Mataio 11:28-30
“O A’u Foi E Malolo Ai Outou”
I le taimi o Lana galuega, sa aoao atu e le Faaola le tulafono maualuga o le talalelei ma faamalolo i e mamai. A o faateleina le faatautee e faasaga i le Faaola ma Ana aoaoga, sa Ia ta’usalaina le amio leaga ma folafola atu le malologa mo i latou uma e o atu ia te Ia. O lenei lesona e mafai ona faateleina ai lou talitonuga o le a fesoasoani mai le Alii i ou luitau ma avega mamafa.
Sauniuniga mo tamaiti o le vasega: Valaaulia tamaiti o le vasega e fesili atu i se tagata o o latou aiga po o se uo pe na faapefea ona foai atu e le Faaola le filemu ma le mafanafana ia i latou.
Gaoioiga e Mafai ona Faaaoga e Aoao Ai
O au avega ma luitau
O le gaoioiga ua tuuina atu i lalo e mafai ona fai e le vasega atoa i luga o le laupapa, po o le valaaulia o tamaiti o le vasega e tusi a latou lava ata.
Tusi se ata o se faatagata faafasilaau e faatusa i se tagata talavou. Tusi se ata o se ato faafafa i le patua o lenei ata e faatusa i avega ma popolega o feagai ma tupulaga talavou i aso nei. Tusi i lalo ni avega po o popolega e le sili atu i le lima le aofai i totonu, i luga po o autafa ane o lenei ato faafafa.
Valaaulia tamaiti o le vasega e faasoa atu ata sa latou tusia.
Valaaulia tamaiti o le vasega e moeiini o latou mata ma mafaufau i sa latou tali i le fesili lenei.
-
I se fua mai le tasi agai i le lima, o le lima e faatusaina i le lelei tele ao le tasi e faatusaina i le leaga tele, o le a le manuia ua e lagona e tusa ai ma lou taulimaina o au avega ma mea tutupu e faapopoleina ai oe?
Afai e lei maea ona e faia, mafaufau e faaaoga sina taimi e talosaga ai le Tama Faalelagi e fesoasoani ia te oe ia maua ni mataupu faavae e fesoasoani ia te oe i au avega faapitoa o loo e tauaveina i le taimi nei.Faitau i le Mataio 11:28–30, ma vaai mo upumoni sa aoaoina mai e le Faaola e ono fesoasoani i se tagata ua taotaomia e ni avega mamafa.
Mataio 11:28–30 o se fuaitau o atamai i aoaoga faavae. Mafaufau e maka vaega o le atamai i aoaoga faavae i se faiga mataina e mafai ai ona faigofie ona e mauaina.
Mafaufau e tusi tali a tamaiti o le vasega i fesili nei i luga o le laupapa i tafatafa ane o le ata o le faatagata.
-
O a ni upumoni na e maua?
-
E faapefea ona ono fesoasoani nei upumoni i se tagata o loo lofituina i se taimi faigata?
E ui atonu e fa’aaogaina e tamaiti o le vasega upu eseese, ia faamautinoa e latou te malamalama e faapea afai tatou te o atu ia Iesu Keriso, o le a Ia faamamaina a tatou avega ma aumaia le malologa ia i tatou. Fesili atu i tamaiti o le vasega pe o iai ni a latou fesili e uiga i mea ua latou aoaoina.
Tagai i le vaega o “Gaoioiga Faaopoopo e Aoao Mai Ai” mo se isi auala e fesoasoani atu ai i tamaiti o le vasega e aoao e uiga i fasifuaiupu i le Mataio 11:28–30.
“Ia outou amoina la’u amo”
O nisi taimi e mafai ona faigata ai ona malamalama i upu po o fasifuaiupu i tusitusiga paia. O le iloaina o uiga o upu ma fasifuaiupu e mafai ona fesoasoani tatou te aoaoina ai mea e finagalo le Faaola tatou te iloa. Faataitai lenei [fautuaga] e faaaoga ai le fasifuaiupu “Ia outou amoina la’u amo” ( Mataio 11:29).
Faamalosiau atu i tagata aoga e faasoa mai mea ua latou iloa e uiga i lea fuaiupu e ala i fesili nei: O le a le amo? O le a le amo a Iesu Keriso? E faapefea ona tatou tauaveina le amo a Iesu Keriso?
Faaaoga se faamatalaga po o faamatalaga uma nei e faaopoopo atu i malamalama o tagata aoga.
Faaali atu le ata lenei.
O le amo o se “meafaigaluega lea e tuu faalava i ua o manuvaefa po o tagata e fusi faatasi ai i latou” (Taiala i Tusitusiga Paia, “ Amo,” scriptures.ChurchofJesusChrist.org). O manuvaefa i lenei ata o loo i ai le amo.
Na faasoa mai e Elder Edward Dube o le Fitugafulu le aafiaga lenei:
I le Tesema 2015 i Madziva, Zimbabwe, sa ma vaaia ai ma Naume [lo’u toalua] se tamaloa o loo suaina le eleele ma ni manu se lua. Sa ou ofo e vaai atu o le tasi o manu o se pulu tele lava ao le isi e nao se pulu laititi. Sa ou popole. Sa ou mafaufau leotele, “Pe aisea e faaaoga ai e se faifaatoaga ni manu e le tutusa i le amo e tasi?”
O le tina o Naume, sa latalata mai, sa faasino atu i le amo. Sa ou toe autilo lelei i ai ma na ou vaaia ni fusi [o manoa po o filifili] e fesootai ai le amo i le pulu. O le pulu matua o loo amoina le tele o le mamafa, ae o le pulu laititi o loo aoao atu ina ia iloa sua le eleele.
(Edward Dube, “Iloa ia te Au,” Liahona, Oke. 2020, Aferika Sautesasae Itulau a le Lotoifale, ChurchofJesusChrist.org)
-
Pe faapefea ona tutusa le tatou mafutaga ma le Faaola ma le mafuata a le pulu matua ma le pulu laititi?
-
E faapefea ona faalolotoina lou malamalama e uiga i lagona a Keriso mo oe ona o lou iloaina o le uiga o le amo ?
Na saunoa mai Elder David A.Bednar o le Korama a Aposetolo e Toasefululua e faapea:
O le osia ma le tausia o feagaiga paia e tuufaatasia ai i tatou ma le Alii o Iesu Keriso.
(David A. Bednar, “Tauave ma le Faigofie a Latou Avega,” Ensign po o le Liahona, Me 2014, 88)
-
O a ni auala e te manatu o le osia ma le tausia o feagaiga e amo ai i tatou i le ma faatasi ma le Faaola?
Sa faamatala mai e Elder Dube:
Pe a tatou amo faatasi ma Iesu Keriso, o Ia e amoina le avega, ae tatou te fefaasoaai i le olioli o le galulue. O le valaau a le Alii ia i tatou taitoatasi e aoao ia te Ia e nao le pau lea o le punaoa o le filemu, fiafia ma e tuuina mai ai tali i le mafaufau le mautonu.
(Edward Dube, “Iloa ia te Au,” Liahona, Oke. 2020, Aferika Sautesasae Itulau a le Lotoifale, ChurchofJesusChrist.org)
-
Na faapefea e le aoao e uiga ia Iesu Keriso i lenei tausaga ona fesoasoani ia te oe e tauave lau avega ma aumai ai ia te oe filemu ma le fiafia?
Faaali atu ulutala o gaoioiga nei i luga o le laupapa. Mafaufau e fesili atu po o le fea o faamatalaga nei e mananao tagata aoga e suesue o se vasega. Poo le valaaulia o le vasega e filifili se gaoioiga e suesue taitoatasi, ma se paga, po o se vaega toa laiti. Faaali atu faatonuga mo gaoioiga ina ia mafai ona vaai iai le vasega ao latou suesue.
O mai ia Keriso ma maua Lona malologa
Gaoioiga A: “O mai ia te au” ( Mataio 11:28). E mafai faapefea ona ou sau ia Keriso?
Ina ia maua le fesoasoani a le Faaola ma le malologa ua Ia ofoina mai, e ao ona tatou o atu ia te Ia.
-
Ana fesili atu se tasi ia te oe po o le a le uiga o le o atu ia Keriso, o le a sau tali?
Sa faailoa mai e Elder Richard G. Scott (1928–2015) o le Korama a Aposetolo e Toasefululua ni auala e mafai ai ona tatou o atu ia Keriso.
A tatou tatalo e le aunoa i le taeao ma le po, suesue a tatou tusitusiga paia i aso uma, fai afiafi faaleaiga faalevaiaso, ma auai soo i le malumalu, o loo tatou tali atu ma le naunautai i Lana valaaulia ia “o mai ia te Ia.”
(Richard G. Scott, “Ia Avea le Faaaogaina o le Faatuatua ma Mea E te Faamuamuaina,” Ensign po o le Liahona, Nov. 2014, 94)
Mafaufau e matamata le “O Mai ia Keriso: Pese Autu o le 2014” (4:48) e vaai ai i faataitaiga o auala e mafai e se tasi ona o atu i le Faaola. O loo maua lenei vitio i le ChurchofJesusChrist.org.
-
O a ni mea ua e faia ina ia e latalata atili atu ai ia Iesu Keriso? (E mafai ona aofia ai ni feagaiga na e osia ma tausia.)
-
O le a se mea e te lagona e mafai ona e faia ina ia atili atoatoa ai lou alu atu ia Keriso ma maua ai Lana fesoasoani paia?
Gaoioiga E: “O A’u foi e malolo ai outou” ( Mataio 11:28). E ono faapefea ona aveese e Keriso a’u avega?
O loo tusifaamaumauina i le Tusi a Mamona se faataitaiga mamana o le tuumamaina e le Faaola o avega. Sa ave faatagaotaua ia Alema ma lona nuu, sa faafaigaluega faamalosi, ma sa matua sauaina.
Faitau i le Mosaea 24:12–16 . Atonu foi e te manao e matamata le vitio “Mataupu 17: Ua Sosola Alema ma Lona Nuu” mai le taimi 0:01 i le 1:29. O loo maua lenei vitio i le ChurchofJesusChrist.org.
-
O le a se mea sa e aoaoina e uiga i auala e mafai e le Faaola ona fesoasoani ai ia te oe i le amoina o au avega?
-
O a ni mea na fai e tagata o Alema ina ia maua ai le fesoasoani a le Faaola?
-
E mafai faapefea e le malamalama i lo tatou matafaioi o le aapa atu i le Faaola ona fesoasoani i se tasi o loo feagai ma luitau?
Mafaufau i mea ua tutupu ia te oe po o ni mea ua tutupu i isi tagata ua e iloaina, ma faamau i lalo se taimi na sii ese ai e le Faaola se avega. Ia mautinoa e aofia ai le mea na e faia, pe na fai e le isi tagata e aapa atu ai i le Faaola ma le auala sa Ia fesoasoani atu ai.
A uma ona fai e tagata aoga a latou gaoioiga na filifilia, valaaulia i latou e faasoa mai mea latou te mananao e manatua pea. Mafaufau e faasoa atu se molimau patino pe valaaulia tagata aoga e faasoa a latou molimau i auala na fesoasoani ai le Faaola ia i latou i taimi faigata.
Tala ma Faamatalaga o Talaaga
E faapefea ona fesoasoani mai Iesu Keriso ia i tatou a o tatou o atu ia te Ia?
Sa faamatala mai e Elder John A. McCune o le Fitugafulu ni isi o faamanuiaga e mafai ona oo mai a o tatou o mai ia Iesu Keriso.
Ao tatou taliaina le valaau a le Faaola e “o mai ia te au,”O le a Ia tuuina mai le lagolago, faamafanafanaga ma le filemu e manaomiaina. … E oo lava i o tatou tofotofoga sili ona loloto, e mafai ona tatou lagona le opo mafanafana o Lona alofa pe a tatou faalagolago ia te Ia ma talia Lona finagalo.
(John A. McCune, “O Mai ia Keriso—Ola o ni Au Paia o Aso e Gata Ai,” Ensign po o le Liahona, Me 2020, 36)
O le vitio “Living with Depression” (3:13) o loo tuuina mai ai se faataitaiga o le ala e mafai ona fesoasoani ai Iesu Keriso ia i tatou e tusa lava pe afai e le laveaiina i tatou mai tofotofoga faigata.
Gaoioiga Faaopoopo e Aoao Mai Ai
O se isi gaoioiga e mafai ona aoao mai ai
O lenei gaoioiga e mafai ona faia i le amataga o le vasega. Aumai i le vasega se atigipusa po o se ato faafafa ma ni mea mamafa e tuu i totonu, e pei o ni maa lapopoa po o ni tusi. Valaaulia se tagata o le vasega e sau i luma o le potu, ma fai i ai e uu le atigipusa pe fafa le ato faafafa. Fai i le vasega e tali fesili o loo maua i le amataga o le lesona. E mafai ona lisi e se isi tagata o le vasega ia tali a tagata aoga i luga o le laupapa. A uma mai tali taitasi, tuu se mea mamafa i totonu o le atigipusa po o le ato faafafa seia tumu.
Malamalama i fuaitau i le Mataio 11:28–30
E mafai e tagata aoga ona faitau le Mataio 11:28–30, ma vaavaai ma maka ni fuaitau puupuu e tu matilatila ia i latou. O nisi o faataitaiga e aofia ai le “O mai ia te au,” “o au foi e malolo ai outou,” “Ona maua lea e outou o le malologa mo outou agaga,” “Ia outou faaaoao ia te au,” ma le “Agamalu ma le loto maualalo.”
Valaaulia tagata aoga e filifili se fuaitau se tasi ma tusi i a latou lava upu. Valaaulia i latou e sue se mau faasino e fesoasoani ia latou malamalama ai i le uiga o le fuaitau. Mo se faataitaiga, e mafai ona latou sueina upu o mai, malolo, faaaoao, po o le agamalu i le Taiala i Tusitusiga Paia po o le Topical Guide. Valaaulia tagata aoga e faasoa i mea ua latou mauaina ma le auala atonu e fesoasoani ai i se tasi o loo tauivi ma se avega.