Төгс эзэмших сургаал: Лук 22:19–20

“Намайг дурсаж үүнийг үйлд”

Sacrament trays with bread and water.

Та Матай 26:26–30-ийг судлахдаа, Сүүлчийн зоогийн үеэр шавь нартаа ариун ёслолыг танилцуулж буй Аврагчийн талаар сурч мэдсэн. Энэ хичээл танд ариун ёслолын сургаалыг илүү сайн эзэмших боломжийг олгох болно. Та сургаалыг тайлбарлаж, сүнслэг мэдлэг олж авах зарчмуудыг хэрэгжүүлж, төгс эзэмших сургаалын хэсэг болох Лук 22:19–20-д зориулсан эшлэл, судрын түлхүүр үг хэллэгийг цээжлэх замаар үүнийг гүйцэтгэх болно.

Суралцагчдад сүнслэг мэдлэг олж авах зарчмуудыг давтахад нь туслах. Сүнслэг мэдлэг олж авах дараах гурван зарчмыг тогтмол давтах боломжийг суралцагчдад олго. Үүнд: Итгэлээр үйлдэх, утга санаа болон асуултыг мөнхийн талаас нь авч үзэх, илүү гүн гүнзгий ойлголтыг тэнгэрээс томилогдсон эх сурвалжаар дамжуулан эрэлхийлэх зэрэг юм (Төгс эзэмших сургаалыг судлах үндсэн материал [2022], “Сүнслэг мэдлэг олж авах нь”). Суралцагчид дадлага хийх дасгал ажил бүр дээр эдгээр зарчмыг ашиглан дадлага хийх болно. Зарчмуудыг хангалттай давт, ингэснээр суралцагчид тэдгээрийг эргэн санаж, амьдралдаа ашиглах боломжтой болно.

Суралцагчийн бэлтгэл: Суралцагчдыг ариун ёслолоос хүртэхдээ Аврагчийг дурсан санахад тусалдаг зүйлсийн талаар бодож, энэ туршлагаа энэ хичээлд ашиглахад эсвэл хуваалцахаар бэлтгэхэд урь.

Боломжит суралцах үйл ажиллагаа

Цээжлэх ба тайлбарлах

Энэхүү төгс эзэмших сургаалын хэсгийн хичээл нь төгс эзэмших сургаалын судрын хэсэг Лук 22:19–20 -ийн хам сэдвийн талаарх хичээл “Матай 26:26–30; Лук 22:19–20”-ийн дараа заахаар зориулагдсан болно. Хэрэв төгс эзэмших сургаалын энэ хичээлийг өөр долоо хоног руу шилжүүлэх шаардлагатай бол холбогдох хам сэдэв бүхий хичээлийг нь тухайн долоо хоногт нь заасан байхад анхаар.

Суралцагчдыг дараах нөхцөл байдлыг хосоороо жүжиглэн тоглоход урих талаар бодож үз эсвэл хоёр суралцагчийг ангийнханд зориулж уг жишээг илтгэн харуулахад урь.

Есүс Христийн талаар эсвэл зохион байгуулалттай шашны талаар юу ч мэддэггүй найзаа сүмд авчирсан гэж төсөөл. Ариун ёслолын цуглааны дараа, тэр “Талх, усыг хүн бүрд дамжуулахын зорилго юу байсан бэ?” гэж асуужээ.

• Та ариун ёслолыг найздаа хэрхэн тайлбарлах байсан бэ?

Суралцагчдад төгс эзэмших сургаалын судрын хэсэг болох Лук 22:19–20 -ийг болон үүнийг дагалдаж буй судрын түлхүүр үг хэллэгт зориулсан эшлэлийг цээжлэх боломжийг олго. Дараах ажиллагаа нь үүнийг гүйцэтгэх нэг арга юм. Суралцагчдыг хосоор нь эсвэл жижиг бүлгээр ажиллуулах эсвэл ангийг бүхэлд нь оролцуулах, судрын эшлэл болон түлхүүр үг хэллэгийг самбар дээр бичих замаар энэхүү үйл ажиллагааг тохируулан өөрчлөх талаар бодож үз.

Судлах тэмдэглэл дээрээ харандаагаар дараах судрын эшлэл болон судрын түлхүүр үг хэллэгийг бүдэгхэн бич. Үүнд: “ Лук 22:19–20 : ‘Намайг дурсаж’” ариун ёслолоос хүрт хэмээн Есүс Христ зарлигдав.

Энэ судрын эшлэл болон судрын түлхүүр үг хэллэгийг чангаар давтан унш. Дараа нь хоёр үг эсвэл тоог арилгаад, судрын эшлэл, үг хэллэгийг дахин давтан хэлэх дадлага хий. Бүх үг болон тоонуудыг арилах хүртэл үгс эсвэл тоонуудыг арилгаад, судрын эшлэл болон түлхүүр үг хэллэгийг цээжээр уншиж, энэхүү загварыг дахин давтан гүйцэтгэ. Дараа нь энэхүү судрын эшлэл болон түлхүүр үг хэллэгээс цээжээр хэлж чадах хэмжээгээрээ аль болох олныг бич.

Амьдралд хэрэгжүүлэх дадлага

Шаардлагатай бол сүнслэг мэдлэг олж авах зарчмуудыг давтахад суралцагчдад тусал. Үүнийг гүйцэтгэх нэг арга нь суралцагчдаар дараах үйл ажиллагааг гүйцэтгүүлэх явдал юм. Уг давтлагад гурваас таван минут хүртэлх хугацаанаас илүүг зарцуулах хэрэггүй.

Сүнслэг мэдлэг олж авах зарчмуудыг товчхон дахин давт (Төгс эзэмших сургаалыг судлах үндсэн материал [2022], “Сүнслэг мэдлэг олж авах нь”). Сүнслэг мэдлэг олж авах гурван зарчмын нэгийг сонгоод, түүнийг төлөөлөх энгийн нэг бэлгэдэл эсвэл зураг зур.

Одоо дараах жишээг уншиж, дагалдан гарах асуултуудад хариулах замаар Лук 22:19–20 дээр заасан номлолыг мөн сүнслэг мэдлэг олж авах зарчмуудыг ашиглах дадлага хий.

Дараах жишээ нь ариун ёслолыг илүү утга учиртай туршлага болгох талаар гүн гүнзгий тунгаан бодоход мөн ариун ёслолын үеэр хийх зүйлсийн жагсаалтыг гаргахаас илүү зүйлсийг хийхэд нь суралцагчдад туслах зорилготой.

Жишээг суралцагчдад илүү их хамааралтай болгохын тулд тохируулан өөрчлөх тухай бодож үз.

Жуди 15 настай бөгөөд бүх амьдралынхаа туршид Сүмийн гишүүн байж, Сүмийн цуглаанд тогтмол оролцдог байжээ. Тэр өөрт нь сайн үлгэр жишээ үзүүлдэг ээж, эмээ хоёртойгоо хамт амьдардаг. Өнгөрсөн ням гарагт Жудид сүмийн цуглаанд үг хэлсэн хүний ярьсан сэдэв маш сонирхолтой санагдсан байна. Үг хэлэгч бүр ариун ёслолоос хүртэх тухай мөн энэ нь тэдний амьдралд Аврагчийн нөлөөг ихэсгэхэд хэрхэн тусалсан талаарх хүчирхэг бөгөөд чин сэтгэлийн хувийн туршлагаа хуваалцжээ. Энэ нь түүнийг өөрт нь яагаад ийм ижил төстэй туршлагууд байхгүй байгаа талаар тунгаан бодоход хүргэв. Тэр ариун ёслолын үеэр утсаараа оролдох юм уу бусдын хийж буй зүйлсэд анхаарал нь сарниж эсвэл хурдхан шиг гэртээ очоод унтах юмсан гэж боддог болохоо ухаарсан байна.

• Танд хэзээ нэгэн цагт ийм мэдрэмж төрж байсан уу?

• Хүмүүс яагаад заримдаа ингэж боддог гэж та бодож байна вэ?

Жудид энэ нөхцөл байдалд нь туслахын тулд сүнслэг мэдлэг олж авах зарчмуудыг ашиглан дадлага хийх боломжийг суралцагчдад олго. Дараах нь үүнийг гүйцэтгэх нэг арга юм.

Хэрэв энэ нөхцөл байдалд сүнслэг мэдлэг олж авах зарчмуудыг ашиглахад нь суралцагчдад илүү их тусламж хэрэгтэй бол ярилцлагад хөтлөхийн тулд хараар тодруулсан гарчгуудын доорх асуултуудыг ашиглахыг бодож үз.

Судлах тэмдэглэл дээрээ сүнслэг мэдлэг олж авах дараах гурван зарчим тус бүрд зориулж гарчиг үүсгэ. Үүнд: (1) итгэлээр үйлдэх, (2) утга санаа болон асуултыг мөнхийн талаас нь авч үзэх, (3) илүү гүн гүнзгий ойлголтыг тэнгэрээс томилогдсон эх сурвалжаар дамжуулан эрэлхийлэх.

Гарчиг бүрийн доор сүнслэг мэдлэг олж авах зарчим Жудид энэхүү нөхцөл байдалд хэрхэн тусалж болох тодорхой аргуудыг бич. Жишээлбэл, та түүний итгэлээр үйлдэж болох аргуудын талаар санал болгож, мөнхийн талаас нь авч үзэх нь түүний нөхцөл байдалд хэрхэн тус болох тухай хуваалцаж, удирдамж, чиглэл авахын тулд түүний ашиглах боломжтой тэнгэрээс томилогдсон зарим эх сурвалжийн талаар санал болгож болох юм.

• Та Жудид асуудлуудаа шийдвэрлэхийн тулд юу хийж эхлэхийг зөвлөх байсан бэ?

• Та Жудид туслахын тулд сүнслэг мэдлэг олж авах гурван зарчим тус бүрийг хэрхэн ашиглах байсан бэ?

Ариун ёслолын үеэр Есүс Христийг дурсан санаж, Түүнтэй холбогдох арга замуудын талаар бодож үзэхэд нь суралцагчдад тусал. Суралцагчдыг хариулах үед дараахтай адил асуултуудыг тавих талаар бодож үз. Тухайлбал: Энэ нь Аврагчийг дурсан санахад тань хэрхэн туслах вэ? Та зүгээр л урсгалаараа явахын оронд хэрхэн Аврагчийг дурсан санаж, Аврагчтай холбогдох вэ?

Итгэлээр үйлдэх

• Та ариун ёслолоос хүртэх илүү сайн туршлага олж авахад нь туслах ямар зөвлөгөөг Жудид өгөх вэ?

• Эдгээр өөрчлөлтийг хийхэд түүнд юу саад болж болох вэ? Тэр эдгээр саад бэрхшээлийг хэрхэн даван туулж чадах вэ?

Утга санаа болон асуултыг мөнхийн талаас нь шинжлэн судлах

• Та тулгарсан нөхцөл байдлаа мөнхийн талаас нь харахад Жудид туслахын тулд түүнд ямар асуултууд тавьж болох вэ? Та яагаад эдгээр асуултыг сонгосон бэ?

Тэнгэрээс томилогдсон эх сурвалжаар дамжуулан илүү гүн гүнзгий ойлголт олж авахыг эрэлхийлэх

• Жудид тусалж болох юуг Лук 22 болон бусад судар дээр эсвэл Сүмийн удирдагчид заасан байдаг вэ?

• Жуди ариун ёслолоос хүртэх туршлагаа сайжруулахын тулд өөр хаана тусламж авахаар хандаж болох вэ?

Давтах

Ирээдүйд заагдах хичээлээр дараах давтах үйл ажиллагааг ашиглах нь зүйтэй байж болно.

Суралцагч тус бүрд тэмдэглэх карт эсвэл наалддаг цаас өгөөрэй. Тэднийг карт эсвэл наалддаг цаасан дээрээ “ Лук 22:19–20 : ‘Намайг дурсаж’ ариун ёслолоос хүрт хэмээн Есүс Христ зарлигдав’ гэж бичээд, энэхүү судрын эшлэл, түлхүүр үг хэллэгүүдээс зарим үг, тоог арилгахад урь. Суралцагчдыг дутуу үгс эсвэл тоонуудыг гүйцээж нөхөхийн тулд карт эсвэл цаасаа хоорондоо солилцоход урь. Дараа нь суралцагчдыг эшлэл болон хэллэгийг цээжээрээ хэлэх гэж оролдоход урь.

Нэмэлт суралцах үйл ажиллагаа

Хоёрдогч жишээ

Сүмд явахад ариун ёслолын гүйцэтгэх гол үүргийн талаар ойлгоход нь суралцагчдад туслахын тулд дараах хоёрдогч жишээг ашиглах талаар бодож үз.

Элдон саяхан ням гарагт ажиллахыг шаарддаг ажилд оржээ. Тэр сард нэг юм уу хоёр ням гарагт сүмд явахгүй байх нь нэг их сүртэй асуудал биш гэж бодсон аж. Гэвч амардаг ням гарагтаа ч гэсэн Сүмд явах ямар ч хүсэл эрмэлзэлгүй болсноо Элдон одоо ухаарч байна. Түүнд сүм уйтгартай санагдаж, түүнтэй хамааралтай эсвэл холбогдох хэн ч тэнд байхгүй мэт санагдаж байв.

Уг жишээг хуваалцсаныхаа дараа, сүнслэг мэдлэг олж авах зарчмууд Элдонд энэ нөхцөл байдалд хэрхэн туслах талаар ярилц. Ярилцлагынхаа нэг хэсэг болгож, ариун ёслолоос тогтмол хүртэхгүй байснаар Элдон ямар адислалуудаас хоцорч байж болох тухай бодоход суралцагчдыг урь.