Toe Vakaiʻi ʻo e Fakataukei Fakatokāteline hono 23
Mahino pea Fakamatalaʻi
Ko e taha ʻo e ngaahi taumuʻa ʻo e fakataukei fakatokāteliné ke tokoni ke mahino kiate koe ʻa e tokāteline ʻoku ʻi he ngaahi potufolofola fakataukei fakatokāteliné pea lava ke fakamatalaʻi e tokāteliné ʻi he ngaahi lea pē ʻaʻau. ʻE ʻoatu ʻe he lēsoni ko ʻení ha faingamālie ke fakaloloto ai hoʻo mahinó mo fakamatalaʻi e ngaahi moʻoni ʻoku maʻu ʻi he ngaahi potufolofola fakataukei fakatokāteline ʻe 13 mei he konga hono ua ʻo e Fuakava Foʻoú.
Ko hono poupouʻi ʻa e ako mo toe vakaiʻi maʻu pē ʻo e ngaahi potufolofola fakataukei fakatokāteliné. ʻOku fiemaʻu ki hono ako maʻuloto, mahino, fakamatalaʻi, mo hono fakaʻaongaʻi ʻo e ngaahi potufolofola fakataukei fakatokāteliné ʻa e akó mo hono akoako fakahokó. Akoʻi fakauike ha lēsoni fakataukei fakatokāteline, pea poupouʻi e kau akó ke nau toe vakaiʻi maʻu pē ʻa e meʻa kuo nau akó. Manatuʻi ko e app Fakataukei Fakatokāteliné ko ha maʻuʻanga tokoni mahuʻinga ia ʻe lava ke tokoni ki he kau akó ke hokohoko atu ʻenau ako e ngaahi potufolofola fakataukei fakatokāteliné.
Teuteu ʻa e tokotaha akó: Fakaafeʻi e kau akó ke nau toe vakaiʻi nounou e ngaahi potufolofola fakataukei fakatokāteline ʻe 13 mei he konga hono ua ʻo e Fuakava Foʻoú pea fili leva ha taha te nau fiemaʻu ke mahino lelei angé.
Ngaahi ʻEkitivitī Ako ʻOku Ala Fakahokó
ʻE ala fiemaʻu ke akoʻi ha lēsoni ki he potufolofola fakataukei fakatokāteliné ʻo fetongi ʻaki ʻa e lēsoni ko ʻení. Vakai ki he taimi-tēpile ʻo e lēsoní ʻa ia ʻoku ʻomi ʻe he talēkita fakaʻēliá pe fakavahefonuá pe kouʻōtineitá ke fakapapauʻi ʻe akoʻi e lēsoni ʻo e potufolofola fakataukei fakatokāteline takitaha lolotonga e lele ʻa e seminelí.
Fai ha ngaahi fehuʻi
-
Ko e fē ha taimi kuó ke ongoʻi houngaʻia ai ʻi hoʻo fai ha fehuʻi ki ha taha? (Hangē ko ʻení, mahalo naʻá ke ako ha meʻa ʻaki hano fai ha fehuʻi, pe mahalo naʻá ke maʻu ha faleʻi mahuʻinga hili haʻo kumi faleʻi mei ha kaungāmeʻa pe mātuʻa.)
Fakakaukau ke vahevahe ha aʻusia fakataautaha ke tokoni ki he kau akó ke nau fakakaukau ki heʻenau ngaahi aʻusiá.
-
Ko e hā ha ngaahi ʻuhinga ʻoku mahuʻinga ai ke fai ha ngaahi fehuʻi ʻi hono ako e ongoongolelei ʻo Sīsū Kalaisí?
Naʻe pehē ʻe Palesiteni Henelī B. ʻAealingi ʻo e Kau Palesitenisī ʻUluakí: “Ke ʻeke pea ke tali ʻa e ngaahi fehuʻí ko e uho ia ʻo e ako mo e akoʻi kotoa pē” (“The Lord Will Multiply the Harvest” [evening with a General Authority, Feb. 6, 1998], 5–6, ʻi he Teaching Seminary: Preservice Readings [2004], 98).
ʻE lava ke tokoni hono fai ha ngaahi fehuʻi fekauʻaki mo e ngaahi potufolofola fakataukei fakatokāteliné ke mahino lelei ange kiate kitautolu pea fakaafeʻi kakato ange e tokoni ʻa e Fakamoʻuí ki heʻetau moʻuí.
Fakakaukau ke fakaʻaliʻali ʻa e ngaahi potufolofola fakataukei fakatokāteline kotoa ʻe 13 pe fakaʻaliʻali ki he kau akó ʻa e feituʻu te nau lava ʻo sio ai ki aí. Kapau ʻe fiemaʻu, fakaʻaongaʻi kotoa e ngaahi potufolofola fakataukei fakatokāteline ʻe 24 ʻo e Fuakava Foʻoú ki hono toe vakaiʻi ko ʻení, pe fili ha niʻihi tokosiʻi pē, ʻo fakatatau mo e ngaahi fiemaʻu ʻa e kalasí.
Fakataukei Fakatokāteline ʻo e Fuakava Foʻoú: 1 Kolinitō–Fakahā
|
“Ko homou sinó ko e fale tapu ʻo e Laumālie Māʻoniʻoní.” | |
|
“ʻOku ʻikai ai ʻa e tangatá kae ʻi he fefiné, pea ʻoku ʻikai ai ʻa e fefiné kae ʻi he tangatá, ʻi he ʻEikí.” | |
|
“ʻOku hangē ʻoku mate kotoa pē ʻia ʻĀtamá, ʻe pehē foki ʻe moʻui kotoa pē ʻia Kalaisi.” | |
|
ʻI he Toetuʻú, ʻoku ʻi ai ʻa e ngaahi nāunau ʻe tolu. | |
|
“ʻI he kakato ʻo e ngaahi kuongá naʻá ne tuʻutuʻuni, ke ne fakakātoa fakataha ʻa e meʻa kotoa pē ʻia Kalaisi.” | |
|
ʻOku fokotuʻu ʻa e Siasí “ki he tuʻunga ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi pē.” | |
|
“ʻA e ʻaho ʻo Kalaisí … ʻe ʻikai hoko ʻa e ʻaho ko iá, ʻo kapau ʻe ʻikai tomuʻa hoko ʻa e liliu koví.” | |
|
“Ko e ngaahi tohi māʻoniʻoní … ʻoku faʻa fakapoto koe ki he fakamoʻuí.” | |
|
Ko e Tamai Hēvaní ʻa e “Tamai ʻo e ngaahi laumālié.” | |
|
“Ka ai hamou taha ʻoku masiva ʻi he potó, ke kole ʻe ia ki he ʻOtuá.” | |
|
“Ko e tuí, kapau ʻoku ʻikai ʻi ai ʻa e ngaahi ngāué, ʻoku mate ia.” | |
|
“[Naʻe] malanga ʻaki ʻa e ongoongoleleí kiate kinautolu foki kuo maté.” | |
|
“Pea naʻe fakamāuʻi ʻa e pekiá … ʻo fakatatau ki heʻenau ngaahi ngāué.” |
Fakakaukau ke fakahoko fakakalasi ʻa e ʻekitivitī ko ʻení ʻo fakaʻaongaʻi ha taha ʻo e ngaahi potufolofola fakataukei fakatokāteliné, pea fakaafeʻi e kau akó ke nau toe fai e ʻekitivitií ʻo fakaʻaongaʻi ha potufolofola fakataukei fakatokāteline kehe te nau fili. ʻE lava ke ngāue ʻa e kau akó ʻi ha ngaahi kulupu, tauhoa, pe fakafoʻituitui, ʻo fakatatau mo e ngaahi fiemaʻu ʻa e kalasí.
Fili ha taha ʻo e ngaahi potufolofola fakataukei fakatokāteline ʻe 13 ʻokú ke fiemaʻu ke mahino lelei angé. Lau fakalelei ia. Vakaiʻi ʻa e ngaahi foʻi lea mo e ngaahi kupuʻi lea ʻo e potufolofola fakataukei fakatokāteliné, ʻo fakatokangaʻi e meʻa ʻoku mahino kiate koe fekauʻaki mo e potufolofolá pea ko e hā ha ngaahi fehuʻi te ke ala fakahoko pe ko ha taha kehe fekauʻaki mo e potufolofolá. Hangē ko ʻení, ko e meʻa te ke ala fehuʻi fekauʻaki mo e ʻEfesō 2:19–20, Ko e hā ʻa e maka tuliki pea ko e hā ʻoku fakafehoanaki ai ʻa Sīsū Kalaisi ki aí?” Pe mahalo te ke fifili pe ko e hā e ʻuhinga ʻo e kupuʻi lea “liliu kovi” ʻi he 2 Tesalonika 2:1–3.
Hiki ki he lahi taha te ke lavá ʻa e ngaahi fehuʻí.
ʻE lava ke hiki ʻe he kau akó ʻa e potufolofola fakataukei fakatokāteline ne nau filí ʻi heʻenau tohinoa akó pe ʻi ha laʻipepa pea hiki takai leva ai ʻenau ngaahi fehuʻí.
Hili pē hoʻo hiki e ngaahi fehuʻí ki he lahi taha te ke lavá, fili ha ngaahi fehuʻi ʻokú ke pehē ʻoku mahuʻinga taha ke mahinó, pea tali kinautolu ʻaki hono fakaʻaongaʻi e ngaahi meʻangāue ako folofola ʻoku maʻú. ʻOku kau ʻi he ngaahi meʻangāue ko ʻení ʻa e Fakahinohino ki he Ngaahi Folofolá, Tikisinale ʻo e Tohi Tapú, gospel Library app, pe ngaahi lea ʻo e konifelenisi lahí. Te ke lava foki ʻo fili ke fakaʻaongaʻi ha niʻihi ʻo e ngaahi founga ako folofola kuó ke ako he taʻu ní, hangē ko hono lau ʻo e ngaahi veesi takatakaí pe feinga ke mahino ʻa e ʻuhinga ʻo e folofolá. Lekooti hoʻo ngaahi talí ʻi hoʻo tohinoa akó.
Manatuʻi he ʻikai faingofua ke tali e ngaahi fehuʻi kotoa pē pea ʻe fiemaʻu ʻe ha niʻihi ha taimi lahi ange ke ako mo fakalaulauloto ai ʻi he faʻa lotu.
Ke fakakau lahi ange ʻa e kau akó mo fokotuʻu ha ngaahi founga kehekehe, fakakaukau ke kole ange ke hiki ʻa e potufolofola fakataukei fakatokāteline ne nau filí mo ʻenau ngaahi fehuʻí ʻi ha laʻipepa kehe ʻoku ʻi ai honau hingoá. Fakaafeʻi leva e kau akó ke fakafetongi ʻenau laʻipepá mo ha tokotaha ako ʻe taha. Pe, fakaafeʻi e kau akó ke paasi ʻenau ʻū laʻipepá ki muʻa ke lava ʻo fio pea tufaki ki he toenga ʻo e kau akó.
ʻOange ha taimi ki he kau akó ke nau fakaʻaongaʻi ʻa e ngaahi meʻangāue mo e ngaahi founga ako folofola ʻoku maʻú ke kumi e tali ki he ngaahi fehuʻi ʻi he laʻipepa ne nau maʻú pea hiki e ngaahi tali ko iá ʻi he laʻipepá. Hili ha taimi feʻunga, fakaafeʻi ʻa e kau akó ke fakafoki ʻa e ʻū laʻipepá ki he kau ako ko honau hingoá ʻoku ʻi he laʻipepá.
Fakaafeʻi ha niʻihi ʻo e kau akó ke vahevahe ʻa e potufolofola fakataukei fakatokāteline ne nau filí, niʻihi ʻo e ngaahi fehuʻi ne nau tohí, pea mo e ngaahi tali ne nau maʻu pe maʻu ʻe honau kaungāakó. Te ke lava foki ʻo fehuʻi ange pe ko e hā ʻoku tokoniʻi kinautolu ʻe he potufolofolá ke mahino fekauʻaki mo e Fakamoʻuí pe ko ʻEne ongoongoleleí.
Kapau ʻoku lahi e taimí (pe ʻi ha ʻaho kehe), fakakaukau ke fakaafeʻi e kau akó ke nau toe fai e ʻekitivitií ʻo fakaʻaongaʻi ha potufolofola fakataukei fakatokāteline ʻe taha.