Seminare
2 Korinito 1–7

2 Korinito 1–7

Vaaiga Aoao

Ina ua feagai tagata o Korinito ma faigata, sa tusi atu Paulo i tagata o le Ekalesia iina e ofo atu le lagolago faifai pea ma fautuaga. Sa ia valaaulia i latou ia faamagalo le tasi i le isi, mo le lelei o le tagata ua faamagaloina faapea foi mo lo latou lava manuia. Sa ia aoao mai e faapea e ala i le Togiola a Keriso, e mafai ai ona togiolaina i latou mai le agasala ma toe aumaia ai i se sootaga lelei ma le Atua. I lona olioli ma le loto faamalieina, sa ia maua ai se tala e faapea na faataunuuina e le Au Paia i Korinito le salamo moni.

Saunia e Aoao Atu

O faamatalaga nei e tuuina atu ai i faiaoga ni manatu i mea e ono manaomia ona muai saunia mo lesona taitasi.

2 Korinito 1, 4

Faamoemoega o le lesona: O lenei lesona e mafai ona fesoasoani i tagata aoga ia malamalama ai i nisi o auala e tuuina mai ai e le Atua le faamafanafanaga i Ana fanau ma faailoa mai auala e mafai ai ona latou faasoa atu Lana faamafanafanaga i isi.  

  • Sauniuniga a le tagata aoga: Valaaulia tagata aoga e mafaufau i ni auala eseese latou te maua ai le mafanafana pe a i ai ni mea e faaletonu i o latou olaga. Afai e mafai, uunaia i latou e aumai se ata po o se mea faitino e faatusa i se punavai o le faamafanafanaga ia i latou.

  • Fautuaga faafaiaoga i fesootaiga faavitio: Pe a fesili atu i tagata aoga e mafaufau i mea e faamafanafanaina ai i latou, mafaufau e faaali atu ni mea faitino faamafanafana patino po o ni ata mai le aiga. O le faaalia o nei mea faitino i luga o le lau ma le faamalamalamaina o lo latou taua e mafai ona fesoasoani e sosoo ai le vamamao ma fatuina ai se siosiomaga toafimalie e aoao ai.

2 Korinito 2

Faamoemoega o le lesona: O lenei lesona ua faamoemoe e fesoasoani i tagata aoga ia faateleina lo latou malamalama i le taua o le faamagalo atu ma lo latou manao e faamagalo atu i isi.

  • Sauniuniga a le tagata aoga: Valaaulia tagata aoga e o mai saunia e faasoa mai se faataitaiga o se tasi latou te iloa na tuuina atu le faamagaloga faaKeriso i se isi tagata.

  • Fautuaga faafaiaoga i fesootaiga faavitio: Mo le 2 Korinito 2:5–11 , faaaoga le vaega o le laupapa paepae e fatu ai ni koluma se lua. Faaigoa le tasi koluma “E faapefea ona tatou taulimaina se tagata ua mafua ai ona tatou faanoanoa?” ma le isi koluma “Aisea e tatau ai ona tatou taulimaina tagata i lenei ala?” Ona mafai lea ona valaaulia tagata aoga e faasoa mai o latou manatu e te taina i totonu, pe atonu foi latou te taina i totonu a latou lava tali e faaaoga ai se polokalama o faamatalaga faaopoopo.

2 Korinito 5

Faamoemoega o le lesona: O lenei lesona e mafai ona fesoasoani i tagata aoga e faalatalata atili atu ai i le Atua ma avea ai ma tagata e finagalo o Ia ia avea ai i latou.

  • Sauniuniga a le tagata aoga: Valaaulia tagata aoga e mafaufau loloto e uiga i taimi na latou lagona ai le latalata atu i le Atua ma taimi na latou lagonaina ai le taumamao mai ia te Ia ma o mai saunia i le vasega e utuvai mai i nei aafiaga.

  • Anotusi e faaali atu: O fesili e tolu o le a mafaufau i ai le vasega a o latou suesueina le 2 Korinito 5:17–21 , faapea foi manatu e fa o le a latou mafaufau loloto i ai i se taimi mulimuli ane i le lesona (amata i le “Mata o a foliga ma lagona o le faalelei ma le Atua e faavavau?”)

  • Vitio: “I Know His Grace Is There When I Fall” (6:24).

  • Fautuaga faafaiaoga i fesootaiga faavitio: I le amataga o le lesona, valaaulia tagata aoga e faasoa mai i le talanoaga nisi o tulaga masani o le soifuaga atonu e talitutusa ma mea o loo i le lesona. E mafai ona valaaulia i latou e mafaufau pe mafai faapefea e upumoni o i lenei lesona ona fesoasoani i na tulaga.

2 Korinito 7

Faamoemoega o le lesona: O lenei lesona e mafai ona fesoasoani i tagata aoga ia malamalama i se vaega taua o le salamo moni ma fesoasoani ia i latou e latalata atili atu ai ia Iesu Keriso.

  • Sauniuniga a le tagata aoga:Valaaulia tagata aoga e mafaufau pe mafai faapefea ona latou iloa pe na oo ia i latou le salamo moni. E mafai foi ona valaaulia i latou e suesue le vaega “O le tiga e tusa i le Atua e taitai atu ai i le salamo” mai le auivi o le Sau, Mulimuli Mai ia te A‘u (“Setema 11–17. 2 Korinito 1–7: ’Ia Outou Faalelei ma le Atua,’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023).

  • Fautuaga faafaiaoga i fesootaiga faavitio: Mafaufau e fatu se siata o i ai se koluma ua faaigoaina “Tiga Faaleatua” ma se koluma ua faaigoaina “Tiga Faalelalolagi.” Ona faasoa atu lea o le lau o lau masini ma faatumu koluma i manatu o tagata aoga e uiga i na ituaiga tiga e lua. I se isi itu, e mafai e tagata aoga ona sue i le ChurchofJesusChrist.org mo ata e faaalia ai a le o le tiga faaleatua po o le tiga faalelalolagi. Ona mafai lea e tagata aoga ona faaopoopo nei mea i se siata fefaasoaai e mafai ona latou vaai uma i ai. Valaaulia tagata aoga e faamatala mai pe faapefea e ata sa latou faasoa mai ona faapupula mai ai le tiga faaleatua po o le faalelalolagi.

Iloiloga 19 o le Atamai i Aoaoga Faavae

Faamoemoega mo le lesona: O lenei lesona ua faamoemoe e fesoasoani i tagata aoga e tauloto ai nisi o mau faasino o mau mo le atamai i aoaoga faavae ma fasifuaitau autu o mau o le Feagaiga Fou.

  • Sauniuniga a le tagata aoga: Tuu atu i tagata aoga se kopi o le mau faasino ma le siata o le fuaitau autu o le mau, ma valaaulia i latou e tauloto le tele o mau faasino e lima o le atamai i aoaoga faavae ma fasifuaitau autu o mau i le mea latou te mafaia. E mafai foi e tagata aoga ona faaaoga le polokalama o le Atamai i Aoaoga Faavae. I se isi itu, e mafai e tagata aoga ona taumafai e tauloto se fuaitau atoa o le atamai i aoaoga faavae.

  • Fautuaga faafaiaoga i fesootaiga faavitio: I le faaaogaina o fuaitau o le atamai i aoaoga faavae e lima mai le lesona po o so o se fuaitau e lima e manaomia ona toefaamanatu e tagata aoga, mafaufau e valaaulia tagata aoga e tusi ia fasifuaitau autu o mau i ni fasipepa eseese se lima. Tuu se tasi o fuaitau i luga o le lau o lau masini, ona valaaulia lea o tagata aoga e uu i luga i le taimi lava lena le fasifuaitau autu o le mau i le faitauga o le [tasi, lua] tolu. Faaauau lenei gaoioiga seia uma ona toefaamanatu ia fuaitau uma ma lagona e tagata aoga le mautinoa e mafai ona latou faafetauia sao ia fuaitau.