ចំណេះចំណានខាងគោលលទ្ធិ ៖ លូកា ២:១០–១២

ព្រះយេស៊ូវគ្រីស្ទបានប្រសូតមកជាព្រះអង្គសង្រ្គោះ និងជាព្រះអម្ចាស់

នៅក្នុងមេរៀនមុន អ្នកបានសិក្សាទីបន្ទាល់របស់ទេវតាដល់ពួកអ្នកគង្វាលថា ព្រះយេស៊ូវគ្រីស្ទគឺជាព្រះរាជបុត្រានៃព្រះ និងជាព្រះអង្គសង្គ្រោះនៃពិភពលោក ( សូមមើល លូកា ២:១០–១២ ) ។ មេរៀននេះនឹងផ្តល់ឱកាសឲ្យអ្នកបង្ហាញការយល់ដឹងរបស់អ្នកអំពីគោលលទ្ធិនេះ នៅពេលអ្នកអនុវត្តគោលការណ៍នៃការទទួលបានចំណេះដឹងខាងវិញ្ញាណទៅនឹងស្ថានភាពក្នុងជីវិតជាក់ស្តែង ។

ចំណេះចំណានខាងគោលលទ្ធិនេះត្រូវបានរៀបរៀងឡើងដើម្បីបង្រៀនបន្ទាប់ពី លូកា ២:១–១៤ ដែលជាមេរៀនទាក់ទងនឹងបរិបទសម្រាប់វគ្គចំណេះចំណានខាងគោលលទ្ធិ លូកា ២:១០–១២ ។ ប្រសិនបើមេរៀននេះត្រូវប្តូរទៅសប្តាហ៍ផ្សេង ដើម្បីរៀបចំតាមកាលវិភាគសាលារៀន សូមធានាឲ្យបានថា អ្នកបានប្តូរមេរៀនដែលទាក់ទងនឹងបរិបទផងដែរ ។

ការបង្រៀនសិស្សពីគោលការណ៍នៃការទទួលបានចំណេះដឹងខាងវិញ្ញាណ ។ សិស្សនឹងសម្រេចបានគោលបំណងនៃចំណេះចំណានខាងគោលលទ្ធិកាន់តែប្រសើរ ប្រសិនបើពួកគេយល់ពីគោលការណ៍នៃការទទួលបានចំណេះដឹងខាងវិញ្ញាណ ហើយមានឱកាសអនុវត្តគោលការណ៍ទាំងនេះ ។ សូមពិចារណារំឭកគោលការណ៍ទាំងនេះសាឡើងវិញខ្លីៗ នៅក្នុងមេរៀនចំណេះចំណានខាងគោលលទ្ធិនីមួយៗ ។ វាអាចមានគុណប្រយោជន៍ ដើម្បីផ្ដល់ឧទាហរណ៍អំពីវិធីអនុវត្តគោលការណ៍នេះនៅដើមឆ្នាំ ហើយបន្ទាប់មកឲ្យសិស្សផ្តល់ឧទាហរណ៍របស់ពួកគេផ្ទាល់ខ្លួន នៅពេលពួកគេអភិវឌ្ឍសមត្ថភាពរបស់ពួកគេ ។

ការរៀបចំរបស់សិស្ស ៖ សូមអញ្ជើញសិស្សឲ្យចាប់ផ្តើមទន្ទេញសេចក្ដីយោង និងឃ្លាខគម្ពីរសំខាន់ៗ លូកា ២:១០–១២ ៖ « ដ្បិតនៅថ្ងៃនេះ មានព្រះអង្គសង្គ្រោះ១អង្គ ប្រសូតដល់អ្នករាល់គ្នានៅក្រុងហ្លួងដាវីឌ គឺជាព្រះគ្រីស្ទដ៏ជាព្រះអម្ចាស់ » ។

សកម្មភាពរៀនសូត្រដែលអាចមាន

ទន្ទេញ និងពន្យល់

សូមមើលរូបភាពនៃការប្រសូតរបស់ព្រះអង្គសង្គ្រោះ និងឃ្លាបទគម្ពីរសំខាន់ៗសម្រាប់ លូកា ២:១០–១២ ។ ការភ្ជាប់រូបភាពជាមួយនឹងសេចក្ដីយោង និងឃ្លាខគម្ពីរសំខាន់ៗ អាចជួយដល់ការចងចាំបាន ។

សូមអញ្ជើញសិស្សឲ្យសូត្រសេចក្ដីយោងខគម្ពីរ និងឃ្លាបទគម្ពីរសំខាន់ៗជាច្រើនដង ។ ការសូត្រនេះអាចត្រូវបានធ្វើឡើងជាលក្ខណៈបុគ្គល ឬជាថ្នាក់ទាំងមូល ។

សូមមើលរូបភាពការប្រសូតរបស់ព្រះអង្គសង្គ្រោះ ហើយសូត្រសេចក្ដីយោង និងឃ្លាខគម្ពីរសំខាន់ៗពីក្នុង លូកា ២:១០–១២ ៖ « ដ្បិតនៅថ្ងៃនេះ មានព្រះ‌អង្គសង្គ្រោះ១អង្គ ប្រសូតដល់អ្នករាល់គ្នានៅក្រុងហ្លួងដាវីឌ គឺជាព្រះ‌គ្រីស្ទដ៏ជាព្រះ‌អម្ចាស់ » ។ សូមធ្វើសារឡើងវិញរហូតដល់អ្នកមានទំនុកចិត្តថា អ្នកអាចសូត្រដោយចាំមាត់បាន ។

សកម្មភាពខាងក្រោមនេះមានគោលបំណងដើម្បីជួយសិស្សឲ្យពន្យល់ចេញពីចិត្តរបស់ពួកគេផ្ទាល់នូវគោលលទ្ធិដែលថា ព្រះយេស៊ូវគ្រីស្ទគឺជាព្រះអង្គសង្គ្រោះនៃពិភពលោក ដូចដែលបានបង្រៀននៅក្នុង លូកា ២:១០–១២ ។

សូមមើលរូបភាពពីការប្រសូត្ររបស់ព្រះអង្គសង្គ្រោះ ។ សូមសរសេរពីរ ឬបីប្រយោគដើម្បីពន្យល់ពីមូលហេតុដែលព្រឹត្តិការណ៍នេះដូចបានបង្ហាញនេះ « ប្រាប់ដំណឹងល្អដល់អ្នករាល់គ្នាពីសេចក្តីអំណរយ៉ាងអស្ចារ្យ » ( លូកា ២:១០ ) ។

សូមអញ្ជើញសិស្សដែលស្ម័គ្រចិត្តឲ្យឡើងចែករំលែកអ្វីដែលពួកគេបានសរសេរ ។ សូមស្តាប់ចម្លើយរបស់សិស្សដោយយកចិត្តទុកដាក់ និងពិនិត្យមើលឯកសារមេរៀន លូកា ២:១–១៤ ឡើងវិញតាមតម្រូវការ ។

រៀនអនុវត្ត

សូមចំណាយពេលពីរបីនាទីដើម្បីពិនិត្យមើលគោលការណ៍នៅក្នុង កថាខណ្ឌទី ៥–១២ នៅផ្នែក « ការទទួលបានចំណេះដឹងខាងវិញ្ញាណ » នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ។ ចំពោះគោលការណ៍នីមួយៗ សូមគូសចំណាំយ៉ាងហោចណាស់មួយប្រយោគ ដែលអ្នកចង់ពន្យល់ពីគោលគំនិតនេះ ។

សូមអញ្ជើញសិស្សស្ម័គ្រចិត្តពីរបីនាក់ឲ្យឡើងចែករំលែកប្រយោគ ដែលពួកគេបានគូសចំណាំ ។ សូមពិចារណាសួរសំណួរតាមដាន ដែលជួយឲ្យសិស្សពន្យល់ពីមូលហេតុដែលពួកគេជ្រើសរើសប្រយោគជាក់លាក់មួយ និងអត្ថន័យរបស់ប្រយោគនោះចំពោះពួកគេផ្ទាល់ ។

សូមពិចារណាពីស្ថានភាពខាងក្រោម ៖

មិត្តភក្តិរបស់អ្នកម្នាក់ពុំមែនជាអ្នកមានជំនឿលើសាសនានោះទេ ថ្មីៗនេះគាត់បានឃើញពួកអ្នកផ្សព្វផ្សាយសាសនាមួយគូកំពុងនិយាយជាមួយមនុស្សម្នានៅឯសួនច្បារ ។ មិត្ដរបស់អ្នកសួរអ្នកថា « ហេតុអ្វីបានជាពួកអ្នកផ្សព្វផ្សាយសាសនាពីព្រះវិហាររបស់ឯង ចេញទៅផ្សព្វផ្សាយអំពីព្រះយេស៊ូវ ? វាហាក់ដូចជាឯងកំពុងតែបង្ខិតបង្ខំមនុស្សផ្សេងឲ្យជឿដូចឯងដូច្នោះដែរ ។ ហេតុអ្វីឯងមិនទុកឲ្យមនុស្សទាំងនោះរីករាយតាមជីវិតរស់នៅរបស់ពួកគេទៅ ? »

ដោយគិតដល់ស្ថានភាពនេះក្នុងចិត្ត សូមសិក្សាគោលការណ៍នៃការទទួលបានចំណេះដឹងខាងវិញ្ញាណដូចខាងក្រោម ហើយពិចារណាពីរបៀបដែលវាអាចជួយអ្នកឲ្យឆ្លើយនឹងសំណួររបស់មិត្តអ្នកបាន ។

សិស្សអាចត្រូវបានបំបែកជាគូៗ ឬក្រុមតូចៗ ដើម្បីពិភាក្សាអំពីគោលការណ៍នៃការទទួលបានចំណេះដឹងខាងវិញ្ញាណ និងរបៀបដែលពួកគេអាចប្រើគោលការណ៍ទាំងនេះ ដើម្បីឆ្លើយតបទៅនឹងស្ថានភាពនេះ ។

សូមពិចារណាប្រើការពិភាក្សាបីជុំអំពីគោលការណ៍នេះ ។ សូមបោះពុម្ព និងកាត់ផ្នែកខាងក្រោមនេះឲ្យច្រើនគ្រប់គ្រាន់ ហើយចែកឲ្យដៃគូ ឬក្រុមនីមួយៗពិភាក្សាអំពីវាម្តងមួយៗ ។ សូមទុកពេលឲ្យសិស្សពិភាក្សាផ្នែករបស់ពួកគេសិន មុនពេលសូមឲ្យពួកគេធ្វើការផ្លាស់ប្ដូរក្រដាសជាមួយក្រុម ឬដៃគូផ្សេងទៀត ។ នៅពេលក្រុម ឬដៃគូទាំងអស់បានពិភាក្សាគ្នានូវផ្នែកទាំងបីហើយ សូមអញ្ជើញសិស្សឲ្យឆ្លើយតបទៅនឹងស្ថានភាពខាងលើនេះដោយខ្លួនឯង ។

ធ្វើសកម្មភាពដោយសេចក្ដីជំនឿ

« យើងធ្វើសកម្មភាពដោយសេចក្ដីជំនឿនៅពេលយើងជ្រើសរើសទុកចិត្តលើព្រះ ហើយបែរទៅរកទ្រង់ជាដំបូងបំផុត » ( ឯកសារគោលនៃចំណេះចំណានខាងគោលលទ្ធិ « ការទទួលបានចំណេះដឹងខាងវិញ្ញាណ » កថាខណ្ឌទី ៥ ) ។

• តើឃ្លាអ្វីខ្លះដែលអ្នករកឃើញនៅក្នុង កថាខណ្ឌទី ៥–៧ នៃផ្នែក « ការទទួលបានចំណេះដឹងខាងវិញ្ញាណ » ដែលអាចជួយអ្នកក្នុងស្ថានភាពនេះបាន ?

• តើការធ្វើសកម្មភាពដោយសេចក្តីជំនឿអាចជួយអ្នកបានយ៉ាងដូចម្ដេច ពេលអ្នកស្វែងរកចម្លើយសម្រាប់មិត្តរបស់អ្នកនោះ ?

ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏អស់កល្បមួយ

« ដើម្បីពិនិត្យមើល [ គោលគំនិត និងសំណួរ ] ដោយទស្សនវិស័យដ៏អស់កល្បជានិច្ចមួយ នោះយើងគួរពិចារណាវាក្នុងបរិបទនៃផែនការនៃសេចក្ដីសង្គ្រោះ និងការបង្រៀនទាំងឡាយរបស់ព្រះអង្គសង្គ្រោះ » ( ឯកសារគោលនៃចំណេះចំណានខាងគោលលទ្ធិ « ការទទួលបានចំណេះដឹងខាងវិញ្ញាណ » កថាខណ្ឌទី ៨ ) ។

សូមពិនិត្យមើល លូកា ២:១០–១២ ។ សូមគិតអំពីអ្វីដែលវគ្គបទគម្ពីរនេះបង្រៀន រួមជាមួយអ្វីដែលអ្នកដឹងរួចហើយអំពីព្រះយេស៊ូវគ្រីស្ទ ។

• តើព្រះអង្គសង្គ្រោះមានតួនាទីអ្វីខ្លះនៅក្នុងផែនការនៃសេចក្ដីសង្គ្រោះ ?

• ហេតុអ្វីវាសំខាន់សម្រាប់អ្នកដែលមិនទាន់ស្គាល់ព្រះយេស៊ូវគ្រីស្ទត្រូវរៀនសូត្រអំពីទ្រង់ ?

• ហេតុអ្វីវាសំខាន់ដែលយើងត្រូវចែករំលែកសារលិខិតនៃដំណឹងល្អដែលបានស្ដារឡើងវិញរបស់ទ្រង់ដល់មនុស្សគ្រប់គ្នា រួមទាំងគ្រិស្ដសាសនិកផ្សេងទៀតដែលបានទទួលយកទ្រង់រួចហើយនោះ ?

• តើអ្នកអាចប្រើចម្លើយចំពោះសំណួរមុនៗ ដើម្បីឆ្លើយនឹងមិត្តរបស់អ្នកយ៉ាងដូចម្តេច ?

ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព

ដើម្បីជួយយើងឲ្យទទួលបានចំណេះដឹងខាងវិញ្ញាណ ព្រះអម្ចាស់ « បានបង្កើតប្រភពជាច្រើនតាមរយៈអ្វីដែលទ្រង់បើកសម្តែងសេចក្ដីពិត និងការណែនាំដល់កូនចៅរបស់ទ្រង់ » ( ឯកសារគោលនៃចំណេះចំណានខាងគោលលទ្ធិ « ការទទួលបានចំណេះដឹងខាងវិញ្ញាណ » កថាខណ្ឌទី ១១ ) ។

សូមមើលប្រភពដ៏បំផុសគំនិតមួយ ឬច្រើនដូចខាងក្រោមនេះ ដោយស្វែងរកព័ត៌មានដែលអាចជួយអ្នកឲ្យឆ្លើយសំណួររបស់មិត្តអ្នក ។

• « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ( នៅលើគេហទំព័រ ChurchofJesusChrist.org )

• ខគម្ពីរដែលអ្នកបានភ្ជាប់ ឬធ្វើសេចក្ដីយោងទៅ លូកា ២:១០–១២ នៅក្នុងមេរៀនមុន

• ចម្រៀងដែលបានរាយនាមក្រោមប្រធានបទ « ព្រះយេស៊ូវគ្រីស្ទ » នៅក្នុង សៀវភៅទំនុកតម្កើង

សូមពិចារណាពីអ្វីដែលប្រភពទាំងនេះបង្រៀនអំពីរបៀបដែលព្រះអង្គសង្គ្រោះ និងការបង្រៀនទាំងឡាយរបស់ទ្រង់អាចនាំឲ្យមនុស្សមានអំណរ ។

• តើអ្នកបានរៀនអ្វីខ្លះអំពីព្រះអង្គសង្គ្រោះ និងការបង្រៀនទាំងឡាយរបស់ទ្រង់ ដែលអាចនាំឲ្យមនុស្សមានអំណរនៅក្នុងជីវិតនេះ និងនៅក្នុងជីវិតក្រោយទៀត ?

• តើបទពិសោធន៍ផ្ទាល់ខ្លួនអ្វីខ្លះជាមួយព្រះអង្គសង្គ្រោះ ឬការបង្រៀនទាំងឡាយរបស់ទ្រង់ដែលបានធ្វើឲ្យអ្នកមានអំណរ ?

• តើចម្លើយរបស់អ្នកចំពោះសំណួរទាំងនេះអាចជួយអ្នក ឲ្យឆ្លើយសំណួររបស់មិត្តអ្នកបានយ៉ាងដូចម្តេច ?

សូមពិចារណាផ្តល់ឱកាសឲ្យសិស្សសម្ដែងស្ថានភាពនេះ បន្ទាប់ពីពិភាក្សាអំពីគោលការណ៍នៃការទទួលបានចំណេះដឹងខាងវិញ្ញាណរួចហើយ ។

រំឭកវគ្គចំណេះចំណានខាងគោលលទ្ធិ

នៅដើម ឬចុងបញ្ចប់នៃមេរៀនក្រោយ សូមចំណាយពេលត្រឹម ៣ ទៅ ៥ នាទីដើម្បីរំឭកវគ្គបទគម្ពីរចំណេះចំណានខាងគោលលទ្ធិនេះ ។ សូមដាក់តាំងរូបភាពការប្រសូតរបស់ព្រះអង្គសង្គ្រោះ ដែលត្រូវបានប្រើនៅពេលសិស្សទន្ទេញ លូកា ២:១០–១២ ហើយអញ្ជើញសិស្សឲ្យប្រាប់សេចក្ដីយោង និងសូត្រឃ្លាខគម្ពីរសំខាន់ៗម្តងទៀត រហូតដល់ពួកគេអាចសូត្រវាដោយចាំមាត់បាន ។

សកម្មភាពរៀនសូត្របន្ថែម

ជម្រើសរៀនអនុវត្តតាមស្ថានភាព

សូមស្រមៃថា អ្នកបានចុះផ្សាយរូបភាពការប្រសូតរបស់ព្រះយេស៊ូវគ្រីស្ទនៅលើប្រព័ន្ធផ្សព្វផ្សាយសង្គម ជាមួយនឹងសារមួយដែលនិយាយថា អ្នកមានអំណរគុណចំពោះសេចក្តីសុខសាន្ត និងអំណរដែលចំណេះដឹងរបស់អ្នកអំពីព្រះអង្គសង្គ្រោះបានផ្តល់ឲ្យអ្នក ។ មិត្តរបស់អ្នកម្នាក់ដែលពុំមានជំនឿលើសាសនាបានចូលបញ្ចេញមតិនៅលើការចុះផ្សាយរបស់អ្នកដោយនិយាយថា « តើមនុស្សមិនអាចមានសេចក្តីសុខសាន្ត និងអំណរដោយគ្មានព្រះយេស៊ូវបានទេឬអី ? »