Иохан 13
“Бие биенээ хайрлагтун”
Есүс Алгасал баярын зоогоос хүртсэнийхээ дараа шавь нарынхаа хөлийг угаажээ. Тэрээр тэдэнд бие биенээ хайрлаж, үйлчлэх талаар заасан байна. Энэ хичээл нь Есүсийн адилаар бусдыг хайрлаж, үйлчилснээр аз жаргалыг эрэлхийлэхийг танд уриалах болно.
Асуултуудад хэд хэдэн хариулт өгөхийг уриалах. Асуултад зөвхөн нэг хариулт өгөөд, дараа нь хичээлээ үргэлжлүүлдэг хандлагаас зайлсхий. Өмнөх хариултад тайлбар өгөх эсвэл сэтгэгдлээ хэлэхэд бусад суралцагчийг урь. Суралцагчдыг ярилцлагад оролцуулахаар урихдаа Сүнсний удирдамжийг эрэлхийлээрэй.
Суралцагчийн бэлтгэл: Суралцагчдыг өөр хүнд Христийнхтэй адил хайрыг үзүүлж, үйлчлэх боломжийг хайхад урь.
Боломжит суралцах үйл ажиллагаа
Есүс шиг байхыг хичээх
“Би Есүс шиг байхыг хичээнэ” (Хүүхдийн дууны ном, 40–41) дууг дуулах юм уу үгийг нь унш. Та дуулж, уншиж эсвэл үзэхдээ Есүс шиг байхыг хичээхийг хүсэж буй шалтгаануудаа бод.
Music Video: I’m Trying to Be Like Jesus – Emily Brown
Суралцагчдыг дуу дуулж, уншиж эсвэл видео үзэж байхад төрсөн бодол, мэдрэмжийг нь хуваалцуулахаар урихыг бодож үз. Ярилцахаас илүүтэй дотроо тунгаан бодоход урихын тулд эхний асуултыг ашиглан дараах асуултуудыг тавь.
-
Та ямар арга замаар Есүс шиг байхыг хичээж байна вэ?
-
Хүмүүсийг Есүс шиг байхыг хичээхэд амьдралд нь ямар өөрчлөлтүүд гарсныг та олж харсан бэ? Таны амьдралын хувьд?
Энэ хичээлд оролцож байхдаа Аврагчийн жишээ, сургаалыг илүү сайн дагах урам зориг өгөх Ариун Сүнсний зааварчилгаанд анхаарлаа хандуул.
“Би ийм үлгэр дуурайл үзүүлэв”
Энэ судрын түүхэд юу болж буйг төсөөлөхөд суралцагчдад туслахын тулд энэ хичээлийн эхэнд гарсан зургийг харуулах талаар бодож үз.
Аврагч амьдралынхаа төгсгөлд, сүүлчийн Алгасал баярын зоогтоо төлөөлөгчдөө цуглуулжээ. Энэ оройн үйл явдлыг ихэвчлэн Сүүлчийн оройн зоог гэж нэрлэдэг.
Иохан 13:1–11 -ийг уншаад, Есүс төлөөлөгчидтэйгөө Алгасал баярын зоогийг барьсныхаа дараа юу хийсэн болохыг олж мэд.
Энэ долоо хоногийн бусад хичээлээр Алгасал баярын үеэр тохиолдсон бусад үйл явдлыг авч үзэх боломж олдоно.
Шинэ Гэрээний цаг үед хүмүүс ихэвчлэн бохир зам дээр сандаалтай алхдаг байсан тул маш бохир хөлтэй байсныг мэдэж байх нь тустай байж болох юм. Бусдын хөлийг угаах ажлыг ихэвчлэн хамгийн доод түвшний зарц нар гүйцэтгэдэг байжээ.
-
Та төлөөлөгчдийнхөө хөлийг угааж буй Есүсийн үйлдлээс Түүний ямар зан чанарыг олж харж байна вэ?
-
Хэрэв Есүс танд ийм төрлийн даруухан үйлчилгээ санал болгосон бол танд ямар санагдах байсан мөн та ямар хариу үйлдэл үзүүлэх байсан бэ?
Аврагч төлөөлөгчдийнхөө хөлийг угааснаар зөвхөн сайн үйлчлэл хийгээд зогсохгүй шинэ ёслол тогтоосон гэдгийг тайлбарла (Брүс Р.Макконки, Doctrinal New Testament Commentary [1965], 1:708–709). Энэ ёслол нь бидний эрин үед бошиглогч Иосеф Смитээр сэргээгдсэн (Сургаал ба Гэрээ 88:74–75, 137–141 ; Гэгээнтнүүд, 1:166-г үзнэ үү). Энэ нь бошиглогч, төлөөлөгчдөөр ховорхон яригддаг нандин ёслол тул багш нар энэхүү ёслолыг өнөө үед хэрхэн үйлдэх талаар ярилцахгүй байх нь зүйтэй. Багш, суралцагчид нэг нэгийнхээ хөлийг угаахтай холбоотой аливаа үйл ажиллагаанд оролцохгүй байх нь зүйтэй. Оронд нь Өөрийн шавь нарт ийм байдлаар үйлчилсэн Аврагчийн агуу жишээг онцол.
Иохан 13:12–17 -г уншаад, Аврагчийн үгсээс олж авах боломжтой сургамжуудыг олж мэд.
-
Та эдгээр шүлэг дээрх Аврагчийн сургаалаас юу сурч мэдсэн бэ?
-
Хэзээ та Есүсийн үйлчлэлийн жишээг дагаснаар аз жаргалыг мэдэрсэн бэ?
“Бие биенээ хайрлагтун”
Төлөөлөгчдийнхөө хөлийг угаасныхаа дараа Аврагч тэдэнд заах цаг гаргажээ. Иохан 13:34–35 -ыг уншаад, Түүний заасан чухал номлолыг олж мэд.
Суралцагчдад дараахтай адил үнэнийг тодорхойлоход нь тусал. Есүс Христийн жинхэнэ шавь болохын тулд, Тэр биднийг хэрхэн хайрладаг шиг бид бие биенээ хайрлах ёстой.
Өөрсдийг нь гомдоосон хэн нэгнийг хайрлах нь зарим суралцагчид хэцүү байж магадгүй. Суралцагчдад тэднийг болон бусдыг гэсэн Есүс Христийн хайрыг мэдрэхэд нь туслахаар ямар өөрчлөлтүүдийг хийх ёстойгоо мэдэхийн тулд Ариун Сүнснээс удирдамж авахыг эрэлхийл.
-
Эдгээр шүлгийг уншиж, эргэцүүлж байхад танд ямар бодол, мэдрэмж эсвэл асуултууд төрсөн бэ?
Дараах үйл ажиллагааг хосоороо эсвэл жижиг бүлгээр гүйцэтгэхэд суралцагчдыг урих талаар бодож үз. Суралцагчид самбар дээрх жагсаалтад жишээнүүдээ нэмэх боломжтой.
Аврагч бусдад хайраа харуулсан тухай гардаг судрын түүхүүдийн талаар бодож үз.
-
Есүс Христ өөр өөр хүнд өөр өөр арга замаар хэрхэн хайраа харуулсан бэ?
Таныг хайрлах Есүсийн хайрыг хэзээ эсвэл хэрхэн мэдэрсэн талаараа эргэцүүлэн бодож, бичихэд цаг гарга. Тайвшраад, эдгээр үеийг бодож олоход туслахыг Тэнгэрлэг Эцэгээс хүсэх талаар бод.
-
Таныг хайрлах Аврагчийн хайрыг мэдэрч, танин мэдэх нь бусдад хайраа харуулах хүсэлд тань хэрхэн нөлөөлж байна вэ?
Зарим суралцагчийн хувьд Аврагч тэдэнд хувийн шинжтэй арга замаар хайраа хэрхэн харуулдаг талаар бодож үзэх нь хэцүү байж болно. Өршөөл санал болгож, үнэ цэнээ олж харахад нь тусалж эсвэл ямар зүйлсийг туулж буйг нь ойлгож байгаагаа мэдүүлэх зэргээр Түүний хайраа харуулж байсан жишээг хуваалцахыг бодож үз. Тэрээр судрууд дээрх түүхүүдэд гардагтай адил хайраар дүүрэн сайхан сэтгэлийг бидэнд харуулсаар байдаг гэдгийг олж харахад суралцагчдад туслахын тулд хувийн туршлагаа хуваалцахыг бодож үз.
Дараагийн “Суралцахуйгаа үнэлэх” хичээлээр энэхүү төлөвлөгөөг эргэн шалгахыг анхаараарай. Хэрэв энд тохируулан өөрчилсөн бол “Суралцахуйгаа үнэлэх” хичээлийг үүний дагуу мөн тохируулан өөрчил.
Бусдад үйлчилж, бусдыг хайрлах Аврагчийн жишээг хэрхэн дагахаа мөн хэзээ үүнийг гүйцэлдүүлэх талаараа төлөвлөгөө гарга. Төлөвлөгөө гаргахдаа дараах асуултуудын талаар эргэцүүлэн бодох нь тустай байж болно.
-
Өнөөдөр гэр бүлийнхээ гишүүн, найз эсвэл эргэн тойрныхоо хэн нэгний төлөө ямар нэг зүйл хий.
-
Танаас өөр эсвэл тэр ч байтугай урьд өмнө тантай таардаггүй байсан хэн нэгэнд хайр, сайхан сэтгэлээ харуулахын тулд ямар нэг зүйл хий.
-
Илүү их хайр, хүндэтгэлээ үзүүлэх сэтгэгдэл төрүүлж буй хэн нэгнийг тодорхойл.
-
Өөрийн хүчин чармайлтад Аврагчийн хайрыг хэрхэн урьж болох талаар бодож үз.
Тайлбар ба нөхцөл байдлын талаарх мэдээлэл
Иохан 13:26 . Талхны хэлтэрхий гэж юу вэ?
Иохан 13:26 дээр дүрсэлсэн “талхны хэлтэрхий” гэдэг нь хооллож буй хүмүүс аяга тавгаасаа мах шөл ууж идэхдээ ашигладаг байсан талхны жижиг хэсэг байжээ. Гэрийн эзэн талхны хэлтэрхийг хоолонд дүрж, оройн зоогийн зочиндоо өгөх нь сайхан сэтгэл, хүндлэлээ харуулж буйн илэрхийлэл байсан тул Аврагч энэ үйлдлээрээ Иудаст нөхөрлөхийг санал болгож буйгаа илэрхийлсэн бөгөөд энэ нь төлөвлөсөн урвалтаасаа няцаасай хэмээн түүнд өгсөн эцсийн боломж байсан ч байж болох юм.
Бид бусдад үзүүлэх өөрсдийн үйлчлэлээр дамжуулан Есүс Христийн хайрыг мэдрэхэд нь тэдэнд хэрхэн тусалж чадах вэ?
Ерөнхийлөгч Хэнри Б.Айринг дараах түүхийг хуваалцжээ.
Би асрах төвийн ариун ёслолын цуглаанд оролцохоор томилогдов. Надаас ариун ёслол түгээхийг хүсэхэд, би ариун ёслолыг түгээх явц, няхуур нямбай байх талаар бодохын оронд ариун ёслол түгээж байхдаа ариун ёслолоос хүртэж буй ахмад настнуудын хүн нэг бүрийн царай руу харсан. Тэдний дунд олон хүн уйлж байхыг би харсан юм. Нэгэн эмэгтэй миний ханцуйнаас зуурч, дээш харан, чангаар “Баярлалаа, баярлалаа” гэж билээ.
Их Эзэн Өөрийнх нь нэрээр үйлчилсэн миний үйлчлэлийг адисалсан юм. Би тэр өдөр үүргээ хэрхэн сайн гүйцэтгэх талаар биш, харин ийм гайхамшгийн төлөө, хайраар дүүрэн үйлчлэлээр минь дамжуулан хүмүүс Их Эзэний хайрыг мэдрээсэй гэж залбирсан байлаа. Энэ бол Түүний нэрээр бусдад үйлчилж, бусдыг адислахын түлхүүр юм байна гэдгийг би сурсан.
(Хэнри Б. Айринг, “Түүний нэрээр адислах нь,” 2021 оны 4-р сарын Ерөнхий чуулган, 71)
Нэмэлт суралцах үйл ажиллагаа
Хичээлийг эхлүүлэх өөр арга
Дараах бүдүүвчийг самбар дээр харуул.
Дараах асуултуудыг чанга уншаад, суралцагчдыг хариултаа тунгаан бодоход урь (чанга хариулах шаардлагагүй гэдгийг тэдэнд тайлбарла).
Та нар өөрсдийгөө энэхүү зураасны хаана нь байрлуулах вэ?
Та нар одоо байгаагаасаа илүү их аз жаргалтай болохыг хүсэж байна уу?
Та хэнд илүү их аз жаргалтай болоход нь туслахыг хүсэж байна вэ?
Суралцагчдыг Иохан 13 -ыг судлахдаа илүү их аз жаргалтай болохын тулд юу хийж чадахаа мэдэхэд туслах зарчмуудыг хайж олоход урь.
Та Христэд итгэгч гэдгээ хэрхэн харуулах вэ?
“Бие биенээ хайрла” хэсгийн эхэнд дараах үйл ажиллагаа нь хичээлд дахин оролцож эхлэхэд суралцагчдад туслах боломжтой.
Өөрсдийг нь Есүс Христийн Хожмын Үеийн Гэгээнтнүүдийн Сүмийн гишүүд учраас Христэд итгэгч эсвэл Есүс Христийн жинхэнэ шавь нар биш гэж хэн нэгэн хэзээ нэгэн цагт буруутгаж байсан эсэхийг суралцагчдаас асуу. Хэрэв аль нэг суралцагчид ийм зүйл тохиолдсон бол энэ нөхцөл байдалд хэрхэн хариу үйлдэл үзүүлсэн болохыг нь асуу. Дараах асуултуудын талаар ярилцахад ангийн гишүүдийг урь.
Хэрэв хэн нэгэн та нарыг Христэд итгэгч биш гэвэл та нар юу гэж хариулах вэ?
Та Есүс Христийн дагалдагч гэдгээ ямар арга замаар харуулж болох вэ?
Иохан 13:35 . “Та нарыг Миний шавь гэдгийг үүгээр чинь бүгд мэдэх болно”
Иохан 13:34 дээрх Есүс Христ биднийг яаж хайрласны адил бид мөн бие биенээ хайрлавал биднийг Түүний шавь гэдгийг бусад хүн мэдэх болно гэсэн үнэнийг онцлон авч үзэх талаар бодож үз.
Энэ үнэнийг дүрслэн харуулахын тулд ахлагч Пол Э. Коеликэрын Далын гишүүнээр үйлчилж байх үедээ ярьсан дараах түүхийг хуваалц.
Хоёр залуу номлогч захиасыг нь сонсох хэн нэгнийг олно хэмээн найдаж, нэгэн айлын хаалгыг тогшжээ. Хаалга онгойж, нэлээд том биетэй эр тийм ч нөхөрсөг бус өнгөөр, “Би та нарт хаалгыг маань ахиж битгий тогш гэж хэлсэн байх аа. Хэрвээ та нар эргэж ирвэл сайхан угтахгүй гэдгийг би анхааруулсан биз дээ. Одоо намайг тайван орхи” гээд хаалгаа чанга хаажээ.
Ахлагчдыг тэндээс холдон явах үед, ахлах буюу илүү туршлагатай номлогч нь хамтрагчаа тайвшруулан, зоригжуулахын тулд мөрөн дээр нь гараа тавьжээ. Өнөөх ууртай эр тэдэнд мэдэгдэлгүй, цонхоороо тэдний хойноос сэм харж байв. Өөрийг нь муухай аашилсан болохоор тэд араас нь дооглон тохуурхах байх гэж тэр бодсон байна. Гэтэл номлогчдын эелдэг харилцааг хараад, зүрх сэтгэл нь тэр даруй зөөлөрчээ. Тэрээр хаалгаа дахин нээгээд, номлогчдыг эргэн ирж, захиасаа хуваалцахыг хүссэн юм.
… Бие биенээ хайрлаж, хэрхэн бодож, ярьж мөн үйлдэж байгаагаа Христ дээр төвлөрүүлэх чадвараа хөгжүүлэх энэхүү зарчим нь Христийн шавь нар болохын гол үндэс юм.
(Пол Э. Коеликэр, “Тэр үнэхээр биднийг хайрладаг,” Ensign эсвэл 2012 оны 4-р сарын Ерөнхий чуулган, 17)
Номлогчдын хоорондох харилцаа нь уг хүнд яагаад ингэж их нөлөөлсөн талаар бодож үзэхэд суралцагчдыг урь.