Seminelí
1–3 Sione; Sute

1–3 Sione; Sute

Vakai Fakalūkufuá

Naʻe tohi ʻe he ʻAposetolo ko Sioné fekauʻaki mo e ʻofa ʻa e ʻOtuá ki he Kāingalotú mo e founga naʻe fakahaaʻi ai ʻa e ʻofa ko ʻení ʻi he misiona faifakamoʻui ʻo Sīsū Kalaisí. Naʻá ne akoʻi ʻe lava ke fakaʻaiʻai kitautolu ʻe heʻetau ʻofa ki he Tamai Hēvaní mo Sīsū Kalaisí ke tauhi ʻEna ngaahi fekaú. Naʻá ne akoʻi foki ʻe lava ke ueʻi kitautolu ʻe he ʻofa ʻa e ʻOtuá kiate kitautolú ke tau ʻofa ki he niʻihi kehé.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

1 Sione 1–5

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ongoʻi e ʻofa ʻa e ʻOtuá kiate kinautolú.

  • Teuteu ʻa e tokotaha akó: Fakaafeʻi e kau akó ke omi mateuteu ke vahevahe ha ngaahi founga kehekehe te nau lava ʻo fakakakato totonu ai e fakamatala ko ʻení: “Ko e ʻOtuá ko e …”

  • Fokotuʻu ki hono akoʻí ʻi he konifelenisi vitioó: Fakakaukau ke kamata e lēsoní ʻaki hono fakaafeʻi e kau akó ke fakakakato e lea “Ko e ʻOtuá ko e …” ʻi he lahi taha te nau lavá. ʻE lava ke lea ʻaki pe hiki ʻe he kau akó ʻenau ngaahi talí ʻo fakaʻaongaʻi ʻa e polokalama fetalanoaʻakí, pe ʻe lava ke fakaʻaongaʻi ʻa e polokalama palakipoé ke fakaʻaliʻali ʻaki ʻa e kupuʻi lea “Ko e ʻOtuá ko e …” pea ʻai ke lava e kau akó ʻo vahevahe ʻenau ngaahi talí. ʻE lava foki ke fakaʻaongaʻi ha polokalama tali fehuʻi ʻi he ʻinitanetí ke fakaʻaiʻai e kau akó ke fakahoko ha tali.

1 Sione 2–4; 2 Sione

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e founga te nau lava ai ʻo fakahaaʻi ʻenau ʻofa ki he Tamai Hēvaní mo Sīsū Kalaisí ʻaki hono tauhi e ngaahi fekaú.

  • Teuteu ʻa e tokotaha akó: Fakaafeʻi e kau akó ke nau fakalaulauloto ki he ongo ʻoku nau maʻu fekauʻaki mo hono tauhi ʻo e ngaahi fekaú. Te nau lava foki ʻo ʻeke ki ha kakai ʻoku nau ʻilo ʻa e meʻa ʻokú ne fakaʻaiʻai kinautolu ke tauhi e ngaahi fekaú.

  • Ngaahi ʻata ke fakaʻaliʻalí: Ko ha fakatātā ʻo ha taha ʻokú ne tali ʻa Sīsū Kalaisi

  • Fokotuʻu ki hono akoʻí ʻi he konifelenisi vitioó: ʻI hono fai e ngaahi fehuʻi ʻoku muimui ki he fakamatala ʻo e tefitoʻi moʻoni ʻi he lēsoní, fakakaukau ke fakaafeʻi e kau akó ke tuku hake ha fakamatala ʻi he mītia fakasōsialé ʻo ʻenau ngaahi talí. Te nau lava ʻo taipeʻi ʻenau ngaahi talí ʻi ha uepisaiti mītia fakasōsiale pea vahevahe ʻenau monitoá mo e kalasí. Pe te nau tā ʻa e ngaahi foʻi fuopotopoto mo e ngaahi fakaʻilonga ʻo ha mītia fakasōsiale ʻi ha laʻipepa, fakafonu ʻenau talí, pea fakaʻaliʻali ʻenau laʻipepá ki he kalasí.

1 Sione 2–4

Taumuʻa ʻo e lēsoní: ʻE lava ke tokoni e lēsoni ko ʻení ke mahino ki he kau akó mo nau fakaʻaongaʻi e fekau ke ʻofa ki he niʻihi kehé ʻo hangē ko ʻenau ʻofa ki he ʻOtuá.

  • Teuteu ʻa e tokotaha akó: Fakaafeʻi e kau akó ke omi mateuteu ke vahevahe ha ngaahi aʻusia ʻa ia ne nau fakahaaʻi ai ʻenau ʻofá ki he niʻihi kehé pe fakahaaʻi ʻe he niʻihi kehé ʻenau ʻofá kiate kinautolu pea mo hono olá.

  • Fokotuʻu ki hono akoʻí ʻi he konifelenisi vitioó: Fakakaukau ke fakaafeʻi ha toko taha pe toko ua ʻo e kau akó ke ʻomi ki he konifelenisi vitioó ha kaungāmeʻa pe mēmipa ʻo e fāmilí ʻokú na ongoʻi ko ha sīpinga maʻongoʻonga ia ʻo e ʻofa ki he niʻihi kehé. Hili hono ʻiloʻi ʻe he kalasí ʻa e moʻoni ʻi he 1 Sione 4:21 , ʻe lava ke fakafeʻiloaki ʻe he kau ako ko ʻení ʻenau kau fakaafé mo talanoa ki he founga ʻoku fakahaaʻi ai ʻe he kau fakaafé ʻenau ʻofa ki he niʻihi kehé.

Toe Vakaiʻi ʻo e Fakataukei Fakatokāteline hono 23

Taumuʻa ‘o e lēsoní: ʻE ʻoatu ʻe he lēsoni ko ʻení ha faingamālie ke fakaloloto ai e mahino ʻa e kau akó mo fakamatalaʻi e ngaahi moʻoni ‘i he ngaahi potufolofola fakataukei fakatokāteline ʻe 13 mei he konga hono ua ‘o e Fuakava Foʻoú.

  • Teuteu ʻa e tokotaha akó: Fakaafeʻi e kau akó ke nau toe vakaiʻi nounou e ngaahi potufolofola fakataukei fakatokāteline ʻe 13 mei he konga hono ua ʻo e Fuakava Foʻoú pea fili leva ha taha te nau fiemaʻu ke mahino lelei angé.

  • Meʻa ke fakaʻaliʻalí: Ko e saati ʻo e ngaahi potufolofola fakataukei fakatokāteline ʻe 13

  • Naunau maʻá e kau akó: Ko ha laʻipepa ʻoku teʻeki tohi ai ha meʻa pea mo ha peni maʻá e tokotaha ako takitaha

  • Fokotuʻu ki hono akoʻí ʻi he konifelenisi vitioó: Fakakaukau ke fakatātaaʻi ʻa e ʻekitivitī ʻi he lēsoní ʻaki hano fakaʻaliʻali ha taha ʻo e ngaahi potufolofola folofola fakatokāteliné ʻi he monitoá pea fakaafeʻi e kau akó ke nau fakaʻaongaʻi ha meʻangāue fakaʻilongaʻi ke siakaleʻi ha faʻahinga kupuʻi lea pē ʻoku ʻi ai haʻanau fehuʻi ai pe ʻikai mahino kiate kinautolu. Hili iá pea kole ki he kau akó ke vahevahe ʻenau ngaahi hohaʻá pe fehuʻí. ʻE lava foki ke ʻeke ʻe he kau akó ha ngaahi fehuʻi fakalūkufua fekauʻaki mo e vēsí pe ngaahi vēsí ʻo fakaʻaongaʻi ʻa e polokalama fetalanoaʻakí.

Siviʻi Hono 11 Hoʻo Akó

Taumuʻa ʻo e lēsoní:ʻOku fakataumuʻa ʻa e lēsoni ko ʻení ke tokoniʻi e kau akó ke nau vakaiʻi ʻa e ngaahi taumuʻa kuo nau fokotuʻú pea mo e tupulaki fakaako mo fakataautaha kuo nau aʻusia lolotonga ʻenau ako e Fuakava Foʻoú.

  • Teuteu ʻa e tokotaha akó: Fakaafeʻi e kau akó ke fakalaulauloto ki he meʻa kuo nau ako fekauʻaki mo Sīsū Kalaisí mo e ngaahi founga ʻoku nau ongoʻi ʻoku nau hoko ai ʻo anga faka-Kalaisi angé.

  • Ngaahi ʻīmisi ke fakaʻaliʻalí: Ko ha fakatātā ʻo ha moʻunga (mei he lēsoni ʻi he 2 Pita 1); ha ngaahi fakatātā ʻo Sīsū Kalaisi ʻoku akonaki ʻi ha ngaahi feituʻu kehekehe; ko ha ʻīmisi ʻo Siosefa Sāmita ʻi heʻene kei talavoú

  • Fokotuʻu ki hono akoʻí ʻi he konifelenisi vitioó: Lolotonga hono fakahoko e ʻekitivitī ʻi lalo ʻi he ʻuluʻi tohi “Ko e Faiako hangē ko Sīsū Kalaisí,” fakaafeʻi e kau akó ke nau tohi ʻi he polokalama fetalanoaʻakí ha fehuʻi ʻe ala maʻu ʻe ha taha fekauʻaki mo ha taha ʻo e ngaahi tefitoʻi moʻoni ʻe tolu ʻo e ongoongoleleí (vakai, sitepu e ʻi he ʻekitivitií). Fakaafeʻi leva e kau akó ke lau kotoa e ngaahi fehuʻi ʻoku lisi atú pea fili ha fehuʻi ʻe taha pe ua te nau fie aleaʻi.

Paaki