Mataio 5:1–12

O Faaamuia

Sa amata le lauga a le Faaola i luga o le mauga i le aoao atu o tagata i se auala e faamanuia ma fiafia ai latou. Sa saunoa Peresitene Harold B. Lee (1899-1973), o nei a’oa’oga “e aofia ai ma le faamaoni, se faavae mo se olaga sili ona atoatoa lelei” (A’oaoga mai Peresitene o le Ekalesia: Harold B. Lee [2000], 200). O le a fesoasoani lenei lesona ia te oe e iloa ai uiga Faakeriso, ma fai sau fuafuaga e atiina ae ai ao e sailia le fiafia ma le atoatoaga.

O le faamoemoega o le seminare. O le faamoemoega o le seminare o le fesoasoani i le tupulaga talavou ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu paia, ma ia saunia i latou lava, o o latou aiga, ma isi mo le ola e faavavau faatasi ma lo latou Tama o i le Lagi. A o e saunia au lesona, ia fuafua ma le agaga tatalo pe faapefea ona e fesoasoani ia ausia lenei faamoemoega i aso taitasi.

Tapenaga a tagata aoga: Valaaulia tagata aoga e filifili se tasi o uiga faaleatua i le Mataio 5:1–12 latou te fia malamalama atili iai. Fesili i ai e aoao po’o le a le uiga, ma mafaufau pe mafai faapefea e lena uiga faaleatua ona tau atu ai i le fiafia.

Gaoioiga e Mafai ona Aoao Ai

Faateleina o le fiafia

Mafaufau e tusi fesili nei i luga o le laupapa ae lei amataina le vasega.

• O le a se taimi sa matuā e fiafia ai lava?

• Pe na umi lenā fiafia? Aisea na umi ai pe na lē umi ai foi?

A o amata e le Faaola Lana galuega, sa Ia tuuina atu se lauga e lata ane i le Sami o Kalilaia. O lea lauga e tele lava ina ta’u o le Lauga i luga o le Mauga ma o loo tusia i le Mataio 5–7 . A o afio atu Le Alii e asiasi ia Sa Nifae, sa Ia tuuina atu se lauga faapena foi (tagai i le 3 Nifae 12–14).

O le Mataio 5:1–12 ua lauiloa o Faaamuia, e sau mai i se upu Latina o lona uiga o le “amuia” po o le fiafia ( Mataio 5:3, vaefaamatalaga a). I nei fuaiupu, na faailoa mai ai e Iesu ia uiga faaleatua ua ia te Ia ma Lona Tama ia e taitai atu ai i le fiafia moni i lenei olaga ma i le olaga a sau. O le atiina’e o nei uiga faaleatua o le a fesoasoani ai e te avea atili ai faapei o le Tama Faalelagi ma Iesu Keriso.

Faitau le Mataio 5:1–12, ma vaavaai ma maka ia uiga faaleatua na aoao mai e le Faaola e uiga i faamanuiaga folafolaina mo uiga faaleatua taitasi.

Pe mafaufau e matamata le vitio “Sermon on the Mount: The Beatitudes” mai le taimi 0:00 agai le 1:15, e faalogologo ai i uiga faaleatua sa aoao mai e le Faaola. O loo maua lenei vitio i le ChurchofJesusChrist.org.

O se tasi a’oa’oga e atagia ma manino mai i nei faitauga o le a tatou atina’eina uiga Faakeriso, e maua atili e i tatou le fiafia.

• O le a sou manatu i le ala na soifua ai le Faaola na saofaga i Lona fiafia?

A faapea sa valaaulia tagata aoga e aoao e uiga i se tasi o nei uiga faaleatua a o lei amataina le vasega, valaaulia i latou e faasoa mai mea sa latou aoaoina. Fesili i tagata aoga po o a punavai na latou faaaogaina e aoao ai e uiga i le uiga faaleatua.

Aoao e uiga i se tasi pe sili atu o uiga faaleatua o lo o ta’ua i lalo. Toe manatunatu pe mafai faapefea e le atiina ae o le uiga faaleatua ma le mauaina o ona faamanuiaga ona fesoasoani ia te oe ia e fiafia.

Tuu atu i tagata aoga fesili nei e fai ma tufaaga. Fautuaina tagata aoga e tu’u le tufaaga lenei i se mea e mauagofie ai mo le toe faaaogaina i le lumanai.

O Faaamuia
Mau Faasino	Uiga Faaleatua
Mataio 5:3; 3 Nifae 12:3	Loto maualalo. O le lotomaualalo po o le “iloa ma le agaga faafetai lou faalagolago atu i le Alii—o le malamalama lea o loo i ai ia i tatou le manaomia faifai pea o Lana fesoasoani. O le lotomaulalo o se faailoaga lea i a tatou taleni ma tomai o meaalofa mai le Atua” (Autu o le Talalelei, “Lotomaualalo,” topics.ChurchofJesusChrist.org).
Mataio 5:4	Faavauvau. O le lagona ma le faaalia o le faanoanoa i se mea. E mafai e se tagata ona faavauvau ona o fitā o le olaga e oo i ai latou faapea ma si tagata. E mafai foi e se tagata ona faavauvau ona o le faanoanoa i le agasala.
Mataio 5:5	Agamalu. O le “‘Mata’u i le Atua, amiotonu, loto maualalo, mafai ona a’oa’oina, ma onosa’i imafatiaga’ [Taiala i le Tusitusiga Paia, Agamalu,’ scriptures.ChurchofJesusChrist.org]. Mo i latou o lo’o iai lenei uiga faaleatua, ua loto e mulimuli ia Iesu Keriso, ma o ō latou uiga e to’amalie, agamalu, onosa’i ma faigofie” (Ulisses Soares, “Ia e Agamalu ma Loto Maualalo,” Ensign po o le Liahona, Nov. 2013, 9).
Mataio 5:6; 3 Nifae 12:6	O le fia ‘ai ma fia inu i le amiotonu. O le i ai o se manaoga sili ia iloa ma fai le finagalo o le Atua.
Mataio 5:7	Alofa atu. O le iai o uiga “agalelei, faaaloalo, faamagalo, agavaivai, ma le onosai, tusa lava pe tatou te iloa ia faaletonu o isi tagata (Autu o le Talalelei, “Alofamutimutivale,” topics.ChurchofJesusChrist.org).
Mataio 5:8	Loto mama. O le faitaulia o se tasi o i latou e “alolofa i le Alii, o e saili e mulimuli ia te Ia ma tausi Ana poloaiga, o e e taumafai e ola i olaga mama ma tumau faamaoni e oo i le iuga. O e loto mama o i latou o e pulea o latou mafaufauga e tausisia le saoloto o i latou lava mai faiga ma amioga le mama” (Sheldon F. Child, “O Afioga a Iesu: Ola Mama,” Ensign po o le Liahona, Ian. 2003, 44).
Mataio 5:9	Faatupu filemu. “Ia fesoasoani i tagata ia maua auala e laugatasia ai, pe a vaai isi i eseesega” (Henry B. Eyring, “Aoaoina i le Perisitua,” Ensign po o le Liahona, Me 2011, 63).
Mataio 5:10–12	Sauaina ona o le amiotonu. O le naunau e usitai ma puipui Iesu Keriso ma Ana aoaoga, tusa lava pe amusia pe agaleagaina ai i tatou mo le faia o lena mea.

Mafaufau ma talanoaina ia auala eseese e faamatalaina ai e le lalolagi le fiafia. Ona faatusa lea i le fiafia i le ala a le Alii. Talatalanoa pe faapefea e le ola i Faaamuia ona eseese mai le ola i ala o le lalolagi ae o le a tau atu ai i le fiafia tumau i le ala a le Atua.

• Ua faapefea ona faataitai e le Faaola se tasi pe sili atu foi o nei uiga faaleatua i tusitusiga paia po o i lou olaga?

• O le a faapefea e le atiinaeina o le uiga faaleatua po o uiga faaleatua na e filifilia ona faateleina ai lou fiafia? Aisea?

Faailoaina o uiga faaleatua i lou lava tagata

Fai le iloiloga lenei. Ua faamoemoe e fesoasoani ia te oe e iloa lelei ai uiga faaleatua ua e ola ai ma uiga e mafai ona e atiina ae atili.

Tusi se numera mai le 1 i le 5 i autafa o uiga faaKeriso taitasi (1 ”e lei matuai atinaeina” ma le 5 ”maualuga le atinaeina”).

__ Ou te loto maualalo [pe ou te mativa i le agaga].__ Ou te lagona le faanoanoa mo isi pe a latou faavauvau, ma ou te lagonaina foi le faanoanoa faaleatua pe a ou agasala.__ Ou te agamalu.__ Ou te fia ‘ai ma fia inu i le amiotonu.__ Ou te alofa atu.__ Ou te loto mama.__ Ou te fa’atupu filemu.__ Ou te faatuatua pe a sauaina a’u ona o o’u talitonuga.

Faailoa mai ni uiga faaleatua o loo gasolo lelei ona e atiinae, ma ave le faafetai i le Atua mo lou agai i luma ina ia e faapei atili o Ia ma Iesu Keriso. Mafaufau i uiga faaleatua o loo e mana’o e atinae atili, ma fesili i le Atua e fesoasoani ia te oe i le atina’eina.

Tuu atu ia lava se taimi mo tagata aoga e faamaea ai le iloiloga ma mafaufau loloto i lo latou agaigai i luma i uiga faaleatua. O le faia o lena mea e fesoasoani e atili sao lelei ai la latou vaai ia i latou lava ma faamalolosia ai a latou sootaga ma le Tama Faalelagi.

A faapea e faigata ia oe ona e iloa po o a uiga faaleatua o loo e lelei ai pe manaomia ai foi lou galue ai, e ono fesoasoani, le talatalanoa ma ou matua, po o nisi tagata faatuatuaina. Fesili i ai e faailoa mai po o a ni uiga faaKeriso ua latou iloa ia te oe ma nisi uiga e mafai ona e faaleleia atili.

O le matafaioi a le Faaola i le atiinaeina o uiga faaKeriso

E tatau ona tatou maua le fesoasoani a le Faaola e atinae ai uiga Faakeriso. Sa faamatala mai e Elder Dieter F. Uchtdorf o le Korama a Aposetolo e Toasefululua:

O uiga faa-Keriso o ni meaalofa mai le Atua. E le mafai ona atiina ae e aunoa ma Lana fesoasoani. O le fesoasoani e tasi lea tatou te manaomia uma lea ua tuuina fua mai ia i tatou e ala i le Togiola a Iesu Keriso. O le i ai o le faatuatua ia Iesu Keriso ma Lana Togiola o lona uiga o le faalagolago atoa atu lea ia te Ia—faalagolago i Lona mana faavavau, atamai, ma le alofa. O uiga faaKeriso e oo mai i o tatou olaga a o tatou faaaogaina ma le amiotonu o tatoufaitalia. O le faatuatua ia Iesu Keriso e taitaiina atu ai i faatinoga. A i ai lo tatou faatuatua ia Keriso, ua lava lo tatou faatuatua i le Alii e mulimuli ai i Ana poloaiga—e tusa lava pe le atoatoa lo tatou malamalama i o latou mafuaaga. I le saili atu ina ia avea atili e faapei o le Faaola, e moomia ai ona tatou toe iloiloina o tatou olaga e le aunoa ma faalagolago i le ala o le salamo moni, i le atoatoa ona lelei o Iesu Keriso ma faamanuiaga o Lana Togiola.

(Dieter F. Uchtdorf, “Uiga FaaKeriso—O Le Mana lea e Siitiaina i Tatou i Luga,” Ensign po o le Liahona, Nov. 2005, 102–103)

• O le a se mea sa e matauina i lenei saunoaga e mafai ona fesoasoani ia te oe i le atinaeina o uiga Faakeriso?

Fai se fuafuaga

Atinae se fuafuaga e te galue ai ia e avea atili e faapei o le Tama Faalelagi ma Iesu Keriso. Faaaofia ai ma ni faatinoga e mafai ona e faatinoina i aso taitasi e te manatu o le a fesoasoani ia oe. Manatua e saili le fesoasoani a le Faaola. Mafaufau e fesili i aiga ma uo faatuatuaina e lagolago atu i au taumafaiga. Atonu foi e te manao e tusifaamaumau lau fuafuaga i totonu o lau Tusi Taiala Mo Talavou po o lau api talaaga mo suesuega.

Tala ma Faamatalaga o Talaaga

Na faapefea ona aoao i tatou e le Faaola e uiga i Ona uiga i le Lauga i luga o le Mauga?

Na aoao mai Peresitene Harold B. Lee (1899–1973) e faapea:

Na afio mai Keriso i le lalolagi e le gata e fai ma Togiola mo agasala a tagata ae ia faia foi ma se faataitaiga i luma o le lalolagi e uiga i le tulaga o le atoatoa i le tulafono a le Atua ma o le usiusitai i le Tama. I lana Lauga i luga o le Mauga na tuu mai ai e le Matai ia i tatou se faaaliga o lana lava amio, lea e atoatoa lelei, … ma o le faia faapea ua aumai ai ia i tatou se mamanu mo o tatou lava olaga.

(Aoaoga a Peresitene o le Ekalesia: Harold B. Lee [2000], 199–200)

O le a le uiga, o i latou o e fiafeinu i le amiotonu o le a malilie i latou?

Ina ua tuuina atu e le Faaola le Lauga i luga o le Mauga i Amerika, sa Ia fetalai, o i latou o lo’o fiaa’ai ma fiainu i le amiotonu “e maoona i latou i le Agaga Paia” ( 3 Nifae 12:6).

O a nisi o uiga FaaKeriso?

Mafaufau e matamata le vitio “Christlike Attributes” (2:53), e maua i le ChurchofJesusChrist.org. O lenei vitio e faailoa ai isi uiga faaleatua o le Faaola ma sa faataitai mai i Lona soifuaga.

//media.ldscdn.org/webvtt/youth/2014-youth-activity-resources/2014-01-001-christlike-attributes-eng.vtt

Gaoioiga Faaopoopo e Aoao Mai Ai

Valaaulia tagata aoga e aoao atu

Mafaufau e valaaulia tagata aoga e saunia se tautalaga i se tasi o Faaamuia. (E mafai ona faia ma se tasi i le vasega.) A maea ona tapena ia tautalaga a tagata aoga, valaaulia nisi e faasoa mai i le vasega. Afai sa galulue tagata aoga ma se isi o le vasega, e mafai ona latou faasoa faatasi a latou tautalaga ma le vasega.

O Faaamuia ma le atoatoaga

O le saunoa ai i Faaamuia, na aoao mai ai e Peresitene Harold B. Lee (1899–1973) “o nei fetalaiga a le Faiaoga Sili e aofia ai … le faavae mo se olaga atoatoa lelei” (A’oa’oga a Peresitene o le Ekalesia: Harold B. Lee [2000], 200).

Valaaulia tagata aoga e talanoaina ni auala eseese e mafai ona fesoasoani ai le ola i Faaamuia ia i tatou ina ia ola atoatoa ai e faapei o le Tama Faalelagi ma Iesu Keriso (tagai i le Mataio 5:48 ; 3 Nifae 12:48).

O isi vaega o Faaamuia

Valaaulia tagata aoga e faitau le Luka 6:20–26 ma le 3 Nifae 12:1–12 ma ia talanoaina ni malamalamaaga faaopoopo e maua mai i nei fuaiupu.

Galuega mo le api talaaga

Valaaulia tagata aoga e tusi i le pito i luga o a latou api talaaga se ullutala e faapei o lenei:

“ Mataio 5–7 : E mafai ona ou avea atili e faapei o le Tama Faalelagi ma Iesu Keriso e ala i le …”

Faamalosiau i tagata aoga e faaopoopo i lenei tusiga ni o latou mafaufauga ma lagona latou te maua a o latou suesue i le Lauga i luga o le Mauga.