Mataio 5:13–16

“O Outou o le Malamalama o le Lalolagi”

O ai se tagata ua avea ma se faataitaiga lelei mo oe i le ola amiotonu? Na faapefea ona e latalata atili i le Atua ona o lana faataitaiga? Ina ua uma ona aoao atu i faaamuia, ia fesoasoani tatou te malamalama ai i le natura ma le uiga o le Atua, na aoao mai e Iesu Keriso e faapea o a tatou faataitaiga amiotonu e mafai ona faamanuia ai isi. Ua faamoemoe lenei lesona e fesoasoani ia te oe e faaaoga lenei upu moni ma toe iloilo ai au faatinoga ma uiga faaalia ia atagia lelei mai ai le malamalama o Iesu Keriso.

Sauniuniga mo tagata aoga: Valaaulia le vasega e mafaufau i fesili nei:

O ai se tagata i lou olaga o se faataitaiga o le ola faaKeriso i le upu ma faatinoga?
O a mea latou te faia e atagia mai ai le malamalama ma le alofa o le Atua?
E faapefea ona aafia oe ma isi tagata i a latou faatinoga?

Gaoioiga e Mafai ona Fai e Aoao Ai

Masima o le lalolagi

E tele taimi sa faaaoga ai e le Faaola faatusatusaga po o upu valiata e aoao mai ai manatu faigofie e i ai uiga loloto. A o e suesue i lenei lesona, mafaufau i meafaitino sa fetalai i ai Iesu e mafai ona fesoasoani ia te oe e malamalama ai i mea na Ia aoao mai.

A mafai ona fai, aumai i le vasega se masima ma ni meaai eseese ua maea ona tipitipi faalaiti e pei o fualaau aina suamalie, fualaau faisua, aano manufasi, po o se sisi. (A le mafai, fesili i le vasega pe ua latou ’aia se meaai e tatau ona faamasima ae peitai e leai se masima na tuu iai.) Valaaulia i latou e taumafai e tofo ni meaai eseese ua faamasima ma meaai e lei faamasimaina.

Faitau le Mataio 5:13, ma vaavaai pe faapefea ona faamatala e Iesu Keriso Ona soo.

E ese mai le faaaogaina e faamanaia ai le tofo o le meaai, o a isi mea e mafai ona faaaoga i ai le masima?

Valaaulia se tagata aoga e faitau le parakalafa lea mai le Sau, Mulimuli Mai ia te Au.

Ua leva ona faaaoga le masima e faasao ai, faamanogi, ma faamama. Sa i ai foi le uiga faalelotu o le masima mo tagata Isaraelu. … A leai se tofo o le masima, ona le aoga lea, pe “leai se mea e toe aoga ai” ( Mataio 5:13). E tupu le mea lea pe a faafefiloi pe faaleagaina e isi elemene.

(Sau, Mulimuli Mai ia te Au—Mo Tagata Taitoatasi ma Aiga: Feagaiga Fou [2019], 31)

O le a sou manatu i mea na aoao mai e le Faaola e ala i le faatusaina o Ona soo i le masima?
O a ni mea patino e mafai ona faaleagaina ai o tatou olaga faaleagaga?

Faaaoga sina taimi e manatunatu ai i lou lava loto pe faapefea, i le avea ai ma masima o le lalolagi, ona fesoasoani e faalelei atili ai tagata o siomia oe. Mafaufau foi pe o a faaosoosoga o feagai ma oe ma pe mafai faapefea ona e tausisia lou mama. Afai ua e faatagaina ni mea leaga i totonu o lou olaga, e mafai ona aveeseina e ala i le meaalofa o le salamo ua maua e ala ia Iesu Keriso.

Malamalama o le Lalolagi

Faitau i le Mataio 5:14–16, ma vaavaai mo mea o loo faamoemoe mai Iesu Keriso mo i tatou i le avea ai o ni Ona soo.

O le a se mataupu faavae o le upumoni e mafai ona e mauaina i le Mataio 5:14–16 ?

Mai le Mataio 5:14–16 e ono mafai ona e mauaina ai se mataupu faavae e pei o lea: O a tatou faataitaiga amiotonu e mafai ona uunaia ai isi e viia le Tama Faalelagi.

O le a sou manatu i le uiga o le viia o le Tama Faalelagi?

Ina ua faatasi le Faaola toetu ma tagata Sa Nifae, sa Ia aoao atili atu i latou e uiga i le malamalama e tatau ona siitia i luga e Ona soo. Mafaufau e fefaasinoai pe faafesootai le Mataio 5:14–16 i le 3 Nifae 18:24–25 (tagai Mataio 5:16, vaefaamatalaga a).

Faitau i le 3 Nifae 18:24–25, ma vaavaai mo le malamalama e tatau ona siitia i luga e le au soo moni.

E faapefea e aoaoga a le Faaola i le 3 Nifae 18:24–25 ona aafia ai lou malamalama i le Mataio 5:14–16: ?

Faaali atu i le vasega se fā’ata. A faapea o susulu mai le la i totonu o le potu, faaaoga le fā’ata e faasusulu atu ai le la i le isi itu o le potu. A faapea e leai se la o susulu mai, faaali atu i nai tagata o latou ata i le fā’ata ma fesili atu i ai po o manino lelei o latou ata. Ona faaaoga lea o se penimaka e mafai ona tapeese, e valivali ai luga o le fā’ata. Taumafai e toe faaaoga le fā’ata e toe faasusulu atu ai le la i le isi itu o le potu pe fesili i le vasega po o lelei pea la latou vaai i o latou ata ina ua valivali le fā’ata.

Fesili i tagata aoga po o le a se mea e mafai ona latou aoaoina e uiga i le faasusuluina atu o le malamalama o Keriso mai lenei faataitaiga.

O Iesu Keriso o le Malamalama moni o le Lalolagi, ma a tatou mulimuli atu ia te Ia ma tatou avea atili faapei o Ia, e toe susulu atu mai ia i tatou le malamalama ua Ia foaiina mai. (Tagai i le Ioane 1:4, 9 ; 8:12 ; Mataupu Faavae ma Feagaiga 50:24 ; 93:2 .)

O faatusa sa faaaoga e le Faaola

O fesili nei e mafai ona fesoasoani atu ia te oe e mafaufau loloto ai i faatusa sa faaaoga e le Faaola i le Mataio 5:14–16 .

Faatonu le vasega e talatalanoa i upu valiata faafaatusa eseese. E mafai ona fai lenei mea i ni ala eseese: o se vasega, i vaega toalaiti, po o suesuega a le tagata lava ia.

O se aai i luga o le mauga:

E mafai faapefea ona faigata na nanā le mulimuli ia Iesu Keriso, e pei o se aai i luga o se mauga?
I aso anamua, sa fausia aai i luga o mauga ina ia puipuia ai mai i ni osofaiga e ono tulai mai. E mafai faapefea e le ola ai ma le lototoa i le talalelei ona maua ai le puipuiga mai faatosinaga leaga?
O le a se mea ua aoaoina ai oe mai lenei ata faafaatusa e uiga i le faamoemoe o le Faaola mo oe, o O Lona soo, ina ia e ola ai?

O se moligao:

E mafai faapefea ona faapei oe o se lamepa i se potu pogisa ma faasusulu atu le malamalama o le Faaola i tagata uma?
O le a se mea e ono mafua ai ona nanā e nisi tagata i lalo o se ato (tuugalamepa) le malamalama e avatu e le Atua ia i latou?

O le a se mea ua aoaoina ai oe e lenei ata faafaatusa e uiga i le faamoemoe o le Faaola mo oe, o Lona soo, ina ia e ola ai?

Faitau le saunoaga lenei mai ia Peresitene Dieter F. Uchtdorf, ao i ai i le Au Peresitene Sili, ma vaavaai mo mea e mafai ona e aoaoina e uiga i le malamalama o Iesu Keriso.

O taimi uma e liliu atu ai o outou loto i le Atua i le tatalo faamaulalo, tou te mauaina Lona malamalama. O taimi uma tou te saili atu ai i Lana afioga ma Lona finagalo i totonu o tusitusiga paia, e faatuputeleina ai lava le susulu o le malamalama. O taimi uma tou te maitauina ai se tasi o mafatia ma faataulagaina ai lou lava toafimalie e aapa atu ai ma le alofa, o le a faalauteleina ma le malamalama ma maena. O taimi uma e te teenaina ai se faaosoosoga ae filifili le mama, o taimi uma e te saili pe tuuina atu le faamagaloga, o taimi uma e te molimau atu ai ma le lototele e uiga i le upumoni, e tuliesea e le malamalama le pouliuli ma tosina mai ai isi o loo saili foi i le malamalama ma le upumoni.

(Dieter F. Uchtdorf, “O E Tauaveina le Malamalama Faalelagi,” Ensign po o le Liahona, Nov. 2017, 80)

E faapefea ona e manatu e fesootai lenei saunoaga i le Mataio 5:14–16 ?

Manatua sa aoao mai e Iesu o tatou o le “masima o le lalolagi” ma le “malamalama o le lalolagi” ina ua faatoa mae’a ona Ia aoao mai i Faaamuia—o uiga faaKeriso e fesoasoani ia avea atili ai i tatou faapei o Ia (tagai i le Mataio 5:3–12).

E faapefea ona fesoasoani le ola faaKeriso i a tatou gaoioiga ma uiga e faamalolosia ai isi tagata e faalatalata atili atu i le Tama Faalelagi?
O a ni mea e mafai ona e faia ia avea ai oe ma se faataitaiga amiotonu o le Faaola mo isi tagata?
Afai na e filifilia se tasi o Faaamuia i le lesona talu ai e faataitai i lou olaga, e faapefea ona fesoasoani lena uiga ia avea ai oe ma masima o le lalolagi po o le malamalama i le lalolagi?

Manatu ma Faamatalaga o Talaaga

E faapefea e a’u faatinoga ona aafia ai lo’u tofo i le avea ai o se masima o le lalolagi?

Na aoao mai Peresitene James E. Faust (1920–2007) o le Au Peresitene Sili:

O niuterene faaleagaga, lea e tausia ai i tatou ina ia ola maloloina faaleagaga, e mafai ona mou atu lo latou aoga ma le malosi pe afai tatou te le ola agavaa i le taitaiga faalelagi tatou te moomia. … E moomia ona tatou tausia o tatou mafaufau ma tino ia mama mai soo se ituaiga mausa o mea ua avea ma faafatiatama’i. Tatou te le filifili lava e ‘ai ni meaai mafu pe ua faaleagaina. I le ala filifili lava lea e tasi, e tatau ai ona tatou faaeteete ina ia aua nei faitauina pe matamata foi i soo se mea e le tauleleia. O le tele o mea palapala faaleagaga lea e oo mai i o tatou olaga e auala mai i le initoneti, taaloga komepiuta, ata i televise ma tifaga lea o loo matuai maualuga mai ai lava le faauigaseseina ma le faaalia i tulaga mataga o uiga maualalalo o le tagata. Talu ai ona o lo o tatou ola i se siosiomaga faapena, e moomia ai ona tatou faateleina lo tatou malosi faaleagaga.

(James E. Faust, “Niuterene Faaleagaga,” Ensign po o le Liahona, Nov. 2006, 55)

E mafai faapefea ona faateleina lo’u malamalama?

Na aoao mai e Peresitene Henry B. Eyring:

O taimi taitasi e te filifili ai e taumafai e ola atili e faapei o le Faaola, o le a faamalosia lau molimau. O le a i ai se taimi e te iloa ai e oe lava ia o Ia lava o le Malamalama o le Lalolagi. O le a oo ina e lagonaina le malamalama ua faatupulaia i lou olaga. O le a le oo mai e aunoa ma se taumafaiga. Ae o le a oo mai a o tuputupu a’e lau molimau ma ua e filifili e faafaileleina. O le folafolaga mautinoa lenei mai le Mataupu Faavae ma Feagaiga: “O le mea e mai i le Atua o le malamalama lea; ma o ia o lē e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai” [Mataupu Faavae ma Feagaiga 50:24]. O le a avea oe ma se malamalama i le lalolagi pe a e faasoa atu lau molimau i isi. O le a e faasusulu atu i isi le malamalama o Keriso i lou olaga. O le a saunia e le Alii auala mo lena malamalama e pai atu ai ia i latou e te alofa i ai.

(Henry B. Eyring, “O Se Molimau Ola,” Ensign po o le Liahona, Me 2011, 128 )

Na aoao mai Peresitene Thomas S. Monson:

Sa taitasi ona tatou o mai i le lalolagi ina ua mavae ona tuuina mai le Malamalama o Keriso. A tatou mulimuli i le faataitaiga a le Faaola ma ola e pei ona sa Ia soifua ai ma e pei ona sa Ia aoao mai, o le a mumu lena malamalama i totonu o i tatou ma o le a faamalamalama ai le ala mo isi.

(Thomas S. Monson, “Avea ma se Faataitaiga ma se Malamalama,” Ensign po o le Liahona, Nov. 2015, 86)