2 Korinito 7

“Tiga e Tusa i le Atua”

E mafai ona faigata ona iloa pe ua tatou salamo atoatoa. Pe na e tauivi ea e iloa pe ua e salamo atoatoa i se mea [sese] pe leai? I lana uluai tusi i tagata Korinito, sa aoai ai e le Aposetolo o Paulo nisi o le Au Paia i Korinito mo a latou agasala. I lona olioli ma le loto faamalieina, na maua mulimuli ane ai e Paulo le tala faapea na oo i le Au Paia i Korinito le salamo moni. O lenei lesona e mafai ona fesoasoani ia te oe e malamalama ai i se vaega taua o le salamo moni ma fesoasoani e te latalata atili atu ai ia Iesu Keriso.

Sauniuniga a le tagata aoga: Valaaulia tagata aoga e mafaufau pe mafai faapefea ona latou iloa pe na latou oo i le salamo moni. E mafai foi ona valaaulia i latou e suesue le vaega “O le tiga e tusa i le Atua e taitai atu ai i le salamo” mai le otootoga o le Sau, Mulimuli Mai ia te A’u otootoga (“Setema 11–17. 2 Korinito 1–7: ’Ia Outou Faalelei ma le Atua,’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023).

Gaoioiga E Ono Mafai Ona Aoao Ai

Faanoanoa e Tusa i le Atua

O le vaaiga faataitai lenei e mafai ona faitauina leotele ma talanoaina o se vasega. E mafai foi ona lolomiina ma tuuina atu i tamaiti aoga e faitau ma talanoaina i ni paga po o ni vaega toalaiti.

Faitau le ata faataitai lenei.I se faatalanoaga mo se pepa malumalu mo se faaipoipoga, sa tau atu e se tamaitai talavou ni ana agasala ua tuanai i lana epikopo. Ina ua uma se faatalanoaga atili, sa oo ina malamalama le epikopo e lei salamo moni le tamaitai talavou i ana agasala ma o ana agasala ua lava le matuia e le agavaa ai o ia mo se pepa malumalu. Ua faamalamalama atu e le epikopo e tatau ona faatali le tamaitai talavou seia salamo atoa o ia ona maua lea o se pepa faataga. Sa faateia le tamaitai, ma fai mai ua salamo aua na te lei toe faia lava se tasi o na agasala mo se taimi umi. Ua faamatala atu e le epikopo o le na o le le toe faia o se agasala e le o se salamo atoa lea, ma ua ia valaaulia o ia e toe amata faamaoni le faagasologa o le salamo moni.

Ua faamalamalama atu e le tamaitai talavou i lana epikopo ua matua le fiafia lava o ia aua ua uma ona ia ta‘u atu i isi tagata e uiga i le faaipoipoga ma faia ni fuafuaga e faamanatu ai. Ua popole o ia i le maasiasi i le tolopo ai o ana fuafuaga o le faaipoipoga ma le auala o le a ia ta‘u atu ai i lana uo ma ona matua. Sa fesilli o ia pe i ai se auala e mafai ai ona faataunuu pea le faaipoipoga e pei ona sa fuafuaina ona galue ai lea mulimuli ane i le faagasologa o le salamo.

• E faavae i le tali a le tamaitai talavou i le epikopo, o le a se mea e foliga mai o sili ona ia popole i ai?

• Aisea e ono avea ai lana taulaiga e faigata ai ia te ia ona salamo atoatoa?

Mafaufau loloto i mea e le o malamalama atoatoa i ai lenei tamaitai talavou e uiga i le salamo. A o e faaauauina lenei lesona, vaavaai mo se mataupu faavae o le a fesoasoani i lenei tamaitai talavou. Mafaufau loloto foi pe e te manaomia lenei mataupu faavae i lou lava salamo.

Tiga faaleAtua

O se tasi o faamoemoega o Paulo i le tusiaina o lana tusi muamua i tagata Korinito o le faamalosiauina lea o ni tagata patino ia salamo. I lana tusi tulitatao, sa faamalo atu ai Paulo ia i latou sa ia faasa‘oina mo lo latou salamo faamaoni ma aoao atu e uiga i se vaega taua o le salamo.

Faitau le 2 Korinito 7:8–11 , ma vaavaai mo manatu loloto na tuuina mai e Paulo e uiga i le salamo e ono fesoasoani i le tamaitai i le ata faataitai. (Ia malamalama o le upu salamo e pei ona faaaogaina i le fuaiupu e 8 o lona uiga ia faanoanoa.) E mafai foi ona e matamata i le vitio Tusi Paia “Godly Sorrow Worketh Repentance” (1:40), o loo maua i le ChurchofJesusChrist.org, ma mulimuli i le faitauga i au tusitusiga paia.

Mo se malamalamaaga mai le Tusi a Mamona e uiga i le tiga faaleatua, faitau le Alema 36:12–13 ; 42:29 .

• O a ni malamalamaaga na e maua o le a fesoasoani i le tamaitai i le ata faataitai?

• E mafai faapefea ona fesoasoani na aoaoga ia te oe?

O se tasi o upumoni atonu na e iloaina e faapea o le tiga faaleatua e taitai atu ai i le salamo faamaoni.

• O le a le isi ituaiga tiga na ta’ua e Paulo i le fuaiupu 10 ?

• O le a se mea na e iloaina i le ata faataitai lea e ta‘u mai ai le ituaiga faanoanoa sa lagonaina e le tamaitai talavou?

Fai ni koluma se lua i lau api faamaumau mo suesuega e ala i le vaseina o se laina i lalo o le ogatotonu o se itulau. Tusi le Tiga FaaleAtua i le pito i luga o le tasi koluma ma le Tiga Faalelalolagi i le pito i luga o le isi koluma.

Faaopoopo ou manatu i fesili nei i lalo o ulutala taitasi.

• O le a le mea o aoao mai e Paulo i fuaiupu 8–10 e uiga i le eseesega i le va o le tiga faaleAtua ma le tiga faalelalolagi?

• O a ni eseesega faaopoopo e te manatu o loo i ai i le va o ituaiga e lua o tiga?

Faitau faamatalaga nei, ma vaavaai mo ni malamalamaaga faaopoopo e uiga i le tiga faaleAtua ma le tiga faalelalolagi. Faaopoopo manatu nei i lau siata.

Mafaufau e faaali atu upusii nei mo tagata aoga e faitau pe vavae ai le vasega i ni paga ma tuu atu i paga taitasi se seti se tasi o upusii. E mafai e i latou taitoatasi ona faitau ma maka se upusii, ona fesuiai lea ma a latou paga, faitau le upusii lona lua, ma vaai po o le a le mea na makaina e a latou paga.

O Elder Neil L. Andersen o le Korama o Aposetolo e Toasefululua na tuuina mai lenei faauigaga o le tiga faaleatua:

[O le tiga e tusa i le Atua o lona uiga] o le lagonaina o le faanoanoa loloto ma le loto ootia mo amioga na faaopoopo ai le tiga ma puapuaga i le Faaola, a o aveesea e o tatou agaga soo se faafitiga po o se ‘alofaga. …

Atonu o le fanuga sili o lenei olaga i se atalii po o se afafine maaleale faaleagaga o le Atua, o le iloa patino o tulaga ese o le totogiina o le agasala e Iesu Keriso e moni lava ma o Lona puapuagatia e le mo na o tagata uma—ae faapea foi mo oe ma au! … A o tatou malamalama faaleagaga sa puapuagatia o Ia mo a tatou agasala, tatou te lagona le faanoanoa mo la tatou vaega o Ona tiga. Ua tatou iloa o se vaega o le fuafuaga a lo tatou Tama, ae ua tatou maofa i le meaalofa ua Ia ofoina mai ia i tatou. O lenei ofo, o lenei talisapaia, o lenei faamemelo o se Faaola na faia lenei mea mo i tatou, e aveina ifo ai i tatou i o tatou tulivae a o faatumulia o tatou agaga i le tiga faaleatua.

(Neil L. Andersen, O Le Meaalofa Paia o le Faamagaloga [2019], 149, 150)

Peresitene Dieter F. Uchtdorf, a o i ai i le Au Peresitene Sili, na saunoa i le mea lenei e uiga i le tiga faaleatua:

Tiga faaleatua e musuia le suiga ma le faamoemoe e ala i le Togiola a Iesu Keriso. Tiga faalelalolagi e tosoina i tatou i lalo, tineia ai le faamoemoe, ma tauanau i tatou ia faamatuu atu atili i faaosoosoga.

Tiga faaleatua e taitai atu i le liua ma se suiga o le loto. Na te uunaia i tatou ia inoino i le agasala ae fiafia i le lelei. Na te uunaia i tatou ia tutu i luga ma savavali i le malamalama o le alofa o Keriso. O le salamo moni e faatatau i le suiga, ae le o le sauaina po o le faatigaina. Ioe, o le faanoanoa ootia ma le loto momomo moni mo le le usiusitai e tele lava ina tiga ma o ni laasaga taua ia i le faagasologa paia o le salamo. Ae a oo atu le tausalaina i le musuā o le tagata lava ia po o le taofia ai o i tatou mai le toe tutulai ae i luga, o le a faalavelave loa nai lo le uunaia o lo tatou salamo.

(Dieter F. Uchtdorf, “E Mafai Ona E Faia Nei Lava!,” Ensign po o le Liahona, Nov. 2013, 56)

Matamata le vitio “Repentance Is a Process That Brings Peace” mai le faailotaimi 0:00 i le 1:39 e vaai ai pe na faapefea e se tagata e toatasi ona faamatalaina lona aafiaga i le tiga faaleatua ma le ala na faamanuiaina ai lona olaga.

• O a malamalamaga na sili ona aoga ia te oe? Aisea?

• E mafai faapefea e le lagonaina na puapuagatia le Faaola e patino mo au agasala ona fesoasoani ia te oe i le faagasologa o le salamo?

Toe manatunatu i le tulaga i le va o le tamaitai talavou ma lona epikopo.

• O le a se mea e mafai ona e faasoa atu i le tamaitai talavou e uiga ia Iesu Keriso ma le tiga faaleatua lea e mafai ona fesoasoani ia te ia e aumaia ai faamanuiaga o le salamo?

Toe tomanatu mo sina taimi e uiga i au lava taumafaiga ina ia salamo. Mafaufau po o a lagona ma aafiaga o le Faaola i le puapuagatia ai mo au agasala. O le a se mea e mafai ona e faia e tatala atoatoa ai lou loto ia lagona ai le tiga faaleatua ma valaaulia ai le mana faamalolo o le Faaola i lou olaga? Mafaufau e tusi lau tali i lenei fesili i se api o talaaga patino po o se tamai api.

Afai e le patino tele, valaaulia tagata aoga e faasoa mai mea na latou aoaoina e uiga i le tiga faaleatua i lenei lesona ma pe mafai faapefea ona fesoasoani ia i latou. Faaopoopo se molimau patino i le taua o le tiga faaleatua i le faagasologa o le salamo. Valaaulia i latou e mafaufau loloto pe o i ai se manaoga mo le tiga sili atu faaleatua i o latou lava olaga.