Fakataukei Fakatokāteliné: 1 Pita 4:6

“Naʻe Malanga ʻaki ai ʻa e Ongoongoleleí Kiate Kinautolu Foki Kuo Maté.”

ʻI hoʻo ako ʻa e 1 Pita 4, naʻá ke ʻilo ai naʻe fokotuʻu ʻe he Fakamoʻuí ʻa e ngāue fakafaifekaú ʻi he maama tataliʻanga ʻo e ngaahi laumālié kae lava ke maʻu ʻe he fānau kotoa ʻa e Tamai Hēvaní ha faingamālie ke maʻu ʻa e fakamoʻuí. ʻE lava ke tokoni atu ʻa e lēsoni ko ʻení ke ke ako maʻuloto ʻa e fakamoʻoni fakataukei fakatokāteliné mo e kupuʻi lea fakafolofola mahuʻinga ʻi he 1 Pita 4:6. ʻE lava foki ke tokoni atu ke ke fakamatalaʻi ʻa e tokāteline naʻe akoʻi ʻi he potufolofola ko iá. Te ke maʻu leva ʻa e faingamālie ke fakaʻaongaʻi ʻa e tokāteline ko iá mo e ngaahi tefitoʻi moʻoni ʻo hono maʻu ʻo e ʻilo fakalaumālié ki ha tūkunga moʻoni.

Ko hono akoʻi ‘o e kau akó ki he ngaahi tefitoʻi moʻoni ki hono maʻu ʻo e ʻilo fakalaumālié. ʻE ola lelei ange ʻa e fakataukei fakatokāteliné kapau ʻe ʻilo mo mahino ki he kau akó ʻa e ngaahi tefitoʻi moʻoni ʻo hono maʻu ʻo e ʻilo fakalaumālié. Tokoni ke mahino pea toutou vakaiʻi ʻe he kau akó ʻa e ngaahi tefitoʻi moʻoni ko ʻení.

Teuteu ʻa e tokotaha akó: Fakaafeʻi e kau akó ke nau fakalaulauloto mo teuteu ke vahevahe e meʻa ne nau ongoʻi ʻi heʻenau fakahoko e papitaisó mo e hilifakinimá ʻi he temipalé pe fai ha ngāue hisitōlia fakafāmili kehe maʻa ʻenau ngaahi kui kuo pekiá.

Ngaahi ʻEkitivitī Ako ʻOku Ala Fakahokó

ʻOku teuteuʻi ʻa e lēsoni fakataukei fakatokāteline ko ʻení ke akoʻi hili ʻa e lēsoni “1 Pita 3:18–22; 4:1–6 ʻa ia ko e lēsoni fakaʻuhinga ia ki he potufolofola fakataukei fakatokāteline 1 Pita 4:6 Kapau ʻoku fiemaʻu ke hiki e lēsoni fakataukei fakatokāteline ko ʻení ki ha uike kehe, fakapapauʻi ke akoʻi e lēsoni fekauʻaki mo iá lolotonga e uike ko iá.

Ako maʻuloto pea fakamatalaʻi

Fakaafeʻi ha tokotaha ako ke ne tā ʻi he palakipoé ha fakatātā faingofua ʻo e palani ʻo e fakamoʻuí. Hili ia pea fai ange ha niʻihi ʻo e ngaahi fehuʻi ko ʻení ke fakafuofuaʻi ʻa e mahino ʻa e tokotaha akó ki he palaní mo e founga ʻoku akoʻi ai ʻa e ongoongoleleí. Ke fakakau mai e kau ako ʻoku ʻikai ke nau faʻa fie leá, ʻe lava ke fai e ngaahi fehuʻi ko ʻení ko ha sivi pea toki aleaʻi fakakalasi.

• Naʻe akoʻi ʻa e ongoongoleleí ki he fānau kotoa ʻa e ʻOtuá ʻi he maama fakalaumālié. Ko e hā naʻe hoko kiate kinautolu naʻa nau tali ʻa e ongoongoleleí ʻaki ʻenau fili ʻa e palani ʻa e ʻOtuá? Ko e hā e meʻa ne hoko kiate kinautolu naʻa nau fakafisingaʻi iá?

• ʻOku akoʻi fēfē nai ʻa e ongoongoleleí ʻi heni ʻi he māmaní?

Fakaʻaongaʻi e ongo fehuʻi ko ʻení ke tokoni ke ʻiloʻi ʻe he kau akó ʻa e potufolofola fakamoʻoni fakataukei fakatokāteliné mo e kupuʻi lea fakafolofola mahuʻingá.

• Ko e hā ʻoku hoko kiate kinautolu ʻoku teʻeki ai ke nau maʻu ha faingamālie ke ako kia Sīsū Kalaisi pe maʻu ʻa e ngaahi ouau ʻo e lakanga fakataulaʻeiki kuo fakamafaiʻi ʻi he moʻui ní?

• Te tau lava nai ʻo lau ʻi fē fekauʻaki mo e meʻá ni ʻi he Fuakava Foʻoú?

Fakakaukau ke fakaʻaongaʻi ʻa e ʻekitivitī ako maʻuloto ko ʻení:

ʻOange ki he tokotaha ako takitaha ha laʻipepa, pea fakaafeʻi kinautolu ke nau hiki ʻa e fakamoʻoni fakafolofola kakató mo e kupuʻi lea fakafolofola mahuʻingá ʻi ʻolunga ʻi he laʻipepá: “1 Pita 4:6Naʻe malanga ʻaki ai ʻa e ongoongoleleí kiate kinautolu foki kuo maté.’” Fakahinohinoʻi kinautolu ke peluki ʻa e konga ki ʻolunga ʻo e laʻipepá ke pulia ʻa e meʻa ne nau tohí pea toe tohiʻi ʻa e fakamoʻoni fakafolofolá mo e kupuʻi leá, pea nau fili ʻo toʻo ha ngaahi foʻi lea mo ha ngaahi mataʻifika ʻe tolu pe fā. Kole ki he kau akó ke fakafetongi ʻenau laʻipepá mo ha taha ofi kiate kinautolu.

Kole ki he kau akó ke nau talaatu ʻa e ngaahi foʻi lea mo e mataʻifika ʻoku toʻo ʻi heʻenau laʻipepa foʻoú. Hili iá pea fakahinohinoʻi kinautolu ke peluki ʻa e laʻipepá ke pulia ʻenau tohí pea toe hiki ʻa e fakamoʻoni fakafolofolá mo e kupuʻi leá, ʻi he taimi ko ʻení, toʻo ha foʻi lea pe mataʻifika ʻe ono ki he valu. Kole ange ke nau fakafoki ʻa e laʻipepá ki he tokotaha ʻoku ʻaʻaná pea feinga ke ʻiloʻi ʻa e ngaahi foʻi lea ʻoku puliá ʻi heʻenau laʻipepa totonú, peluki fakaʻosi ʻa e laʻipepá, pea tohi fakaʻosi ʻa e fakamoʻoni fakafolofolá mo e kupuʻi leá mei heʻenau manatú.

Akoako hono fakaʻaongaʻí

ʻI he lēsoni kuo ʻosí, naʻá ke ako ai ʻa e moʻoni ko ʻení mei he 1 Pita 4:6 : ʻOku malangaʻi ʻa e ongoongoleleí ki he kau pekiá koeʻuhí ke nau maʻu ʻa e ngaahi faingamālie tatau mo kinautolu ʻoku fanongo ki he ongoongoleleí ʻi he moʻui fakamatelié.

Fakaʻaongaʻi ʻa e fakatātā ko ʻení ke ʻahiʻahi fakahoko hono fakaʻaongaʻi ʻo e moʻoni ko ʻení mo e ngaahi tefitoʻi moʻoni ki hono maʻu ʻo e ʻilo fakalaumālié.

Tūkungá: Konga 1

Fakakaukauloto ʻoku ʻi ai hao kaungāmeʻa ko Seisoni ʻoku talanoa mo e ongo faifekaú. ʻOku kole atu ʻa Seisoni ke mo omi ki he seminelí ke mo ako lahi ange ki he ongoongoleleí. ʻI hono ʻuluaki ʻaho ʻi he seminelí, ʻoku kole ai ʻe hoʻo faiakó ki he kalasí ke nau fakamanatu mo ha hoa ngāue ʻa e ngaahi tefitoʻi moʻoni ʻo hono maʻu ʻo e ʻilo fakalaumālié. ʻOku tafoki atu ʻa Seisoni ʻo fehuʻi atu, “Ko e hā ʻa e ngaahi tefitoʻi moʻoni ki hono maʻu ʻo e ʻilo fakalaumālié?”

• Te ke fakafeʻiloaki fēfē nai kia Seisoni ʻa e ngaahi tefitoʻi moʻoni ʻo hono maʻu ʻo e ʻilo fakalaumālié? (Fakakaukau ke toe vakai ki he palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2022) kapau ʻokú ke fiemaʻu tokoni ki hono tali e fehuʻi ko ʻení.)

Tūkungá: Konga 2

Kimui ange ʻi he uike ko iá, ʻoku fakataha ʻa Seisoni mo e ongo faifekaú ʻi homou ʻapí. ʻOkú ke tokoni ki he ongo faifekaú ke na akoʻi ʻa e ngaahi ʻuluaki tefitoʻi moʻoní mo e ngaahi ouau ʻo e ongoongoleleí, ʻo kau ai ʻa e tui kia Sīsū Kalaisí mo e papitaiso ʻi he fakauku ke fakamolemoleʻi ʻa e ngaahi angahalá. ʻOku fakaʻaongaʻi ʻe he ongo faifekaú ʻa e Sione 3:5 ke akoʻi ʻoku fiemaʻu ʻa e papitaiso ʻaki ʻa e mafai totonu ʻo e lakanga fakataulaʻeikí ke fakahaofi ʻi he puleʻanga ʻo e langí. ʻOku kiʻi fakakaukau taimi siʻi ki ai ʻa Seisoni, pea kiʻi mata mamahi. ʻOku fehuʻi ange ʻe ha taha ʻo e ongo faifekaú pe ko e hā ʻoku loto mamahi aí, pea tali ange ʻe Seisoni, “Naʻe teʻeki ai papitaiso ʻeku kui tangatá, ka ko ha tangata lelei moʻoni ia naʻá ne pehē maʻu pē naʻá ne fiemaʻu ke moʻui fiefia kae lava ke ʻalu ki hēvani. ʻE papitaiso nai mo ia?” Fai ha lotu fakalongolongo, ʻo kole ki he Tamai Hēvaní pe te ke tokoniʻi fēfē nai ʻa Seisoní. ʻOku haʻu ki ho ʻatamaí ʻa e fakakaukau ke fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié mo e tokāteline ʻoku akoʻi ʻi he 1 Pita 4:6 .

ʻE lava ke fakaʻaongaʻi ʻe he kau akó ʻenau ngaahi talí ke fakatātaaʻi ʻaki hono akoʻi ʻo Seisoní, ʻo fakatatau mo e tokolahi ʻo e kalasí mo e taimí. ʻE lava pē ke vahe ki he kau akó ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālié pea aleaʻi mo ha hoa pe ʻi ha kulupu tokosiʻi ʻa e founga ʻe lava ke tokoniʻi ai ʻe he tefitoʻi moʻoni ko iá ʻa Seisoní. ʻI he ʻosi ʻenau fealeaʻakí, te nau lava ʻo lipooti ki he kalasí pe fokotuʻu fakakulupu tautau toko tolu ke vahevahe ʻenau ngaahi fakakaukaú mo honau kaungā-ako ne nau ako e ongo tefitoʻi moʻoni ʻe tahá.

Fokotuʻutuʻu e founga te ke lava ʻo fakaʻaongaʻi ai e ngaahi tefitoʻi moʻoni ʻe tolu ki hono maʻu ʻo e ʻilo fakalaumālié mo e tokāteline ʻoku akoʻi ʻi he 1 Pita 4:6 ke tokoni kia Seisoni ke ne maʻu e ngaahi tali ki heʻene fehuʻí mo ongoʻi nonga fekauʻaki mo ʻene kuí. Hili hono fokotuʻutuʻú, teuteuʻi ha tali maʻa Seisoni. Fakakaukau ki he ngaahi fehuʻi te ke fai ke tokoni ke ne ʻiloʻi mo ongoʻi e moʻoni ʻo e tokāteliné. Fakapapauʻi ke fakakau ʻi hoʻo talí ʻa e kotoa ʻo e ngaahi tefitoʻi moʻoni ʻe tolu ʻo hono maʻu ʻo e ʻilo fakalaumālié mo e tokāteline ʻoku akoʻi ʻi he 1 Pita 4:6.

Kapau ʻe fiemaʻu, te ke lava ʻo fakaʻaongaʻi ha niʻihi pe kotoa ʻo e ngaahi fehuʻi ko ʻení ke tataki koe.

• Te ke tokoniʻi fēfē nai ʻa Seisoni ke ne maʻu ha fakakaukau ʻoku taʻengatá? Ko e hā te ke talaange kia Seisoni fekauʻaki mo e Tamai Hēvaní mo Sīsū Kalaisi ʻe lava ke ne maʻu ai ha nonga fekauʻaki mo ʻene kuí?

• Makehe mei he 1 Pita 4:6, ko e hā ha ngaahi maʻuʻanga tokoni kehe kuo fokotuʻu fakalangi te ke lava ʻo vahevahe mo Seisoni ke tokoniʻi ia ke ne ongoʻi ha ʻamanaki lelei ʻo fakafou ʻia Sīsū Kalaisi? Te ke fakaʻaongaʻi fēfē nai ʻa e ngaahi potufolofola ko ʻení ke tokoni ke ʻiloʻi ʻe Seisoni ʻa e moʻoní?

• ʻE fēfē nai e ngāue ʻi he tuí ʻi he tūkunga ʻo Seisoní? Ko e hā te ke fakaafeʻi e tokotahá ni ke ne fakahokó?

• Ko e hā ha ngaahi meʻa kuó ke aʻusia ʻi hoʻo fakahoko e ngāue fakatemipalé pe hisitōlia fakafāmilí maʻa hoʻo ngaahi kuí te ke lava ʻo vahevahe mo Seisoní?

• Ko e hā te ke fakamoʻoniʻi ke tokoni ki ho kaungāmeʻá?

Toe vakaiʻi ʻo e Fakataukei Fakatokāteliné

Tokoni ke toe vakaiʻi ʻe he kau akó ʻa e fakamoʻoni fakafolofolá mo e kupuʻi lea fakafolofola mahuʻinga ʻi he 1 Pita 4:6 ʻi ha lēsoni ka hoko mai. Ko ha founga ʻeni ʻe taha ke fakahoko ai ʻení:

Hiki e ʻū mataʻi tohi 1, P, 4:6, N, M,A, A, O, K, K, F, K, M ʻi ha kōlomu ʻi he palakipoé. Fakaafeʻi e kau akó ke nau feinga ke ʻiloʻi e ngaahi lea ʻo e potufolofola fakamoʻoni fakataukei fakatokāteliné mo e kupuʻi lea fakafolofola mahuʻinga mei he ngaahi mataʻitohi ʻuluaki ko ʻení. Hili hono ʻiloʻi kotoa e ngaahi foʻi leá, toe lau fakakalasi e fakamoʻoni fakafolofolá mo e kupuʻi lea mahuʻingá.