2 Korinito 1; 4

“Faamafanafanaina e le Atua”

Tatou te oo uma lava i le lototiga ma le faanoanoa, faafatiatamai ma faalavelave, ma logo i tiga ma le ma’i. Ina ua feagai tagata o Korinito ma faigata, sa tusi atu Paulo i tagata o le Ekalesia iina e ofo atu le lagolago faifai pea ma fautuaga. Sa ia molimau atu e uiga i le mafanafana ma le filemu o loo avanoa mo i latou e ala mai i le Tama Faalelagi ma Iesu Keriso (tagai i le 2 Korinito 1:3–4). O lenei lesona e mafai ona fesoasoani ia te oe e malamalama ai i nisi o auala e tuuina mai ai e le Atua le faamafanafanaga i Ana fanau ma faailoa ai auala e mafai ona e faasoa atu ai Lana faamafanafanaga i isi tagata.

Faaaogaina o mea faitino ma ata. O nisi o manatu faavae o le talalelei e mafai ona faigata ona malamalama i ai. O le faaaogaina o mea faitino ma ata e mafai ona avea o se auala lelei e fesoasoani ai i tagata aoga ia malamalama i mataupu faavae faaleagaga.

Sauniuniga a le tagata aoga: Valaaulia tagata aoga e mafaufau i ni auala eseese latou te maua ai le mafanafana pe a i ai ni mea e faaletonu i o latou olaga. Afai e mafai, fautuaina i latou e aumai se ata po o se mea faitino e faatusa i se puna o le faamafanafanaga ia i latou.

Gaoioiga E Ono Mafai Ona Aoao Ai

O le a se mea na te aumaia ia te oe le mafanafana?

Afai na talosagaina tagata aoga e fai le gaoioiga sauniuni a le tagata aoga, valaaulia i latou e faaali i le vasega le mea faitino na latou aumaia ma faamatala mai pe faapefea ona aumaia ia i latou le mafanafana.

• O le a ma po o ai foi e te tapa atu i ai mo se faamafanafanaga i taimi faigata?

• O le a ma po o ai foi e tuuina atu ia te oe le faamafanafanaga sili? Aisea?

Fai se lisi o tulaga o le olaga o i ai nei po o le lumanai atonu e te manaomia ai se fesoasoani ma se faamafanafanaga e te manuia ai.

Mafaufau loloto i fesili nei:

• Aisea e mafai ai ona e faatuatuaina o le a faamafanafanaina oe e le Tama Faalelagi ma Iesu Keriso e ala i le meaalofa o le Agaga Paia i taimi faapenei?

• O le a le lelei o lou lagona e te iloa ma maua ai le mafanafana lea e ofoina mai e le Tama Faalelagi ma Iesu Keriso e ala mai i le Agaga Paia?

• E ono mafai faapefea ona e faasoa atu i isi le faamafanafanaga Laua te ofoina mai?

Saili mo tali i fesili na muamua atu a o e suesue i lenei lesona.

Sa manao Paulo e faamafanafana i le Au Paia i Korinito i o latou tofotofoga

A o i ai i Maketonia, sa maua e Paulo se tala mai se soo e igoa ia Tito e faapea o lana tusi muamua na taliaina lelei e le Au Paia i Korinito (tagai i le 2 Korinito 2:13 ; 7:5). Sa aoao foi Paulo e uiga i luitau tumau o nei Au Paia ma tusia ai se isi tusi (2 Korinito) e ofo atu ai ia i latou le faamafanafanaga ma tautalagia ai o latou faafitauli.

• O le a se mea e te manatua e uiga ia Korinito ma faigata o le Au Paia iina?

Afai e faigata i tagata aoga ona tali mai, faamanatu atu ia i latou o Korinito o se aai tele, e mauoa ma lauiloa i le ifo i tupua ma le faitaaga. Sa tauivi le Au Paia iina e tumau i le lotogatasi, talia le atamai o le Atua nai lo aoaoga sese, ma tausia le tulafono o le ola mama.

Faitau le 2 Korinito 1:1–4, ma taulai toto’a i le auala na faatomua ai e Paulo lana tusi lona lua i le Au Paia i Korinito.

Mafaufau e fai atu i tagata aoga e faailoa mai igoa sa faaaoga e Paulo e faalagilagi ai le Tama Faalelagi ona tusi lea o nei igoa i luga o le laupapa.

• O le a se mea na sili ona e maitauina i le faatomuaga a Paulo i le Au Paia?

• O a igoa po o faalagiga na faaaoga e Paulo mo le Tama Faalelagi na e gauai atu i ai?

• O a ni mea ua aoao mai e na igoa po o faalagiga ia te oe e uiga i le Tama Faalelagi?

• O le a le upumoni na aoao mai e Paulo i le fuaiupu 4 ?

Mauaina o le faamafanafanaga mai le Tama Faalelagi ma fesoasoani i isi ia latou maua foi lea lava faamafanafanaga

Atonu na e faailoa maia se upumoni mai le fuaiupu 4 e pei o lenei: A tatou maua le faamafanafanaga a le Tama Faalelagi i taimi o o tatou tofotofoga, e mafai ona sili atu ona tatou fesoasoani i isi ia latou mauaina foi.

A o faailoa mai e tagata aoga le upumoni i le 2 Korinito 1:4, mafaufau e valaaulia i latou e faatusatusa lenei fuaiupu ma le Mosaea 18:8–10 ma vaavaai mo mea e tutusa ai.

Mafaufau e faasoa atu le saunoaga a Elder Gary E. Stevenson i le vaega o “Talatalaga ma Faamatalaga o Talaaga” i le faaiuga o le lesona ma fai atu fesili e pei o nei.

• O le a sou manatu i le uiga o le “faamafanafana atu ia te i latou ua i ai i soo se faalavelave”? ( fuaiupu 4).

• Aisea e te manatu ai o lenei faamoemoega mo soo o Iesu Keriso?

• O anafea na e maua ai po o se tasi e te iloa le fesoasoani ma le faamafanafanaga mai le Tama Faalelagi i le taimi o se tofotofoga?

• O le a se mea na e aoaoina pe na latou aoaoina mai lena aafiaga?

• O le a sou manatu i se mea e mafai ona e faia e maua atili ai le faamafanafanaga a le Atua pe a e manaomia?

Afai e le maaleale patino tele tali a tagata aoga, valaaulia nisi o tagata aoga e faasoa mai o latou aafiaga. E mafai ona fesoasoani mo tagata aoga le faalogo i ni auala e faamafanafanaina ai i tatou e le Tama Faalelagi. Mafaufau e faaopoopo foi se molimau ma ni aafiaga patino.

Faitau le saunoaga lenei mai ia Peresitene Spencer W. Kimball (1895–1985).

E amanaia i tatou e le Atua, ma na te leoleo ia te i tatou. Ae e masani lava ona auala mai i se isi tagata lona taulimaina o o tatou manaoga. O le mea lea, o se mea taua tele lo tatou auauna atu i le tasi ma le isi i le malo o le Tama Faalelagi.

(Aoaoga a Peresitene o le Ekalesia: Spencer W. Kimball [2006], 82)

Afai o i ai, matamata le vitio “God Will Lift Us Up” (4:58) i le ChurchofJesusChrist.org. O loo faamatala ai le tala i se tamaitai talavou e igoa ia Brittany lea na maua le mafanafana i le auauna atu i isi ma le faalagolago i le Alii nai lo le taulai atu i lona lava faaletonu faalesoifua maloloina.

• Aisea e te manatu ai e masani ona faaaoga i tatou e le Tama Faalelagi e fesoasoani ai i isi tagata i taimi o o latou tofotofoga e lagona ai Lona alofa ma le faamafanafanaga?

Mafaufau i se tasi e te iloa o loo feagai nei ma se faigata. Mafaufau ma le agaga tatalo pe ono mafai faapefea ona e fesoasoani ia i latou ia lagona le faamafanafanaga ua ofoina mai e le Tama Faalelagi a o e faia mea nei:

A. Mafaufau i mea ua e aoaoina mai le 2 Korinito 1:1–4 e mafai ona fesoasoani ai i lenei tagata.

E. Faitau ni seti se lua pe sili atu o fuaiupu nei, o loo i ai aoaoga faaopoopo a Paulo i Korinito e uiga i tofotofoga. Sue se fasifuaitau po o se fuaiupu e te lagona o le a aoga i le tagata na e filifilia.

• 2 Korinito 1:8–11

• 2 Korinito 4:6–10

• 2 Korinito 4:14–18

I. Fai se mea i le taimi nei e fesoasoani ai i lenei tagata ia lagona le faamafanafanaga a le Tama Faalelagi. Mafaufau e tatalo mo i latou e pei o le Au Paia i Korinito sa tatalo mo Paulo (tagai i le 2 Korinito 1:11). E le gata i lea, e mafai ona e tusi atu i lenei tagata se savali faamalosiau e pei ona sa faia e Paulo i Korinito, e ui atonu o lau savali o se tesi, imeli, po o sina faamatalaga nai lo o se tusi. (Mafaufau e faaaofia ai mea na e aoaoina i lenei lesona mai le 2 Korinito 1; 4 faapea foi ma soo se aafiaga patino e mafai ona fesoasoani i ai.)

O. Fai ni fuafuaga faaopoopo e fesoasoani ai i lenei tagata. Atonu e uunaia oe e le Tama Faalelagi e fai nisi faatinoga, e pei o le asiasi atu ia i latou po o le auauna atu ia i latou i nisi o auala. Ia mautinoa e tusi i lalo soo se fuafuaga e te mafaufau i ai i se nofoaga o le a faamanatu atu ai ia te oe e te tulitaulai i ai, e pei o lau kalena, i luga o lau telefoni feaveai, po o luga o se fasi pepa o le a e tilotilo i ai i se taimi mulimuli.

A maea ua lava se taimi na tuuina atu i tagata aoga, valaaulia i latou e faasoa mai se mea se tasi ua latou fuafua e fai e fesoasoani ai i le tagata na latou mafaufau i ai. E ui atonu e talafeagai mo tagata aoga ona faasoa mai e uiga i le tofotofoga lautele po o le tulaga o le tagata, faamanatu atu ia i latou e aua nei faasoa maia po o ai le tagata pe matuai patino lava ina ia mafai ai e isi tagata aoga ona faigofie ona mateia pe o ai.

Molimau atu i mataupu faavae na aoaoina i lenei lesona ma fautuaina tagata aoga e tulitaulai i a latou fuafuaga e faamafanafana ai se isi tagata.

Manatu ma Talaaga o Faamatalaga

2 Korinito 1:4 . Aisea ua faamoemoe mai ai le Alii ia te au e aapa atu ma faamafanafana i tagata o loo manaomia le fesoasoani?

Na aoao mai Elder Gary E. Stevenson o le Korama a Aposetolo e Toasefululua e faapea:

Mai le taimi na tatou tutu a’e ai mai le vai o le papatisoga, na tofiaina ai i tatou i lenei galuega. Tatou te aapa atu i le alofa i isi ona o le mea lena na poloaiina i tatou e lo tatou Faaola e fai. … Soo se taimi lava e oo ai o tatou tuaoi i ni mafatiaga faaletino pe faaleagaga, tatou te taufetuli atu e fesoasoani ia i latou. Tatou te tauave avega a le tasi ma le isi ina ia māmā. Tatou te faanoanoa faatasi ma i latou o ē faanoanoa. Tatou te faamafanafana ia i latou o e manaomia le faamafanafanaga. Ua faamoemoeina ma le alofa e le Alii lenei mea mai ia i tatou. Ma o le a oo mai le aso o le a tatou tali atu ai ia te Ia mo le tausiga o loo tatou faia e auauna atu i Lana lafu.

(Gary E. Stevenson, “Leoleoina o Agaga,” Ensign po o le Liahona, Nov. 2018, 111)

2 Korinito 4:17 . O le a le uiga o le manatu o Paulo ina ua ia faasino i o tatou luitau faaletino o se “puapuaga mamasagia”?

Na aoao mai e Elder Paul V. Johnson o le Au Peresitene o Fitugafulu e faapea:

I le totonugalemu o faafitauli, e toetoe lava a le mafai ona iloaina e faapea o faamanuiaga o loo faamoemoeina e sili atu ona maoae nai lo le tiga, faalumaina, po o le lototiga atonu tatou te lagonaina i lena taimi. … Na aoao mai le Aposetolo o Paulo, “Aua o lo matou puapuaga mamasagia ma e vave mavae, e tupu mai ai mo i matou le manuia mamafa e matua silisili ese lava ma le faavavau” [ 2 Korinito 4:17 ]. E manaia le faaaogaina e Paulo o le faaupuga “puapuaga mamasagia.” O le upu lenei e sau mai se tagata sa fasia, fetogia, afatia i le vasa , faafalepuipuiina, ma sa oo i le tele o isi tofotofoga. Ou te masalo e ta’ua e le toatele o i tatou o tatou puapuaga e mamasagia. Ae pe a faatusatusa i faamanuiaga ma le tuputupu ae tatou te maua mulimuli ane, i lenei olaga ma le faavavau, e moni lava e mamasagia o tatou puapuaga. …

O nisi taimi tatou te mananao ai ia tatou tuputupu ae e aunoa ma ni luitau ma ia atiina ae le malosi e aunoa ma se tauiviga. Peitai e le mafai ona oo mai le tuputupu ae i le uia o se auala faigofie. Ua tatou malamalama lelei o se tagata taalo afeleti e musu i toleniga faigata ma malolosi o le a le avea lava ma se tagata afeleti iloga i le lalolagi. E tatau ona tatou faaeteete ia aua ne’i o tatou inoino i mea tonu lava ia e fesoasoani tatou te maua ai le natura paia.

(Paul V. Johnson, “E Sili Atu Nai Lo Le Manumalo e ala ia te Ia o Le Alofa ia i Tatou,” Ensign po o le Liahona, Me 2011, 79–80)

Gaoioiga Faaopoopo e Aoao Ai

2 Korinito 1:3 . “O le Atua o faamafanafanaga uma”

Valaaulia tagata aoga e sue isi tala i tusitusiga paia pe mai le talafaasolopito o le Ekalesia o loo faaalia ai e mafai e le Tama Faalelagi ona tuuina mai le faamafanafanaga. Mo se faataitaiga, e mafai e tagata aoga ona aotele le tala i le Tusi a Mamona ina ua faamamaina e le Alii avega a le nuu o Alema a o latou nofopologa ia sa Lamana (tagai Mosaea 24), pe e mafai foi ona latou talanoaina pe na faapefea ona faamafanafanaina e le Alii ia Iosefa Samita i le Falepuipui o Liperate (tagai Maataupu Faavae ma Feagaiga 121). Tuu atu i tagata aoga se taimi e suesue ai i tusitusiga paia ma isi punaoa ae latou te lei faasoa mai.

Faamafanafanaga e ala ia Iesu Keriso

A uma ona fesiligia le vasega pe aisea latou te lagona ai e masani ona faaaoga e le Tama Faalelagi i tatou e faamafanafana ai i isi, mafaufau e faitau faatasi ma le vasega le 2 Korinito 1:5–7 ma valaaulia i latou e suesue i nei fuaiupu mo se isi puna o le faamafanafanaga ua saunia e le Tama Faalelagi: o le Faaola o Iesu Keriso. Fesili i tagata aoga pe aisea latou te lagona ai o Iesu Keriso o se puna mamana o le faamafanafanaga pe a latou feagai ma tofotofoga. Mafaufau e valaaulia tagata aoga e faatusatusa nei fuaiupu ma le Alema 7:11–13 .