Naʻe tohi ʻa Pita ki he kau ākonga ʻa Sīsū Kalaisí ʻa ia naʻe mālohi ʻenau tuí. ʻI he ofi ke ngata e moʻui ʻa Pitá, naʻá ne fie tokoni ki he Kāingalotu ko ʻení ke nau manatuʻi ʻa e ngaahi tāpuaki maʻongoʻonga kuo talaʻofa ki he kau faivelengá. Naʻá ne poupouʻi e Kāingalotú ke nau fakatupulaki ʻa e ngaahi ʻulungaanga ʻo Sīsū Kalaisí. ʻOku fakataumuʻa ʻa e lēsoni ko ʻení ke tokoniʻi koe ke ke fai ha ngaahi meʻa ke ke hoko ai ʻo hangē ange ko Sīsū Kalaisí.
Tokoni ke mahino ki he kau akó e ngaahi ʻulungaanga ʻo e Fakamoʻuí. ʻI he ako ʻa e kau akó fekauʻaki mo e Fakamoʻuí, tokoniʻi kinautolu ke ope atu ʻenau ako ki he meʻa naʻá Ne folofola ʻaki mo fakahokó pea ako ko hai Ia. Ko e founga ʻe taha ke fakahoko ai ʻení ko e tokanga taha ki Hono ngaahi ʻulungāngá.
Teuteu ʻa e tokotaha akó: Fakaafeʻi e kau akó ke nau fakakaukau pe ko e ʻulungaanga fē ʻo Sīsū Kalaisi ʻoku nau saiʻia taha aí pea ko e hā hono ʻuhingá.
Ngaahi ʻEkitivitī Ako ʻOku Ala Fakahokó
Ngaahi lavameʻa fakahokohokó
Ko e hā ha taumuʻa mahuʻingamālie te ke fie aʻusiá?
Ko e hā ʻokú ke fakahoko ke ke aʻusia ai ‘a e tamuʻa ko ‘ení?
Naʻe vahevahe ʻe ʻEletā Sikoti D. Uaitingi ʻo e Kau Fitungofulú ha lēsoni naʻá ne ako mo hono uaifí lolotonga ha meʻa naʻá na aʻusia ʻi he lolotonga ʻena kaka ʻi he Moʻunga Susí ʻi Siapani. ʻE ala tokoni atu e lēsoni ne nau akó ke ke ngāueʻi hoʻo ngaahi taumuʻá.Mahalo te ke fie mamata ʻi he foʻi vitiō “Hoko ʻo Hangē ko Iá,” ʻoku maʻu ʻi he ChurchofJesusChrist.org, mei he taimi 2:35 ki he 3:09, pe lau ʻa e fakamatala ko ʻení:
ʻĪmisi
Ko e hā fakaʻeiʻeiki mai ʻa e Moʻunga Fuji, ʻi Siapani, mei mui ʻi ha efiafi ʻo e konga fakaʻosi ʻo e faʻahitaʻu fakatō lau. ʻOku lava ke ʻasi mai e ngaahi huelo fakaʻosi ʻo e laʻaá ʻi he fakahihifo ʻo e tafatafaʻaki ʻo e sinoú. ʻOku tuʻu ʻa e Anovai Kawaguchi ʻi muʻa mo e kolo ko Fujikawaguchiko ʻi he vahaʻa ʻo e anovaí mo e moʻungá. Kuo ʻufiʻufi ʻe ha sinou siʻisiʻi ʻa e koló mo e ʻuluʻakau ofi maí.
ʻĪmisi
Laʻitā Fakaʻofisiale ʻo ʻEletā Sikoti D Uītingi. Laʻitā Fakaʻofisiale ʻo ʻEletā Lōpeti C. Kei kimuʻa.
ʻI he ngaahi taʻu siʻi kuo hilí, ne u tuʻu ai mo hoku uaifí ʻi he kamataʻanga ʻo e foʻi hala ʻi he moʻunga māʻolunga taha ʻo Siapani ko Moʻunga Fusí. ʻI he kamata ke ma kaká ne ma sio ki ʻolunga ki he tumutumu ʻo e moʻungá peá ma fifili pe te ma lava koā ʻo aʻu ki ai.
ʻI he hokohoko atu ʻema kaká, ne ma ongoʻi helaʻia mo felāngaaki, he ko e haʻahaʻa ia ʻo e māʻolunga ʻa e moʻungá. Ne ma fakakaukau, ne mahuʻinga ange ke tukutaha ʻema tokangá ki he foʻi sitepu pē hono hokó. Naʻá ma pehē, “Mahalo he ʻikai ke u aʻu ki he tumutumú, ka te u lava he taimí ni ke manga ki he sitepu hono hokó.” Ne fai atu pē kuo fakaʻau ke faingofua ʻa e meʻa ne ngali faingataʻá—ʻi he foʻi laka ki he foʻi laka.
ʻE lava ke fakaʻaongaʻi e sīpinga ko ʻení ki hono aʻusia ha ngaahi taumuʻa kehekehe lahi. Ko e hā ʻe lava ʻo tokoni ke mahino kiate kitautolu ʻa e taumuʻa ʻo e hoko ʻo hangē ko Sīsū Kalaisí?
Fakaʻaongaʻi ha kiʻi taimi ke fakalaulauloto ai ki he meʻa kuó ke fai pea mo fakahoko ke ke hoko ai ʻo hangē ko Sīsū Kalaisí.
Ko e hā ʻoku faingataʻa ʻi he feinga ke hangē ange ko Sīsū Kalaisí?
Ko e hā kuó ne tokoniʻi koe ke ke fakalakalaka ʻi hoʻo hoko ʻo hangē ange ko Sīsū Kalaisí?
Manatuʻi ʻoku mahuʻinga ke vakai ki hoʻo fakalakalaká ʻi hoʻo hoko ʻo hangē ange ko Sīsū Kalaisí ko ha founga māmālie mo fakahokohoko. ʻI hoʻo ako ʻa e lēsoni ko ʻení, kumi e meʻa te ke ala fakahoko ʻi he tokoni ʻa e Fakamoʻuí ke hoko atu ki he sitepu hokó.
Natula faka-ʻOtuá
ʻI ha tohi ki he kāingalotu ʻo e Siasí kuo nau ʻosi tui kia Sīsū Kalaisí, naʻe fakahaaʻi ai ʻe he ʻAposetolo ko Pitá ʻa ʻene fakaʻamu ke nau maʻu ʻa e ngaahi tāpuaki ʻo hono ʻiloʻi ʻa e Tamai Hēvaní mo Sīsū Kalaisi pea mo Hona natula faka-ʻOtuá.
Lau ʻa e 2 Pita 1:2–4 , ʻo kumi e ngaahi tāpuaki ʻe lava ke tau maʻu ʻi he ʻilo ko ʻení.
ʻOkú ke pehē ʻoku ʻuhinga ki he hā ke “kau ai ʻi he anga ʻa e ʻOtuá”? (2 Pita 1:4).
ʻOku tau takitaha maʻu ha natula faka-ʻOtua koeʻuhí ko e “foha mo e ʻofefine [kitautolu takitaha] ʻo ha mātuʻa fakalangi” (“Ko e Fāmilí: Ko ha Fanongonongo ki Māmani,” ChurchofJesusChrist.org). ʻE lava ke tokoniʻi kitautolu ʻe Sīsū Kalaisi ke tau fakatupulaki mo fakaleleiʻi ʻa e ngaahi ʻulungaanga faka-Kalaisí ʻi heʻetau feinga ke muimui ki Heʻene sīpinga haohaoá mo falala kiate Ia ke tokoni ke tau liliu.
Fakakaukau ke tā ha fakatātā faingofua ʻo ha moʻunga ʻi he palakipoé.
Tā ʻi hoʻo tohinoa akó ha kiʻi fokotuʻutuʻu faingofua ʻo e Moʻunga Fusí pe ko ha moʻunga kehe te ke fili. Tohi ʻi hoʻo moʻungá ha niʻihi ʻo e ngaahi ʻulungaanga ʻo Sīsū Kalaisí.
Fakakaukau ke fakaafeʻi ha niʻihi ʻo e kau akó ke nau hiki e ngaahi ʻulungaanga faka-Kalaisí ʻi he fakatātā ʻo ha moʻunga ʻi he palakipoé. ʻE lava ke fakaafeʻi e kau akó ke nau fakakaukau ki heʻenau teuteu ki he kalasí ʻi heʻenau ʻiloʻi e ngaahi ʻulungaanga ʻo e Fakamoʻuí.
Ko e fē ʻi he ngaahi ʻulungaanga ʻo Sīsū Kalaisí ʻokú ke saiʻia taha aí? Ko e hā hono ʻuhingá?
Lau ‘a e 2 Pita 1:5–7 , ʻo kumi e ngaahi ʻulungaanga faka-Kalaisi naʻe hiki ʻe Pitá. Tānaki atu ʻa e ngaahi ʻulungaanga ko ʻení ki he ngaahi ʻulungaanga naʻá ke hiki ʻi hoʻo moʻungá ʻi hoʻo tohinoá.
Tuku ha kiʻi taimi ke ke fakakaukau ai ki he ʻuhinga ʻa Pita ki he kupuʻi lea “[faivelenga] lahí” (veesi 5).
Te ke fakaʻasi fēfē nai ʻa e meʻá ni ʻi hoʻo fakatātaá?
Fakakaukau ke fakahaaʻi ʻi he fakatātā he palakipoé ʻa e mahuʻinga ʻo e faivelengá ʻaki hano tā ha foʻi tao ʻoku ʻalu hake ʻi he moʻungá, ʻo fehokotaki mo e foʻi lea faivelengá (vakai ki he fakatātā kuo kakató ʻamui ange ʻi he lēsoní ki ha sīpinga ʻo e founga ʻe lava ke fakahoko ai ʻení).
Lau ʻa e 2 Pita 1:8–11 , ʻo kumi e meʻa naʻe talaange ʻe Pita ki he Kāingalotú ʻe hoko kapau te nau fakatupulaki e ngaahi ʻulungaanga ko ʻení.
Ko e hā ha foʻi moʻoni ʻokú ke ako mei he ngaahi veesi ko ʻení?
Mahalo ʻe talaatu ʻe he kau akó ha ngaahi moʻoni kehekehe, kau ai ʻeni: ʻI heʻeku fakatupulaki ha ngaahi ʻulungaanga faka-ʻOtuá, ʻe lava ke u ʻilo ʻa Sīsū Kalaisi mo maʻu ʻa e talaʻofa ʻo e moʻui taʻengatá .
Fakakaukau ki he meʻa te ke ala tānaki ki hoʻo fakatātaá koeʻuhí ko e meʻa ʻokú ke akó. Mahalo te ke fie tānaki atu ha hingoa ʻi ʻolunga ʻi hoʻo moʻungá ke ne fakamāʻopoʻopo ha foʻi moʻoni mahuʻinga ʻokú ke ako fekauʻaki mo e feinga ke ʻiloʻi ʻa Sīsū Kalaisí.
ʻĪmisi
Fakatātā ʻo e Moʻunga ʻo e Ngaahi ʻUlungaanga Faka-ʻOtuá
Ko e hā te tau lava ʻo fai ke fakatupulaki ai ʻa e ngaahi ʻulungaanga faka-Kalaisí?
ʻOkú ke pehē ʻoku tokoni fēfē nai hono fakatupulaki ʻo e ngaahi ʻulungaanga faka-ʻOtuá ke tau ʻiloʻi ʻa Sīsū Kalaisi pea hoko ʻo hangē ange ko Iá?
Ko Hono Fakatupulaki ʻo e Ngaahi ʻUlungaanga Faka-Kalaisí
ʻE lava ke kamata e fononga ʻo hono fakatupulaki e ngaahi ʻulungaanga faka-Kalaisí ʻaki e ʻuluaki sitepu faingofua ʻo hono fili ha ʻulungaanga ʻe taha pea ako lahi ange ki aí. Kamata e fononga ko ʻení he ʻahó ni ʻaki hono fili ha taha ʻo e ngaahi ʻulungaanga ʻoku hiki ʻi he 2 Pita 1:5–7 pea hiki ʻi hoʻo fakatātā ʻo e moʻungá.
Ko e founga ʻe taha te ke lava ai ʻo ako lahi ange fekauʻaki mo e ʻulungaanga naʻá ke filí ko hono fakaʻaongaʻi ʻa e Fakahinohino ki he Ngaahi Folofolá, pe ko e fekumi ʻi he Gospel Library ke maʻu e ngaahi potufolofola pe fakamatala ʻoku fekauʻaki mo e ʻulungaanga ko iá.
Hiki ha fanga kiʻi fakamatala ʻi hoʻo tohinoa akó, pea fakakaukau ke fakaʻilongaʻi ʻa e ngaahi kupuʻi lea mahuʻinga ʻi he ngaahi potufolofola ʻokú ke laú.
Tuku ha taimi feʻunga maʻá e kau akó ke fakakakato ai ʻa e ʻekitivitií. Tokoniʻi kinautolu ke nau lava ʻo maʻu e ngaahi maʻuʻanga tokoni te nau fie fakaʻaongaʻi fakaʻilekitulōniká, pe ʻoange ha ngaahi tatau ʻo e naunaú.
Ke maʻu ha ngaahi fakakaukau lahi ange ki he founga ke tokoniʻi ai ʻa e kau akó ke nau ako mo fakatupulaki ʻa e ngaahi ʻulungaanga faka-Kalaisí, vakai ki he konga “Ngaahi Fakamatala Fakamahino mo e Puipuituʻa” ʻo e lēsoní.
Fakakaukau ke fakaʻaongaʻi ha niʻihi pe kotoa ʻo e ngaahi fehuʻi ko ʻení ke ʻoange ki he kau akó ha faingamālie ke vahevahe ʻa e meʻa ʻoku nau akó.
Ko e ʻulungaanga fē naʻá ke fili ke tokanga taha ki aí?
Ko e hā naʻá ke ako fekauʻaki mo Sīsū Kalaisi pea mo e ʻulungaanga ko ʻení mei hoʻo akó?
ʻE fakalakalaka fēfē nai hoʻo moʻuí ʻi hono fakatupulaki e ʻulungaanga faka-Kalaisi ko ʻení?
Ko e hā ha ngaahi ngāue ʻokú ke loto fiemālie ke fai ke hoko ʻo hangē ange ko e Fakamoʻuí ʻaki hono fakatupulaki e ʻulungaanga ko ʻení?
Fakakaukau ke fai hoʻo fakamoʻoní ki he finangalo mo e malava ʻa e Fakamoʻuí ke tokoniʻi kitautolu ke tau hoko ʻo hangē ko Iá. ʻE lava ke ʻoange ki he kau akó ha ngaahi faingamālie ʻi he ngaahi lēsoni he kahaʻú ke lipooti ʻenau fakalakalaka ʻi hono fakatupulaki e ngaahi ʻulungaanga faka-Kalaisi kuo nau fili ke ngāue ki aí.
Fakamatala Fakamahinó mo e Puipuituʻá
Ko e hā ʻe fiemaʻu ai ke u fakatupulaki ʻa e ngaahi ʻulungaanga faka-Kalaisí?
Naʻe akoʻi ʻe ʻEletā Sikoti D. Uaitingi ʻo e Kau Fitungofulú ʻo pehē:
ʻĪmisi
Laʻitā Fakaʻofisiale ʻo ʻEletā Sikoti D Uītingi. Laʻitā Fakaʻofisiale ʻo ʻEletā Lōpeti C. Kei kimuʻa.
Ke lava ʻo mamata ki he tupulaki moʻoní, ʻe fiemaʻu ke hokohoko atu hoʻo feingá. ʻOku hangē pē ia ko e fiemaʻu ke fai ha teuteu kimuʻa pea toki kaka he moʻungá, mo e kātaki mo e tui mateaki lolotonga ʻa e kaka hake ki ʻolungá, ʻoku pehē pē ʻa e fononga ko ʻení ʻoku fiemaʻu ki ai ha ngāue lahi mo ha feilaulau. ʻOku fiemaʻu maʻu pē hotau lelei tahá ki he anga faka-Kalisitiane moʻoní, ʻa ia ʻoku tau feinga ai ke hangē ko hotau ʻEikí. …
ʻOku ou ʻilo ko e hoko ʻo hangē ko Iá ʻo fakafou ʻi Heʻene tokoni fakalangí mo e mālohí ʻoku malava fakakongokonga ia. Kapau naʻe ʻikai malava ke pehē, naʻe ʻikai ke Ne ʻomi ʻa e fekau ko ʻení kiate kitautolu [vakai, 1 Nīfai 3:7].
(Scott D. Whiting, “Hoko ʻo Hangē ko Iá,” Ensign pe Liahona, Nōvema 2020, 14)
Ko e hā ʻoku hoko ʻi heʻeku feinga ke maʻu e ngaahi ʻulungaanga faka-Kalaisí?
Naʻe fakamatalaʻi ʻe ʻEletā Lōpeti D. Heili (1932-2017) ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
Laʻitā fakaʻofisiale ʻo ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá, 2003.
Ko e ngaahi ʻulungaanga ʻo e Fakamoʻuí, ʻi heʻetau vakai ki aí, ʻoku ʻikai ko ha fakamatala tohi ke muimuiʻi pe ko ha lisi ke fakaʻilongaʻi. Ko ha ngaahi ʻulungaanga ia ʻoku lalanga fakataha, ʻo tātānaki fakataha ʻa ia ʻoku fakatupu ʻiate kitautolu ʻi ha ngaahi founga ʻoku nau fekauʻaki. Ko hono ʻai ʻe tahá, he ʻikai ke tau lava ʻo maʻu ha taha ʻo e ngaahi ʻulungaanga faka-Kalaisí ʻo ʻikai maʻu mo tākiekina ai e toengá. Ko e taimi ʻoku fakaʻau ʻo mālohi ai ha ʻulungaanga ʻe tahá, ʻoku pehē pē mo ha ngaahi ʻulungaanga lahi ange.
Naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
ʻEletā Tēvita A. Petinā, Kōlomu ʻo e Kau ʻAposetolo ʻe Toko Hongofulu Mā Uá. 2020.
ʻOku ʻatā ʻa e tokoni mei he Fakamoʻuí ʻi he kotoa ʻo e fononga ʻo e matelié—mei he koví ki he leleí ki he lelei angé pea ke liliu hotau natulá.
(David A. Bednar, “Ko e Fakaleleí pea mo e Fononga Fakamatelié,” Ensign, Apr. 2012, 42; Liahona, ʻEpeleli 2012, 14)
Ngaahi ʻEkitivitī Fakalahi ki he Akó
Ko hono fakaʻaongaʻi ha sīpinga sitepu ʻe valu
ʻE lava ke tokoni ʻa e sīpinga ko ʻení ki he kau akó ke nau ʻiloʻi ʻa Kalaisi mo fakatupulaki Hono ngaahi ʻulungāngá. ʻE lava ke fakaafeʻi e kau akó ke nau lau ia pea fakakaukau ki he founga ʻe ala tokoni ai e ngaahi sitepu takitaha ke nau hoko ʻo hangē ko Sīsū Kalaisí.
Fakakaukau ki ha ʻulungaanga faka-Kalaisi ʻokú ke fie fakatupulaki.
Hiki ha fakamatala ʻo e ʻulungaanga ko ʻení.
Kumi ha ngaahi potufolofola ʻoku nau akoʻi ʻa e ʻulungaanga ko ʻení, pea ako fakaʻauliliki kinautolu.
ʻI hoʻo akó, hiki ha faʻahinga fehuʻi pē ʻokú ke fiemaʻu ha ngaahi tali ki ai.
Hiki e ngaahi ongo ʻokú ke maʻú pea mo hoʻo ngaahi fakakaukaú.
Fokotuʻu ha ngaahi taumuʻa ʻe tokoni atu ke ke fakaʻaongaʻi ai e ʻulungaanga ko ʻení ʻi hoʻo moʻuí.
Lotua ke maʻu e fakahinohino ʻa e ʻEikí.
Toutou vakaiʻi maʻu pē hoʻo fakalakalaká.
Fakakaukau ke fakaʻaliʻali e sīpinga ko ʻení pe ʻoange ha laʻipepa tufa ke tauhi ʻe he kau akó.
Ko hono lalanga ʻo e ngaahi ʻulungaanga faka-Kalaisí ʻi hotau ʻulungāngá
Kapau ʻe ʻaonga ki he kau akó ha lēsoni fakataumuʻa ʻokú ne akoʻi e ngaahi ʻulungaanga faka-Kalaisí, fakakaukau ke fakaʻaongaʻi e konga “ʻI he mālohi ʻo Sīsū Kalaisí, te u lava ʻo fakatupulaki hoku natula faka-ʻOtuá” ʻi he fokotuʻutuʻu ki he Haʻu, ‘o Muimui ʻIate Aú “20–26 Nōvema. 1 mo e 2 Pita: ʻFiefia ʻaki ʻa e Fiefia Taʻefaʻalaua mo Fonu ʻi he Kolōliá’” (Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻou 2023). ʻE lava ke fakaʻaongaʻi ha kupesi pe kāpeti (pe fakatātā ʻoku ʻoatu ʻi he fokotuʻutuʻú) ke fakatātaaʻi ʻaki ʻe lava ke lalanga fakalaumālie e ngaahi ʻulungaanga faka-Kalaisí ʻi hotau natula totonú.
Fakakaukau ke ʻoange ki he kau akó ha faingamālie ke nau ako ha ngaahi konga ʻo e lea “Ko e Hoko ko ha Ākonga Hotau ʻEiki ko Sīsū Kalaisí” fai ʻe ʻEletā Robert D. Hales (1932–2017) (Ensign pe Liahona, Mē 2017, 46–48).
