Ko Hono Fakahā ‘o e ‘Ofa ki he Tamai Hēvaní mo Sīsū Kalaisí
ʻĪmisi
ko ha fefine ʻoku puke hake hono nimá ʻo lotu
ʻI he taimi ʻoku ongoʻi ai ʻe ha taha ʻoku ʻofaʻi pe ʻofa ʻi ha taha kehe, ʻoku faʻa liliu ʻenau ngaahi tōʻongá. Naʻe akoʻi ʻe Sione ʻe lava ke fakaʻaiʻai kitautolu ʻe heʻetau ʻofa ki he Tamai Hēvaní mo Sīsū Kalaisí ke tauhi ʻEna ngaahi fekaú. ʻOku fakataumuʻa ʻa e lēsoni ko ʻení ke tokoni ke mahino kiate koe ʻa e founga te ke lava ai ʻo fakahaaʻi ʻa e ʻofa ki he Tamai Hēvaní mo Sīsū Kalaisí ʻaki hono tauhi ʻa e ngaahi fekaú.
Fakaafeʻi e kau akó ke hoko ʻo hangē ange ko Sīsū Kalaisí. ʻE lava ke tokoni hono fakaafeʻi e kau akó ke fakahoko e ngaahi meʻa faingataʻá ke nau tupulaki mo hoko ai ʻo hangē ange ko e Tamai Hēvaní mo Sīsū Kalaisi. ʻI hono fakahoko e ngaahi fakaafé, fakaʻapaʻapaʻi ʻa e tauʻatāina ke filí mo fakahaaʻi ʻa e ʻofa ki he kau akó, neongo kapau ʻoku ʻikai ke nau tali ʻa e ngaahi fakaafé.
Teuteu ʻa e tokotaha akó: Fakaafeʻi e kau akó ke nau fakalaulauloto ki he ongo ʻoku nau maʻu fekauʻaki mo hono tauhi ʻo e ngaahi fekaú. Te nau lava foki ʻo ʻeke ki he kakai ʻoku nau ʻilo ʻa e meʻa ʻokú ne fakaʻaiʻai kinautolu ke tauhi e ngaahi fekaú.
Ngaahi ʻEkitivitī Ako ʻOku Ala Fakahokó
Maluʻi ʻofa ʻa e ʻOtuá
Huluʻi ʻa e foʻi vitiō ko ʻení, pe vahevahe ʻa e talanoá ki ha ngaahi konga ke lau leʻolahi ʻe he kau akó.
Naʻe fetaulaki ʻa ʻEletā Voni G. Kiisi (1960–2018) ʻo e Kau Fitungofulú lolotonga ʻene ʻi ha matātahi ʻi ʻAositelēliá mo ha kau fānifo ne nau fononga ki ai ʻi ha aʻusia laulōtaha ʻi he moʻuí. Ne nau lāunga fekauʻaki mo ha ngaahi pā fakangatangata ʻi he tahí, ʻo taʻofi ai kinautolu mei heʻenau lava ʻo fānifo ʻi he ngaahi peau lalahí.
Ke ʻiloʻi e meʻa naʻe hokó, sio ʻi he foʻi vitiō “ʻOku Monūʻia mo Fiefia ʻa Kinautolu ʻOku Tauhi e Ngaahi Fekau ʻa e ʻOtuá” (5:41) mei he taimi 0:00 ki he 2:34. ʻE lava ke maʻu ʻa e vitioó ni ʻi he ChurchofJesusChrist.org. Pe lau ʻa e lea ko ʻení.
ʻI he lahi ange e ʻita ʻa e kau fānifo ʻAmeliká, ne u fakatokangaʻi ha tokotaha fānifo ne ofi mai—ko ha tangata matuʻotuʻa ange pea mahino ko e taha pē mei heni. Naʻe hangē naʻá ne fakaʻau ke ʻitá ʻi heʻene fanongo ki he fakalalahi e lāunga fekauʻaki mo e paá.
Ne faifai peá ne tuʻu hake ʻo lue atu ki he kulupú. Ne ʻikai ke ne lea ka ne toʻo hake ha ongo meʻa fakaʻata mei heʻene kato āfeí ʻo ʻoange ki ha taha ʻo e kau fānifó peá ne tuhu ki he paá. Ne sio tahataha e kau fānifó ʻi he meʻa fakaʻatá. ʻI heʻene aʻu mai kiate aú, naʻá ku lava ʻo sio, ʻi he tokoni mai ʻa e meʻa fakaʻata lahí ki ha meʻa naʻe ʻikai ke u lava ʻo sio ki ai ki muʻa: ko ha ngaahi tala—ʻo ha fanga ʻanga lalahi ʻoku fafanga ofi ʻi he hakaú ʻi he tafaʻaki ʻe taha ʻo e paá.
Ne tuai-e-kemo e longomate hifo ʻa e kulupú. Ne faʻo ʻe he tangata fānifo matuʻotuʻá ʻa ʻene meʻa fakaʻatá peá ne tafoki ʻo ʻalu. ʻI heʻene fai iá, naʻá ne lea ʻaki ha meʻa he ʻikai toe ngalo ʻiate au: Naʻá ne pehē mai, “ʻOua te mou fuʻu fakaangaʻi e paá.” “Ko e meʻa pē ia ʻokú ne taʻofi hono keina kimoutolú.”
Ne fakafokifā e liliu ʻemau fakakaukaú ʻi heʻemau tuʻu he matātahi fakaʻofoʻofa ko iá. Ko ha pā ne hangē naʻe tuʻumaʻu mo fakapōpulá—ne hangē naʻá ne fakangatangata ʻa e fakalata mo e fiefia ʻo e fānifo ʻi he ngaahi peau lalahí—kuo hoko ia ko ha meʻa lelei ʻaupito. ʻI he toki mahino kiate kimautolu ʻa e fakatuʻutāmaki ʻoku toitoi mai ʻi lalo he fukahi vaí, kuo ʻomi ai ʻe he paá ha maluʻi, haoʻanga mo e nonga.
Ko e hā ha ngaahi tōʻonga fakakaukau ʻe niʻihi ʻe ala maʻu ʻe he kakaí fekauʻaki mo hono tauhi e ngaahi fekau ʻa e ʻOtuá?
Fakakaukau ke ke hiki ʻi hoʻo tohinoa akó ʻa hoʻo ngaahi tali ki he fehuʻi ko ‘ení.
ʻOku fēfē nai ʻeku ongo fekauʻaki mo e ngaahi fekau ʻa e ʻOtuá? Ko e hā ʻoku ou tauhi pe ʻikai tauhi ai kinautolú?
Ko hono tauhi e ngaahi fekau ʻa e ʻOtuá
ʻOku tau takitaha moʻona pē ha ngaahi ʻuhinga ʻokú ne takiekina ʻetau fili ke tauhi e ngaahi fekau ʻa e ʻOtuá. Lau ʻa e ngaahi veesi ko ʻení, ʻo kumi e meʻa naʻe akoʻi ʻe he ʻAposetolo ko Sioné te ne lava ʻo fakaʻaiʻai kitautolu ke tauhi kinautolú. Mahalo ʻe tokoni ke manatuʻi naʻe fai ʻe Sione ʻene ngaahi tohí ki he kakai tui naʻa nau fehangahangai mo ha ngaahi akonaki hala.
Fakakaukau ke fakaafeʻi e kau akó ke nau ngāue fakataha ke lau e ngaahi potufolofolá. ʻE lava ke takitaha lau ʻe he kau akó ha niʻihi ʻo e ngaahi potufolofolá pea nau fevahevaheʻaki ʻa e meʻa ne nau akó.
(Mahalo ʻe ʻaonga foki ke lau e ngaahi akonaki ʻa e Fakamoʻuí ʻi he Sione 14:15, 23–24.)
Ko e hā ha ngaahi moʻoni naʻá ke maʻu?
Mahalo ʻe ʻilo ʻe he kau akó ha ngaahi tefitoʻi moʻoni kehekehe. Fakakaukau ke fai ange ha ngaahi fehuʻi vakaiʻi hangē ko ʻení:
ʻE fakatupulaki fēfē nai ʻe he ʻilo ki he ngaahi moʻoni ko ʻení ha holi ʻa ha taha ke tauhi ʻa e ngaahi fekaú?
Naʻe akoʻi ʻe Sione ha ngaahi moʻoni kehekehe ʻi he ngaahi veesi ko ʻení. Mahalo ko e taha ʻo kinautolu kuó ke ʻiloʻí ko e lahi ange ʻetau ʻilo mo e ʻofa ki he Tamai Hēvaní mo Sīsū Kalaisí, ko e lahi ange ia ʻetau loto fiemālie ke tauhi ʻEna ngaahi fekaú (vakai, 1 Sione 1:5–7 ; 2:3–6 ; 2 Sione 1:6–9).
ʻO ka faingamālie, fakakaukau ke fakaʻaongaʻi e tekinolosiá ke liliu e ʻekitivitī ko ʻení. Hangē ko ʻení, ʻe lava ke faʻu ʻe he kau akó ha foʻi vitiō, ha tohi ʻi he mītia fakasōsialé, pe ko ha pōpoaki telefoni ke vahevahe ʻenau ngaahi talí. ʻE lava heni ke fakalahi ai ʻa e kau mai ʻa e kau akó pea mo lava ke aʻu ʻa e ngaahi pōpoaki ʻa e kau akó fekauʻaki mo e Tamai Hēvaní mo Sīsū Kalaisí ki ha kakai tokolahi ange.
Ko e meʻa ʻe taha, ʻe lava ke fakakaukauloto ʻa e kau akó ʻoku fie tokoni ʻenau faiako Lautohi Faka-Sāpaté ki he kau mēmipa ʻo ʻenau kalasí ke nau ongoʻi ʻoku ueʻi kinautolu ke tauhi e ngaahi fekaú. ʻOkú ne kole ki he kau akó ke nau fakalaulauloto ki he ngaahi fehuʻi ko ʻení mo teuteu ke vahevahe ʻenau ngaahi fakakaukaú ʻi he kalasí.
ʻI hono teuteu ʻe he kau akó ʻa e meʻa te nau lea ʻakí, ʻe lava foki ke nau fakakau ai ha ngaahi fakakaukau mei heʻenau teuteu ʻa e tokotaha akó.
Ko e hā ʻoku hoko ai hono tauhi e ngaahi fekaú ko ha founga ke fakahaaʻi ai e ʻofa ki he Tamai Hēvaní mo Sīsū Kalaisí?
Ko e hā ʻokú ke ʻilo fekauʻaki mo e Tamai Hēvaní mo Sīsū Kalaisi ʻokú ne fakaʻaiʻai koe ke tauhi ʻEna ngaahi fekaú? Ko e hā ʻoku fakaʻaiʻai ai koe ʻe heʻiloko iá?
Ko e hā kuó ke ako fekauʻaki mo Kinaua ʻi hoʻo tauhi ʻEna ngaahi fekaú?
Fakaafeʻi ha niʻihi ʻe loto fiemālie ke vahevahe e meʻa ne nau tohí. ʻE lava ke fakahoko ʻeni ko ha kalasi pe ʻi ha fanga kiʻi kulupu iiki. Hili e vahevahe ʻa e kau akó, fakakaukau ke fai ha ngaahi fehuʻi vakaiʻi, hangē ko e “ʻE tokoniʻi fēfē nai ʻe he meʻa naʻá ke vahevahé ha taha ke ne tauhi e ngaahi fekaú?”
Fakaafeʻi e kau akó ke nau fakakaukau ke vahevahe ʻenau ngaahi fakakaukaú mo ha taha mavahe mei he kalasí.
Te ke fakahaaʻi fēfē nai hoʻo ʻofa ki he Tamai Hēvaní?
Sio ki he fakatātā ko ʻení pea fakakaukau ki he meʻa ʻokú ke ʻilo fekauʻaki mo Sīsū Kalaisi mo e Tamai Hēvaní pea mo ʻEna ongo kiate koé. Mahalo te ke fiemaʻu foki ke fakakaukau ki he ongo ʻokú ke maʻu fekauʻaki mo Kinauá.
Fakaʻaliʻali e fakatātā ko ʻení.
ʻĪmisi
Ko ha tangata ʻoku tuʻu ʻo fāʻofua kia Kalaisi hili hono fakamoʻui iá.
Neongo ʻe ngali faingataʻa ke fakahaaʻi ʻetau ʻofa ki he Tamai Hēvaní mo Sīsū Kalaisi koeʻuhí ʻoku ʻikai ke Na ʻi heni fakaesino mo kitautolu, ka te tau lava ʻo fakahaaʻi ʻetau ʻofa kiate Kinauá ʻaki hono tauhi ʻEna ngaahi fekaú. Tuku ha taimi ke ke fakalaulauloto ai ki he meʻa ʻokú ke fie manatuʻi pe fakahoko koeʻuhí ko e lēsoni ko ʻení. Ko ha ngaahi founga ʻeni ʻe lava ke ke fakahoko ai ia:
Hiki ha founga ʻe taha te ke fie ʻilo mo ʻofa lahi ange ai ʻi he Tamai Hēvaní mo Sīsū Kalaisí.
Fakakaukau ki he ngaahi fekau ʻokú ke lolotonga tauhí mo e ʻuhinga ʻokú ke tauhi ai kinautolú. Fakakaukau pe ʻoku fakaʻaiʻai koe ʻe he ʻofa ki he Tamai Hēvaní mo Sīsū Kalaisí pea fakakaukau foki pe te ke lava ʻo fakalakalaka ʻi he tafaʻaki ko iá.
Feinga ke ʻiloʻi ha fekau ʻe taha pe lahi ange te ke lava ʻo tauhi kakato ange ke fakahaaʻi hoʻo ʻofa ki he Tamai Hēvaní mo Sīsū Kalaisí. Faʻu ha palani ki he founga te ke tauhi kakato ange ai ʻa e ngaahi fekau ko ʻení.
Poupouʻi e kau akó ke nau ngāueʻi ʻa e ngaahi ongo mo e ngaahi fakakaukau kuo nau maʻú koeʻuhí ke nau lava ʻo fakahaaʻi ʻenau ʻofa ki he Tamai Hēvaní mo Sīsū Kalaisi. Fai hoʻo fakamoʻoni ki he ngaahi tefitoʻi moʻoni naʻe akoʻi ʻi he lēsoni ko ʻení.
Fakamatala Fakamahinó mo e Puipuituʻá
Ko e hā ha founga ʻoku hoko ai e ngaahi fekaú ko ha founga ʻoku fakahaaʻi ai e ʻofa [ʻa e ʻOtuá] kiate kitautolú?
Naʻe pehē ʻe Palesiteni Tōmasi S. Monisoni (1927–2018):
ʻĪmisi
Laʻitā fakaʻōfisiale ʻo Palesiteni Tōmasi S. Monisoni, 2008
ʻOku ʻikai ʻomi ʻa e ngaahi fekau ʻa e ʻOtuá ke fakakinaʻi kitautolu pe hoko ko ha fakatuta ki heʻetau fiefiá. Ko hono fehangahangaí ia. ʻOku ʻafioʻi ʻe Ia naʻá Ne fakatupu mo ʻofa haohaoa ʻiate kitautolú ʻa ʻetau fiemaʻu ke moʻui ka tau lava ʻo maʻu ʻa e fiefia lahi taha [ʻe ala lava ke tau maʻú]. Kuó ne foaki mai ai ha ngaahi fakahinohino ʻa ia, kapau te tau muimui ki ai, te tau hao ʻi he fononga fakatuʻutāmaki fakamatelié ni. …
… ʻOku mahino kiate Ia ko e taimi ʻoku tau tauhi ai ʻa e ngaahi fekaú, ʻe fiefia ange ʻetau moʻuí, lavameʻa lahi ange, pea siʻi ange [e] palopalemá. ʻE faingofua ange hotau ngaahi ʻahiʻahí pea faingofua ange ʻa e palopalemá ke fuesia, pea te tau maʻu ʻEne ngaahi tāpuaki kuo talaʻofa maí.
ʻOku fakahaaʻi fēfē nai ʻeku ʻofa ki he ʻOtuá ʻi hono tauhi ʻo e ngaahi fekaú?
Naʻe pehē ʻe ʻEletā Voni G. Kiisi (1960–2018) ʻo e Kau Fitungofulú:
ʻĪmisi
Tā Fakaʻofisiale ʻo ʻEletā Voni G. Kītisi. Faitaaʻi ʻi Māʻasi 2017.
ʻOku tau fakahaaʻi ʻetau ʻofa ki he ʻOtuá—mo ʻetau tui kiate Iá—ʻi heʻetau fai hotau lelei tahá he ʻaho kotoa pē ke muimui ʻi he hala kuó Ne tofa maʻatautolú pea tauhi e ngaahi fekau kuó Ne ʻomi kiate kitautolú. ʻOku tau fakahaaʻi e tui mo e ʻofa ko iá ʻi he ngaahi tūkunga ʻoku ʻikai mahino kakato ai kiate kitautolu ʻa e ʻuhinga ʻo e ngaahi fekau ʻa e ʻOtuá pe hala tukupau ʻokú Ne folofola mai ke tau fou aí.
Naʻe fakamatala ʻa Palesiteni Tieta F. ʻUkitofa, ʻi heʻene hoko ko ha mēmipa ʻo e Kau Palesitenisī ʻUluakí he taimi ko iá ʻo pehē:
ʻĪmisi
Laʻitā fakaʻofisiale ʻo ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá, 2006. Uiuiʻi ko e Tokoni Ua ʻi he Kau Palesitenisī ʻUluakí, ʻaho 3 ʻo Fēpueli 2008. Laʻitā fakaʻofisiale ʻi he 2008 ʻo fetongi e tā naʻe faitaaʻi ʻi he 2004.
ʻOku tau fakatupulaki ʻetau ʻofa ki heʻetau Tamai Hēvaní mo fakahaaʻi e ʻofa ko iá ʻaki hono fakafenāpasi ʻetau fakakaukaú mo e tōʻongá mo e folofola ʻa e ʻOtuá. ʻOku tataki mo poupouʻi kitautolu ʻe Heʻene ʻofa haohaoá ke tau hoko ʻo haohaoa mo māʻoniʻoni ange. ʻOkú ne ueʻi kitautolu ke tau ʻaʻeva ʻi he māʻoniʻoni—ʻo ʻikai ʻi he manavahē pe haʻisia ka ʻi he holi fakamātoato ke hoko ʻo hangē pē ko Iá koeʻuhí he ʻoku tau ʻofa ʻiate Ia.
3 Sione 1:1–4 . ʻOku tau maʻu ʻa e fiefiá ʻi heʻetau tokoni ki he niʻihi kehé ke nau “ʻaʻeva … ʻi he moʻoní”
Kapau ʻe ʻaonga ki he kau akó ʻenau ako fekauʻaki mo hono vahevahe e ongoongoleleí mo e niʻihi kehé, te nau lava ʻo lau ʻa e 3 Sione 1:1–4fekauʻaki mo e ngaahi ongo ʻa Sioné ʻi heʻene tokoniʻi e niʻihi kehé ke nau haʻu ki he Fakamoʻuí. Te nau lava leva ʻo fakafehokotaki ʻa e ngaahi veesi ko ʻení mo e Tokāteline mo e Ngaahi Fuakava 18:15–16.
Kole ki he kau akó ke nau fakakaukau ki ha kakai ʻoku nau ʻiloʻi te nau lava ʻo fakaafeʻi ke toe ofi ange ki he Fakamoʻuí. Fakaʻaiʻai kinautolu ke nau faʻu ha palani ke fakaafeʻi e kakai ko iá.
