Mataio 5; Luka 6

Vaaiga Aoao

I le amataga o le Lauga i le Mauga, na aoao mai le Faaola i le auala e mafai ai ona maua e tagata le fiafia. Na Ia aoao mai o a tatou faataitaiga amiotonu e mafai ona faamanuiaina ai isi. Na Ia faatonuina Ona soo e fai ma faataitaiga mo isi e ala i le mulimuli atu ia te Ia. Na Ia aoao mai le ala na Ia faataunuuina ai le tulafono a Mose ma sa Ia folasia mai ai foi le tulafono maualuga o le talalelei. Na Ia valaaulia tagata uma ina ia atoatoa ona lelei o a latou amio e pei ona atoatoa ona lelei o le Tama Faalelagi.

Mataio 5:1–12

Faamoemoega o le lesona: O lenei lesona o le a fesoasoani i tagata o le vasega e faailoa uiga faaKeriso ma fai se fuafuaga e atinae ai ia uiga a o latou sailia le fiafia ma le atoatoa.

Tapenaga a le tagata o le vasega: Valaaulia tagata o le vasega e filifili se tasi o uiga faaleatua o loo i le Mataio 5:1–12 latou te mananao e fiailoa atili i ai. Fai atu ia i latou e aoao po o le a lona faauigaga ma mafaufau pe faapefea e lena uiga faaleatua ona tau atu ai i le fiafia.

Vitio: “Lauga i luga o le Mauga: O Faaamuia” (2:08; matamata mai le 0:00 i le 1:15)
Tufaaga: “O Faaamuia”

Fautuaga mo aoaoga i fesootaiga faavitio: E aofia i isi polokalama faatekinolosi mo vitio se avanoa mo se laupapa paepae e mafai ona faaaogaina e tagata o le vasega e ta pe tusi ai foi. Afai o i ai lena avanoa, mafaufau e valaaulia tagata o le vasega e saili mo Faaamuia i le Mataio 5:1–12 ma tusi mea ua latou mauaina i luga o le laupapa paepae. Ona mafai lea ona latou faaopoopo i ai faauigaga o upu i le taimi latou te mauaina ai.

Mataio 5:13–16

Faamoemoega o le lesona: O lenei lesona o le a fesoasoani i tagata o le vasega e iloilo ai a latou faatinoga ma uiga faaalia ina ia atagia lelei atili ai le malamalama o Iesu Keriso.

Tapenaga a le tagata o le vasega: Valaaulia tagata o le vasega e mafaufau i fesili o loo mulimuli mai: O ai i lou olaga ua fai ma faataitaiga i le ola e faapei o Keriso i le upu ma le amio? O a latou mea e fai e atagia mai ai le malamalama ma le alofa o le Atua? E faapefea ona aafia oe ma isi i a latou faatinoga?

Meafaitino: Masima ma se meaai e ono faamasima; se fāata ma se peni maka e mafai ona tape gofie.

Atamai i Aoaoga Faavae: Mataio 5:14–16

Faamoemoega o le lesona: E mafai e lenei lesona ona fesoasoani i tagata aoga e faaaoga mataupu faavae o le mauaina o le malamalama faaleagaga ina ia avea ma faataitaiga mo isi ma faalatalata atili ai i le Faaola.

Tapenaga a le tagata aoga: Valaaulia tagata aoga e mafaufau i se isi i o latou olaga ua fai ma faataitaiga lelei mo i latou. Ona fai lea ia i latou e mafaufau pe vili i lenei tagata pe tusi se tusi puupuu e momoli i ai lo latou loto faafetai.

Meafaitino: Sapalai mo tagata aoga e fatu ai se ata (laupepa, peni vali, ma isi mea)

Fautuaga mo aoaoga i fesootaiga faavitio: Tapena e faaali mea e manaomia ona toe faasino i ai tagata aoga, e pei o mataupu faavae e tolu o le mauaina o le malamalama faaleagaga ma le ata faataitai. Faaaoga le auaunaga e faasoa ai le lau o le komepiuta, pe faaali foi aitema nei i le talanoa [chat].

Mataio 5:17–47

Faamoemoega o le lesona: E mafai e lenei lesona ona fesoasoani i tagata aoga e ola e tusa ai ma tulafono maualuga a Keriso ina ia mafai ona latou avea atili e faapei o le Tama Faalelagi.

Tapenaga a le tagata aoga: Valaaulia tagata aoga e tatalo ina ia faiaoga le Agaga ia i latou i totonu o seminare. E mafai foi ona valaaulia tagata aoga e tatalo mo o latou faiaoga ma isi tagata o le vasega.

Meafaitino: O se ata o se mea ua faafouina–o se telefoni, se masini, se vaega o lavalava, ma isi mea
Vitio: “Watch Your Step” (2:36)

Fautuaga mo aoaoga i fesootaiga faavitio: Afai o filemu tagata aoga pe foliga faafefefe i le taliga o fesili po o le faasoaga o malamalamaaga, mafaufau e valaaulia i latou e tali atu e faaaoga ai le talanoa [chat].

Mataio 5:48

Faamoemoega o le lesona: O lenei lesona o le a fesoasoani i tagata e malamalama ai i le poloaiga a le Faaola ina “ia atoatoa … e pei o lo [tatou] Tama o i le lagi e atoatoa ona lelei o ia” ( Mataio 5:48).

Tapenaga a le tagata aoga:Valaaulia tagata aoga e aumai i le vasega ni o latou ata a o laiti. E ono aoga atili le vave fai o lenei mea i se vaiaso pe sili atu ma le fesoasoani a matua.

Anomea e faaali:O saunoaga a Peresitene Russell M. Nelson, Elder Jeffrey R. Holland, ma Elder Gerrit W. Gong, mo tagata aoga e suesue i ai i ni vaega toalaiti

Fautuaga mo aoaoga i fesootaiga faavitio: Mafaufau pe valaaulia tagata aoga e galulue i totonu o potu e taape i ai [breakout rooms] e talatalanoa ai i faamatalaga faaperofetaga na aofia i le lesona. Faamautinoa le tofia o se taitai vaega ma fai muamua faatonuga manino ina ia mafai ai ona amata vave talatalanoaga a tagata aoga.