1–2 Pita

Vakai Fakalūkufuá

ʻI he ʻuluaki tohi ʻa Pita ko e ʻAposetolo Pulé, naʻá ne tokanga taha ki he ngaahi founga ʻe lava ke fakamālohia ai e Kāingalotú ʻi he ngaahi faingataʻa lahi ne nau aʻusia ʻi he nima ʻo e kau Lomá. Naʻá ne poupouʻi e Kāingalotú ke nau mateuteu maʻu pē ke fakamoʻoni ki he moʻoní mo fakamanatu kiate kinautolu honau tukufakaholo fakalangí (vakai, 1 Pita 2:9; 3:15). Naʻá ne akoʻi naʻe malangaʻi ʻe Sīsū Kalaisi ʻa e ongoongoleleí ʻi he maama tataliʻanga ʻo e ngaahi laumālié hili ʻEne pekiá, ʻo fakaʻatā ʻa e ngaahi tāpuaki ʻo e ongoongoleleí ki he fānau kotoa ʻa e Tamai Hēvaní.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

1 Pita 1–5

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino lelei ange ki he kau akó ʻa e ngaahi taumuʻa ʻa e ʻOtuá ʻi hono fakaʻatā kinautolu ke nau aʻusia ʻa e ngaahi ʻahiʻahí pea lava ke fakamālohia ʻenau tukupā ke kātekina faivelenga ʻa e ngaahi faingataʻá.

• Teuteu ʻa e tokotaha akó: Fakaafeʻi e kau akó ke nau fakakaukau ki he founga te nau tali ʻaki e fehuʻi ko ʻení: Ko e hā ʻoku tau aʻusia ai e ngaahi ʻahiʻahí, faingataʻá, mo e taʻe-angatonú ʻi he moʻuí?

• ʻĪmisí: Ko ha fakatātā ʻo ha tutuʻanga ukamea

•  

• Fokotuʻu ki hono akoʻí ʻi he konifelenisi vitioó: Hili hano fakaʻaliʻali ha fakatātā ʻo ha tutuʻanga ukamea, fakaafeʻi ʻa e tokotaha ako takitaha ke tā ha tutuʻanga ukamea pea hiki ha faingataʻa fakataautaha ʻi loto ai. ʻE lava leva ke hiki ʻe he kau akó ʻi he tafaʻaki ki mui ʻo e laʻipepá ʻa e founga ʻoku siviʻi ai kinautolu mo fakamālohia ʻenau tui kia Sīsū Kalaisí. Fakaafeʻi e kau akó ke puke hake ʻenau fakatātaá ki he meʻafaitaá pea vahevahe ʻenau ngaahi fakakaukaú mo e kalasí. Fakapapauʻi ke fakatokanga ki he kau akó ke ʻoua te nau vahevahe ha meʻa ʻoku fuʻu fakatāutaha.

1 Pita 2–3

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e mahuʻinga ʻo e hoko ko ha sīpinga faivelenga ʻo Sīsū Kalaisí mo ʻomi ha ngaahi faingamālie ke akoako tali ai ki he niʻihi kehé fekauʻaki mo ʻenau tuí.

• Teuteu ʻa e tokotaha akó: Fakaafeʻi e kau akó ke aleaʻi mo honau fāmilí ʻa e taimi naʻe kole ange ai kiate kinautolu pe ko ha taha ʻoku nau ʻilo ke fakamatalaʻi ʻenau tuí mo e tui kia Sīsū Kalaisí. Fakaafeʻi kinautolu ke nau fakakaukau pe naʻe mei kehe nai ʻenau talí pea nau omi mateuteu ke vahevahe ʻenau ngaahi fakakaukaú.

•  

• Fokotuʻu ki hono akoʻí ʻi he konifelenisi vitioó: Vahevahe ʻa e ngaahi fehuʻí ʻi he fakaʻosinga ʻo e lēsoní ki he kau akó, pe fakaafeʻi kinautolu ke nau fakakaukau ki ha fehuʻi kuo fai ange kiate kinautolu fekauʻaki mo e Siasí pe ko ʻenau tuí. ʻOange ha taimi ke nau fakakaukau ai ki he founga te nau tali ʻakí, pea tuku ange leva ke nau taufetongi ʻi hono vahevahe ʻo e ngaahi talí. Kapau ʻoku manavasiʻi ʻa e kau akó ki he talanoa ʻi he meʻafaitaá, te nau lava ʻo fakahū ʻenau talí ʻo fakaʻaongaʻi ʻa epolokalama fetalanoaʻakí.

1 Pita 3:18–22; 4:1–6

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau fekumi ki ha ngaahi founga ke tokoni ai ki he Fakamoʻuí ʻi Heʻene ngāue ki hono huhuʻi ʻo e kau pekiá.

• Teuteu ʻa e tokotaha akó: Ke maʻu ha ngaahi meʻa pau ʻi he FamilySearch.org pe polokalama FamilySearch Family Tree, ʻe fiemaʻu ke hū ki ai e kau akó mo honau hingoa ngāue mo e lea fufū ʻi he ʻAkauni ʻi he Siasí ʻa ia ʻoku fehokotaki mo ʻenau fika lēkooti memipasipí. Kapau ʻoku ʻikai maʻu pe ʻikai ʻilo ʻe he kau akó honau hingoa ngāué mo e lea fufuú, fakaafeʻi kinautolu ke nau faʻu pe toe kumi kinautolu ʻi he account.ChurchofJesusChrist.org pe faʻu ha ʻakauni ʻi he FamilySearch.org. Kole ki ha mataotao hisitōlia fakafāmili fakauooti pe fakakolo pe ko ha kouʻōtineita ʻo e Seminelí mo e ʻInisititiuti Fakalotú ki ha tokoni ʻo ka fiemaʻu.

• Ngaahi Maʻuʻanga Tokoní: Ko ha komipiuta pe meʻangāue toʻotoʻo ʻoku maʻu ai e ʻinitanetí koeʻuhí ke lava e kau ako ʻoku ʻikai ke ʻi ai haʻanau ngaahi meʻangāue fakaʻilekitulōniká ʻo fakaʻaongaʻi ha taimi ‘i he kalasí ke fekumi ʻi he FamilySearch.org pe ko e polokalama FamilySearch Tree , kapau ʻe lava

• Fokotuʻu ki hono akoʻí ʻi he konifelenisi vitioó: Kapau ʻe lava ʻe he kau akó ʻo fakaʻaongaʻi ʻa e polokalama Ngaahi Ouau Kuo Māú ʻi he FamilySearch.org, fakaafeʻi kinautolu ke fakaʻaongaʻi ia ke kumi ha kāinga te nau lava ʻo fakahoko ki ai ʻa e ngāue fakatemipalé. Fakakaukau ki ha faingamālie ke fokotuʻu ha ʻaho ʻe lava ke fakataha ai ʻa e kalasí ʻi ha founga pau ʻi he temipalé ke fakahoko ʻa e papitaiso mo e hilifakinima fakafofonga maʻá e kakai naʻe maʻu honau hingoá.

Fakataukei Fakatokāteliné: 1 Pita 4:6

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea fakafolofola mahuʻinga ʻi he 1 Pita 4:6 . Te ne ʻoange foki kiate kinautolu ʻa e faingamālie ke fakaʻaongaʻi ʻa e tokāteline ʻoku akoʻi ʻi he potufolofola ko iá pea mo e ngaahi tefitoʻi moʻoni ʻo hono maʻu ʻo e ʻilo fakalaumālié ki ha tūkunga moʻoni.

• Teuteu ʻa e tokotaha akó: Fakaafeʻi e kau akó ke nau fakalaulauloto mo teuteu ke vahevahe e meʻa ne nau ongoʻi ʻi heʻenau fakahoko e papitaisó mo e hilifakinimá ʻi he temipalé pe fai ha ngāue hisitōlia fakafāmili kehe maʻa ʻenau ngaahi kui kuo pekiá.

• Ngaahi Naunaú: Ko ha laʻipepa mo ha peni maʻá e tokotaha ako takitaha

• Fokotuʻu ki hono akoʻí ʻi he konifelenisi vitioó: ʻE lava ke vahe ki he kau akó ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālié pea ngāue tautau toko ua pe ʻi ha fanga kiʻi kulupu iiki ʻi he ngaahi loki fealēleaʻakí ke aleaʻi ʻa e founga te nau lava ai ʻo fakaʻaongaʻi ʻa e tefitoʻi moʻoni ko iá ke tokoni kia Seisoní. ʻI he ʻosi ʻenau aleaʻi ʻenau tefitoʻi moʻoní, te nau lava ʻo lipooti ki he kalasí.

2 Pita 1

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau fakahoko ha ngaahi sitepu ke nau hoko ʻo hangē ange ko Sīsū Kalaisí.

• Teuteu ʻa e tokotaha akó: Fakaafeʻi e kau akó ke nau fakakaukau pe ko e ʻulungaanga fē ʻo Sīsū Kalaisi ʻoku nau saiʻia taha aí pea ko e hā hono ʻuhingá.

• Vitiō: “Hoko ʻo Hangē Ko Iá” (10:21; mamata mei he taimi 2:34 ki he 3:09)

• Fakatātā ʻo e lainé: Ko ha fakatātā ʻo ha moʻunga ke hiki ai pe hiki takatakai ai ha ngaahi foʻi lea ʻi he lolotonga ʻo e lēsoní

• Fokotuʻu ki hono akoʻí ʻi he konifelenisi vitioó: Fakakaukau ke fakaʻaongaʻi ʻa e polokalama palakipoé ke faʻu fakakalasi ʻa e fakatātā ʻo e moʻungá mo e lisi ʻo e ngaahi ʻulungaanga faka-Kalaisí. ʻE lava foki ke fakaafeʻi e kau akó ke faʻu haʻanau fakatātā pē ʻanautolu pea lisi ʻi heʻenau tohinoa akó, pea ʻe lava ke fakaafeʻi ha kau ako tokosiʻi ke fakaʻaliʻali ʻenau ngāué. Ko e taimi ʻaonga taha ke fakaafeʻi ai ʻa e fevahevaheʻakí ko hono kole ki he kau akó ke nau fakamatalaʻi ʻa e founga naʻa nau fakafofongaʻi ai ʻa e fakakaukau ʻo e faivelengá ʻi heʻenau fakatātaá.