1 Korinito 15:13-28

“Ae o Lenei ua Toetu mai Keriso nai e ua Oti”

Vaai faalemafaufau mo sina taimi e faapea e le i toetu mai lava Iesu Keriso. O le a le uiga o lena mea mo le lalolagi? mo oe lava ia? Aisea ua matua taua tele ai le Toetu o Keriso? Ina ua fesiligia e le au Au Paia i Korinito mea moni e uiga i le Toetu, sa tusi atu Paulo e faamatala atu le uiga o le Toetu o le Faaola mo i latou. O lenei lesona e mafai ona fesoasoani ia te oe ia lagonaina ai le alofa sili ma le talisapaia o Iesu Keriso ona o Lona manumalo i le oti.

Mafaufau i manaoga o tagata aoga a o aoao atu. O le fetuunaiina o metotia faafaiaoga e mafai ona fesoasoani i tagata o le vasega ia faataunuuina ma le manuia a latou matafaioi o ni tagata aotauina. Mo se faataitaiga, afai e foliga mai ua vaivai tagata o le vasega, mafaufau e valaaulia i latou e galulue taitoalua e fesoasoani ai ia faaauau ona punouai i le aoaoina. Afai e mataalia naua tagata o le vasega, o le fai atu ia i latou e suesue taitoatasi e fesoasoani ia latou tumau ai pea i le galuega o loo fai.

Sauniuniga a le tagata aoga: Valaaulia tagata aoga e talanoaina le fesili lenei ma tagata o le aiga po o uo ma ia omai saunia e faasoa mai ni tali e ono maua mai ai: “O le a le aso na sili ona suia ai le ala o le talafaasolopito o le lalolagi? Aisea?”

Gaoioiga E Ono Mafai Ona Aoao Mai Ai

O le aso na suia ai le talafaasolopito

Sa faasoa mai e Elder Dieter F. Uchtdorf o le Korama a Aposetolo e Toasefululua se fesili sa ia suesueina muamua. Matamata i le “Faauta o le Tagata!” mai le faailo taimi 1:37 i le 2:31, e maua i le ChurchofJesusChrist.org, pe faitau le faamatalaga lea.

Talu ai nei sa ou fesili ai i le initoneti, “O le a le aso na sili ona suia ai le alafua o le talafaasolopito [o le lalolagi]?”

O tali na amata mai le faateia ma le ese lava e oo i le malamalama loloto ma le faatupu manatu. O se tasi [o na tali], o le aso na taia ai e se paneta papa anamua le Penisula o Iukatana; po o le 1440 ina ua faamaea e Johannes Gutenberg lona falelomitusi; ma ioe, o le aso i le 1903 ina ua faaalia e le au uso o Wright i le lalolagi e faapea e mafai moni lava e tagata ona felelei.

Pe afai e fai atu lea lava fesili e tasi ia te oe, mata o le a lau tala e fai?

(Dieter F. Uchtdorf, “Faauta o le Tagata!, Ensign po o le Liahona, Me 2018, 107-8)

• O le a le aso na sili ona suia ai le alafua o le talafaasolopito? Aisea?

Sa faasoa mai e Elder Uchtorf le mea na tupu sa ia manatu na sili ona suia ai le alafua o le talafaasolopito. Matamata i le “Faauta o le Tagata!” mai le faailo taimi 4:20 agai i le 4:55, pe faitau i le faamatalaga lenei.

E tele mea na tutupu i le talafaasolopito ua matua aafia tele ai le taunuuga o malo ma tagata. Peitai a tuufaatasi uma, e le mafai ona amata faatusatusa i le tāua o le mea na tupu i lena taeao o le uluai Eseta.

O le a le mea ua avea ai le taulaga e le i’u ma le Toetu o Iesu Keriso ma mea aupito sili ona taua na tupu i le talafaasolopito—e sili atu ona aafiaga nai lo taua o le lalolagi, mala matautia faataumaoi, ma mea fou faasaienisi e suia ai le olaga?

(Dieter F. Uchtdorf, “Faauta o le Tagata!, Ensign po o le Liahona, Me 2018, 108)

• Aisea e te manatu ai o le Togiola ma le Toetu o le Faaola o se mea sili ona taua na tupu i le talafaasolopito?

• Aisea e taua ai le Toetu o Iesu Keriso ia te oe?

O le Toetu o Iesu Keriso

Sa tusi atu Paulo i le Au Paia o Korinito e faasa’o le talitonuga sese na aliae e faapea sa leai se Toetu. Ao e suesue i ana upu, tusi se siata e talitutusa ma lenei e faamau ai faamatalaga auiliili ma mea moni mai tusitusiga paia, faatasi ai ma ni musumusuga e te maua mai le Agaga Paia. O le faia ai o lea mea e mafai ona fesoasoani ia te oe e malamalama atili ai i tusitusiga paia, maua se aoaoga sili ona mamana, ma faalolotoina ai lou alofa mo ma le malamalama o le Faaola ma Lona manumalo i le oti.

Mafaufau e tusi le siata i luga o le laupapa ma faatumu faatasi ma le vasega. Valaaulia tagata aoga e tusi foi le siata i a latou api faamaumau mo suesuega.

Pe ana fai e lei toetu mai Iesu Keriso …	Ona ua toetu mai Iesu Keriso …

Mafaufau e valaaulia tagata aoga e galulue i ni paga, po o ni vaega toalaiti ao latou faia mea nei.

Faitau le 1 Korinito 15:13-19 . Faaopoopo ni faamatalaga se lua pe tolu i le itu tauagavale o lau siata e fua i mea e te aoaoina mai nei fuaiupu.

• E faapefea ona aafia oe faapea ma isi tagata pe ana fai e lei toetu mai Iesu?

O le 1 Korinito 15:20–22 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se ala iloga ina ia mafai ai ona e mauaina gofie. O le a e aoao atili e uiga i lenei fuaitau o le atamai i aoaoga faavae i le lesona e sosoo ai.

Faitau nei le 1 Korinito 15:20–22 . Vaai po o le a le mea o le a tupu ona o le Toetu o Iesu Keriso. Faaopoopo atu i le koluma i le itu taumatau o lau siata. Ia manatua o le upu “faapolopolo” i le fuaiupu 20 e faatatau ia Iesu Keriso o le tagata muamua sa toetu mai.

• O le a le mea ua faamamafa e Paulo o le a tupu ona o le toetu o Iesu?

O lenei fuaitau e fesoasoani ia tatou malamalama ai ona o le Toetu o Iesu Keriso, o le a toetutu ai tagata uma. O le oti faaletino e oo i tagata uma ona o le Pa’ū o Atamu ma Eva. Sa manumalo Iesu Keriso i lenei mea ma ua avea ma se meaalofa maua fua mo tagata uma.

Nofo ma mafaufau po o le a se mea e mafai ona e aoaoina e uiga ia Iesu Keriso ona o lenei meaalofa o le toetu mo tagata uma.

• O le a se mea e mafai ona aoaoina ai oe e uiga i le Faaola ona o Lona manumalo i le oti faaletino mo tagata uma?

Afai e mafai, matamata i le “#Hallelujah—An Easter Message about Jesus Christ” (2:13), e maua i le ChurchofJesusChrist.org. Sue ma lisi i totonu o le koluma i le itu taumatau o lau siata auala e mafai ona faamanuiaina ai oe ona o le Toetu o le Faaola. O le “Aleluia” o se faaupuga o lona uiga o le “viia oe le Alii” (tagai i le Bible Dictionary, “ Hallelujah ”).

• O le a se mea na e aoaoina mai le vitio e faatupu ai lou manao e viia le Alii?

Ia magafagafa lelei ao faia fesili nei. Mafaufau e faasoa atu se aafiaga patino e fesoasoani e faamalosiau atu ai i tagata aoga e tali mai. Afai latou te le o mananao e faasoa ma le vasega, e mafai ona latou tali i totonu o a latou api faamaumau mo suesuega.

Toe mafaufau i tua i le fesili mai le amataga o le lesona: “Aisea e taua ai le Toetu ia te oe?”

• E faapefea ona aafia lau tali i lena fesili ona o mea sa e suesueina i le asō?

• O a ni auala e te vaai faalemafaufau ai i ou lagona e uiga ia Iesu Keriso pe a Ia avatu ia te oe ma e pele ia te oe se olaga fou?

O le uiga o Lona Toetu mo i tatou

O taitai o le Ekalesia mai anamua faapea aso nei ua molimau i le uiga o le manumalo o le Faaola i le oti mo i tatou.

Faitau i le 1 Korinito 15:51-58, Alema 11:42-44, ma le faamatalaga lenei a Elder Paul V. Johnson o le Fitugafulu, lea na maliu lona alo tamaitai i le kanesa. Faaopoopo i lau siata faamatalaga auiliili taua e te vaai i ai. Ia manatua o le faaupuga “e ola pea” ( 1 Korinito 15:52) o lona uiga e tumau i le faavavau ma e le pala.

O i tatou taitoatasi e i ai ni tapulaa ma ni vaivaiga faaletino, faalemafaufau, ma faalelagona. O nei faafitauili … o le a mulimuli ane ona foia lea. E leai se tasi o nei faafitauli o le a mafatia ai i tatou pe a mavae le toetutu. …

… Tatou te iloa e mafai e [Keriso] ona faaatoatoa i tatou e tusa lava pe o a mea ua gauia i totonu o i tatou. Tatou te iloa e Na te “soloiesea loimata uma i o tatou mata; e leai foi se toe oti, po o se faanoanoa, po o se tagi aue, e leai foi se toe puapuaga” [Faaaliga 21:4].

(Paul V. Johnson, “Ma E Le Toe Iai Se Oti,” Ensign po o le Liahona, Me 2016, 122-23)

Valaaulia tagata aoga e faasoa mai mea na latou faaopoopo i a latou siata mai le saunoaga a Elder Johnson.

Toe iloilo lau siata. Mafaufau loloto pe faapefea e mea sa e faamauina ona aafia ai ou lagona ia Iesu Keriso.

• E faapefea ona fesoasoani lenei siata i au suesuega?

• E faapefea e mea na e faamauina ona aafia ai lou lagona alofa mo ma mai le Tama Faalelagi ma Iesu Keriso?

I le faaiuga o au suesuega, mafaufau e matamata le ata “I Know That My Redeemer Lives” (5:25) pe faitau i upu o le pese “Ua Ou Iloa Lou Faaola” (Viiga, nu. 73), e maua i le ChurchofJesusChrist.org.

I le pito i lalo o lau siata, tusi ai mea na e aoaoina pe lagonaina i le asō sa sili ona anoa ia te oe ma pe aisea foi.

Tuu atu i tagata aoga ia lava le taimi e tusitusi ai. Ona mafaufau lea e tuu atu lau molimau i le Faaola ma le uiga ia te oe lava o Lona mana e manumalo ai i le oti.

Manatu ma Talaaga o Faamatalaga

E faapefea e le iloa o le mana o le Toetu o Keriso ona aafia ai au?

Na faamalamalama mai e Peresitene Dallin H. Oaks o le Au Peresitene Sili:

O le faamautinoaga e faapea o le toetu o le a aofia ai ma se avanoa e faatasi ai ma tagata o o tatou aiga—tane, ava, matua, uso ma tuafafine, fanau, ma a latou fanau—o se faamalosiau malosi mo i tatou e faataunuu ai o tatou tiutetauave faaleaiga i le olaga nei. E fesoasoani ia i tatou e ola faatasi ai i le alofa i lenei olaga i le tulimatai atu o le toe tuufaatasiga fiafia ma fegalegaleaiga i le isi olaga.

(Dallin H. Oaks, “Toetu,” Ensign po o le Liahona, Me 2000, 16)

Mafaufau e matamata le “Sunday Will Come” (2:31) mo nisi malamalamaaga. O loo maua lenei vitio i le ChurchofJesusChrist.org.

E faapefea e le Togiola ma le Toetu o le Faaola ona fesoasoani i a tatou mafutaga motusia tatou te oo i ai i le olaga faaletino?

Matamata i le “Come What May, and Love It” mai le faailo taimi 8:23 i le 9:12, sa faamatala mai ai e Elder Joseph B. Withlin (1917-2008) o le Korama a Aposetolo e Toasefululua auala e fesoasoani mai ai le Faaola ia i tatou pe a motusia mafutaga i le soifuaga faaletino. O loo maua lenei vitio i le ChurchofJesusChrist.org.

Na aoao mai Elder D. Todd Christofferson o le Korama a Aposetolo e Toasefululua:

O le Faaola na te faia mea uma ina ia tonu ma sao. E le tumau le faailogatagata i le olaga faaletino, e oo lava i le oti, aua na Ia toefuatai mai le ola. E leai se manua, se le atoatoa, se faalataina, po o se sauaina e le tauia i le iuga ona o Lana faamasinoga tonu mulimuli ma le alofa mutimutivale.

(D. Todd Christofferson, “O Le Toetu o Iesu Keriso, Ensign po o le Liahona, Me 2014, 112)

Pe toetutu uma tagata i le taimi e tasi?

“Sa faamatala e Paulo e faapea e mulimulitai le Toetu i se faatulagaga po o se faasologa na faavaeina (tagai i le 1 Korinito 15:23). …

“O Iesu Keriso o Ia na uluai toetu mai. E sosoo lava ma Lona Toetu, sa i ai le Au Paia amiotonu o e na toetutu mai i tuugamau (tagai i le Mataio 27:52–53). I le Afio Mai Faalua, o le a faaauau pea le Toetutu e ala i le tulai mai o isi Au Paia amiotonu “o e o ia Keriso i lona afio mai” ( 1 Korinito 15:23). E ala mai i faaaliga o aso e gata ai, tatou te aoao ai o nei tagata o le a fai mo latou tofi le malo selesitila [tagai i le Mataupu Faavae ma Feagaiga 76:50–70 ; 88:97–98 ]. Ona oo mai ai lea o le toetu o i latou o le a maua le mamalu terasitila [tagai i le Mataupu Faavae ma Feagaiga 76:71–79 ; 88:99 ]. O le a mulimuli mai ia i latou i le iuga o le Mileniuma i latou o le a fai mo latou tofi le mamalu telesitila [tagai i le Mataupu Faavae ma Feagaiga 76:81–86 ; 88:100–101 ]. O le faaiuga, o le Toetu o le a faaiuina i le faatutuina mai … o ‘atalii o le malaia’ o e o le a leai se mamalu latou te mauaina ae o le a ‘toe foi atu i lo latou lava nofoaga, e fiafia ai i mea ua latou naunau e maua, aua sa latou lei naunau e fiafia i mea semanu latou te mauaina’ [tagai i le Mataupu Faavae ma Feagaiga 76:31–39, 43–44 ; 88:28–32, 35, 101–2 ]” (Tusi Lesona a le Tagata Aoga o le Feagaiga Fou [2014], 385).

O agaga sa tetee i le muai olaga ma sa lei maua se tino faaletino e le faitaulia i latou i tagata o le a toetutu (tagai i le Mataupu Faavae ma Feagaiga 76:32-39).

Gaoioiga Faaopoopo e Aoao Ai

Gaoioiga e suesue ai 1 Korinito 15:20-22

Mafaufau e valaaulia tagata aoga e faitau le “Le upu ma le upu: 1 Korinito 15:20-22” i le itulau 12 o le New Era o Tesema 2012. E mafai ona faaaoga e tagata aoga punaoa o loo lisiina atu i lenei tusiga ao faatumu a latou siata i le faagasologa o le lesona.