2 Korinito 2

“E Sili Lo Outou Faamagalo”

O le faamagalo atu o isi e mafai ona faigata tele. Sa tusi atu Paulo i le Au Paia i Korinito e uiga i le faamagaloina o se tagata solitulafono i lo latou aai. Sa valaaulia e Paulo i latou e faamagalo atu, mo le lelei o le tagata ua faamagaloina faapea foi mo lo latou lava manuia. A o e suesue ai, saili ia faateleina lou malamalama i le taua o le faamagalo atu ma lou manao e faamagalo atu i isi.

Uunaia suesuega o tusitusiga paia i aso taitasi. Uunaia se faiga masani o le suesue i tusitusiga paia i aso taitasi. E laiti ni mea o le a i ai se aafiaga e sili ona mamana ma tumau mo le manuia i olaga o tagata aoga nai lo o le fesoasoani ia i latou e aoao ia fiafia i tusitusiga paia ma ia suesue i ai i aso uma.

Sauniuniga a le tagata aoga: Valaaulia tagata aoga e o mai saunia e faasoa mai se faataitaiga o se tasi latou te iloa na tuuina atu le faamagaloga faaKeriso i se isi tagata.

Gaoioiga E Ono Mafai Ona Aoao Ai

O fesili nei e mafai ona fesoasoani i tagata aoga e mafaufau ai e uiga i le matafaioi a le faamagaloga i o latou olaga. O le autu o le faamagalo atu atonu e maaleale mo nisi o tagata aoga. Ia saunia e mulimuli i musumusuga a le Agaga Paia e aoao atu ai nei mataupu faavae i le alofa ma le malamalama.

E faapefea ona e tali atu i ai?

Vaai faalemafaufau pe faapefea ona e tali atu faatasi ai ma isi o siomia oe i tulaga nei:

• Ua agai ina lauiloa e faapea o se tagata o lau uarota po o le paranesi na faia se agasala matuia, e pei o le solia o le tulafono o le ola mama.

• Sa tetee faaaliali se tasi o lau uarota po o le paranesi i taitai o le Ekalesia.

Tali fesili nei:

• E tusa lava pe na feiloai tagata o i nei ata faataitai ma taitai o le Ekalesia ma taumafai e salamo, o a ni auala e talanoa ai isi e uiga ia i latou faapea ma le faiga o i latou?

• Aisea e ono faigata ai i nisi tagata ona taulimaina i latou i le alofa ma le faamagalo?

I le 2 Korinito 2, na tusi ai Paulo i se tulaga talitutusa i Korinito ina ua solitulafono se tagata ma aoaiina e tagata o le Ekalesia.

Mafaufau loloto pe faapefea ona e taulimaina i latou o siomia oe atonu na solitulafono. Mafaufau i fesili nei na tuuina mai e Elder Jeffrey R. Holland o le Korama a Aposetolo e Toasefululua:

Pe o i ai se tagata i lou olaga atonu e manaomia se faamagaloga? O i ai se tasi i lou fale, se tasi i lou aiga, se tasi i le tou lotoifale o le na faia se mea le tonu pe faalealofa po o se mea e le kerisiano? O i tatou uma lava e tausalaina i na ituaiga solitulafono, o lea e tatau lava ona i ai se tasi o loo manaomia lau faamagaloga.

(Jeffrey R. Holland, “I Stand All Amazed,” Ensign, Aok. 1986, 72)

A o e suesue i lenei lesona, saili le fesoasoani a le Agaga Paia e faateleina ai lou malamalama i le taua o le faamagalo atu faaKeriso ma pe faapefea ona e ono faamagalo atu i isi.

Na aoao atu Paulo e uiga i le faamagalo atu

E mafai e tagata aoga ona galulue i le gaoioiga lenei i ni vaega toalaiti, i ni paga, pe na o i latou lava.

Faitau le 2 Korinito 2:5–11, ma vaai po o a upumoni e mafai ona e faailoa mai i lalo o vaega nei:

E faapefea ona tatou taulimaina se tagata ua mafua ai ona tatou faanoanoa?

Aisea e tatau ai ona tatou taulimaina tagata faapena i lenei auala?

• O a ni mea na e aoaoina mai i le suesueina o lenei fasifuaitau?

A o faasoa mai e tagata aoga mea na latou aoaoina, tusi i luga o le laupapa soo se upumoni latou te tauina mai.

E lua mataupu faavae atonu na e faailoaina mai e faapea e ala mai i le Faaola o Iesu Keriso, e mafai ai ona tatou faamagalo atu ma aapa atu i le alofa i isi ma afai tatou te le faamagalo atu i isi, o le a maua e Satani se faasiliga i luga atu o i tatou.

• O a ni faataitaiga o auala e mafai ona e faamagalo atu ai, faamafanafana, pe faamautu ai lou alofa i se tasi ua solitulafono pe sa agaleaga mai?

• E tusa ma mea ua e iloa e uiga i le Faaola o Iesu Keriso, aisea e finagalo ai o Ia ia tatou faamagalo atu ma faaali atu le alofa o le tasi i le isi? E mafai faapefea ona Ia fesoasoani ia i tatou e faia lenei mea?

Sa aoao mai Elder Massimo De Feo o le Fitugafulu:

O soo moni e fiafia e faamagalo atu. Latou te iloa o le Togiola a le Faaola e ufitia ai agasala uma ma mea sese a i tatou uma taitoatasi. Latou te iloa o le tau na Ia totogiina o se “tau-e-aofia-ai mea uma.” O lafoga faaleagaga, o pili, o komisi, ma totogi e faatatau i agasala, sasi, po o mea sese e fai ua aofia uma ai lava. O soo moni e vave ona faamagalo atu ma vave ona ole atu mo le faamagaloga.

O’u uso e ma tuafafine pele, afai o e tauivi e sue le malosi e faamagalo atu ai, aua e te mafaufau i mea na faia e isi ia te oe, ae mafaufau i le mea na faia e le Faaola mo oe, ma o le a e maua le filemu i faamanuiaga laveai o Lana Togiola.

(Massimo De Feo, “Alofa Mama: O Le Faailoga Moni o Soo Moni Uma o Iesu Keriso,” Ensign po o le Liahona, Me 2018, 82)

Afai na faia e tagata aoga le gaoioiga sauniuni a le tagata aoga, mafaufau e fai atu fesili nei ma valaaulia i latou e faasoa mai mea sa latou saunia. Faamanatu i tagata aoga e aua nei faasoa maia ni aafiaga atonu e patino tele.

• O anafea na e vaaia ai se faataitaiga o se tasi na faamagaloina se isi ona aapa atu lea i le alofa i lena tagata?

• E faapefea e le taofiofia o le faamagaloga ona tuuina atu ai ia “Satani … se faasiliga [i luga atu] o i tatou”? ( 2 Korinito 2:11).

Fesoasoani i tagata aoga ia malamalama i le faamanuiaga e mafai ona oo mai i le tagata e faamagalo atu ma le tagata ua faamagaloina e ala i le faia o le gaoioiga lenei.

Faaali atu faatonuga nei mo le gaoioiga, pe tufa atu ni pepa mo tagata aoga.

Vaai faalemafaufau e faapea, e pei o tagata Korinito, ua manaomia e tagata o lau uarota ona faateleina lo latou alolofa ma le faamagalo atu ia i latou o e ua agasala. Ona o lenei mea, ua valaaulia ai oe e lou epikopo e faasoa atu se manatu puupuu e uiga i le faamagalo atu i le amataga o lau vasega po o le fonotaga a le korama. Faaaoga ni nai minute ma fatu se otootoga o mea e mafai ona e fai atu ai. Ia aofia ai mea nei:

1. Ia le itiiti ifo ma le tasi se fuaiupu po o se fasifuaitau mai le 2 Korinito 2:7–11 .

2. Se isi mau po o se saunoaga a se taitai o le Ekalesia. (E mafai ona e faaaogaina le saunoaga a Elder Kevin R. Duncan o loo i lalo, o se tasi o mau o loo ia ta’ua, po o se tasi o fuaitau o mau o loo mulimuli mai i lana saunoaga.)

3. O ou lava manatu ma le molimau e uiga i le tuuina atu o le alofa ma le faamagalo atu i isi ma le auala e mafai ai ona fesoasoani lena mea ia i tatou e latalata atili atu ai i le Faaola.

Aoaoga e uiga i le faamagaloga

Na saunoa mai Elder Kevin R. Duncan o le Fitugafulu:

Ou te talitonu o le toatele o i tatou e mananao e faamagalo atu, ae e faigata tele ona tatou faia. Pe a tatou aafia i se amioletonu, atonu e vave ona tatou faapea atu, “Na faia e lena tagata se mea sese. E tatau ia i latou se faasalaga. O fea o i ai le faamasinogatonu?” Tatou te mafaufau sese faapea afai tatou te faamagalo atu, atonu o le a le faataunuuina le faamasinoga tonu ma o le a alofia ni faasalaga.

E le o le tulaga lea. O le a faia e le Atua se faasalaga e talafeagai, aua e le mafai e le alofa mutimutivale ona faoa le faamasinogatonu (tagai i le Alema 42:25). Ua faamautinoa mai ma le alofa e le Atua ia te oe ma a’u: “Ia tuu toatasi mai ia te a’u le faamasinoga, aua e a a’u lea, ma o le a Ou toe totogi atu. [Ae tuu] ia te outou le filemu” [ Mataupu Faavae ma Feagaiga 82:23 ].

(Kevin R. Duncan, “O Le U‘u Faamalolo o le Faamagaloga,” Ensign po o le Liahona, Me 2016, 33–34)

• Mataio 5:43–44

• Efeso 4:32

Mafaufau pe valaaulia tagata aoga e faasoa taitoalua i a latou otootoga pe i ni vaega laiti.

• O le a se mea na e aoaoina e mafai ona fesoasoani i tagata o lau uarota ia malamalama atili ai ma tuuina atu le faamagaloga?

• E mafai faapefea e le faamagalo atu o isi ona aumaia faalatalata atili i latou ia Iesu Keriso?

Tomanatu pe na faapefea ona e taulimaina i latou na solitulafono. Saili musumusuga mai le Tama Faalelagi e uiga i mea e mafai ona e faia e “faamagalo atu ai … ma … faamautu atu lou alofa ia i latou” ( 2 Korinito 2:7–8). Mafaufau e tusi ou uunaiga ma manatu i lau api talaaga mo suesuega, e aofia ai soo se faatinoga e te lagona lou musuia e fai.

Fautuaina tagata aoga e faatino uunaiga na latou maua i le taimi o le lesona. Mafaufau e molimau atu i faamanuiaga o le faamagalo atu ma le auala e mafai ai e le faamagaloga ona aumaia le e faamagalo atu ma le ua faamagaloina ia latalata atili atu ia Iesu Keriso.

Manatu ma Talaaga o Faamatalaga

E mafai faapefea ona faamanuiaina patino oe e le faamagalo atu?

Na aoao mai Peresitene James E. Faust (1920–2007) o le Au Peresitene Sili:

Afai e mafai ona tatou maua le faamagaloga i o tatou loto mo i latou o e na mafua ai ona tatou tiga ma faamanualia, o le a tatou tulai ae i se tulaga maualuga atu o le faatauaina o le tagata lava ia ma le soifua manuia.

(James E. Faust, “O Le Mana Faamalolo o le Faamagaloga,” Ensign po o le Liahona,, Me 2007, 68)

Na aoao mai Elder Jeffrey R. Holland o le Korama a Aposetolo e Toasefululua:

Faatasi ai ma le pule faaaposetolo ua faamatuu mai ia te a’u e le Faaola o le lalolagi, ou te molimau atu e uiga i le filemu o le agaga lea o le a aumaia e le faaleleiga ma le Atua faapea ma le tasi ma le isi pe afai e lava lo tatou agamalu ma le lototele e saili ai.

(Jeffrey R. Holland, “O le Galuega o le Faaleleiga,” Ensign po o Liahona, Nov. 2018, 79)

E mafai faapefea ona fesoasoani Iesu Keriso ia te oe e faamagalo atu?

Na aoao mai e Elder Kevin R. Duncan o le Fitugafulu:

O le faamagalo atu o le mafuaaga tonu lea na auina mai ai e le Atua Lona Alo, o lea ia tatou olioli ai i Lana taulaga e faamalolo ai i tatou uma. O le Togiola a le Faaola e le mo na o i latou e tatau ona salamo; e mo i latou foi e tatau ona faamagalo atu. Afai o faigata ona e faamagaloina se isi tagata po o oe lava ia, ole atu i le Atua e fesoasoani ia te oe. O le faamagalo atu o se mataupu faavae mamalu, ma faamalolo. E le manaomia ona avea faalua i tatou ma tagata ua pagatia. E mafai ona tatou faamagalo atu.

(Kevin R. Duncan, “O Le U’u Faamalolo o le Faamagaloga,” Ensign po o le Liahona, Me 2016, 35)

Matamata le vitio “Principles of Peace: Forgiveness,” 1:49, o loo maua i le ChurchofJesusChrist.org, lea o loo faaalia ai se faataitaiga o le auala, ona o Iesu Keriso, sa mafai ai e se tamaitai ona faamagalo lona tama.

E faapefea ona ou malamalama atili i le uiga o le faamagalo atu?

Na aoao mai Elder Jeffrey R. Holland o le Korama a Aposetolo e Toasefululua:

Sa lei fetalai mai [Iesu Keriso], “E le faatagaina ona outou lagonaina le tiga moni o le faanoanoa moni mai aafiaga matuitui na e oo i ai mai le lima o le isi tagata.” Pe na Ia fetalai foi, “Ina ia mafai ona faamagalo atu atoatoa, e ao ona e toe faia se sootaga faatiga pe toe foi atu i se tulaga faasaua, tulaga faataumaoi.” Ae e ui i ni faatiga sili ona matuitui e ono oo mai ia i tatou, e mafai lava ona tatou tutulai a‘e i o tatou tiga pe afai tatou te savavali i luga o le ala i le faamalologa moni.

(Jeffrey R. Holland, “O le Galuega o le Faaleleiga,” Ensign po o le Liahona, Nov. 2018, 79)

Gaoioiga Faaopoopo e Aoao Ai

Aoaiga ona o le alofa

I nisi o tusi muamua a le Aposetolo o Paulo i Korinito, sa ia aoaia ai i latou i lo latou le usiusitai ma le le lava o le faatuatua. Mafaufau e valaaulia tagata aoga e faitau le 2 Korinito 2:1–4 ma vaai po o le a le mea na faamoemoe Paulo o le a latou malamalama ai e uiga i ona faamoemoega mo le aoaiina o i latou. E mafai faapefea ona avea le aoaiga po o le faasa‘oina o se faamaoniga o le alofa o se taitai po o se matua mo oe?

Tusia i le loto

Talu ai ona o anomea i le 2 Korinito 3 e le o aoaoina i le mataupu o aoaoga, o loo ofoina mai ai iinei se manatu se tasi mo le aoaoina o lena mataupu.

Faamatala i le taimi o toesea Paulo i Korinito, sa amata e nisi o aoao pepelo ona tetee atu i aoaoga a Paulo ma sa taumafai e tauleagaina Paulo i le tau atu i tagata liliu e latou te manaomia lava ona mulimuli i le tulafono a Mose. Aotele le 2 Korinito 3:1 i le faamatala atu, o le tali atu i e sa taumafai e faaleaga ia te ia, sa fesili atu ai Paulo i tagata o le Ekalesia i Korinito pe manaomia ona ia avatu ia i latou se “[tusi] faamalo” e molimau atu ai i lana amio ma lona tulaga aloaia o se Aposetolo moni a Iesu Keriso.

E mafai e le tagata aoga ona faitau le 2 Korinito 3:2–3, ma vaavaai mo mea na avea ma tusi o le faamalo a Paulo (o olaga ua suia e le Au Paia). O le a sou manatu o le a le uiga o le tusia o afioga a Keriso “e le o papamaa, ae i papa aano o le loto”? E mafai faapefea e se tagata ona faataga le talalelei i totonu o o latou loto? E mafai faapefea ona tatou ola lelei i le talalelei mai o tatou loto?