Mataio 11:27; Ioane 5:19 - 30; Ioane 8:18-28

“O le Atalii e Faailoaina Mai o Ia”

Sa tautino mai le Faaola e mafai ona tatou iloa atili le Tama Faalelagi e ala i le suesueina o le faataitaiga a Lona Alo. O mea uma sa fetalai mai ai ma faia e Iesu Keriso sa mulimulitaia ai o faataitaiga a Lona Tama ma sa faamoemoeina e aumaia atili atoa ai tatou i le Tama. O lenei lesona e mafai ona fesoasoani ia te oe e malamalama atili ai e uiga i le Tama Faalelagi ma Ona lagona e uiga ia te oe.

O le fesoasoani ai i tagata o le vasega e a’oa’o. E faagaeetia tagata o le vasega pe a latou suesue i tusitusiga paia mo le malamalama ma mauaina mea moni o le talalelei mo i latou lava ia. E tatau ona tuu atu ia i latou ni avanoa e faamatala mai ai i a latou lava upu le talalelei ma faasoa atu ma molimau e uiga i mea latou te iloa ma lagonaina. E fesoasoani lea mea e momoli ai le talalelei mai o latou mafaufau ma tuuina i totonu o o latou loto.

Tapenaga mo tagata o le vasega: Valaaulia tagata o le vasega e mafaufau e uiga i o latou sootaga ma le Tama Faalelagi ma pe faapefea ona latou faamalosia.

Gaoioiga Talafeagai mo le Aoaoina

O lenei lesona e talanoaina ai anotusi o le a talanoaina i le Mulimuli Mai ia te A’u pe a suesueina e tagata taitoatasi ma aiga le Mataio 14 ; Mareko 6 ; Ioane 5–6, faapea foi pe a latou suesue i le Ioane 7–10 . O loo ua tuu iinei lenei lesona ina ia maua ai avanoa mo isi lesona o le a faia i vaiaso o mulimuli mai. E mafai ona aoaoina i le vaiaso lenei pe toe suia e fai i se tasi o vaiaso o mulimuli mai.

O le iloaina ai e uiga i le Tama Faalelagi

Mafaufau i le tulaga faatusa lenei:

I se tasi o sauniga faamanatuga talu ai nei, sa faalogo ai Claudio i se tagata o lana uarota o loo tautino faapea, “Ou te iloa o loo silafia ma e alofa le Tama Faalelagi ia te a’u. Na te silafia o’u manaoga ma o loo saili e na te fesoasoani ia te a’u.” Sa faate’ia Claudio ma sa manatunatu pe faapefea ona ia iloa nei mea uma e uiga i le Tama Faalelagi. A o ia tau tomanatu i mea patino na te iloa e uiga i le Tama Faalelagi, sa ia lagona e le matua tele naua. Sa oo lava ina ia sailiili ai i totonu o tusitusiga paia ae sa lē maua foi se manuia i lena taumafaiga.

• O a ni auala e ono tali tutusa ai o tatou lagona e faapei o Claudio?

• E faapefea ona avea ma luitau mo i tatou le lagonaina o le lē iloa o le Tama Faalelagi pe o le lē iloa foi e uiga ia te Ia?

Sauni se auala mo tagata o le vasega e iloiloina ai e le tagata lava ia mea latou te iloa ma malamalama e uiga i le Tama Faalelagi. O le gaoioiga o mulimuli mai o se tasi lea o auala e faatino ai.

O loo maua se manatu faaopoopo i le vaega o le “Gaoioiga Faaopoopo e Aoao Mai Ai”.

Mafaufau i mea ua e aoaoina e uiga i le Tama Faalelagi ma pe faapefea ona aafia ai oe i lena malamalama. I se fasi pepa po o i totonu o lau api faamaumau suesuega, tusi upu nei “Tama Faalelagi” i le ogatotonu. Tusi faataamilo i upu nei mea e te iloa e uiga i le Tama Faalelagi.

• E faapefea e le iloa atili o le Tama Faalelagi ona ono aafia ai le olaga o se tasi tagata?

A o e suesue i lenei lesona, saili mo mea moni e uiga i le Tama Faalelagi ma Lona Alo e mafai ona fesoasoani ia te oe e malamalama atili ai e uiga ia i Laua ma po o a La lagona e uiga ia te oe. Mafaufau pe faaopoopo mea o e aoaoina i lau pepa e uiga i le Tama Faalelagi.Sa fai ma masani ona fetalai Iesu Keriso e faatatau i Lona Tama ma sa Ia faia ma se faamoemoega taua. Faitau i fuaitau o le a mulimuli mai nei, ma vaavaai po o a mea sa finagalo Iesu ia iloa e ona au soo e uiga ia te Ia ma i le Tama Faalelagi:

Tusi mau faasino o tusitusiga paia nei i luga o le laupapa. Mafaufau pe valaaulia tagata aoga e suesue i nei fuaiupu taitasi. Ona mafai lea ona latou faasoa i mea ua latou mauaina i ni vaega laiti, pe ma le vasega atoa.

Mataio 11:27, e aofia ai le suiga i le Faaliliuga a Iosefa Samita o loo faapea mai o e e faaali atu ai e le Atalii na ia lava, o le a latou vaai foi i le Tama.

• Ioane 5:19, 30

• Ioane 8:18–19, 26, 28

• E faapefea ona e faaotooto i mea na aoao mai e le Faaola mai mea na e faitauina?

Sa faamatala mai e Jeffrey R. Holland le Matua o le Korama a Aposetolo e Toasefululua se tasi auala taua e mafai ai ona tatou iloa le Tama Faalelagi.

O le tele o faamoemoega maoae na ausia i le soifuaga ma le galuega a le Alii o Iesu Keriso, o se tasi o vaega tele o lena misiona e masani ona le amanaiaina. Sa lei malamalama atoatoa i ai e na mulimuli ia te Ia i lena taimi, ma o le toatele o le Au Kerisiano o ona po nei ua latou le maua lava, ae o le Faaola lava Ia na fetalai ai pea lava pea ma le malosi. O le upumoni silisili i mea uma na afio mai Iesu e fetalai i ai ma faataunuu, e aofia ai ae maise lava i Lana taulaga togiola ma le puapuaga, sa Ia faaali mai ai ia i tatou le uiga o le Atua lo tatou Tama Faavavau, faapea le atoatoa o Lona gauai atu i Lana fanau i soo se augatupulaga ma soo se atunuu. Sa taumafai Iesu e ala i upu ma galuega e faaali ma faamanino mai ia i tatou le natura moni o Lona Tama, lo tatou Tama o i le Lagi.

(Jeffrey R. Holland, “O Le Silisiliese o le Atua,” Ensign po o le Liahona, Novema. 2003, 70)

• O le a se mea ua e aoaoina mai le faamatalaga a Holland?

O se tasi o mataupu autu e mafai ona tatou aoao i ai o fetalaiga ma faiga a Iesu Keriso e faaali mai ia i tatou uiga o le Tama Faalelagi.

Mafaufau pe tusi le upumoni lenei i luga o le laupapa.

• O le a sou vaai i lenei upu moni o loo aoaoina i upu fetalai a le Faaola lea faatoa uma ona e faitauina?

Sa faamatala atili mai Holland le Matua e uiga i lenei upu moni.

O le fafagaina la o e o fia aai, faamalolo i e mamai, aoaiina o tagata pepelo, ole atu mo le faatuatua—o Keriso lena o loo faaali mai ia i tatou le ala o le Tama, o Le e “alofa tunoa ma alofa mutimutivale, e telegese lona toasa, e onosai ma tumu i le agalelei.” I Lona soifuaga aemaise lava i Lona maliu, na faailoa mai ai e Keriso, “O le alofa lenei o le Atua ua ou faaali atu ia te outou, e faapena foi ia te au.” I le faatinoina atoatoa e le Alii o le tausiga atoatoa a le Tama, i lo Laua puapuagatia ma le fetufaai o le faanoanoa mo agasala ma lototiga o le toatele o i tatou, tatou te iloa ai le uiga tonu o loo i totonu o le folafolaga: “Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. E lei auina mai e le Atua lona Atalii i le lalolagi ina ia faasala i le lalolagi; a ia faaolaina le lalolagi ia te ia” [ Ioane 3:16–17 ].

(Jeffrey R. Holland, “O Le Silisiliese o le Atua,” Ensign po o le Liahona, Novema. 2003, 72)

Fesoasoani i tagata aoga e faataitai le faaaogaina o lenei mataupu autu (ma vaavaai i fetalaiga ma gaioiga a le Faaola) e aoao atili ai e uiga i le Tama Faalelagi. O se tasi faataitaiga o le faiga o lenei mea o loo aofia i lalo.

Filifili le faamaumauga e aupito sili ona e fiafia i ai e uiga ia Iesu Keriso i totonu o tusitusiga paia. Tusi i lalo le mau faasino o tusitusiga paia ma faaotooto le fuaitau. Ona tali lea o fesili o le a mulimuli mai nei:

• O a mea ua aoaoina e uiga i le Tama Faalelagi ma Ona lagona e uiga ia te oe mai fetalaiga ma gaioiga a Iesu Keriso i lenei faamaumauga?

• E faapefea ona aafia e le iloa o lenei mea e uiga i le Tama Faalelagi lau mafutaga ma Ia?

• E faapefea ona fesoasoani ia te oe le mauaina o se mafutaga e sili atu ma le Tama Faalelagi?

Mafaufau pe tusia upu “Tama Faalelagi” i le ogatotonu o le laupapa. Valaaulia tagata aoga e faasoa mai mea na latou aoaoina. E fuafua i le telē o le vasega ma le aofaiga o le taimi avanoa o totoe, e mafai ona faitau pe faaotooto e tagata aoga taitasi le latou faamaumauga. E mafai ona latou tusia mea na latou aoaoina e uiga i le Tama Faalelagi e faataamilo i Lona suafa i luga o le laupapa. I se isi itu, e mafai ona faasoa mai e tagata aoga se ata pue o le faamaumauga mai le Tusi Paia po o le Tusi a Mamona, pe afai o loo i ai.

Saili mo musumusuga mai le Agaga Paia a o e saunia se fuafuaga otooto mo auala e mafai ai ona e faamalosia lau mafutaga ma le Tama Faalelagi, ma tusi i totonu o lau api faamaumau suesuega.

Manatu ma Faamatalaga o Talaaga

E faapefea ona ou aafia mai le iloa o le Tama Faalelagi?

Sa aoao mai le Perofeta o Iosefa Samita (1805–44):

Afai e lē sili atu se mea e iloa e se [tagata] nai lo le ‘ai, inu ma le moe, ma e na te lē malamalama i se fuafuaga e tasi a le Atua, o le mea lava lea e tasi e malamalama i ai manu. E ’ai, inu, moe le manu, ma na te lē iloa se mea sili atu e uiga i le Atua; ae peitai na te iloa mea foi ia tatou te iloa, sei vagana ai ua mafai ona tatou malamalama e ala i musumusuga a le Atua Silisili Ese. Afai e lē malamalama [tagata] i uiga o le Atua, latou te lē malamalama ia i latou lava.

(Aoaoga a Peresitene o le Ekalesia: Iosefa Samita [2007],40)

Faatinoga Faaopoopo e Aoao Mai Ai

O se isi faatinoga e mafai ona amata ai le lesona

Mafaufau pe e te faasoa i se aafiaga patino i le iloaina o ou matua, matua o ou matua, po o se isi tagata e pei o se matua ma po o le a se aafiaga o le faia o lena mea. Valaaulia tagata aoga e mafaufau ma faasoa foi i se tasi aafiaga. Valaaulia tagata aoga e mafaufau i mea latou te iloa ma o loo latou aoaoina e uiga i lo latou Tama Faalelagi.

O se iloiloga e mafai ona fai e le tagata lava ia mo ia

Fesoasoani i tagata aoga e tofotofo i o latou taumafaiga i le taimi nei ia iloa atili e uiga i le Tama Faalelagi e ala i le talosagaina o i latou e faamaea le suesuega o le a mulimuli mai nei:

(A) Ioe malosi (B) Ioe (C) E lē ioe pe leai (D) Leai (E) Leai malosi

1. Ua amata ona ou iloa atili e uiga i le Tama Faalelagi.2. Ou te lagona ua ou faalatalata atili ia te Ia.3. O lau mafutaga ma le Tama Faalelagi ua gata le malosi i le mea ou te manao i ai. 4. Ou te iloa pe faapefea ona faamalosia lau mafutaga ma le Tama Faalelagi.