Mateo 22:34–40
Ang Duha ka Dagkong mga Sugo
Sa tinguha nga masulayan ang Manluluwas, usa sa mga Pariseo nangutana unsang sugo sa balaod ang pinakadako. Isip tubag, ang Manluluwas mitudlo nga ang unang sugo mao ang paghigugma sa Ginoo sa tibuok natong kasingkasing, kalag, ug salabotan ug nga ang ikaduha mao ang paghigugma sa atong isigkatawo sama sa atong kaugalingon. Kini nga leksiyon makatabang ninyo nga masabtan unsaon sa pagsunod kining duha sa dagkong mga sugo.
Pagtabang sa mga estudyante nga mobati sa kamatuoran ug kaimportante sa doktrina ug mga baroganan. Ang mga estudyante may dakong kalagmitan nga mogamit sa mga kamatuoran diha sa mga kasulatan kon mobati sila sa kaimportante niini ug mobati og kadinalian aron kini ilakip sa ilang kinabuhi. Usa ka paagi sa pagtabang sa mga estudyante nga mahimo kini mao ang pag-awhag kanila sa pagpamalandong kon sa unsang paagi ang mga kamatuoran konektado ba sa ilang kinabuhi ug sa pagpaambit og personal nga mga kasinatian nga may kalabotan niini nga mga kamatuoran.
Pagpangandam sa estudyante: Awhaga ang mga estudyante sa pag-adto nga andam mopaambit mahitungod sa usa ka tawo nga ilang nailhan kinsa nagpakita nga sila tinuoray nga nahigugma sa Dios ug sa uban.
Posible nga mga Kalihokan sa Pagkat-on
Ang dagkong mga sugo
Mahimong gamiton ang mosunod nga senaryo aron sugdan ang leksiyon o dapiton ang mga estudyante sa pagpaambit og mga sanglitanan bahin sa mga tawo nga susama kang Kristo ug pagtabang kanila nga makita kon sa unsang paagi ang duha ka dagkong mga sugo makatabang kanila nga mahisama sa Manluluwas.
Hunahunaa nga nakigsulti kamo og usa ka higala mahitungod sa inyong relihiyuso nga mga gituohan. Samtang naghisgot sa kaimportante sa mga sugo sa Dios, ang inyong higala nangutana kon unsang piho nga mga sugo ang gitudlo sa inyong simbahan.
Paggahin og usa ka minuto ug paglista kutob sa mahimo og daghan nga mga sugo sa Dios ug mga sumbanan nga inyong mahunahunaan.
Human nga inyong mapaambit ang inyong lista sa mga sugo sa Dios, ang inyong higala nangutana asa sa mga sugo ang labing importante.
Irebyo ang inyong lista ug hunahunaa kon unsaon kaha ninyo sa pagtubag ang iyang pangutana.
Samtang si Jesus nanudlo sa katawhan, daghan nga Pariseo nangutana kaniya, nagtinguha nga siya masuko atubangan sa mga tawo. Basaha ang Mateo 22:36–40 , nga mangita sa usa ka pangutana nga gipangutana ngadto sa Manluluwas ug kon giunsa Niya sa pagtubag.
-
Unsa nga mga hunahuna o mga pagbati ang anaa ninyo mahitungod sa pamaagi sa pagtubag sa Manluluwas?
Ang Manluluwas mipasabot nga ang unang dako nga sugo mao ang paghigugma sa Dios sa tibuok natong kasingkasing, kalag, ug salab[o]tan. Ang ikaduhang dako nga sugo mao ang paghigugma sa atong isigkatawo sama sa atong kaugalingon. Kining duha ka sugo naggikan sa Deutoronomio 6:5 ug Levitico 19:18 . Ang “balaod” nga gipasabot sa Mateo 22:36 usa ka balaod ni Moises.
Hunahunaa ang mahitungod sa mga panginahanglan sa mga estudyante, ug hisgoti ang pipila o tanan sa mosunod nga mga pangutana nga naa sa materyal nga nagsunod. Ikonsiderar kon unsa nga pamaagi ang makatabang sa mga estudyante nga makatubag sa mga pangutana. Sama pananglit, ang pipila mahimong mahisgotan sa klase, sa gagmay nga mga grupo, o sa tinagsa-tagsa diha sa usa ka journal sa pagtuon.
-
Unsay ipasabot sa paghigugma sa Dios sa tibuok ninyong kasingkasing, kalag, kusog, ug salabotan? (Kon gusto ninyo nga mas masabtan kini nga mga pulong, ikonsiderar ang pagpangita sa mga kahulogan niini gamit ang mga tabang sa pagtuon sama sa Ang Giya ngadto sa mga Kasulatan.)
-
Unsa ang pipila ka sanglitanan gikan sa kinabuhi ni Kristo dihang Siya mipakita nga Siya nahigugma sa Dios niini nga paagi?
-
Sa inyong hunahuna unsa kaha ang ipasabot sa paghigugma sa inyong silingan sama sa inyong kaugalingon?
-
Sa unsang paagi ang pagsunod niining duha ka dagkong mga sugo makatabang nato nga mahimong sama ni Jesukristo?
Timan-i nga sa Mateo 22:40 , si Jesus mitudlo nga ang tanan nga sugo sa Dios gidesinyo aron matabangan ang katawhan nga makapakita sa ilang paghigugma sa Dios ug sa ilang isigkatawo.
-
Sa unsang paagi ang pagkamasulundon sa duha ka dagkong mga sugo makatabang kanato sa pagsunod sa tanan pang uban nga mga sugo?
Si Presidente Russell M. Nelson mipasabot sa unsang paagi ang atong gugma alang sa Dios konektado sa atong gugma alang sa uban.
Kon higugmaon nato ang Dios uban sa tibuok natong kasingkasing, Iyang ipaling ang atong mga kasingkasing ngadto sa kaayohan sa uban diha sa matah[o]m, mahiyason nga paagi.
(Russell M. Nelson, “Ang Dako ug Ikaduhang Sugo,” Liahona, Nob. 2019, 97)
-
Ngano kaha nga ang atong gugma sa Dios makapaduol sa atong mga kasingkasing ngadto sa uban?
Gamita ang tip sa pagtudlo ug ang pagpangandam sa estudyante alang niini nga leksiyon pinaagi sa pag-awhag sa mga estudyante sa pagpaambit og mga ehemplo bahin sa mga tawo kinsa nahigugma sa Dios ug sa uban. Ang pagbuhat niini makatabang sa mga estudyante nga mobati sa kamatuoran ug sa kaimportante niini nga mga sugo ug sa pagtino og mga paagi nga kini ilang magamit. Paminawa og maayo ang ilang mga tubag, ug pasalamati ang mga estudyate sa ilang pagpaambit.
-
Kinsay inyong nailhan nga usa ka maayong ehemplo sa pagtuman sa duha ka dagkong mga sugo?
-
Unsa ang mga paagi nga sila mipakita niini nga gugma? Unsaon ninyo sa pagsunod ang ilang mga ehemplo sa pagpakita og gugma sa uban sa yanong inadlaw-adlaw nga mga paagi?
Sa inyong journal sa pagtuon, isulat ang unsay inyong nahibaloan mahitungod sa Langitnong Amahan ug kang Jesukristo nga makadasig ninyo sa pagtuman sa duha ka dagkong mga sugo. Tingali makatabang ang pagpamalandong sa pihong paagi sa mga kasinatian dihang kamo mibati sa Ilang gugma alang kaninyo.
Pagdapit og andam nga mga estudyante sa pagpakigbahin kadali kon unsay ilang gisulat.
Ang Gugma sa Dios maoy angay nga atong iprayoridad
Samtang importante ang pagsunod sa duha ka dagkong mga sugo, si Presidente Dallin H. Oaks mipaambit og usa ka pasidaan:
Ang atong kadasig sa pagtuman niining ikaduha nga sugo kinahanglan nga dili makapahikalimot sa una, ang paghigugma sa Dios sa tibuok natong kasingkasing, kalag, ug salab[o]tan. Atong mapakita kana nga gugma pinaagi sa “pagtuman sa [Iyang] mga sugo” [ Juan 14:15 ].
(Dallin H. Oaks, “Duha ka Dagkong mga Sugo,” Liahona, Nob. 2019, 73–74)
-
Ngano kaha nga ang ingon niini nga pagkahan-ay sa sugo importante man?
-
Unsa kaha ang modangat nga mga problema kon atong unahon ang paghigugma sa atong isigkatawo kay sa paghigugma sa Dios?
-
Unsa nga mga sitwasyon o mga kahimtang ang lagmit ninyong atubangon diin kinahanglan ninyong isiguro nga himoong usa ka prayoridad ang paghigugma sa Dios?
Kon ang mga estudyante nagkinahanglan og usa ka ehemplo kon giunsa sa usa ka tawo sa paghimo sa Dios nga usa ka prayoridad, ikonsiderar ang pagtan-aw sa “Espirituhanong mga Alimpulos” gikan sa time code 7:40 hangtod 9:13. Kini nga video anaa sa https://www.churchofjesuschrist.org/study/general-conference/2014/04/spiritual-whirlwinds?lang=ceb.
Paghimo og plano
Pamalandongi ang bag-o lang ninyong mga oportunidad nga makasunod sa duha ka dagkong mga sugo. Sa sukod nga uno hangtod singko, gradohi ang inyong kaugalingon unsa kamo kamasulundon sa matag usa niini nga mga sugo, nga ang uno “maayo kaayo” ug singko alang sa “dili maayo.”
Pagbuhat og plano diha sa inyong journal sa pagtuon sa pagsunod niining duha ka dagkong mga sugo nga mas hingpit gayod.
-
Paglista og pihong mga buhat nga inyong mahimo aron mas momaayo ang pagsunod niiining duha ka dagkong mga sugo. Paminawa og maayo ang mga impresyon gikan sa Espiritu Santo, ug pagpili og usa aron ipadayon sa pagsunod niini.
-
Isulat kong sa unsang paagi ninyo mapadayon kana nga buhat. Ikonsiderar ang pagpambit sa inyong plano ngadto sa inyong mga ginikanan o kasaligan nga higala ug sa pagdapit kanila sa pagtabang kaninyo. Ilha nga ang Dios motabang kaninyo samtang inyong buhaton ang tanan (tan-awa sa Doktrina ug mga Pakigsaad 123:17).
Dasiga ang mga estudyante sa pagpadayon sa ilang mga plano, ug pahibaloa sila nga sa umaabot nga leksiyon sa pagsusi (“Pagsusi sa Inyong Nakat-onan 5”) lagmit aduna silay kahigayonan nga makapadayon niini nga plano. Ipahayag ang pagsalig diha kanila, ug pasaligi sila nga ang Ginoo motabang kanila sa ilang mga paningkamot.
Komentaryo ug Background nga Impormasyon
Unsaon nako sa pagkat-on nga mahigugma sa akong kaugalingon?
Sa iyang pakigpulong nga “Kini Mao ang Atong Panahon!” Si Elder S. Gifford Nielsen sa Seventy namulong bahin sa kaimportante sa paghigugma sa atong kaugalingon (Liahona, Mayo 2021, 64–67). Tan-awa ang “Kita Naghisgot Kang Kristo,” nga anaa sa https://www.churchofjesuschrist.org/study/liahona/2021/05/33nielsen?lang=ceb, gikan sa time code 7:36 hangtod sa 9:32.
Sa unsang paagi ang duha ka dagkong mga sugo nagkahiusa? (tan-awa sa 1 Juan 4:7–11, 20–21)
Si Elder Peter M. Johnson sa Seventy mitudlo:
Hinumdomi nga ang una og dako nga sugo mao ang paghigugma sa Dios sa tibuok natong kasingkasing, gah[o]m, hunahuna, ug kusog [tan-awa sa Mateo 22:37–38 ]. Ang tanan natong buhaton kinahanglang dinasig sa atong gugma Kaniya ug sa Iyang Anak. Kon magpalambo kita sa atong gugma alang Kanila pinaagi sa pagtuman sa Ilang mga sugo, ang atong kapasidad sa paghigugma sa atong kaugalingon ug sa uban molambo. Makasugod kita sa pagserbisyo sa pamilya, mga higala, ug mga silingan kay makita nato sila sama sa pagkakita sa Manluluwas kanila—isip mga anak sa Dios [tan-awa sa Juan 3:16 ; 1 Juan 4:19 ; Mosiah 2:17 ].
(Peter M. Johnson, “Gah[o]m sa Pagbuntog sa Kaaway,” Liahona, Nob. 2019, 111)
Sa unsang paagi ang pagsunod sa mga sugo nga higugmaon ang Dios ug ang uban makaapekto sa akong kinabuhi?
Si Presidente M. Russell Ballard, Akting nga Presidente sa Korum sa Napulog Duha ka Apostoles, mitudlo:
Ang pagkamasulundon ngadto niadtong duha ka mga sugo naghatag og paagi sa pagsinati og dugang nga kalinaw ug hingpit nga kalipay. Kon kita mohigugma ug moserbisyo sa Ginoo ug mohigugma ug moserbisyo sa atong mga silingan, dayag nga kita mobati og dugang nga hingpit nga kalipay nga moab[o]t kanato sa walay mas maayong paagi.
(M. Russell Ballard, “Ang Tinuod, Putli, ug Yanong Ebanghelyo ni Jesukristo,” Liahona, Mayo 2019, 29)
Kini nga video anaa sa https://www.churchofjesuschrist.org/study/general-conference/2014/04/spiritual-whirlwinds?lang=ceb.
Sa unsang paagi ang gugma sa Dios miimpluwensiya kanato sa pagsunod sa duha ka dagkong mga sugo?
Si Elder Jeffrey R. Holland sa Korum sa Napulog Duha ka Apostoles mipamatuod:
Ang unang dako nga sugo sa tanang kahangt[o]ran mao ang paghigugma sa Dios sa tibuok natong kasingkasing, gahj[o]m, hunahuna, ug kusog—mao kana ang una ug dakong sugo. Apan ang unang dako nga kamatuoran sa tanang kahangt[o]ran mao nga ang Dios nahigugma kanato sa tibuok Niyang kasingkasing, gah[o]m, hunahuna, ug kusog. Kana nga gugma mao ang pundasyon nga bato sa kahangt[o]ran, ug kini maanaa sa tuk[o]ranan nga bato sa atong inadlaw-adlaw nga kinabuhi. Sa pagkatinuod kini lamang inubanan nianang kasigurohan nga nagdilaab sa atong kalag, nga kita makaangkon sa pagsalig aron magpadayon sa pagpaningkamot nga molambo, padayon sa pagpangita og kapasayloan sa atong mga sala, ug pagpadayon sa pagtugyan niana nga grasya sa atong silingan.
(Jeffrey R. Holland, “Ugma ang Ginoo Mobuhat og Katingalahan diha Kaninyo,” Liahona, Mayo 2016, 127)
Dugang nga mga Kalihokan sa Pagkat-on
Pagtuman og una sa unang dako nga sugo: pokus alang sa puli nga leksiyon
Dapita ang mga estudyante sa pag-ila sa kalibotanong mga tradisyon, balaod, o kostumbre nga tingali makaimpluwensiya kanato sa pagbutang sa atong gugma sa isigkatawo labaw sa gugma sa Ginoo. Ang mga sanglitanan puwedeng maglakip sa pagminyo sa kaparehas og sekso, uban pang mga pagsupak sa balaod sa kaputli, ug mga pagsupak sa Pulong sa Kaalam.
Ikonsiderar ang paggamit sa mosunod nga mga kapanguhaan nga makagiya sa panaghisgot nga gibase sa importansya sa pagsiguro nga kita nagtuman sa unang sugo ug dili motugot sa mga kalibotanong mga impluwensiya sa pagbalda kanato sa atong paghigugma sa Dios. Pagpokus ngadto sa Manunubos ug sa kon giunsa Niya pagpakita ngari kanato pinaagi sa Iyang ehemplo kon unsaon sa paghigugma og una ang Dios samtang sa gihapon naghigugma sa atong mga isigkatawo.
-
Dallin H. Oaks, “Duha ka Dagkong mga Sugo,” Liahona, Nob. 2019, 73–76
-
Lynn G. Robbins, “Hain Ka Nag-at[o]bang?,” Liahona, Nob. 2014, 9–11