tagata, e leai se mea e taua tele e pei o le toetu o le Alo o le Atua” (“The Empty Tomb Bore Testimony,” Ensign, Me 1988, 65).

Faaaoga upumoni mai le 1 Korinito 15:20–22, e pei o le, ona o le Toetu o Iesu Keriso, o le a toetutu tagata uma, e faamatala ai pe aisea ua avea ai le Toetu o le Faaola ma mea aupito sili ona taua i le talafaasolopito o tagata ola. Ia aofia ai le mafuaaga e taua ai mo oe lava ia.

Valaaulia ni nai tagata aoga e faasoa mai a latou faamatalaga i le vasega. Fuafua pe manaomia e tagata aoga nisi faatonuga e uiga i le aoaoga faavae o le Toetu a o lei agai i luma i le lesona.

Faaalu sina taimi e tauloto ai le mau faasino ma le fasifuaitau autu o le mau mo le 1 Korinito 15:20–22 . O laasaga o mulimuli mai ua tuuina mai ai se tasi o auala e faatino ai lea tulaga.

Valaaulia tagata aoga e teu le pepa o loo latou faaaogaina i lenei gaoioiga e faasino i ai i se lesona i le lumanai.

I le pito i luga o se fasipepa, tusi ai le mau faasino ma le fasifuaitau autu o le mau 1 Korinito 15:20–22: “Aua faapei ona oti uma ia Atamu, e faapea foi ona faaolaina uma ia Keriso.”
Gagau i lalo le pito i luga o lau pepa ina ia le mafai ai ona e vaai i mea na e tusia. Ona tusi lea po o le a lava le tele o mea o e manatuaina mai lenei mau faasino ma le fasifuaitau autu.
Tatala le pito i luga o le pepa e siaki ai lou sa‘olele ma faasa’o soo se mea sese.
Toe fai le faagasologa lenei seia oo ina mafai ona e tusia atoatoa le mau faasino ma le fasifuaitau autu o le mau mai lou manatuaga.

Faataitai le faaaogaina

Ona o le Pau o Atamu ma Eva, o fanau taitasi a le Tama Faalelagi o e e soifua i le olaga faaletino i le lalolagi o le a oo i ai le oti (tagai i le 1 Korinito 15:21–22). Pe a tatou feagai ma se maliu o se tasi e latalata mai ia i tatou, tatou te lagonaina le faavauvau ma se loto malamalama. E ui o nei aafiaga e eseese mo tagata uma, ae o le malamalama ma le faaaogaina o upumoni o le talalelei a Iesu Keriso e mafai ona fesoasoani i lena faavauvau.

O le ata faataitai lenei o se faataitaiga e mafai ona faaaoga mo le gaoioiga faataitai o le faaaogaaga. I se isi itu, o isi tulaga e mafai ona faaaoga, e pei o se aafiaga patino, o se aafiaga a se tagata aoga mai a latou sauniuniga mo le vasega, po o le aafiaga na faasoa mai e Sister Reyna I. Aburto o le Au Peresitene Aoao o le Aualofa i lana lauga ua faaulutalaina “E Leai Se Manumalo o le Tuugamau” (matamata mai le taimi faailo 4:22 i le 4:49). O loo maua lenei vitio i le ChurchofJesusChrist.org.

Sa faamatala e Elder S. Mark Palmer o le Fitugafulu le aafiaga o ona matua i le maliu o le la tama teine ae latou te lei aoao e uiga i le talalelei a Iesu Keriso.

Matamata i le “Our Sorrow Shall Be Turned into Joy,” o loo maua i le ChurchofJesusChrist.orgmai le faailotaimi 3:27 i le 4:26, pe faitau le faamatalaga o loo i lalo.

8:51

O lo’u tama ma lo’u tina o ni tagata fai lafu mamoe i Niu Sila. Sa fiafia lava i o la olaga. I le avea ai o se ulugalii talavou, sa faamanuiaina i la’ua i se fanau teine e toatolu. O le ui’i o i latou e igoa ia Ane. I se tasi aso a o tafafao faatasi i se vaituloto, sa savalivali ese atu Ane e 17-masina le matua. I le mavae ai o ni nai minute o le sailiga faanatinati, sa maua o ia ua maliu i le vai.

O lenei faalavelave matautia na afua ai se tiga e le mafaamatalaina. Sa tusia e lona tama i ni tausaga mulimuli ane e faapea na mou ese atu se vaega o le fiafia mai o latou olaga e faavavau. Na afua ai foi se faanaunauga mo ni tali i fesili aupito taua o le olaga: O le a le mea o le a oo i ai la ma pele o Ane? Pe matou te toe vaai ea ia te ia? E mafai ea faapefea ona toe fiafia lo matou aiga?

(S. Mark Palmer, “O Lo Tatou Faanoanoa o le a Liua i le Olioli,” Liahona, Me 2021, 88–89)

O anafea na e oo ai pe oo ai foi se tasi e te iloa i ni lagona talitutusa faapea ia i latou e faapei o matua o Elder Palmer ina ua maliu se tasi e pele ia te oe?
E ono mafai faapefea e le le iloaina e uiga i le fuafuaga o le faaolataga a le Tama Faalelagi ona atili faigata ai nei tulaga?

O mataupu faavae o le mauaina o le malamalama faaleagaga e mafai ona fesoasoani ia i tatou e onosaia ai ma le faamaoni tulaga faigata e pei o lea na oo i ai le aiga o Palmer. Manatu faapea o oe o se uo ma se tasi o uso matutua o Ana, o loo tauivi nei ma fesili ma luitau ina ua mavae le maliu o Ana. Ua e lagona le uunaiga e tusi atu ia te ia se tusi faamalosiau ma le lagolago. I se isi foi faiga, tusi se tusi ma tuu atu i se tasi e te iloa o le a manuia mai ai.

A o lei tuuina atu i tagata aoga se taimi e tusi taitoatasi ai a latou tusi, mafaufau e vaevae i latou i ni paga po o ni vaega toalaiti ma valaaulia i latou e talanoaina fesili o loo lisi atu i lalo e fesootai i mataupu faavae o le mauaina o le malamalama faaleagaga. E mafai ona tuu tagata aoga i ni vaega taitoatolu, faatasi ma tagata taitoatasi o le vaega ua tofia i ai se tasi o mataupu faavae o le mauaina o le malamalama faaleagaga e suesue ma aoao atu ai isi i la latou vaega.

Valaaulia i latou e faaaoga malamlamaaga mai a latou sauniuniga mo le vasega a o latou faia le gaoioiga lenei.

Mo le tapenaina o lenei tusi, toe faitau parakalafa 5-8, 11 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2022). Vaavaai, ma maka upu, fasifuaitau, mau, po o upumoni e te lagona o le a aoga i le tagata o loo e tusi atu i ai.

E mafai faapefea e le taumafai e vaai atu i le tagata o loo e tusi atu i ai e pei ona silasila atu le Tama Faalelagi ia i latou ona suia mea ua e tusi atu ai ia i latou?

Tusi se tusi i le uso o Ane po o se isi tagata ua e filifilia. Faaaofia ai malamalamaaga mai mataupu faavae e tolu o le mauaina o le malamalama faaleagaga.

Mafaufau i nisi o manatu nei ae o loo e tusia le tusi.

Faailoa atu manatu nei mo tagata aoga e vaai i ai a o latou tusia tusi.

Faatino i le faatuatua

Mata e faapei foliga o le faatinoina ma le faatuatua ia Iesu Keriso i o latou tulaga?
E mafai faapefea e le faatinoina ma le faatuatua ia Keriso ona fesoasoani ia i tatou e onosaia ai le motusia o mafutaga?
O le a se aafiaga na oo ia te oe po o se tasi e te iloa lea na fesoasoani ai le faatinoina ma le faatuatua ia Iesu Keriso e onosaia o se luitau faapena?

Iloilo mataupu ma fesili i se vaaiga e faavavau

O a upumoni e uiga i le Tama Faalelagi ma Lana fuafuaga e mafai ona faamafanafanaina i le tulaga o le tagata o loo e tusi atu i ai? Aisea?
E mafai faapefea e le i ai o se vaaiga e faavavau ona fesoasoani ia i latou e iloa ai pe faapefea ona tali atu i o latou tulaga?

Saili le malamalama atili e ala i pogai paia filifilia

O a fasifuaitau mai le 1 Korinito 15:20–22 o le a fesoasoani ia i latou? Aisea?
O a isi pogai paia filifilia o le a fesoasoani ia i latou e atiina ae ai le faatuatua ia Iesu Keriso?

Mafaufau e faaiu lau tusi i le faasoaina atu o lau molimau.

Valaaulia ni tagata aoga o loto i ai e faasoa mai a latou tusi na tusia i le vasega. Fautuaina i latou e faaaoga mataupu faavae o le mauaina o le malamalama faaleagaga e taiala ai i latou i taimi o luitau po o fesili i o latou lava olaga.

Iloiloga o le atamai i aoaoga faavae

I le amataga po o le faaiuga o se lesona o le a sosoo ai, ia le silia ma le tolu i le lima minute e toe faamanatu ai le tusi faasino o le mau ma le fasifuaitau autu o le mau mo lenei fuaitau o le atamai i aoaoga faavae. Valaaulia le vasega e sue le pepa sa gaugau lea sa latou faaaogaina e tauloto ai le 1 Korinito 15:20–22 . A o gaugau pea le pepa ia le mafai ona latou vaai i mea sa latou tusia, valaaulia tagata aoga e taumafai e tusi mai i o latou mafaufau le mau faasino ma le fasifuaitau. Afai e le mafai ona latou faia e aunoa ma se fesoasoani, valaaulia i latou e tatala le pepa ma toe faamanatu pe a manaomia. E mafai ona faaauau pea ona latou gaugau ma tusitusi seia oo ina mafai ona latou tusia le mau faasino ma le fasifuaitau mai le mafaufau.