Atamai i Aoaoga Faavae: Mataio 5:14–16

“Ia Faapea ona Pupula Atu lo Outou Malamalama i luma o Tagata”

Sa poloaiina e le Faaola Ona soo ia avea i latou ma faataitaiga mo isi e ala lea i le mulimuli atu ia te Ia. O lenei lesona e mafai ona fesoasoani ia te oe e faaaoga mataupu faavae mo le mauaina o le malamalama faaleagaga ina ia avea ma faataitaiga mo isi ina ia latou latalata atili atu i le Faaola.

Iloiloga o mataupu faavae o le mauaina o le atamai faaleagaga. Faamanatu pea lava pea i tagata aoga ia mataupu faavae e tolu mo le mauaina o le malamalama faaleagaga: faatino i le faatuatua, iloilo manatu ma fesili ma se vaaiga e faavavau, ma saili le malamalama atili e ala i punaoa paia ua filifilia. I lenei lesona, o le toe loiloina o nei mataupu faavae e mafai ai e tagata aoga ona faataitai le faaaogaina.

Tapenaga mo tagata aoga: Valaaulia tagata aoga e mafaufau i se tagata i o latou olaga o loo avea ma se faataitaiga lelei mo i latou. Ona fai lea i ai e mafaufau e vili le tagata lea pe tusi i ai se feau patino e faaali atu i ai la latou faafetai.

Gaoioiga e Mafai ona Aoao Mai Ai

A’o tauloto ma faamatala

Tuu atu se avanoa mo le vasega e a’o tauloto ai le mau faasino ma le fasifuaitau autu o le mau. O se faataitaiga lea se tasi o se auala e fai ai.

Faitau le Mataio 5:14–16 .

Tusi se ata o le fasifuaitau autu “Ia faapea ona pupula atu lo outou malamalama i luma o tagata” ma le mau faasino Mataio 5:14–16 . Ao tusi lau ata, mafaufau i auala e faaaofia ai le mau faasino e fesoasoani e te manatua ai.

Ao e tilotilo i le ata sa e tusia, faitau soo le mau faasino ma le fasifuaitau autu o le mau. Ona tilotilo ese lea, ma taumafai e toe fai tauloto soo le mau faasino ma le fasifuaitau autu o le mau.

Mo le gaoioiga lenei, uunai tagata aoga e faaaoga a latou ata e faamatala ai upu moni mai le fuaitau o le atamai i aoaoga faavae ae le na o le talatalanoa i le ata lava ia.

Faaali atu lau ata i se tasi o sui o le vasega, ma faamatala pe faapefea ona iloa atu le fuaitau o le atamai i aoaoga faavae ma le faasinoupu.

A mafai ona fai, mafaufau e faatautau i luga o le potuaoga ni isi o ata ua tusia e mafai ona faaaoga e le faiaoga ma tagata o le vasega i le lumanai mo lesona po o gaoioiga toe faamanatu.

Faataitai le fa’aaogaina

I lenei faataitaiga o le faaaogaina, o le a e faaaogaina mataupu faavae e filima’oti ai pe faapefea ona avea ma se faataitaiga mo isi ma valaaulia ai i latou e faalatalata atili i le Faaola.

Toe iloilo i parakalafa 5–12 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2022).

Mafaufau e faaaoga le vitio “Bullying—Stop It” (10:22), e maua i le ChurchofJesusChrist.org, e avea ma se vaaiga faataitai o le fa’aaogaina.

O nisi o manatu mo le fa’aaogaina o lenei vitio e maua i le vaega “Gaoioiga Faaopoopo e Aoao Mai Ai.”

Faitau le ata faataitai lenei, ma mafaufau pe mafai faapefea ona e tali atu pe afai ua e i ai i le tulaga a Raul.

O Raul, o se ositaulaga ua faatoa faauuina, o loo iai faatasi ma ana uo ma ua amata ona fai e nisi ni talatausua mataga, ma tautatala le mafaufau i se tasi e iloa e Raul. Ua le nofo lelei Raul ma ua ia iloaina le sese o mea ua latou faia. Ao ia mafaufau po o le a se mea e fai, sa faasaga mai lana uo o Iese, o se tasi e ese lana lotu ma o se tagata e fiafia i ai Raul ma fai atu ia Raul, “Ei, o le a le mea ua loloto ai lau pupula?”

Mafaufau i mataupu faavae taitasi mo le mauaina o le malamalama faaleagaga e fesoasoani e atiae ai lau tali atu.

Manatu e valaaulia le vasega e galulue i paga po o i vaega toalaiti. Atonu e aoga le faaali atu o nei faatonuga mo tagata aoga.

Iloilo manatu faavae ma fesili faatasi ma se vaaiga e faavavau

Filifili se tagata e tasi mai le ata faataitai (O Iese po o le tagata o loo faatauemu i ai).

• O le a sou manatu, o le a se lagona o le Alii i le tagata ua e filifilia?

• E faapefea e le vaai atu i le tagata lea e faapei ona silasila i ai le Alii, ona aafia ai le tali a Raul i le feili a Iese?

Saili le malamalama atili e ala i punavai paia ua atofaina

• E faapefea e le manatua ma le faaaogaina o mataupu faavae i le Mataio 5:14–16 ona fesoasoani mo Raul?

• O a ni isi punaoa paia ua atofaina e te manatu e mafai ona fesoasoani atu ia Raul?

Faatino i le faatuatua

• Pe aisea e ono faigata ai ia Raul ona faatino lona faatuatua i lenei tulaga?

• O le a se mea e te fautuaina ai Raul e mafai ona ia faia e faatino ai i le faatuatua?

Valaaulia ni isi o tagata aoga e faasoa mai a latou tali. Mafaufau e faailoa ma faamalo atu i tagata aoga i mataupu faavae mo le mauaina o le malamalama faaleagaga ua latou ta’ua.

Mafaufau i se tulaga e tali pei o le tulaga o Raul o loo feagai ma oe i le taimi nei pe mafai ona oulua fetaiai i le lumanai.

• Pe faapefea ona fesoasoani atu ia te oe ia mea sa e aoaoina i le aso, ina ia avea oe ma se faataitaigia mo isi?

Toe iloilo

Fesoasoani i tagata aoga e toe iloilo le mau faasino ma le fuaitau autu o le mau mo le Mataio 5:14–16 i se lesona o i luma. O se tasi nei o faataitaiga.

Toe tagai i le ata sa e tusia mo le Mataio 5:14–16 . Ao e tilotilo i le ata, ia fai soo le mau faasino ma le fasifuaitau autu o le mau. Taumafai e faifai pea mai le manatuaga.

Gaoioiga Faaopoopo e Aoao Mai Ai

O se isi gaoioiga mo le faamalamalamaina o le atamai i aoaoga faavae

Faaali atu ni ata o ni puna o le malamalama, e pei o se afi, o se matauila, o se moli uila, ma isi mea. Valaaulia tagata aoga e filifili se tasi o nei mea ma faaaoga e faamatala ai se upu moni mai le Mataio 5:14–16 .

Valaaulia tagata aoga e faaaoga fesili nei e fesoasoani i le tapenaina o a latou faamatalaga.

• O le a le malamalama e tatau ona tatou faapupula atu?

• E faapefea ona tatou faapupulaina lena malamalama?

O se isi faataitaiga mo le faaaogaina

O le vitio “Bullying—Stop It” (10:22), e maua i luga o le ChurchofJesusChrist.ord, o loo faaali mai ai ni faataitaiga o alii talavou ma tamaitai talavou o loo faatino o latou faatuatua. Mafaufau e taofi le vitio i le taimi 4:08. Ona talanoaina lea o mea e faafaigata ai i nisi taimi ona faatinoina i le faatuatua. A uma, valaaulia tagata aoga e matamata pe o faapefea ona faatino e le alii talavou le faatuatua ma vaai atu i le tulaga mai se vaaiga e faavavau. A uma le vitio, e mafai ona talanoaina e tagata aoga le Mataio 5:14–16 ma pe mafai faapefea ona faaaoga se punaoa paia ua filifilia e fesoasoani ai ia i latou i se tulaga e pei ona faaalia i le vitio.