Mareko 2:23–3:6

“Ia Agalelei i le Sapati”

Sa tele ina faitioina e Faresaio ma isi taitai Iutaia le Faaola ona o le ala na Ia tausia ai le aso Sapati. O tali a Iesu i nei taitai faalelotu o le a fesoasoani ai ia te oe e te malamalama atili ai i le faamoemoega o le Sapati ma pe faapefea ona e valaaulia atoatoa faamanuiaga a le Alii i totonu o lou olaga.

Sauniuniga mo tamaiti o le vasega: Valaaulia tamaiti o le vasega e mafaufau i se auala e sili ona latou fiafia e faalatalata atili atu ai i le Faaola, taitoatasi pe faatasi ai ma o latou aiga, i le aso Sapati.

Gaoioiga e Mafai ona Faaaoga e Aoao Ai

O le faamoemoega o le Sapati

Mo le gaoioiga o loo tuuina atu i lalo, mafaufau e tofi ni paga mo tamaiti o le vasega ma valaaulia paga taitoatasi e tali mai i se tasi o tulaga e pei ona tuuina atu.

Vaai faalemafaufau i tulaga e lua ua tuuina atu i lalo. I se tasi o tulaga, o loo faapea atu se tasi ia te oe e tele mea e tatau ona fai faapea foi mea e lē tatau ona fai i le aso Sapati ma afai e te lē mulimulitaia ia mea uma, ua e solia tulafono a le Atua. I se isi tulaga, o loo faapea atu se isi ia te oe o le Aso Sa e leai se eseesega ma soo se isi lava aso ma e tatau ona e faia soo se mea e te manao e fai i Aso Sa.

• O le a le mautinoa o sou lagona e tali atu ai i nei tulaga?

• O a fesili o loo ia te oe e uiga i le aso Sapati?

A o fefaasoaai tamaiti o le vasega ia latou fesili, mafaufau e tusi nei fesili i luga o le laupapa. Afai e lē o mautu se lagona o tamaiti o le vasega e fefaasoaai a latou fesili ma le vasega atoa, valaaulia i latou e tusi a latou fesili i totonu o a latou api talaaga o suesuega. Aua le taumafai e tali ni fesili i lenei taimi, ae uunai tamaiti o le vasega e saili mo tali a o faaauau pea a latou suesuega.

A o e suesue i auala na tausia ai e le Faaola le paia o le Sapati, vaavaai mo tali i au fesili. Saili mo le taitaiga a le Tama Faalelagi e fesoasoani ia te oe.

Na aoao mai le tulafono a Mose e faapea e lē tatau ona galulue tagata o Isaraelu i le Sapati (tagai i le Esoto 31:14–15). Na faaopoopo i ai e tusiupu ma Faresaio a latou lava faauigaga i le tulafono a Mose, ma suia ai lona uluai faamoemoega.

Faitau i fuaiupu ua tuuina atu i lalo, ma faailoga faaupuga o loo faailoa mai ai pe o le a se silasila a Iesu i le aso Sapati.

• Mareko 2:23–28 —Na fesiligia e Faresaio le tatau ai o le ooti fano ma le aia o saito i le Sapati.

• Mareko 3:1–6 —Na fesiligia e Faresaio le tatau ai o le faamaloloina o se tasi i le Sapati.

Mafaufau e fai atu i tamaiti o le vasega e faasoa mai i mea na latou faailogaina ma pe aisea foi.

O le otootoga mo le Mataio 11–12; Luka 11 i le Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023 o loo talanoaina ai le aso Sapati. Afai e tusa le taimi o le lesona o lenei aso ma le otootoga mo le Sau, Mulimuli Mai ia te A’u , mafaufau e fai atu i tamaiti o le vasega e faasoa mai i mea na latou aoaoina mai a latou suesuega i o latou aiga. E mafai foi ona uunaia tamaiti o le vasega e faasoa atu malamalamaaga mai le vasega ma o latou aiga.

Na tuuina mai e Peresitene Russell M. Nelson malamalamaaga o loo tuuina atu i lalo e faatatau i faamoemoega o le aso Sapati:

O le a le uiga o le fetalaiga a le Faaola ina ua Ia fetalai mai “ua faia le sapati mo tagata, a ua le faia tagata mo le sapati”? [ Mareko 2:27 ]. Ou te talitonu na finagalo o Ia ina ia tatou malamalama o le Sapati o Lana meaalofa lea ia i tatou, o loo faatagaina ai le malologa moni [po o le mapusaga] mai faigata o le olaga i aso taitasi ma se avanoa mo le toefaafouina faaleagaga ma faaletino. Na tuuina mai e le Atua ia i tatou lenei aso faapitoa, e le mo mea faafiafia po o galuega o aso taitasi ae mo se malologa mai tiute, faapea foi i le faaletino ma le faaleagaga.

(Russell M. Nelson, “O le Sapati o se Aso Fiafia,” Ensign po o le Liahona, Me 2015, 129)

• O a ni mea na e aoao i ai e uiga i faamoemoega a le Alii mo le aso Sapati?

• O a ni mea e mafai ona tatou aoao i ai e uiga i le Faaola ma Ana gaoioiga ma amioga i le Sapati?

Fesoasoani i tagata aoga e mataulia mataupu faavae e pei lenei: na tuuina mai e le Alii le aso Sapati e fai ai galuega lelei ma malolo ai mai faigata o le olaga i aso taitasi.

• O le a sou manatu e faapefea e le poloaiga a le Atua ia tausi le paia o le aso Sapati ona faaali mai ai Lona alofa mo i tatou?

E mafai faapefea ona e faamamaluina le aso Sapati?

O le malamalama i faamoemoega a le aso Sapati ma i faamanuiaga a le Atua mo oe e mafai ona faaosofia ai oe e tausi le paia o le Sapati. I le aoao ai pe faapefea ona faamamaluina atili le aso Sapati, e te aoao ai e valaaulia atoatoa atili le faamalologa ma le mapusaga a le Faaola i lou olaga.

Tuu atu i tagata aoga faamatalaga nei o se pepa e tufa atu, pe faaali faalautele i luma o le vasega. E mafai ona suesue na faamatalaga e tagata aoga taitoatasi pe o ni vaega toalaiti.

Suesue i punaoa o le a mulimuli mai e aoao atili ai e uiga i le Sapati ma i faamanuiaga e tatou te mauaina pe a faamamaluina.

• Isaia 58:13–14

• Mataupu Faavae ma Feagaiga 59:9-10

Na aoao mai Peresitene Russell M. Nelson le aoaoga lenei e uiga i le faaalia o le tatou alofa i le Atua i le Sapati:

A o ou laitiiti, sa ou suesue i sailiiliga a isi sa faia ai ni lisi e faatatau i mea e fai ma mea e lē faia i le Sapati. O se taimi mulimuli ane faatoa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi [tagai i le Esoto 31:13 ; Esekielu 20:12, 20 ]. Faatasi ai ma lena malamalamaga, sa ou le toe manaomia ni lisi o mea e faia ma mea e lē faia. I taimi na manaomia ai ona ou faia se filifiliga pe o se gaoioiga talafeagai pe leai mo le Sapati, e na o lo’u fesili lava ia te au, “O le a le faailoga ou te manao e avatu i le Atua?” O lena fesili na matua manino mai ai lava a’u filifiliga e uiga i le aso Sapati.

(Russell M. Nelson, “O le Sapati o se Aso Fiafia,” Ensign po o le Liahona, Me 2015, 130)

• O le a se mea na e aoaoina e uiga i le faamoemoega ma faamanuiaga o le aso Sapati?

Matamata le vitio “Share Your Sabbath” (0:53), lea o loo faasoa mai ai ni auala e “agalelei” ai i le aso Sapati.

O le fesili o le a mulimuli mai e mafai ona tuu ai i tagata aoga le avanoa e faasoa mai ai i o latou manatu mai le gaoioiga fautuaina o tapenaga a le tagata aoga.

• O a ni auala e silisili ona e fiafia e faalatalata atili ai ia Iesu Keriso i le aso Sa?

A o faasoa tagata aoga, ia e iloa e ono eseese ni a latou manatu i mea e talafeagai pe lē talafeagai mo le aso Sapati. A manaomia, faamanatu i tagata aoga ia taumafai e malamalama ma faaaloalo i manatu o isi tagata.

• Na faapefea e mea ua e aoaoina i lenei lesona ona fesoasoani e tali ai au fesili e uiga i le aso Sapati?

• Afai e te lei mauaina ni tali o au fesili, o a mea e mafai ona e faia e faaauau ai ona sailia i latou?

• O a ni manatu ua e mauaina e uiga i le po o a mea e mafai ona e faia e maua atoatoa ai faamanuiga o le faamamaluina o le Sapati?

Mafaufau pe molimau atu i le taua o le tausia o le paia o le Sapati. Valaaulia foi tagata aoga e faasoa mai a latou molimau, pe a latou mananao ai.

Tala ma Faamatalaga o Talaaga

Aisea na faitioina ai e Faresaio le au soo ina ua latou “ooti fano fua o au saito” i le Sapati?

I lalo o le tulafono a Mose e mafai e se tagata ona tauina ni saito i o latou lima tau lava ina aua nei soona faia lenei avanoa e selesele ai i le faaaogaina o se selesaito (tagai i le Teuteronome 23:25). Peitai, o le tulafono tuugutu a le au Faresaio, sa oo ina ua sopo atu i lo le tulafono a Mose ma ua faapea mai ai o le ooti limaina o saito i le Sapati ua faasaina.

E faapefea e le loto faafetai ona faamanuiaina lou aafiaga i le faamanatuga ma le Sapati?

I le vitio “Gratitude on the Sabbath Day” (3:38), ua valaaulia ai e Peresitene Henry B. Eyring tagata e faataga le mana o le loto faafetai i totonu o o latou aafiaga o le aso Sapati. O loo maua lenei vitio i le ChurchofJesusChrist.org.

O le a se isi mea e mafai ona ou faia ina ia valaaulia ai faamanuiaga a le Sapati?

Na aumai e Peresitene Russell M. Nelson ni nai malamalamaga e uiga i auala aoga e valaaulia ai le agaga o le aso Sapati i lana saunoaga “O Le Sapati o Se Aso Fiafia” (Ensign po o le Liahona, Me 2015, 129–132).O le vitio “Make the Sabbath a Delight by Finding Your Ancestors” (2:57) o loo faaalia ai le ala e mafai ai ona avea le faaalu o le taimi i le Aso Sa e fai ai galuega o talafaasolopito o aiga, o se aafiaga tele i lou aso ma i lou olaga. O loo maua le vitio i le ChurchofJesusChrist.org.

E mafai faapefea ona manuia lou aiga i le faamamaluina o le aso Sapati?

O le vitio “How We Have Changed—Saisopa Family and the Sabbath Day” (5:03), o loo maua i le ChurchofJesusChrist.org, o loo faasoa mai ai le aafiaga o se aiga o o latou olaga pisi sa suia e ala i le taliaina o le talalelei ma le faamamaluina o le Sapati.

Galuega Faaopoopo e Aoao Mai Ai

E faapefea ona e tapenapena mo le aso Sapati?

E ono aoga mo tagata aoga le faalogologo o le isi i manatu o le isi e uiga i le pe faapefea ona tapenapena mo le Sapati a o faagasolo le vaiaso. Mafaufau pe fesili i le vasega, “O a ni mea ua e matauina o ni tapenaga aoga a o faagasolo le vaiaso e avea ai le Sapati ma se faamanuiaga e sili atu?”