Ioane 4, Vaega 2

Vai Ola

Sa a’oa’oina e Iesu le fafine Samaria i le vaieli e uiga i le vai ola e Na te ofoina atu. O lenei lesona ua faamoemoe e fesoasoani ia oe e atili malamalama ai i le vai ola ua foaiina mai e le Faaola: o le a lea, aisea e te manaomia ai, ma pe faapefea ona e maua.

Fetuunaiga o gaoioiga ina ia fetaui ma manaoga. O nei faataatiaga e lē faapea o se tusiga e ao lava ona e mulimuli ai. Ae, ia faaaoga nei mea o se punavai o ni manatu e valaaulia ai au lava musumusuga. A o e mafaufau i manaoga o au tamaiti aoga, ma tatalo mo se taitaiga mai lou Tama o i le Lagi, o le a taitaiina oe e fetuunai manatu po o fautuaga i nei punaoa ina ia talafeagai lelei ma na manaoga.

Sauniuniga mo tagata aoga: Valaaulia tagata aoga e faatusatusa taimi sa o latou lagonaina ai le gaogao faaleagaga ma taimi sa latou lagonaina ai le faamalieina faaleagaga. O le a le mafuaaga o lenei eseesega?

Gaoioiga e Mafai ona Fai e Aoao Mai Ai

O le ala i le fiafia ma le faamalieina

Amata le vasega i le faasoa atu o le saunoaga lenei a Elder Corbridge, ma talanoaina fesili o loo sosoo ai. Mafaufau e fai se lisi i luga o le laupapa e tusi ai tali a tamaiti aoga i le fesili muamua.

Na aoao mai Elder Lawrence E. Corbridge o le Fitugafulu:

E na o le tasi le ala i le fiafia ma le faamalieina. O [Iesu Keriso] o le Ala. O nisi lava ala uma, soo se isi lava ala, po o le a lava le ala, e faavalevalea lea.

Na te ofoina mai se vaieli o le vai ola. A le o le tatou feinu ma le toe galala ai, pe o le tatou lē feinu ma galala ai pea lava faavalevalea.

(Lawrence E. Corbridge, “O Le Ala,” Ensign po o le Liahona, Nov. 2008, 34)

• O a nisi o mea e saili iai tagata mo le fiafia ma le faamalieina, e mafai ona tumau ai pea lo latou lagona galala po o le le malilie faaleagaga?

• Aisea e te manatu e liliu atu ai tagata i nisi o taimi i mea e le aumaia ai le faamalieina tumau?

• O le a le mea ua ofoina mai e Iesu Keriso e aumai ai le fiafia ma le faamalieina tumau?

Valaaulia tamaiti aoga e iloilo o latou lava olaga e ala i le tuuina atu i ai o se avanoa latou te mafaufau ai i fesili o i lalo.

Mafaufau pe fesootai faapefea nei fesili i lou olaga. E iai ni mea e te liliu atu i ai mo le fiafia ma le faamalieina e lē faamalieina moni ai ou manao? O a ni aafiaga na tupu ia te oe sa e lagonaina ai le filemu ma le fiafia tumau lea e na o Iesu Keriso e mafai ona ala mai ai?

Vai ola

Matau mai lau a’oa’oga o le Ioane 4 i le lesona talu ai na a’oa’o e Iesu le fafine Samaria e uiga i le vai ola, o “se faatusa o le Alii o Iesu Keriso ma Ana A’oa’oga” (Taiala i Tusitusiga Paia, “ Vai Ola,” scriptures.ChurchofJesusChrist.org).

Mafaufau faapea sa talosagaina oe e saunia se lauga mo se sauniga faamanatuga e uiga i le vai ola uao ofoina mai e Iesu Keriso. E aofia i se vaega o lau lauga lou faailoa mai (1) pe o le a le vai ola (2) aisea tatou te manaomia ai, ma (3) pe faapefea ona tatou mauaina mai le Faaola. O le faaaoga ai o tusitusiga paia, faamatalaga, ma fesili, ma soo se fesoasoani faaopoopo e te maua, ia tapena ou manatu ma faatulaga lau lauga.

Faailoa pe avatu i tamaiti aoga le tufaaga o loo i lalo latou te toe tepa iai a o saunia a latou lauga.

Vai Ola

Faitau i mau ma saunoaga o loo i lalo, ma saili mo malamalamaaga e uiga i le vai ola ua ofoina mai e Iesu Keriso.

• Ioane 4:13–14

• Ioane 7:37–38

• 2 Nifae 9:50–51

• 3 Nifae 20:8–9

Na aoao mai Elder David A. Bednar o le Korama a Aposetolo e Toasefululua e faapea:

O le vai ola o loo faasino i ai i le [ Ioane 4:10 ], o se faatusa o le Alii o Iesu Keriso ma Lana talalelei. Ma talu ai e taua le vai i le tausiga o le ola faaletino, e faapena foi ona taua le Faaola ma Ana aoaoga faavae, ma mataupu faavae ma sauniga mo le ola e faavavau. E manaomia e oe ma au Lana vai ola i aso taitasi ma se sapalai e lava ma totoe e tausi ai lo tatou tuputupu a’e faifaipea ma le atinaega faaleagaga.O tusitusiga paia o loo i ai afioga a Keriso ma o se faatanoa o le vai ola lea ua tatou maua ma o lea e mafai ai ona tatou feinu ai pea lava pea mo se taimi umi. E ao ia te oe ma au ona vaai atu ma omai ia Keriso, le “punavai o le vai ola” ( 1 Nifae 11:25 ; faatusatusa i le Eteru 8:26 ; 12:28), e ala i le faitau (tagai i le Mosaea 1:5), le suesue [tagai i le Mataupu Faavae ma Feagaiga 26:1], le saili (tagai i le Ioane 5:39 ; Alema 17:2), ma le fiafia (tagai i le 2 Nifae32:3) i fetalaiga a Keriso o loo iai i tusitusiga paia. O le faia o lea mea, e tatou te maua ai le taitaiga ma le puipuiga faaleagaga i la tatou malaga i lenei olaga.

(David A. Bednar, “O Se Faatanoa o le Vai Ola” [faeasaite a le Ofisa o Aoga o le Ekalesia mo talavou matutua, Fep. 4, 2007],1, broadcasts.ChurchofJesusChrist.org)

Na aoao mai Elder Joseph B. Wirthlin (1917–2008) o le Korama a Aposetolo e Toasefululua:

Ua toatele naua e o nonofo i le laulau o le taumafataga o le talalelei a Iesu Keriso ua na ona aai tofotofo i le taumafataga ua laulau atu i o latou luma. Latou te o i taaiga—auai ia latou fonotaga pe a, ma tilotilo i tusitusiga paia, ma fai faafia tatalo masani—ae ua mamao o latou loto. Afai latou te faamaoni, o le a latou ta’u sao mai e sili atu lo latou fiafia i talafeaveai fou a le pitonuu, o taualumaga o maketi o oloa, ma ata latou te fiafia i ai i le TV nai lo le mea ofoofogia faalelagi ma auaunaga suamalie a le Agaga Paia.E te fia tofo i lenei vai ola ma iloa ai o loo puna pea i totonu ia te oe e oo atu i le ola e faavavau?Aua la tou te fefefe. Ia talitonu ma o outou loto atoa. Ia atiina ae se faatuatua e le maluelue i le Alo o le Atua. Tuu atu o outou loto ina ia aapa atu i le tatalo faatauanau. Ia faatumu o outou mafaufau i le malamalama ia te Ia. Ia faagalo ou vaivaiga. Savavali i le paia ma ia ogatasi ma poloaiga.

(Joseph B. Wirthlin, “The Abundant Life,” Ensign po o le Liahona, Me 2006, 100)

E tusa ai ma lou malamalama mai le aoaoina o nei punaoa ma isi fesoasoani, amata ona fau se auivi o lau lauga. Ia mautinoa o le auivi o lau lauga e mafai ona tali ai fesili o i lalo. Mafaufau foi pe faapefea ona e faasoaina atu ou lagona e uiga ia Iesu Keriso i lau lauga. Mafaufau e faasoa atu ni ou aafiaga patino i se taimi sa e inu ai i le vai ola a le Faaola, ma pe na faapefea e ia aafiaga ona suia ai oe.

• O le a le vai ola o loo ofoina mai e Iesu Keriso?

• Aisea tatou te manaomia ai le vai ola a le Faaola?

• O a ni mea e mafai ona tatou faia e maua ai le vai ola mai le Faaola?

• O le a sou faalogona e uiga ia te Ia i lou iloa e finagalo le Faaola i tagata uma ia feinu i Lana vai ola?

Mafaufau e tuu i ni volenitia e faasoa mai a latou lauga sa latou tapenaina.

A maea ona faasoa mai e volenitia a latou lauga, tuu atu le avanoa i le vasega latou te faasoa ai ma talatalanoa i ni malamalamaaga ma uunaiga sa latou maua mai le Agaga Paia ao latou suesue. Mafaufau e taiala le talanoaga, e ala i le fai o ni fesili pei o le “O le a se mea na tulaga ese ia te oe mai lau suesuega? ma le “O le a se mea e ono valaaulia oe e le Faaola e fai ina ia e inu atili ai mai le vai ola Na te ofoina mai?”

Tala ma Faamatalaga o Talaaga

O le a le sootaga o le vai ola ua ofoina mai e Iesu Keriso ma le faamanatuga?

A o avea o se Feosoasoani Lua i le Au Peresitene Aoao o le Peraimeri, sa a’oa’o mai ai ia Sister Cheryl A. Esplin:

E mafai ona faamaloloina ma toe faafouina o tatou agaga ua faamanualia e le gata ona ua faamanatu mai ia i tatou e le areto ma le vai le ositaulagaina e le Faaola o Lona tino ma le toto ae ona ua faamanatu mai foi e faatusa ia i tatou o le a avea pea o Ia ma a tatou “areto o le ola” [ Ioane 6:48 ] ma le “vai ola” [ Ioane 4:10 ].

Ina ua uma ona faia le faamanatuga ia sa Nifae, sa fetalai atu Iesu:

“O ia o le e ai i lenei areto ua ai o ia i lou tino mo lona agaga; o ia o le e inu i lenei uaina ua inu o ia i lou toto mo lona agaga; ma o le a le fia ai lava pe fia inu lona agaga, ae o le a faatumuina.

“O lenei, ina ua uma ona aai ma feinu le motu uma o tagata, faauta, sa tumu i latou i le Agaga” [ 3 Nifae 20:8–9 ].

O nei upu, ua aoao mai ai i tatou e Keriso e faamaloloina ma faafouina e Keriso o tatou agaga. O faamanuiaga folafolaina o le faamanatuga o le a tatou “maua pea lona Agaga e faatasi ma i [tatou]” [ Mataupu Faavae ma Feagaiga 20:77 ].

(Cheryl A. Esplin, “O Le Faamanatuga—o se Toefaafouina o le Agaga,” Ensign po o le Liahona, Nov. 2014, 13)

E faapefea ona fesoasoani mai le vaiola a le Faaola ia a’u i lo’u taumafai e faatoilalo ia mea leaga o lenei lalolagi?

Na aoao mai Peresitene James E. Faust (1920–2007) o le Au Peresitene Sili:

O le tele o mea leaga faaleagaga lea e oo mai i o tatou olaga e auala mai i le initoneti, taaloga komepiuta, ata i televise ma tifaga lea o loo matuai maualuga mai ai lava le fautuaina o uiga maualalalo o le tagata. Talu ai ona o lo o tatou ola i se siosiomaga faapena, e moomia ai ona tatou faateleina lo tatou malosi faaleagaga.

E saunoa Enosa i mo’omo’o o lona agaga ma le tagi ma le aue i aso ma po uma mo le faafoisia o lona agaga [tagai i le Enosa 1:4 ]. O ona mana’oga mo le mea lelei mo lona agaga, ma e faamalie ai foi le fia inu mo upumoni faaleagaga. Na aoao atu e le Faaola le fafine i le vaieli i Samaria, “A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau” [ Ioane 4:14 ].

(James E. Faust, “Niuterene Faaleagaga,” Ensign po o le Liahona, Nov. 2006, 55)

Gaoioiga Faaopoopo e Aoao Ai

O se isi foi auala e mafai ona amatalia ai le lesona

Nai lo le faaaoga o le faamatalaga a Elder Corbridge la e i le amataga o le lesona, ae mafaufau e faasoa ma tamaiti aoga se ata faataitai, e pei o lea, o loo faapupula mai ai le gaogao e mafai ona lagonaina e tagata pe a latou liliu atu i isi mea nai lo Iesu Keriso mo le fiafia ma le faamalieina.

Mafaufau i le ata faataitai lenei:E tele ina liliu atu Sikoti i faafiafiaga, mea a le lalolagi, ma o nisi foi o taimi o amioga agasala i se taumafaiga ia maua le faamalieina ma le fiafia. E ui o nisi taimi e lagona ai e Sikoti se fiafia le tumau e ala i nei mea, ae mulimuli ane na te lagonaina ai lava le gaogao ma se naunauga mo se mea e ese.

• O le a sau fautuaga e ave ia Sikotit e fesoasoani ai ia te ia e faatoilalo ona lagona o le gaogao ma le le faamalieina?

• O le a se mea na e aoaoina mai le tala ia Iesu o aoao atu le fafine Samaria i le vaieli, e mafai ona fesoasoani ia Sikoti?