Atamai i Aoaoga Faavae: 1 Korinito 15:40–42

I le Toetu, E Tolu Tikeri o le Mamalu

O se ata o loo faaalia ai le Faaolataga ma le Faaeaga: La & Masina ma Fetu

I se lesona talu ai, “1 Korinito 15:32–54,” sa e aoao ai e uiga i tikeri e tolu o le mamalu i le Toetu. Sa e aoaoina foi o le a tuuina mai e lo tatou Tama Faalelagi le mamalu selesitila ia i latou e faamaoni e ala ia Iesu Keriso. O lenei lesona o le a fesoasoani ia te oe e tauloto ai mau faaleaoaoga faavae ma le fasifuaitau autu o le mau mo le 1 Korinito 15:40-42, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga masani faale-soifuaga.

Fesoasoani i tagata aoga e sue tali i a latou fesili. E le o se tiute tauave a se faiaoga le tali o fesili uma e fesili mai ai se tagata aoga. Fesoasoani i tagata aoga e faaaoga ia mataupu faavae o le mauaina o le malamalama faaleagaga ina ia mafai ai ona latou maua ia tali mo i latou lava. Faamalosi i tagata aoga e liliu atu ma le faatuatua ma faalagolago i le Alii. E ono fesoasoani le galue ai o se faatonu e ala i le faailoaina o punavai paia ua filifilia e mafai ona latou faaaogaina e saili ai mo tali.

Sauniuniga a le tagata aoga: Valaaulia tagata aoga e faitau le 1 Korinito 15:40–42 ma omai saunia i le vasega e faasoa mai se tulaga moni o le olaga lea o le a fesoasoani ai le aoaoga faavae o loo aoaoina i lenei fuaitau.

O Gaoioiga E Ono Mafai Ona Aoao Ai

O lenei lesona o le atamai i aoaoga faavae ua fuafuaina ia aoao atu pe a maea le lesona o le “1 Korinito 15:32-54,” o le lesona faatatau mo le fuaitau o le atamai i aoaoga faavae o le 1 Korinito 15:40-42 . Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ma le lesona o le vaiaso foi lena.

Tauloto ma faamatala

Fesoasoani i tagata aoga e tauloto ma faamatala le mau faasino ma le fasifuaitau autu o le mau mo le 1 Korinito 15:40–42 . O le gaoioiga o mulimuli mai o se tasi lea o auala e faatino ai lenei mea.

Mo lenei gaoioiga, mafaufau e tuu atu i tagata aoga e faauma laasaga taitasi a o lei tuuina atu le isi laasaga.

Tusi le “1 Korinito 15:40–42: I le Toetu, E Tolu Tikeri o le Mamalu” i le pito i luga o se fasipepa.
Tusi le ata o se la i lalo ifo o le fasifuaitau, se masina i lalo ifo o le la, ma se fetu i lalo ifo o le masina.
Faitau le 1 Korinito 15:40–42, ma faaigoa au ata taitasi i le igoa o le mamalu ua faatusa i ai. (Manatua o le Faaliliuga a Iosefa Samita o le 1 Korinito 15:40 ua faaopoopo ai se faasinoga i le mamalu telesitila [i le 1 Korinito 15:40, vaefaamatalaga a].)
Vaai i lau ata a o fai faafia le mau ma le fasifuaitau autu o le mau i lou mafaufau seia oo ina e mautinoa ua e iloaina lelei.
E faapefea ona e faamatalaina upumoni o loo aoao mai i lenei fuaitau i se tasi e le malamalama i le mea e tupu pe a mavae le oti i le fuafuaga a le Tama Faalelagi? Tusi i lalo lau faamalamalamaga i au lava upu.

Mafaufau e valaaulia tagata aoga e feoai solo i le potu ma faasoa a latou faamalamalamaga i isi tagata aoga ia le itiiti ifo ma le toatolu. Afai e manaomia, faataitai pe faapefea ona faailoa atu nei upumoni a o lei amata ona fefaasoaai o le tasi ma le isi.

Uunaia tagata aoga ia taofi pea a latou ata pe tuuina mai ina ia mafai ona faaaoga e iloilo ai lenei fuaitau i se lesona i se taimi lata mai o le lumanai.

Faataitai le faaaogaina

O le faaaogaina o mataupu faavae o le mauaina o le malamalama faaleagaga e mafai ona fesoasoani ia i tatou i tulaga masani o le olaga ma fesili taua o loo ia i tatou.

Faitau i tala faataitai ia, ma filifili se tasi e te manao e taulai i ai mo le isi gaoioiga e sosoo ai.

Valaaulia tagata aoga o e na faamaeaina le gaoioiga sauniuni a le tagata aoga e faasoa mai a latou ata faataitai. Mafaufau e sui ata faataitai nei i ata faataitai a tagata aoga.

E taumafai ma le faamaoni Iulia e fai le mea sao, ae e masani ona ia lagona le tauemuina ona o ona vaivaiga. E talitonu o ia o le a o atu isi tagata i le malo selesitila ae masalosalo i lona ausia
Na faatoa faalogo Maria i se lauga maoae e uiga i le meaalofa o le toetu lea o le a tuuina mai e le Tama Faalelagi ma Iesu Keriso i tagata uma. Sa ia tau mafaufau, “Aisea e tatau ai ona ou salamo pe tausia poloaiga pe afai o le a toetutu tagata uma i se tino ola pea?”

Mafaufau e fai atu i tagata aoga e faatulaga i ni vaega taitoatolu ma isi o e na filifilia le ata faataitai lava e tasi. Mo le gaoioiga o lo o mulimuli mai, e mafai ona talosagaina tagata aoga taitasi o le vaega e suesue ma faaaoga se mataupu faavae ese o le mauaina o le malamalama faaleagaga. A uma le taimi atofaina, valaaulia tagata aoga e lipoti i a latou vaega mea sa latou aoaoina.

E ono fesoasoani le faaali pe lolomi ni kopi o vaega nei mo tagata aoga e tagai i ai a o latou suesue.

I le lesona talu ai, sa e suesue ai e uiga i le upumoni lenei o loo aoao mai i le 1 Korinito 15:40–42 : i le fuafuaga a le Tama Faalelagi e eseese tikeri o le mamalu mo tino toetutu. Faaaoga mataupu faavae o le mauaina o le malamalama faaleagaga ma le upumoni o loo aoao mai i le 1 Korinito 15:40–42 e fesoasoani ai a le o Iulia po o Maria i ona popolega po o fesili.

Iloilo manatu faavae ma fesili ma se vaaiga e faavavau

Faitau le parakalafa 8 i le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2022). Mafaufau e faailoga fesili e lua i le faaiuga o lena parakalafa.

E faapefea ona faatatau tali i na fesili e lua i le tulaga o Iulia po o Maria.

O le parakalafa 8 o loo faapea mai foi, “Tatou te saili le fesoasoani a le Agaga Paia ina ia mafai ai ona vaai i mea e pei ona silasila i ai le Alii.”

Mata o le a se mea o silafia e le Alii i lenei tulaga o le a fesoasoani ai ia Iulia po o Maria? Aisea?

Saili le malamalama atili e ala i punavai paia ua filifilia

Faitau parakalafa 11–12 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae.

O fea e te fautuaina Iulia po o Maria e vaavaai i ai mo upumoni la te manaomia i o la olaga?
O a ni aafiaga na e oo i ai ua faaalia ai le taua o le filifili ma le faaeteete po o fea e te saili atu i ai mo upumoni faaleagaga?

Faaalu ni nai minute e saili ai mo ni mau patino po o ni saunoaga faaperofeta e te lagona e talafeagai i le tulaga o Iulia po o Maria. (O nisi o fuaitau o mau mai lesona talu ai nei e ono fesoasoani e aofia ai le 1 Korinito 15:40–42 ; Mataupu Faavae ma Feagaiga 76:50–52, 62–64, 69–70, 71–76, 81–85 ; 88:21–24 .)

O le a se mea na e mauaina e ono mafai ona e faasoa atu? Na faapefea ona faia e upumoni na e mauaina se eseesega i lou olaga?

Savalivali solo i le potu, ma fesoasoani i tagata aoga o e le o mautinoa pe faapefea ona maua fuaitau o mau po o faamatalaga mai taitai o le Ekalesia. Mafaufau e faaali atu ia i latou pe faapefea ona sue mea o loo latou sailia nai lo le na o le tuuina atu ia i latou o se mau po o se faamatalaga e mafai ona faatatau i ai.

Faatino i le faatuatua

Toe iloilo parakalafa 5-6 i le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae. Mafaufau e maka ia le itiiti ifo ma le tolu ni fasifuaitau po o ni manatu eseese e te manatu e mafai ona fesoasoani ia Iulia po o Maria.

O a fasifuaitau na e filifilia? E mafai faapefea e nei fasifuaitau taitasi ona fesoasoani ia Iulia po o Maria?
Afai na i ai ni ou manatu e talitutusa ma manatu o Iulia po o Maria, o le a se mea na e faia e tali atu ai ma le faamaoni i na mafaufauga?
Aisea o le a manaomia ai e nei tamaitai talavou taitoatasi ona taulai atu o laua faatuatua ia Iesu Keriso a o galulue ai i o la tulaga? Aisea e le faia ai tau o le mea sili la te mafaia e aunoa ma le taulai atu ia te Ia?

Mafaufau e fai atu i tagata aoga e manatunatu i o latou lava olaga, uiga faaalia, ma fesili. Uunaia i latou e faaaoga mataupu faavae o le mauaina o le malamalama faaleagaga i o latou lava tulaga i fafo atu o le vasega. Molimau atu o nei mataupu faavae e mafai ona fesoasoani ia i latou e o mai ia Keriso e maua ai le upumoni ma le filemu sili atu.

Iloiloga o le atamai i aoaoga faavae

I le amataga po o le faaiuga o se lesona o le a sosoo ai, faaaoga ia le silia ma le tolu i le lima minute e toe faamanatu ai le faitauga o le atamai i aoaoga faavae. Mo se faataitaiga, e mafai e tagata aoga ona toe faamanatu a latou ata tusi o tikeri e tolu o le mamalu a o fai pea lava pea le mau ma le fasifuaitau autu o le mau i o latou mafaufau. Ona valaaulia lea o i latou e faaali atu a latou atatusi i se paga a o tauloto leotele le mau faasino ma le fasifuaitau.