Doktrinal nga Kahanas: Mga Taga-Efeso 2:19–20

Ang Simbahan Gitukod Diha ni Jesukristo ug sa Iyang Apostoles ug Mga Propeta

Imahe

All the members of the First Presidency and the Quorum of the Twelve Apostles are seated or standing with the Christus Statue and statues of the Original Twelve at the Visitors’ Center in Rome, Italy. Front Left to Right: Dieter F. Uchtdorf, Jeffrey R. Holland, M. Russell Ballard, Dallin H. Oaks, Russell M. Nelson, Henry B. Eyring, David A. Bednar, Quentin L. Cook, D. Todd Christofferson, Gary E. Stevenson, Ronald A. Rasband, Neil L. Andersen, Dale G. Renlund, Gerrit W. Gong, Ulisses Soares

Sa imong pagtuon sa Mga Taga-Efeso 2, imong nakat-onan nga ang Simbahan ni Jesukristo gitukod sa pundasyon sa apostoles ug mga propeta ug nga si Jesukristo mao ang ulohang bato sa pamag-ang. Kini nga leksiyon gituyo aron madugangan ang imong kahanas niini nga mga pagtulun-an diha sa imong pagsag-ulo sa pakisayran ug mahinungdanong hugpong sa pulong sa kasulatan alang sa Mga Taga-Efeso 2:19–20, mapasabot ang doktrina, ug magamit ang doktrina ug ang mga baroganan sa pag-angkon og espirituhanong kahibalo diha sa tinuod nga sitwasyon sa kinabuhi.

Pagpangandam sa estudyante: Mahimong sultihan ang mga estudyante sa senaryo sa pagbansay sa paggamit [practice application] gikan niini nga leksiyon ug dapita sila sa pagpamalandong unsaon nila paggamit sa mga baroganan sa pag-angkon og espirituhanong kahibalo aron matabangan ang ilang higala.

Posible nga mga Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas nga itudlo human sa leksiyon sa “Mga Taga-Efeso 2,” nga mao ang pangkonteksto nga leksiyon para sa tudling sa doktrinal nga kahanas sa Mga Taga-Efeso 2:19–20 . Kon kinahanglang ibalhin kini nga leksiyon sa tudling sa doktrinal nga kahanas ngadto sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Imemorya ug ipasabot

Imahe

Line drawing of a meetinghouse.

Aron matabangan kamo nga masag-ulo kini nga pakisayran sa doktrinal nga kahanas ug sa mahinungdanong hugpong sa pulong sa kasulatan, isulat ang mosunod sa labing menos tulo ka higayon diha sa imong journal sa pagtuon: “Mga Taga-Efeso 2:19-20. Ang Simbahan ‘gitukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.’”

Mahimo nimong isulat ang hugpong sa pulong sa paagi nga kini makahulagway niini nga kamatuoran. Pananglitan, mahimo kang magdrowing og usa ka rektanggulo palibot sa hugpong sa pulong aron pagsimbolo sa usa ka pundasyon ug pagdrowing og usa ka simbahan sa ibabaw niini. O, kon nagdrowing ka og usa ka ehemplo niini nga pundasyon sa miaging leksiyon, mahimo nimong isulat ang mahinungdanong hugpong sa pulong diha o duol niana nga drowing.

A. Basaha ang Mga Taga-Efeso 2:19–20 , ug pamalandongi ang mensahe nga naglangkob niini.

B. Paghunahuna og usa ka pangutana nga lagmit anaa sa usa ka tawo mahitungod sa mga propeta ug apostoles nga ang Mga Taga-Efeso 2:19–20 mahimong makatabang pagtubag. Pipila ka mga pananglit mamahimong “Nganong ang inyong simbahan adunay mga propeta ug apostoles?” “Unsa ang gitudlo sa mga kasulatan mahitungod sa mga propeta ug apostoles?” o “Unsa ang relasyon taliwala sa Manluluwas ug mga propeta ug apostoles?” Isulat ang imong pangutana.

C. Gamit ang Mga Taga-Efeso 2:19–20 , isulat unsa ang imong masulti agig tubag sa maong pangutana.

Inay nga dapiton ang mga estudyante nga mosulat sa ilang mga tubag sa lakang C, mahimong sultihan sila nga mobuhat nga magkapares ug tubagon ang mga pangutana sa usag usa. Paminaw sa ilang mga tubag ug timbang-timbanga unsa ka maayo ang pagsabot sa mga estudyante. Kon gikinahanglan, irebyo ang Mga Taga-Efeso 2:19–20 kauban ang mga estudyante ug bisan unsang materyal gikan sa “Mga Taga-Efeso 2” nga leksiyon.

Bansaya ang paggamit

Panahon sa mosunod nga kalihokan, timbang-timbanga ang kahibalo sa mga estudyante sa mga baroganan sa pag-angkon og espirituhanong kahibalo, ug tabangi sila kon gikinahanglan.

Ang mosunod nga kalihokan makatabang kanimo nga marebyo ang mga baroganan sa pag-angkon og espirituhanong kahibalo. Ipares ang kapahayag diha sa tukma nga baroganan sa pag-angkon og espirituhanong kahibalo. Kon gikinahanglan, gamita ang mga parapo 5–12 sa “Pag-angkon og Espirituhanong Kahibalo” nga bahin sa Mahinungdanon nga Dokumento sa Doktrinal nga Kahanas (2022) aron makatabang kanimo.  

1. Ang sinserong mga tigpangita sa kamatuoran kinahanglang magmabinantayon sa dili kasaligang mga tinubdan sa impormasyon. 

2. Samtang magmatinud-anon kita sa mga kamatuoran ug kahayag nga nadawat na nato, makadawat pa kita og mas daghan.

3. Samtang padayon natong gipalig-on ang atong pagsalig sa atong Langitnong Amahan ug sa Iyang plano sa kaluwasan, mas klaro natong makita ang mga problema. 

a. Molihok inubanan sa hugot nga pagtuo.

b. Mosusi sa mga konsepto ug mga pangutana inubanan sa mahangtorong panglantaw.

c. Magtinguha og dugang nga panabot pinaagi sa balaanong gitudlo nga mga tinubdan.

Pagdapit og pipila ka mga estudyante nga mopaambit og usa sa mga pares nga ilang natukma ug ipasabot nganong ang maong pamahayag nga ilang gipili makatabang kanila sa pag-angkon og espirituhanong kahibalo.

Handurawa nga ang imong suod nga higalang si Estelle mibati og pakigsumpaki. Aduna siyay pagpamatuod sa mga propeta ug apostoles, apan misupak siya sa usa ka kasamtangang pagtulun-an sa Simbahan. Sa pagkatinuod, aduna siyay lig-on nga pagbati batok niini. Nangayo siya nimo og tabang aron masayod unsay buhaton. Niana nga higayona wala ka masayod unsay isulti, apan midesisyon ka nga mosunod sa mga baroganan sa pag-angkon og espirituhanong kahibalo nga imong gigamit sa seminary aron pagpangandam sa pagtabang sa imong higala.

Gamita ang mosunod nga tsart aron pamalandongan ang imong kaugalingong mga hunahuna ug mga pagbati mahitungod sa mga propeta ug apostoles ug sa unsang paagi nimo mahimong matabangan si Estelle.

Mahimong isulat ang mosunod nga kasayuran sa pisara o pag-andam og mga pangutana sa usa ka piraso sa papel aron magamit sa mga estudyante.

Sa unsang paagi ako nakakat-on og pagsalig ug pagsunod sa apostoles ug mga propeta?	Sa unsa kaha nga paagi ako makatabang sa akong higala?
Unsa nga mga kasinatian ang akong naangkon dihang milihok ako sa hugot nga pagtuo kang Jesukristo aron mosunod sa Iyang apostoles ug mga propeta? Unsang kasinatian ang mahimong makatabang nga ipaambit kang Estelle?	Unsang mga pangutana ang mahimo nakong ipangutana kang Estelle aron matabangan siya nga ikonsiderar kon sa unsang paagi siya gustong palihokon nga may hugot nga pagtuo sa Ginoo?
Unsa ang nahibaloan na nako mahitungod sa Langitnong Amahan, Iyang plano, ug giunsa Niya pakigsulti sa Iyang mga anak nga mahimong makatabang ni Estelle niini nga sitwasyon?	Unsa nga mga pangutana ang akong ikapangutana ni Estelle aron matabangan siya nga makita ang iyang kabalaka uban sa mahangtorong panglantaw?
Unsa nga balaanong gitudlo nga mga tinubdan ang nakatabang kanako nga mosalig sa apostoles ug mga propeta? Sa unsang paagi sila nakatabang kanako?	Unsang balaanong gitudlo nga mga tinubdan ang akong irekomendar kang Estelle aron iyang dangpan?

Kon nagkinahanglan og tabang ang mga estudyante sa mga pangutana aron matabangan si Estelle nga makita ang iyang kabalaka nga adunay mahangtorong panglantaw, mahimong gamiton ang mosunod nga mga pananglitan:

Unsa ang imong nahibaloan na mahitungod sa tahas sa mga propeta ug apostoles sa plano sa Langitnong Amahan alang sa kaluwasan?
Unsa ang imong mga kabalaka mahitungod niining maong pagtulun-an? Unsa nga mga baroganan sa ebanghelyo ni Jesukristo ang mahimong makatabang kanimo aron mas makasabot niini?
Sa unsang paagi kaha nga ang desisyon nga mosunod sa mga propeta ug apostoles, o ang dili pagsunod kanila, makaapekto kanimo sa paglabay sa panahon? Unsa kaha ang epekto niini sa imong relasyon sa imong Langitnong Amahan?

Kon ang mga estudyante nagkinahanglan og tabang sa pagrekomendar og balaanong gitudlo nga mga tinubdan aron tun-an ni Estelle, mahimong dapiton sila sa pagbasa sa Doktrina ug mga Pakigsaad 21:4–6 ug 1 Nephi 2:11, 16, 19 .

Dapita ang mga estudyante sa pagdrama-drama unsa lagmit ang ilang isulti kang Estelle kauban ang pares o diha sa gagmayng grupo. Mahimo usab magdrowing ang mga estudyante og usa ka komik istrip nga adunay mga istik nga porma ug mga speech bubble.

Mahimong ipangutana ang follow-up nga mga pangutana sama sa “Sa unsang mga paagi kamo mibati og pagsalig sa paggamit sa mga baroganan sa pag-angkon og kahibalo aron makatabang sa uban? Ngano man?” “Sa unsang mga dapita kamo ganahan mangayo og dugang tabang o pagbansay?”

Dayega ang mga estudyante sa mga paagi nga sila maayo nga migamit sa mga baroganan sa pag-angkon og espirituhanong kahibalo ug sa mga paagi nga sila naglambo.

Mahimong mopaambit og usa ka personal nga kasinatian o pagpamatuod aron pagdasig sa mga estudyante.

Rebyo sa doktrinal nga kahanas

Paggamit og usa ka kalihokan sama sa mosunod aron pagrebyo niini nga tudling sa doktrinal nga kahanas sa usa ka umaabot nga leksiyon.

Sa pisara, pagdrowing og usa ka yanong outline sa usa ka building sa simbahan nga adunay rektanggulo ubos niini aron pagrepresentar sa pundasyon. Sulod niining rektanggulo, isulat ang mosunod: Mga Taga-Efeso _:19–20, Ang Simbahan “gitukod ibabaw sa __________________ nga mao ang _____________ ug ____________, nga niini si Jesukristo mao ang ulohang bato sa ___________ ________.” Dapita ang mga estudyante nga sulatan ang mga blangko. Humna kini nga rebyo pinaagi sa pagdapit sa mga estudyante sa paghubit [recite] sa pakisayran ug sa mahinungdanong hugpong sa pulong sa kasulatan sa makadaghan nga higayon, nga papason ang pipila ka mga pulong sa matag higayon.

Dugang nga Kalihokan sa Pagkat-on

Ikapuli nga senaryo

Ikonsiderar ang paggamit sa mosunod nga senaryo agig puli sa usa nga anaa sa leksiyon:

Handurawa nga ang imong suod nga higalang si Estelle ug ang iyang pamilya nagtuo gihapon ni Jesukristo ug sa Biblia apan naghunahuna sila sa pagbiya sa Simbahan tungod kay wala sila mouyon sa pipila ka mga butang nga gitudlo sa kasamtangan sa mga propeta ug apostoles. Nangayo siya nimo og tabang aron masayod unsay buhaton.