Doktrinal nga Kahanas: Mateo 16:15–19

Si Jesus Miingon, “Hatagan Ko Ikaw sa mga Yawe sa Gingharian”

A young woman meets with her Bishop.

Sa miaging leksiyon, nakat-onan nimo ang mahitungod sa importansiya sa mga yawe sa pagkapari ug giunsa pagtugyan sa Manluluwas sa Iyang mga yawe ngadto sa mga propeta dinhi sa yuta. Kini nga leksiyon maghatag kanimo og oportunidad aron dugangan ang imong kahanas niini nga doktrina pinaagi sa pagmemorya sa pakisayran ug mahinungdanong hugpong sa mga pulong sa kasulatan, pagpasabot sa doktrina, ug paggamit sa mga baroganan sa pag-angkon og espirituhanong kahibalo diha sa sitwasyon sa tinuod nga kinabuhi.

Ang pagkatukma sa panahon sa doktrinal nga kahanas. Namulong ngadto sa mga magtutudlo sa seminary ug institute mahitungod sa doktrinal nga kahanas, si Presidente M. Russell Ballard sa Korum sa Napulog Duha ka Apostoles mitudlo: “Kini nga inisyatibo dinasig ug tukma sa panahon. Kini adunay talagsaong impluwensya sa atong mga kabatan-onan. Hinoon, ang kalamposan sa Doctrinal Mastery [Doktrinal nga Kahanas], ug sa uban pang mga programa sa pagtuon diha sa CES, mag-agad sa inyong paghatag og importansiya niini” (“Ang mga Oportunidad ug Responsibilidad sa mga Magtutudlo sa CES sa Ika-21 nga Siglo” [gabii uban sa usa ka General Authority, Peb. 26, 2016], broadcasts.ChurchofJesusChrist.org).

Pag-andam sa estudyante: Dapita ang mga estudyante nga maghunahuna mahitungod sa mga paagi nga ang ilang mga kinabuhi napanalanginan tungod sa mga yawe sa pagkapari.

Posible nga mga Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas aron itudlo pagkahuman sa “Mateo 16:18–19; Mateo 17:1–7,” nga mao ang pangkontekstong leksiyon para sa tudling sa doktrinal nga kahanas sa Mateo 16:15–19 . Kon kinahanglang ibalhin kini nga leksiyon sa tudling sa doktrinal nga kahanas ngadto sa laing semana, siguroha nga itudlo usab ang tukma nga pangkontekstong leksiyon nianang semanaha.

Ipasabot

Ikonsiderar ang pagdapit sa mga estudyante nga ipraktis ang pagpasabot sa mosunod nga managpares o diha sa gagmay nga mga grupo.

Hunahunaa nga ang usa ka tawo nga imong nailhan nakadungog sa termino nga “mga yawe sa pagkapari” pero wala makasabot niini. Gamit ang Mateo 16:15–19 , ipasabot kon unsa ang mga yawe sa pagkapari ug nganong importante kini. Kon posible, ipakigbahin ang imong pagpasabot ngadto sa higala o sakop sa pamilya. Lagmit nga makatabang usab kon basahon ang pipila sa mga pamahayag sa mga seksiyon 3.0–3.4.1.1 sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlawsa ChurchofJesusChrist.org o sa Gospel Library nga app.

Isulat ang imong pagpasabot bahin sa mga yawe sa pagkapari. Kon napaambit nimo ang imong pagpasabot ngadto sa laing tawo, ihulagway kadali kon unsa ang nahitabo.

Imemorya

Siguroha nga hatagan og panahon ang mga estudyante nga ipraktis ang pagmemorya sa pakisayran sa kasulatan ug mahinungdanong hugpong sa mga pulong sa kasulatan. Ikonsiderar ang pag-andam ug paggunting sa mosunod nga handout sa wala pa ang klase aron kompletohon sa mga estudyante nga managpares o diha sa gagmay nga mga grupo.

Ipraktis ang pagmemorya sa mahinungdanong hugpong sa mga pulong sa kasulatan para sa Mateo 16:15–19 : “Miingon si Jesus, ‘Hatagan ko ikaw sa mga yawe sa gingharian.’” Kon posible, iprinta ang mosunod nga handout ug guntinga ang kada usa sa mga yawe. Isip alternatibo, pagdrowing og mga yawe sa papel ug guntinga kini. Isulat ang usa ka pulong sa hugpong sa mga pulong sa kada yawe. Isulat usab ang pakisayran sa kasulatan sa doktrinal nga kahanas, Mateo 16:15–19 , diha sa usa ka yawe. Sagola ang mga yawe, ug sulayi sa pagbutang og balik niini sa saktong pagkahan-ay. Sublia kini nga kalihokan sa daghang higayon hangtod nga mamemorya nimo ang pakisayran sa kasulatan ug hugpong sa mga pulong. Lagmit nga malingaw ka kon orasan ang imong kaugalingon ug mosulay sa pagpalambo sa imong kapaspas sa kada pagsulay.

Doctrinal Mastery - Matthew

Awhaga ang mga estudyante nga tipigan ang ilang mga yawe para sa kalihokan sa pagrebyo sa umaabot nga leksiyon.

Pagbansay sa paggamit

Rebyoha kauban sa mga estudyante ang mga baroganan sa pag-angkon og espirituhanong kahibalo. Ang usa ka paagi sa pagbuhat niini mao ang pagdapit og usa ka estudyante nga basahon og kusog ang pamahayag mahitungod sa usa sa mga baroganan sa pag-angkon og espirituhanong kahibalo gikan sa mga parapo [paragraph] nga 5–12 sa Mahinungdanon nga Dokumento sa Doktrinal nga Kahanas (2022). Unya awhaga ang klase nga tukion ang saktong baroganan. Sublia kini nga kalihokan sa makadaghang higayon uban sa lain-laing mga estudyante aron matabangan ang klase nga mahimong mas pamilyar sa kada baroganan.

Pagtagana og panahon aron rebyohon ang mga baroganan sa pag-angkon og espirituhanong kahibalo sa mga parapo [paragraph] nga 5–12 sa Mahinungdanon nga Dokumento sa Doktrinal nga Kahanas (2022) sa dili pa magpadayon sa kalihokan sa pagpraktis sa paggamit.

Ang mosunod nga sitwasyon mahimong tun-an sa tinagsa-tagsa, diha sa gagmay nga mga grupo, o magdungan isip usa ka klase. Mahimong bag-ohon ang hilisgotan sa sitwasyon aron mas matubag ang mga panginahanglan sa mga estudyante. Pananglitan, ang video nga nakita ni Vanya sa social media lagmit nga usa ka miyembro sa Simbahan nga nangangkon nga nakahibalo sa adlaw ug oras sa Ikaduhang Pag-anhi.

Nakakita ang imong higala nga si Vanya og video sa social media diin ang usa ka miyembro sa Simbahan misaway sa doktrina sa Simbahan. Kini nga miyembro maalamon ug maaghaton ug nag-awhag sa Simbahan nga usbon ang partikular nga doktrina. Gigamit pa nila ang mga kasulatan aron suportahan ang ilang mga panglantaw. Dili sigurado si Vanya kon unsa ang mahunahuna o kon unsaon pagtubag.

• Unsa kaha nga mga pangutana o mga kabalaka ang aduna si Vanya?

Nagpadala si Vanya kanimo og text message nga nangayo og tabang. Hunahunaa kon sa unsang paagi kaha ka motubag aron makatabang sa pagsulbad sa iyang kabalaka.

Pagsulat og tulo ka text message ngadto kang Vanya. Ilakip ang mosunod:

• Text 1: Mga kamatuoran mahitungod sa kon giunsa paggamit sa Ginoo ang mga propeta ug ang mga yawe sa pagkapari diha sa plano sa kaluwasan nga makatabang kang Vanya sa pagtan-aw sa iyang sitwasyon gikan sa usa ka mahangturong panglantaw.

• Text 2: Balaanong gipili nga mga tinubdan nga magamit ni Vanya aron makahibalo og dugang mahitungod sa mga propeta ug mga yawe sa pagkapari. (Paglakip og dili mominos sa usa ka partikular nga tudling sa kasulatan o pamahayag sa propeta.)

• Text 3: Mga sugyot kon sa unsang paagi nga si Vanya makalihok inubanan sa hugot nga pagtuo diha kang Jesukristo nga mopadayon sa unahan. Kon posible, paglakip og personal nga kasinatian nga may kalabotan sa mga yawe sa pagkapari ug kon sa unsang paagi nga ang paggamit niadto nga mga yawe nakatabang kanimo nga mas mahiduol kang Jesukristo.

Samtang gibuhat sa mga estudyante kini nga kalihokan, bantayi basin adunay naglisod. Kon gikinahanglan, hisgoti sa hilom kauban kanila kon sa unsang paagi sila mahimong motubag. Kon daghan sa klase ang naglisod, ikonsiderar ang pag-undang og kadali sa kalihokan ug pag-awhag sa mga estudyante nga ipaambit ang ilang mga ideya sa pagtubag kang Vanya. Ikonsiderar ang pagtapos sa leksiyon pinaagi sa pagpamatuod nga gisalig ni Jesukristo ang Iyang mga yawe sa pagkapari ngadto sa mga propeta ug mga apostoles sa Ang Simbahan ni Jesukristo sa mga Santos sa Ulahing mga Adlaw.

Pagrebyo sa doktrinal nga kahanas

Sa kaulahian sa klase, rebyoha ang pakisayran sa doktrinal nga kahanas ug mahinungdanong hugpong sa mga pulong sa kasulatan pinaagi sa pagdapit sa mga estudyante nga gamiton ang mga yawe nga ilang gihimo aron pormahon pag-usab ang pakisayran ug mahinungdanong hugpong sa mga pulong sa kasulatan. Kon mapuslanon, hangyoa sila nga sagolon ang ilang mga yawe ug ibalik kini sa saktong pagkahan-ay sa pipila ka higayon.