1 Korinito 15:32–54

Tino Selesitila, Terasitila, ma le Telesitila

Aisea e aoga ai le mulimuli ia Iesu Keriso e ui lava ina foliga mai e maua e isi le fiafia i le agasala? Sa faamatala e Paulo se tasi o mafuaaga e ala i le aoaoina o tagata Korinito e uiga i tikeri eseese o le mamalu i le Toetu. O lenei lesona e mafai ona fesoasoani ia te oe e taumafai ai ia agavaa mo se toetu selesitila e ala ia Iesu Keriso.

Uunaia o saofaga a tagata aoga. Fesoasoani i tagata aoga ia malamalama o a latou saofaga e taua i le aafiaga o le aoaoina i le vasega. Taumafai e faamalosiau i a latou faamatalaga e ala i le faafetai atu ia i latou, e ala i le faamalo atu ia i latou, po o le fesili atu i isi tagata aoga i mea na latou aoaoina mai manatu faaalia.

Sauniuniga a le tagata aoga: Valaaulia tagata aoga e faitau le Alema 40:23 e iloa ai mea e tutusa ai tino toetutu uma, ona faitau lea o le 1 Korinito 15:40–42 e vaai ai i eseesega o le a i ai i tagata toetutu.

Gaoioiga E Ono Mafai Ona Aoao Ai

Faamanuiaga i le lumanai i le fuafuaga a le Atua

Mafaufau e tuuina atu taui i tagata aoga uma o e o loo ofuina se lanu faapitoa. Fai atu i tagata aoga o e sa lei ofuina lena lanu pe ana latou mananao e iloa e uiga i lenei taui ma pe faapefea ona maua ae latou te lei omai i le vasega.

• Afai na e iloa o le a tauia e lou faiaoga tagata uma sa ofuina se lanu faapitoa i lenei aso, mata o le a aafia ai lau filifiliga o ofu?

• Mata e te le fiafia pe a e iloaina e uiga i ai ae ua tuai? Aisea e te fiafia ai pe aisea foi e te le fiafia ai?

Ona e alofa le Tama Faalelagi ia i tatou, ua Ia tau mai ai ia i tatou le mea e tupu pe a mavae lenei olaga ma po o a filifiliga o le a taitai atu ai i le fiafia po o le faanoanoa. A o e suesue i tusitusiga paia i lenei aso, vaai mo upumoni o le a faaosofia ai oe e fai fiifiliga e taitai atu ai i le fiafia e faavavau.

Tusi se ata faigofie po o se ata o mea ua uma ona e iloa e uiga i le fuafuaga a le Atua o le faaolataga. Ia aofia ai le mea sa tatou i ai ae tatou te lei fananau mai, olaga i le lalolagi, ma le mea e tupu pe a mavae le oti. A o e tusia se ata, ia mautinoa o e mafaufau i le matafaioi a Iesu Keriso i le fuafuaga atoa a lo tatou Tama.

Mafaufau e valaaulia ni tagata aoga e le itiiti ifo ma le toalua e tusi a laua faatusa i luga o le laupapa. O le iloaina o le malamalama o tagata aoga i le taimi nei i le olaga pe a mavae le oti e mafai ona maua ai se malamalamaaga i le auala e fetuunai ai le lesona ia talafeagai ai ma o latou manaoga.

• E mafai faapefea e le malamalama i le fuafuaga a le Tama Faalelagi mo i tatou pe a mavae le oti ona aafia ai faaiuga e te faia i le olaga nei?

• E faapefea ona totonugalemu Iesu Keriso i le fuafuaga?

I le 1 Korinito 15:1–29, sa faasao ai e le Aposetolo o Paulo le talitonuga sese faapea “[o le a] leai se toetutu mai o e ua oti” ( 1 Korinito 15:13). Ona ia lapataia lea o Korinito ia aua nei faaseseina i uiga faaalia o tagata o e fai mai, “Ia tatou aai ma feinu; aua o a taeao tatou te oti ai” ( 1 Korinito 15:32), lea e faamatalaina ai le talitonuga sese e faapea e leai se ola pe a mavae le oti, o le mea lea, o mea tatou te faia i lenei olaga e le afaina.

Ina ia fesoasoani i tagata aoga e vaai faalemafaufau i lenei talitonuga sese, mafaufau e tapeese mea uma pe a mavae le olaga faaletino mai se tasi o ata a tagata aoga i luga o le laupapa.

O le isi talitonuga sese e faapea, tusa lava po o a a tatou filifiliga, o le a tuuina mai e le Atua i tagata uma faamanuiaga o le ola e faavavau (tagai i le 2 Nifae 28:8 ; Alema 1:4).

Mafaufau e suia le ata a se isi tagata aoga i luga o le laupapa e ala i le faaopoopoina o se aū mai le lalolagi e sa‘o atu i le malo selesitila ma tapeese malo terasitila ma le telesitila.

• E mafai faapefea e talitonuga sese faapea e leai se olaga pe a mavae le oti pe o le a tuuina mai e le Atua i tagata uma faamanuiaga o le ola e faavavau ona aafia ai a tatou faaiuga ma uiga faaalia? Aisea?

O le 1 Korinito 15:40–42 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se ala iloga ina ia mafai ai ona e mauaina gofie. O le a e aoao atili e uiga i lenei fuaitau o le atamai i aoaoga faavae i le lesona e sosoo ai.

Faitau le 1 Korinito 15:40–42, ma vaavaai mo aoaoga a Paulo e uiga i le toetu i le fuafuaga a le Tama Faalelagi. E fesoasoani le iloa o le Faaliliuga a Iosefa Samita o le 1 Korinito 15:40 e faasino foi i tino telesitila.

Afai na faia e tagata aoga le gaoioiga mo sauniuniga a le tagata aoga, mafaufau e valaaulia i latou e faasoa mai mea e tutusa ai tino toetutu uma, ma pe o a eseesega o le a i ai.

• Aisea e taua ai le iloa o le upumoni e faapea i le fuafuaga a le Tama Faalelagi, e eseese tikeri o le mamalu mo tino toetutu?

Tikeri o mamalu

Mo le gaoioiga lenei, mafaufau e faaali atu fesili e tolu o loo lisi atu i le saunoaga a Peresitene Monson mo tagata aoga e faasino i ai i le taimi o a latou suesuega. E mafai foi ona faasino atu tagata aoga i Autu o le Talalelei, “Malo o le Mamalu,” (topics.ChurchofJesusChrist.org) e aoao atili ai e uiga i tikeri o le mamalu ma mea e manaomia e maua ai le mamalu selesitila.

A uma ua lava le taimi, valaaulia ni tagata aoga e faasoa mai a latou tali ma ni fesili i le vasega.

O faaaliga e ala mai i perofeta o aso nei ua aumaia ai ni malamalamaaga faaopoopo i aoaoga a Paulo. Suesue le Mataupu Faavae ma Feagaiga 76:50–52, 62–64, 69–70, 71–76, 81–85 ; 88:21–24 ma faitau le saunoaga lenei a Peresitene Thomas S. Monson (1927–2018). Vaavaai mo tali i fesili e tolu o loo mulimuli mai i le saunoaga.

Ona o le taunuuga o le manumalo o Keriso i le tuugamau, o le a tatou toetutu uma ai lava. O le togiola lea o le agaga. Na tusia e Paulo: “E i ai … tino faalelagi, ma tino faalelalolagi: a e ese le matagofie o le faalelagi, ese i lo le faalelalolagi” ( 1 Korinito 15:40).

O le mamalu selesitila lea e tatou te sailia. O le i ai i le afioaga o le Atua lea tatou te mananao e nonofo ai. O se aiga e faavavau lea tatou te mananao e avea ai i tatou mona. O faamanuiaga faapena e maua e ala i se olaga atoa o le tauivi, sailiili, salamo, ma iu ai ina faamanuiaina.

(Thomas S. Monson, “O Le Tausinioga o le Olaga,” Ensign po o le Liahona, Me 2012, 93)

• O le a le matafaioi a le Faaola i la tatou malaga agai atu ai i le mamalu selesitila?

• O le a le mea e manaomia ona tatou faia e maua ai le mamalu selesitila?

• Aisea e aoga ai le taumafaiga mo le mauaina o le mamalu selesitila nai lo le mamalu terasitila po o le telesitila?

Mafaufau loloto po o fea e te vaai ai ia te oe lava i luga o le ala e agai atu i le malo selesitila. Pe o e faalagolago i le Faaola e fesoasoani ia te oe e ola i se auala e mafai ai ona e maua nei faamanuiaga?

Pe mafai moni ea ona tatou ausia le mamalu selesitila?

O nisi tagata e lagona le lotovaivai pe a latou iloa le mamao ese o i latou mai le ola ai i ni olaga selesitila i le lalolagi. Faitau le mea na aoao mai e Elder Dieter F. Uchtdorf o le Korama a Aposetolo e Toasefululua e uiga i lo tatou alualu i luma e faavavau, pe matamata le vitio “God among Us,” mai le faailo taimi 5:01 i le 6:58, o loo maua i le ChurchofJesusChrist.org.

Ua taumasuasua lo’u loto i le agaga faafetai mo lo’u Tama Faalelagi. Ua ou iloaina Na te le’i faamalaia i Ana fanau e tautevateva i le olaga nei e aunoa ma se faamoemoe mo se lumanai susulu ma le faavavau. Sa Ia tuuina mai faatonuga e faaalia mai ai le ala e toe foi atu ai ia te Ia. Ma i le totonugalemu o nei mea uma o Lona Alo Pele, o Iesu Keriso, ma Lana taulaga mo i tatou. …

O tamameamea i tatou uma pe a faatusatusa i tagata o le mamalu ma le paia ua fuafuaina ia avea ai i tatou. E leai se tagata ola e faasolo i luma mai le totolo i le savali ma le tamoe e aunoa ma le pa’ū faafia, feto’ai, ma ni uno’oa. O le auala lena tatou te aoao ai.

(Dieter F. Uchtdorf, “O Loo ia i Tatou le Atua,” Liahona, Me 2021, 8–9)

• O le a se mea ua fesoasoani le saunoaga a Elder Uchtdorf e te malamalama ai e uiga i le Tama Faalelagi?

• E faapefea e lena mea ona tosinaina ai ou lagona ia te Ia ma lou sootaga ma Ia?

Mafaufau e valaaulia tagata aoga e mafaufau loloto ma le filemu i le fesili o le a mulimuli mai.

• O le a se mea ua e lagona na uunaia oe e fai ona o le mea ua e aoaoina i le aso?

Molimau atu e aoga taumafaiga e saunia ai e maua se tino selesitila e ala ia Iesu Keriso. Valaaulia tagata aoga e faasoa mai mea na latou aoaoina ma e pele ia i latou o e manaomia nei upumoni.

Manatu ma Talaaga o Faamatalaga

Ae faapefea pe afai tatou te taumafai e ola faamaoni i lenei olaga ae e le atoatoa pea pe a oo mai le oti?

Na faamalamalama mai e le Perofeta o Iosefa Samita (1805–44):

Pe a e a’e i se apefai, e tatau ona e amata atu i le pito i lalo, ma alu atu i luga mai lea sitepu i lea sitepu, seia e taunuu i le tumutumu; ma e faapena i mataupu faavae o le talalelei—e tatau ona e amata i le muamua, ma alu atu ai seia e aoao i mataupu faavae uma o le faaeaga. Ae o le a i ai se taimi umi pe a maea ona e ulu atu i le veli e faatoa e aoaoina ai ia mea. E le faapea o le a malamalama uma i ai i le lalolagi lenei; o le a avea ma galuega tele lo tatou aoao i lo tatou faaolataga ma le faaeaga e oo lava i tala atu o le tuugamau.

(Aoaoga a Peresitene o le Ekalesia: Iosefa Samita [2007], 268)

O le a le uiga o le “e luluina i le pala; e toe faatuina mai i le le pala” ( 1 Korinito 15:42)?

Sa faatusatusa e Paulo le tino faaletino i se fatu e le atoatoa, pe leaga (taga i le 1 Korinito 15:37–38, 42). A mavae ona tatou feoti ma tanumia (luluina pe totoina), o le a i ai se aso tatou te tutulai a‘e ai mai le tuugamau e faapei o se laau e tupu ae mai le eleele. O le a le toe pala o tatou tino toetutu, ae o le a faaatoatoaina e ala i le mana o le Atua.

O ai o le a maua le mamalu selesitila?

O le malo selesitila o le nofoaga ua saunia mo i latou o e “na taliaina le molimau ia Iesu” ma ua “faaatoatoaina e ala ia Iesu le puluvaga o le feagaiga fou, o lē na faia lenei togiola ua atoatoa e ala i le faamaligiina o lona lava toto” ( Mataupu Faavae ma Feagaiga 76:51, 69). Ina ia mautofi i lenei meaalofa, e tatau ona tatou maua sauniga o le faaolataga, tausi poloaiga, ma salamo ia tatou agasala. Mo se faamatalaga auiliili o i latou o le a mautofi i le mamalu selesitila, tagai i le Mataupu Faavae ma Feagaiga 76:50–70 ; 76:92–96 .

(Autu o le Talalelei, “Malo o le Mamalu,” topics.ChurchofJesusChrist.org)

Gaoioiga Faaopoopo e Aoao Ai

Faatusatusaina o o tatou tino faaletino i o tatou tino toetutu

Valaaulia tagata aoga e fai mai ni a latou lava lesona faatino e mafai ona latou faaaogaina e fesoasoani ai i se tasi ia malamalama i le Toetu. Mafaufau e tuu atu ia i latou se faataitaiga e pei o le faatusatusaina o se ketapila i se pepe (iniseti), po o le faatusatusaina o le talepeina o se fale tuai ae fausia se fale fou i lona tulaga.

Faamatala i le vasega sa faaaoga e Paulo le faataitaiga o le totoina o se fatu e fesoasoani ai i Korinito ia malamalama i le Toetutu (tagai i le 1 Korinito 15:35–38). E mafai ona faatusatusa o tatou tino faaletino i se fatu. O lo tatou oti ma le tanuga e mafai ona faatusatusa i le fatu na totoina (luluina). E mafai ona faatusatusa o tatou tino toetutu i le laau o loo ola.

Valaaulia tagata aoga e suesue le 1 Korinito 15:43–54, e faailoga ai upu na faaaoga e Paulo e faamatala ai o tatou tino faaletino, ma ia faailoga (i se isi auala) ia upu na faaaoga e Paulo e faamatala ai o tatou tino toetutu.

Valaaulia tagata aoga e tusi i luga o le laupapa se mafatiaga faaletino o i ai i se tasi e pele ia te ia. O faataitaiga e mafai ona aofia ai ma‘i, leaga le vaai, leaga le papatua, po o ni faafitauli i sooga o ponaivi. Valaaulia tagata aoga e moeiini o latou mata ma vaai faalemafaufau i e pele ia i latou i se tino toetu, ua faamaloloina e ala i le mana o le Atua mai na faigata uma. Tape faigata faaletino taitasi mai le laupapa, ma molimau atu i le alofa o le Tama Faalelagi ma Iesu Keriso, o e na faia na faigata ina ia le tumau, ma o le o le a tuuina mai ia i tatou taitoatasi se tino toetu mo le faavavau.