Atamai i Aoaoga Faavae: Mataio 11:28–30

“Ia outou o mai ia te Au … o A’u Foi E Malolo Ai Outou”

Na aoao mai Iesu Keriso afai tatou te o atu ia te Ia, o le a Ia faamāmāina a tatou avega ma aumaia ia i tatou le malologa.O lenei lesona o le a tuuina atu ai ia te oe le avanoa e faamatala ai lou malamalama i lenei aoaoga faavae i le faatatauina lea o mataupu faavae mo le mauaina o le malamalamaaga faaleagaga i se tulaga faatusatusa e tali tutusa ma aafiaga o ono i ai i lou lava olaga.

O le atamai i aoaoga faavae e ala mai i faaaliga. Na faasoa mai e Elder Kim B. Clark o le Au Fitugafulu e uiga i le atamai i aoaoga faavae e faapea: “Ou te manao ia outou iloa ma lagona i o outou loto ua oo mai lenei mea e ala i faaaliga mai le Alii; o se vavega lava. Ua tele na ou mafaufau i le auala na oo mai ai ma le taimi na oo mai ai ma le mafuaaga na oo mai ai. Ua oo ina ou vaaia le Atamai i Aoaoga Faavae i se anomea tele atu o aoaoga a le Ekalesia ma le galuega tele a le Alii i le lalolagi” (Kim B. Clark, “Atamai i Aoaoga Faavae ma le Aoaoina Loloto” [o se afiafi faatasi ma se Pulega Aoao, Fepuari. 17, 2017], broadcasts.ChurchofJesusChrist.org).

Sauniuniga mo tamaiti o le vasega: Valaaulia tamaiti o le vasega e faataitai ona taulotoina le mau faasino mo le atamai i aoaoga faavae ma le fuaitau autu o le mau mo le Mataio 11:28–30 (po o le fuaitau atoa pe a gafatia e tamaiti aoga). Fai atu ia i latou e mafaufau pe faapefea ona latou faaaogaina mea ua latou aoaoina e uiga i le gafatia e Iesu Keriso ona faamāmāina a latou avega pe a latou o atu ia te Ia.

Gaoioiga e Mafai ona Faaaoga e Aoao Ai

O lenei lesona o le atamai i aoaoga faavae ua fuafuaina ia aoaoina pe a maea ona fai le lesona o le “Mataio 11:28–30,” o le lesona anomea mo le fuaitau o le atamai i aoaoga faavae o le Mataio 11:28–30 . Afai e manaomia ona faamei lenei lesona o le fuaitau o le atamai i aoaoga faavae i se isi vaiaso, ia mautinoa e aoao foi le lesona o le anomea e faatatau i ai i lena foi vaiaso.

Tauloto ma faamatala

Tuu se avanoa i tamaiti o le vasega e tauloto ai le mau faasino ma le fasifuaitau autu o le mau mo le Mataio 11:28–30 (E mafai ona valaaulia tamaiti o le vasega e tauloto le fuaitau atoa pe a mafai.)

O se tasi mea e filifili e fai o le tusi lea o mea nei i luga o le laupapa ma valaaulia tamaiti o le vasega e faataitai ona fai le faamatalaga faatasi ma le vasega pe fai taitoatasi na o i latou.

“Mataio __:28–__: Ia outou o mai ia te a_, o outou u__ o e t____ ma mafatia i a____, o au foi e m___ a___ outou.”

E mafai foi ona fesoasoani ia te oe le polokalama faatekinolosi o le Doctrinal Mastery e tauloto ai lenei fasifuaitau autu o le mau.

Faamatalaina o le upumoni

Tuu i tamaiti o le vasega se avanoa e faamatala ai aoaoga faavae sa aoaoina i le lesona talu ai o loo faapea mai afai tatou te o atu ia Iesu Keriso, o le a Ia faamāmāina a tatou avega ma aumaia ia i tatou le malologa.

O se tasi o auala e mafai ona faia ai lenei mea o le faaali atu o le ata lenei ma valaaulia tamaiti o le vasega e toe faamatala po o le a le mea e tau o le amo pe faamalamalama po o le a le aoga o se amo.

Toe faamatala po o le a le mea e tau o le amo (tagai i le ata lenei). Toe iloilo le Mataio 11:28–30, ma vaavaai mo upumoni na aoao mai e le Faaola.

I le faasino atu i le ata o le amo, faamatala pe mafai faapefea ona fesoasoani le Faaola i a tatou avega. Ia mautinoa ona faaaofia ai ma le tatou matafaioi a o tatou paaga ma Keriso.

Faata’ita’i ona faatatauina

Afai o manaomia e tagata aoga ona toe iloilo mataupu faavae o le mauaina o malamalama faaleagaga, mafaufau pe valaaulia i latou e galulue i ni vaega taitoatolu. I totonu o vaega taitoatolu, e mafai ona sailia e tagata taitasi o le vaega se mataupu faavae e ese. Ona mafai lea ona faaaoga e tagata taitoatasi a latou lava upu e faamatala ai le mataupu faavae i le latou vaega. Ona faaali pe tufa atu lea o le gaoioiga lenei, ma fai atu i tagata aoga e faafetaui le mataupu faavae ma lona faamatalaga. (O tali sao o le 1. I; 2. A; 3. E.)

A manaomia, toe iloilo mataupu faavae o le mauaina o le malamalama faaleagaga i le suesueina lea o palakalafa 5–12 o le vaega “Mauaina o Malamalama Faaleagaga” i le Pepa Faamatalaga o le Atamai i Aoaoga Faavae (2020). Ona faafetaui lea o fuaiupu taitasi o le a mulimuli mai ma le mataupu faavae talafeagai o le mauaina o le malamalama faaleagaga.

1. O le aoao ia iloa ma aloese mai punaoa e le faatuatuaina e mafai ona puipuia i tatou mai faamatalaga sese ma mai ia i latou o e saili e faatamaia le faatuatua.

2. Ao tatou saili e atiina ae lo tatou malamalama ma taulimaina popolega, e taua lo tatou faalagolago i le molimau ua tatou maua ia Iesu Keriso, le Toefuataiina o Lana talalelei, ma aoaoga a Ana perofeta faauuina.

3. Tatou te saili le fesoasoani a le Agaga Paia ina ia vaai ai i mea e pei ona silasila i ai le Alii.

A. Faatino le faatuatua

E. Iloilo manatu ma fesili ma se vaaiga e faavavau

I. Saili le malamalama atili e ala i punaoa mamana ua filifilia

Ata Faataitai

Atonu e aoga ona valaaulia tagata aoga e toe faamatala avega na latou mafaufau i ai i le lesona talu ai.

I ni fuaiupu se lua pe tolu, fatu se ata faataitai faatusa o se tagata fatu e tali tutusa ma lou matua o loo mamafa i ai se avega. Ia aofia ai ma se igoa, se avega faapitoa, ma se tasi pe lua o auiliiliga e uiga i lagona o lena tagata.

Mafaufau pe valaaulia tagata aoga e fesuiai a latou ata faataitai i le tasi ma le isi. Ona tusi lea e tagata aoga se tali i le ata faataitai na latou maua e faaaoga i ai mataupu faavae o le mauaina o le atamai faaleagaga. Pe, mo se faiga ese e sili atu, e mafai ona tali tagata aoga e faaaoga ai na o se mataupu faavae e tasi o le mauaina o le malamalama faaleagaga a o lei fesuiaia ata faataitai ma se isi tagata aoga. E mafai ona tali lena tagata aoga e faaaoga ai se mataupu faavaeu e ese a o lei toe fesuiaia foi ata faataitai. E mafai ona fesuiai faatolu e tagata aoga ia ata faataitai ina ia faaaoga uma ai mataupu faavae e tolu. Ona valaaulia lea o tagata aoga e toe aumai ata faataitai na latou tusia ma toe iloilo tali tusia a tagata o le latou vasega.

Mauaina o le malamalama faaleagaga

Mafaufau pe faapefea ona e faaaogaina mataupu faavae o le mauaina o le malamalama faaleagaga e fesoasoani ai i le tagata o i le ata faataitai. Tali fesili o le a mulimuli mai e fesoasoani ia te oe.

Faatino le faatuatua

• O a ni mea ua e faia e faatuatua ai i le Atua ma liliu atu ia te Ia a o e feagai ma luitau?

• O a ni lesona ua e aoaoina mai i le faaalia o le faatuatua ia Iesu Keriso i le taimi ua tea, e mafai ona fesoasoani i lenei tulaga? E faapefea?

Iloilo manatu ma fesili ma se vaaiga e faavavau

• O le a se mea ua e iloa e uiga ia Iesu Keriso e mafai ai ona Ia fesoasoani e siitia avega?

• E faapefea ona avea le feagai ma avega ma luitau i o tatou olaga o se vaega taua o le fuafuaga a lo tatou Tama Faalelagi?

Saili le malamalama atili e ala i punaoa paia ua filifilia

• E faapefea e le iloaina o aoaoga faavae o loo maua i le Mataio 11:28–30 ona fesoasoani i lenei avega po o luitau?

• O le a se isi mau po o se saunoaga faaperofeta e mafai ona fesoasoani ai? E faapefea?

Faamāmāina o avega

I le faaaogaina o mea ua e faailoaina, tusi se tusi i le tagata o loo i le ata faataitai. Ia aofia ai upumoni mai le Mataio 11:28–30 ma nisi punaoa e tuuina atu ai le faamafanafanaga ma faamalosiauga.

Afai na fesuiai ata faataitai a tagata aoga, valaaulia i latou e faasoa atu a latou tusi i le tagata o le vasega na tusia le ata faataitai o loo latou tali atu i ai.

• O le fea le mataupu faavae o le mauaina o le malamalama faaleagaga e te lagona na sili ona fesoasoani e sauni ai oe e tali i lenei ata faataitai? Aisea?

Toe iloilo

Fesoasoani i tagata aoga e toe iloilo le mau faasino ma le fuaitau autu o le mau mo le Mataio 11:28–30 .

O se tasi o auala e fesoasoani ai i tagata aoga e toe iloilo o le tusi lea o mea nei i luga o le laupapa. Afai o maua, mafaufau pe faaaogaina le polokalama faatekinolosi o le Doctrinal Mastery. E ono aoga mo tagata aoga le galulue ma se isi tagata o le vasega, ma feauauai e fai le mau faasino ma fuaitau autu o le mau.

“Mataio __:28–__: Ia outou o mai ia te a_, o outou u__ o e t____ ma mafatia i a____, o au foi e m___ a___ outou.”

Galuega Faaopoopo e Aoao Mai Ai

Ata faataitai e mafai ona faaaoga

Mafaufau e faasoa atu le ata faataitai o le a mulimuli mai pe afai e lē mafai ona mafaufau tagata aoga i se ata a o faagasolo le gaoioiga o le ata faataitai i le lesona.

“Ua ou faalogoina lava le atuatuvale i le taimi lenei. O lea ou te taumafai e faalatalata pea i le Alii, ae ua tetele mai lava mea. O loo faigata le aoga, e lē o lelei mea i totonu o le matou aiga i le taimi nei, ma ua ou lē iloa pe faapefea ona taulimaina nei mea uma. E lē o atagia mai foi a mea o le a faasolo ina lelei se mea. Ua ou popole lava i nei mea uma, ma ou te lē iloa po o le a le mea e fai.”