Doktrinal nga Kahanas: Mateo 22:36–39

Ang Duha ka Dagkong mga Sugo

Jesus is shown with a group of people speaking to a scribe about the two great commandments. Outtakes: include close ups of people in the crowd. (Scene filmed at ext. the temple court of the Women)

Sa Mateo 22:36–39, ang Manluluwas mitudlo kanato og duha ka dagkong sugo. Kini nga leksiyon makatabang nimo sa pagbansay sa paggamit sa doktrina nga gitudlo niini nga tudling ug sa mga baroganan sa pag-angkon og espirituhanong kahibalo aron masabtan unsaon sa pagsunod ang mga sugo sa paghigugma sa Dios ug paghigugma sa inyong silingan.

Pagtabang sa mga estudyante nga makakat-on kon unsaon pagpangita ang mga tubag sa mga pangutana. Ang katuyoan sa doktrinal nga kahanas mao ang pagtudlo sa mga estudyante “kon unsaon pagpangita ang kamatuoran, unsaon paghunahuna mahitungod sa bag-ong impormasyon, ug unsaon pagtubag ang kaugalingon nilang mga pangutana.” Imbis nga hatagan ang mga estudyante og mga tubag sa matag pangutana, ikonsiderar kon hain sa mga pangutana ang makatabang sa mga estudyante sa pagpraktis sa mga baroganan sa pag-angkon og espirituhanong kahibalo ug mogiya nila ngadto “sa balaanong gitakda nga proseso sa pagdiskobre sa kamatuoran” alang sa ilang kaugalingon (tan-awa sa Chad H Webb, “Doctrinal Mastery” [pakigpulong nga gihatag sa tinuig nga sibya sa pagbansay sa Seminaries and Institutes of Religion, Hunyo 14, 2016], broadcasts.ChurchofJesusChrist.org).

Pagpangandam sa estudyante: Dapita ang mga estudyante sa pagrebyo sa mga pakisayran sa doktrinal nga kahanas ug mahinungdanong hugpong sa mga pulong diha sa ilang balay pinaagi sa paghangyo og usa aron mo-quiz nila o sa paggamit sa app sa Doktrinal nga Kahanas. Ang mga estudyante mahimo usab nga dapiton sa paglihok sa ilang mga plano sa pagtuman sa duha ka dagkong sugo.

Posible nga mga Kalihokan sa Pagkat-on

Gidisenyo kini nga leksiyon nga itudlo pagkahuman sa leksiyon nga giulohan og Mateo 22:34–40, ang pangkontekstong leksiyon para niini nga tudling sa doktrinal nga kahanas. Kon kini nga leksiyon sa doktrinal nga kahanas kinahanglang ibalhin ngadto sa laing semana aron mahan-ay gikan sa mga iskedyul sa eskuwelahan, siguroha nga itudlo usab ang tukma nga pangkontekstong leksiyon nianang semanaha.

Imemorya ug ipasabot

Ikonsiderar nga gamiton ang mosunod nga kalihokan o lahi nga mubo nga kalihokan aron matabangan ang mga estudyante sa pagmemorya sa pakisayran sa doktrinal nga kahanas ug mahinungdanong mga pulong.

Bansaya ang pagmemorya sa mahinungdanong mga pulong nga “Higugmaa ang Ginoo nga imong Dios. … Higugmaa ang imong isigkatawo” alang sa pakisayran sa Mateo 22:36–39 .

Pagdrowing og kasingkasing ug isulat ang mga numero 1 ug 2 sa ubos niini. Tapad sa numero 1, isulat ang, “Higugmaa ang Ginoo nga imong Dios”;tapad sa numero 2, isulat ang,”Higugmaa ang imong isigkatawo.” Itudlo ang kasingkasing, ug isulti ang pakisayran [reference]. Sunod, itudlo ang matag numero. Sa inyong pagbuhat niini, isulti ang porsyon sa mahinungdanong mga pulong nga may kalambigitan sa maong numero. Balika ang proseso sa pipila ka higayon.

Ang katuyoan sa mosunod nga seksiyon mao ang pagdapit sa mga estudyante nga magbansay sa pagpasabot sa mga kamatuoran ngadto sa uban, mao nga ang paghatag og mga kapares o paghimo og mga grupo mahimong epektibo.

Basaha ang Mateo 22:36–39 , ug hinumdomi ang milabay ninyo nga pagtuon niini nga mga bersikulo.

Unsa ang pipila sa mga paagi nga kita makahigugma sa Dios sa tibuok natong kasingkasing? Unsaon nato paghigugma ang atong isigkatawo sama sa atong kaugalingon?
Ngano kaha nga kining duha ka sugo gihatag sa ingon niini nga pagkahan-ay?

Ipraktis ang paggamit

Ikonsiderar ang daklit nga pagrebyo kauban sa mga estudyante sa tulo ka baroganan nga pag-angkon og espirituhanong kahibalo. Dayon bahina ang klase ngadto sa paresan o gagmay nga mga grupo ug dapita ang mga estudyante nga magpuli-puli sa pagsulti sa mga baroganan gikan sa ilang panumdoman. Paghangyo og mga moboluntaryo sa pagpamubo niini gamit ang ilang kaugalingong mga pulong.

Kon gikinahanglan, rebyoha ang mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022).Sa pipila ka mga kahimtang, kita tingali maglisod sa paghibalo unsaon sa pagsunod ang mga sugo sa Dios ug pagpakita og gugma alang niadtong dili magmasulundon sa mga sugo sa Ginoo.

Si Elder Lynn G. Robbins sa Seventy mitudlo:

Ang pagsulay sa pagpahimuot og una sa uban kay sa pagpahimuot sa Dios usa ka pagbaliktad sa una ug ikaduhang dagko nga sugo (tan-awa sa Mateo 22:37–39). Kini usa ka paghikalimot kon asa kita moat[o]bang. Ug bisan pa niana, kitang tanan nakabuhat niana nga sayop tungod sa kahadlok sa tawo. …

Ang mga desisyon sa kinaiya gihimo pinaagi sa paghinumdom sa husto nga pagkahan-ay sa una ug ikaduhang dako nga sugo. …

Ang Manluluwas, ang atong labing maayo nga Ehemplo, kanunay nga nag-at[o]bang sa Iyang Amahan. Siya nahigugma ug nagserbisyo sa Iyang isigkatawo apan miingon, “Ako wala magpaab[o]t og dungog nga gikan sa tawo” ( Juan 5:41).

(Lynn G. Robbins, “Hain ka Nag-at[o]bang?,” Liahona, Nob. 2014, 9, 11)

Pamalandongi kini nga mga pangutana sa dili pa buhaton ang mosunod nga kalihokan.

Nakasulay ba mo nga nahadlok nga mohimo og mapinanggaong pagkorihir o sa pagtambag og usa ka higala tungod kay dili mo ganahan nga masilo sila?
Mibati na ba kamo nga kinahanglan kamong mopili tali sa unsay gilaoman sa uban diha ninyo ug sa unsay gilaoman sa Ginoo gikan ninyo?

Ikonsiderar ang paghatag og papel o mga notecard nga kasulatan sa mga estudyante aron ila kining ikabaylo ngadto sa ubang mga estudyante.

Pagsulat og usa ka senaryo diin tingali adunay tawo nga naglisod sa paghigugma sa Dios ug pagsunod sa Iyang mga sugo ug usab sa pagpakita og gugma sa uban. (Timan-i: Ayaw paghimo og senaryo nga posibling mamatikdan sa uban nga may kalabotan sa usa ka tawo o higala.)

Kon gikinahanglan, ang mga ehemplo sa posible nga mga senaryo anaa gilakip sa “Dugang nga Kalihokan sa Pagkat-on” nga seksiyon.

Ikonsiderar ang pagdapit sa mga estudyante sa pakigbayloay ug paghisgot og mga senaryo kauban sa lain pang mga sakop sa klase. Ang pagbuhat niini makatabang sa mga estudyante nga makonektar sa usag usa ug makaangkon og mas dako nga panglantaw. Ang mga senaryo mahimong kolektahon ug iuli na usab nga pinasulagma [random] (ang paghimo nga pabiling dili mailhan makatabang sa mga estudyante aron sila mobati og mas komportable sa pagkahimong matinuoron).

Susiha ang mga konsepto ug mga pangutana inubanan sa mahangtorong panglantaw

Hunahunaa ang mahitungod sa tawo nga anaa sa inyong senaryo kon kamo motubag sa mosunod nga mga pangutana.

Unsang mga pangagpas ang lagmit nga makaimpluwensiya sa tawo sa pagpili nga mopahimuot sa uban imbis mopahimuot sa Dios?
Sa unsang paagi kaha ang pagsabot sa plano sa Langitnong Amahan sa kaluwasan o sa lain pang mga pagtulon-an makatabang sa pagresolba niining mga bakak nga pangagpas?
Unsang mga kamatuoran mahitungod sa Langitnong Amahan ug ni Jesukristo ang makatabang sa tawo aron makita ang uban gikan sa Ilang panglantaw?

Tinguhaon ang dugang nga panabot pinaagi sa balaanong gipili nga mga tinubdan

Sa unsang paagi ang mga kamatuoran diha sa Mateo 22:36–39 makatabang sa paggiya niining tawhana?

Basaha ang mosunod nga mga pamahayag gikan sa ulahing adlaw nga mga propeta aron makita unsa nga mga pagtulon-an ang makatabang niining tawhana sa inyong senaryo.Si Presidente Russell M. Nelson mitudlo:

Usahay kita isip mga lider sa Simbahan gisaway tungod sa hugot nga pagtuo sa mga balaod sa Dios, nagpanalipod sa doktrina sa Manluluwas, ug nagsalikway sa katilingbanong mga pamugos sa atong panahon. …

… Apan dili ba mas labaw nga walay pagpakabana ang atong dili pagsulti sa kamatuoran—nga dili motudlo sa unsay gipadayag sa Ginoo?

(Russell M. Nelson, “The Love and Laws of God” [Brigham Young University debosyonal, Sept. 17, 2019], 3, speeches.byu.edu)

Si Presidente Dallin H. Oaks sa Unang Kapangulohan mipahayag:

Kinahanglan kitang mosulay sa paghupot sa duha ka dagkong mga sugo. Sa pagbuhat niini, naglatay kita sa pino nga linya tali sa balaod ug sa gugma––nagtuman sa mga sugo ug naglakaw sa dalan sa pakigsaad, samtang naghigugma sa atong mga silingan. Kini nga paglakaw nanginahanglan kanato nga magtinguha sa balaanong inspirasyon kon unsa ang suportahan ug unsa ang supakon ug unsaon sa pagpaminaw sa matinahurong paagi ug niana nga proseso makatudlo.

(Dallin H. Oaks, “Duha ka Dagkong mga Sugo,” Liahona, Nob. 2019, 75)

Sa unsang paagi ang pagkahibalo sa mga kamatuoran nga gitudlo niining mga pamahayag nakatabang sa tawo diha sa inyong senaryo?

Molihok inubanan sa hugot nga pagtuo

Unsa man ang mabuhat sa tawo diha sa inyong senaryo aron makakuha sa tabang sa Langitnong Amahan aron masayod unsaon sa paglihok?
Unsaon man nila sa paglihok sa paagi nga matuman ang duha ka dagkong sugo?

Kon ang mga estudyante magbinayloay og mga senaryo, kolektaha ang mga senaryo ug ipasa kini og balik ngadto sa mga estudyante nga nagsulat niini, o ibutang kini sa lamesa ug sila ang pakuhaon.

Rebyo sa doktrinal nga kahanas

Sa sunod nga klase, rebyoha ang pakisayran sa doktrinal nga kahanas ug ang mahinungdanong hugpong sa kasulatan pinaagi sa pagdapit sa mga estudyante sa paghimo og kalihokan sama sa mosunod:

Isulat ang mosunod nga pakisayran ug hugpong sa pulong diha sa inyong journal sa pagtuon ug dayon sulatan ang mga blangko. 

Mateo 22:36–39 : “_____ ang _______ nga imong ____. … Higugmaa ang imong ________.”

Kon gikinahanglan, i-recite ang pakisayran nga kasulatan ug ang mahinungdanong hugpong sa kasulatan. 

Dugang nga Kalihokan sa Pagkat-on

Posible nga mga senaryo

Ikonsiderar ang paggamit sa mosunod nga mga senaryo:

Ang mga ginikanan ni Stanton nagdiborsiyo, ug siya atoa sa iyang papa sa kadaghang higayon sa kataposan sa semana. Ang iyang papa dili ganahan nga si Stanton mosimba ug tuyoon nga mag-iskedyul og mga butang dungan sa oras sa mga serbisyo simbahan. Gusto ni Stanton nga mogahin og panahon kauban sa iyang papa, apan ganahan usab siyang mosunod sa Ginoo pinaagi sa pag-adto sa simbahan.
Si Sara padayon nga mibati sa mga pag-aghat gikan sa Espiritu Santo nga dapiton ang iyang higala nga si Gabe nga mobasa sa Basahon ni Mormon, apan kanunay siyang mobaliwala sa mga pag-aghat kay nasayod siya nga si Gabe aktibo kaayo uban sa iyang pamilya sa laing tinuohan ug dili siya gusto nga mosilo kaniya.