Young woman sitting in home reading open scriptures that have been underlined. (horiz)
Unsa ka kamasaligon sa imong abilidad sa pagpangita og kamatuoran diha sa mga kasulatan? Ang mga propeta nagtudlo sa mga kamatuoran nga nagagikan sa Langitnong Amahan alang sa atong kaayohan. Pananglitan, si Pablo nitudlo sa mga Santos sa Efeso og mga kamatuoran mahitungod sa pagbuntog sa kalibotan ug pagkahimong mas susama kang Jesukristo. Kini nga leksiyon gituyo aron tabangan ka nga makat-on unsaon pagpangita og mga kamatuoran gikan sa mga kasulatan nga makatabang kanimo sa imong kinabuhi ug magdala kanimo paduol sa Manluluwas.
Pagbansay sa mga kahanas sa pagtuon sa kasulatan. Makabenepisyo ang mga estudyante gikan sa pagbansay sa mga kahanas sa pagtuon sa kasulatan, sama sa pagtandi sa mga kasulatan sa ilang kinabuhi, paggamit sa mga tabang sa pagtuon, pag-ila sa mga tema ug mga sumbanan, pagsabot sa mga simbolo, pagpangita og mga kapanguhaan sa kinatibuk-ang komperensiya, pagbutang og mugbong pahinumdom [annotate] sa mga kasulatan, paghimo og mga lista, pagsuma [summarize] sa unsay ilang gibasa, ug pagpangita ug paggamit sa mga cross-reference, paghatag og kahulogan sa lisod nga mga pulong, ug uban pa.
Pagpangandam sa estudyante: Dapita ang mga estudyante sa pagtuon sa mga kasulatan taliwala sa karon ug sa sunod nga klase nga mangita sa mga kamatuoran nga gitudlo sa mga kasulatan. Dapita sila sa pagpamalandong sa lainlaing mga paagi nga ilang maila kini nga mga kamatuoran.
Posible nga mga Kalihokan sa Pagkat-on
Pagpangita og bili
Basaha ang sugilanon ug paghunahuna mahitungod sa bisan unsa nga espirituhanong mga leksiyon nga imong nakat-onan gikan niini.
Imahe
Official portrait of President M. Russell Ballard of the Quorum of the Twelve Apostles, 2004.
Usahay sama kita sa batan-ong negosyante gikan sa Boston, kinsa niadtong 1849, sigon sa istorya, naagni sa pagpanguykoy og bulawan sa California. Gibaligya niya ang tanan niyang mga kabtangan aron sa pagpangita sa iyang swerte didto sa mga sapa sa California, nga giingon nga puno sa mga tibuok nga bulawan nga sa kadako ang usa ka tawo maglisod sa pag-alsa niini.
Human sa adlawng tanan, ang batan-on mituslob sa iyang ayagan diha sa sapa ug walay nakuha. Ang bugtong niya nga ganti mao ra ang nagtipun-og nga mga bato. Sa kahiubos ug kapurdoy, andam na siyang mohunong hangtod nga usa ka adlaw usa ka tigulang, hanas nga tigsuhid miingon kaniya, “Daghan na gayod nang mga batoha ang natigom nimo, dong.”
Ang batan-ong lalaki mitubag, “Wala may bulawan dinhi. Mopauli na lang ko.”
Naglakaw ibabaw sa nagtipun-og nga mga bato, ang tigulang nga tigsuhid miingon “O, tinuod gayod nga adunay bulawan dinhi. Kinahanglan lang nga makamao ka asa mangita niini.” Mipunit siya og duha ka bato ug gipakang kini. Usa sa mga bato nabuak, nagpakita og pipila ka pinong tipaka sa bulawan nga migilak sa hayag sa adlaw.
Nakamatikod sa nagbugol nga bag nga gihigot sa hawak sa tigsuhid, ang batan-on miingon, “Nangita ko og mga tibuok sama sa naa sa imong bag, dili kay pinong tipaka.”
Ang tigulang nga tigsuhid mitunol sa iyang bag ngadto sa batan-on, kinsa mitan-aw sa sulod, naglaom nga makakita og daghang tibuok nga bulawan. Natingala siya nga makita ang bag nga puno sa liboan ka pinong tipaka sa bulawan.
Ang tigulang nga tigsuhid miingon, “Dong, akong nakita nga busy kaayo ka nga nagpangita og dagkong buok nga bulawan nga wala na hinoon nimo masudli ang imong bag niining bililhon nga mga pinong tipaka sa bulawan. Ang mapailubong pagtigum niining pinong mga tipaka nagpaadunahan gayod kanako.”
Sa unsang paagiha kini nga sugilanon adunay koneksiyon sa pagpangita og mga kamatuoran sa mga kasulatan?
Basaha ang mosunod nga mga pamahayag, ug sukda gikan sa usa hangtod sa lima unsa ka tinuod kini sila alang kanimo (usa = dili gayod matinuod alang kanako; lima = kanunay nga tinuod alang kanako)__ Ako masaligon sa akong abilidad sa pagpangita og mahangtorong mga kamatuoran sa mga kasulatan inubanan sa panabang sa Espiritu Santo.
__ Ang pagpangita og mga kamatuoran sa mga kasulatan usa ka panalangin sa akong kinabuhi ug nagtabang kanako nga mobati og kaduol ngadto sa Langitnong Amahan ug kang Jesukristo.
Mahimong dapiton ang mga estudyante nga nakakompleto sa pagpangandam sa estudyante nga kalihokan aron mopaambit sa ilang mga kasinatian.
Pagpangita og mga kamatuoran diha sa mga kasulatan
Pipila ka mga kamatuoran sa mga kasulatan ang mas lisod pangitaon kaysa sa uban. Pagtinguha sa panabang sa Langitnong Amahan pinaagi sa Espiritu Santo aron tabangan ka nga maila ang mga kamatuoran sa mensahe ni Pablo ngadto sa mga Santos sa Efeso. Ang Espiritu Santo motabang kanimo pinaagi sa pagpamatuod kanimo niini nga mga kamatuoran (tan-awa ang Moroni 10:5 ; Juan 16:13).
Kini nga bahin gituyo nga mahimong usa ka ehemplo aron tabangan ang mga estudyante nga makakita kon unsaon pag-ila sa mga kamatuoran sa mga bersikulo sa kasulatan. Mahimong gamiton ang lain pang mga kamatuoran gikan sa Mga Taga-Efeso 2–5 kon sila mahimong labing makatabang alang sa mga estudyante.
Kini nga bidyo anaa sa ChurchofJesusChrist.org.
Dapita ang mga estudyante nga mopaambit kon giunsa nila pag-ila sa mga kamatuoran sa kasulatan.
Samtang si Pablo usa ka binilanggo ubos sa house arrest sa Roma, sila misulat ngadto sa mga Taga-Efeso aron pagdasig kanila ug tambagan sila mahitungod sa kon unsaon pagpadayon sa pagpahiduol kang Jesukristo ug unsaon pagbuntog sa espirituhanong mga pag-atake sa daotan. Pagbansay sa pag-ila sa mga kamatuoran gikan sa unsa ang gipaambit ni Pablo ngadto niining mga Santos.
Ang mosunod mao ang usa ka paagi nga imong mapangita ang mga mahangtorong mga kamatuoran diha sa imong pagtuon sa mga kasulatan. Basaha ang Mga Taga-Efeso 2:4–10 , ug buhata ang mosunod nga mga lakang:
Mahimong isulat ang mosunod nga mga lakang sa pisara aron makadangop ang mga estudyante kanila panahon sa leksiyon.
Pangita og mga pulong, mga hugpong sa mga pulong, o mga bersikulo nga daw labing importante kaayo. Ikonsiderar ang pagmarka niini diha sa imong mga kasulatan.
Sumadaha [summarize] ang pinaka-unod nga ideya niining mga pulong, mga hugpong sa mga pulong, o mga bersikulo. (Pananglitan, mahimo ba nimong sumadahon ang unsa ang gisulti ni Pablo mahitungod sa grasya diha sa bersikulo 8 ?)
Pormaha unsa ang imong nakat-onan ngadto sa usa ka pamahayag sa kamatuoran nga imong magamit sa imong kinabuhi.
Unsa ang usa ka kamatuoran nga imong nakaplagan? Sa unsang paagi nimo naila kana nga gugma?
Hangyoa ang pipila ka mga estudyante sa pagpaambit. Dayega sila alang sa ilang mga paningkamot. Pipila ka posibleng mga kamatuoran naglakip sa mosunod: Ang Dios maluloy-on ug nahigugma kanato (tan-awa ang Mga Taga-Efeso 2:4); diha sa atong pagbansay og hugot nga pagtuo kang Jesukristo, kita naluwas pinaagi sa Iyang grasya (tan-awa ang Mga Taga-Efeso 2:5, 8); ang atong mga buhat lamang dili igo aron muluwas kanato (tan-awa ang Mga Taga-Efeso 2:8–9). Samtang mopaambit ang mga estudyante, mahimong mag-follow up og pangutana sama sa mosunod:
Sa unsang paagi kining kamatuoran makatabang kanimo nga mabati ang gugma sa Langitnong Amahan ug ni Jesukristo alang kanimo o matabangan ka nga mahimong mas susama Kanila?
Sa unsang paagi nimo nagamit o sa unsang paagi nimo magamit kini nga kamatuoran sa imong kinabuhi?
Pagbansay sa pag-ila sa mga kamatuoran
Lagmit makatabang ang pagtugot sa mga estudyante nga mangita sa kamatuoran nga mag tinagsa. Dayon mahimo silang mangita og laing estudyante sa klase nga nagtuon sa parehong tudling ug itandi ang mga kamatuoran nga ilang nakaplagan sa usag usa.
Gamita ang mga lakang nga nalista sa unahan. Pagpili og usa o duha sa mosunod nga mga set sa mga bersikulo, ug pangita og mahangtorong mga kamatuoran diha kanila.
Mga Taga-Efeso 4:20–32 , lakip na ang Hubad ni Joseph Smith sa bersikulo 26 sa Giya ngadto sa mga Kasulatan (Mahimong makatabang ang pagkasayod nga ang “daang pagkatawo” niini nga mga bersikulo nagsimbolo sa karaang mga paagi sa pagpakasala ug nga ang “bag-ong tawo” nagsimbolo sa pagpuyo og usa ka matarong nga kinabuhi pinaagi ni Jesukristo.)
Pagpili og usa sa mga kamatuoran nga imong nakaplagan, ug pamalandongi sa unsang paagi kini makatabang kanimo aron mabati ang gugma sa Langitnong Amahan ug ni Jesukristo alang kanimo o makatabang kanimo nga mahimong mas susama Kanila.
Gamit ang mga kapanguhaan nga anaa kanimo (papel, de kolor nga mga lapis, digital nga mga tool, ug uban pa), pagmugna og usa ka poster nga mahimong ilakip sa For the Strength of Youth nga magasin. Ilakip ang mosunod sa imong poster:
Ang baroganan nga imong naila ug ang bersikulo sa kasulatan o mga bersikulo diin nimo kini nakit-an
Usa ka yanong larawan o drowing nga makatabang sa mga mobasa nga makasabot sa kamatuoran o maghulagway kon unsaon sa usa ka tawo paggamit niini nga kamatuoran sa ilang kinabuhi
Mahimong magpakita og pipila ka mga pananglitan sa mga poster gikan sa ChurchofJesusChrist.org.
Dapita ang mga estudyante sa pagpaambit sa ilang mga poster ug ipasabot kini. Mahimong mangutana og follow up nga mga pangutana sama sa mosunod: “Giunsa ninyo pagpangita niini nga kamatuoran?” “Sa unsang paagi kini nakatabang kaninyo nga mabati ang gugma sa Langitnong Amahan ug ni Jesukristo alang ninyo?” “Sa unsang paagi ang Ginoo mipanalangin kaninyo diha sa inyong pagpaningkamot pagpuyo niini nga kamatuoran?”
Pagpamalandong sa pagpangita og mga kamatuoran
Paghunahuna mahitungod sa imong kasinatian sa pagpangita sa mahangtorong mga kamatuoran diha sa mga kasulatan.
Sa unsang mga paagi nimo nabati nga nagmalamposon ka?
Unsa ang lisod?
Sa unsang paagi nga ang pagpangita sa mga kamatuoran nakatabang kanimo aron makita ang gugma sa Langitnong Amahan alang kanimo?
Sa unsang paagi nimo magamit ang unsa ang imong nakat-onan karon sa imong pagtuon sa kasulatan sa personal o sa pamilya?
Samtang nag-alagad isip usa ka miyembro sa Unang Kapangulohan, si Presidente Dieter F. Uchtdorf naghatag og kahulogan sa grasya sa Dios isip “ang balaang panabang ug gasa sa kalig-on pinaagi diin kita nagtubo gikan sa masalaypon ug may kinutubang mga tawo nga kita karon mao ngadto sa gihimaya nga mga tawo sa ‘kamatuoran ug kahayag, hangtod [kita] pagahimayaon diha sa kamatuoran ug [masayod] sa tanan nga mga butang’ [ Doktrina ug mga Pakigsaad 93:28 ]” (“Ang Gasa sa Grasya,” Liahona, Mayo 2015, 107). Alang sa dugang nga kasayoran mahitungod sa grasya, mahimong basahon ang kompletong pakigpulong, anaa sa ChurchofJesusChrist.org.
Mga Taga-Efeso 4:22 . Unsay buot ipasabot sa “hukasa … ang daang pagkatawo”?
Si Pablo nagtudlo nga kon kita mopili sa pagdawat sa ordinansa sa pagbunyag, kita nakigsaad nga tapuson ang atong karaan nga mga paagi (o “[hukason] … ang daang pagkatawo” [ Mga Taga-Efeso 4:22 ]) ug sugdan ang usa ka bag-ong kinabuhi isip mga sumusunod ni Jesukristo (tan-awa ang Mga Taga-Roma 6:1–6 ; Doktrina ug mga Pakigsaad 20:37). Kini naglakip sa pagbiya sa atong mga sala ug bisan unsa nga makabalda kanato sa pagpahiduol ngadto sa Langitnong Amahan. Dili nato mahimo kini nga proseso sa atong kaugalingon lang. Kini nahitabo lamang tungod ni Jesukristo ug sa Iyang Pag-ula ug ang makabalaan nga impluwensiya sa Espiritu Santo.
Dugang nga mga Kalihokan sa Pagkat-on
Mas lawom pa nga pagsabot sa kamatuoran
Human ang mga estudyante makaila og usa ka kamatuoran gikan sa mga Taga-Efeso, mahimo silang dapiton nga mas palawman pa ang ilang pagsabot sa kamatuoran. Mahimo silang mogamit sa mga kapanguhaan sa kasulatan nga, Gospel Library nga app, o lain pang mga kapanguhaan nga kapangitaan sa mga mahinungdanong mga pulong. Mahimo dayon silang dapiton sa pagpaambit unsa ang ilang nakat-onan mahitungod sa mga kamatuoran ug unsaon nila paglakip sa mga kamatuoran ngadto sa ilang mga kinabuhi.
Mga panabot sa Basahon ni Mormon sa grasya ni Jesukristo
Kon makatabang sa mga estudyante ang paghisgot sa grasya ni Jesukristo inay sa pagpangita og mga baroganan diha sa mga kasulatan, dapita sila nga magtuon sa Mga Taga-Efeso 2:1–12 , itandi kon unsa kaha ang ilang kinabuhi kon wala ang grasya ni Jesukristo (tan-awa ang mga bersikulo 1–3) ngadto sa unsa kaha ang ilang kinabuhi kon anaa ang Iyang grasya (tan-awa ang mga bersikulo 4–8). Mahimo dayon nilang matun-an ang mga tudling gikan sa Basahon ni Mormon nga nagtudlo bahin sa grasya sa Manluluwas (tan-awa sa 2 Nephi 10:24–25 ; Jacob 4:6–7 ; Helaman 12:24 ; Ether 12:27 ; Moroni 10:32–33), ilhon ang ilang kaugalingong panginahanglan alang sa grasya sa Manluluwas, ug magbuhat og plano kon unsaon nila pagtinguha sa Iyang grasya nga mas kanunay.
