Ioane 4, Vaega 1

O Le Fafine i le Vaieli

I lona agai atu i Kalilaia, sa feiloai ai Iesu ma se fafine Samaria sa i se vaieli, ma sa a’oa’oina ai lenei fafine, e uiga i le Vai o le Ola Na te ofoina atu. Ua iloa foi e lenei fafine, o Iesu o le Keriso lea. O le faamoemoe o lenei lesona o le fesoasoani ina ia e iloa ma vaavaai i lou manaomia o le Faaola ma Lona alofa mo oe.

Fai atu fesili tulitatao. O le fai o fesili tulitatao e fesoasoani i tamaiti aoga e faailoa mai ai po o a ni mea ua latou aoaoina, pe ua loloto so latou malamalamaaga i upumoni o le talalelei ma pe faapefea foi ona faatatau na upumoni i o latou olaga. Ia faaeteete ina ia aua le faatopetopea le faasologa i se lisi umi o fesili tulitatao. E masani lava ona sili atu le faia o nai fesili laiti ona tuu atu lea i tagata aoga le taimi e tali mai ai ma le manatunatu lelei.

Sauniuniga mo tagata aoga: Faasino tagata aoga i le gaoioiga i le Sau, Mulimuli Mai Ia te Au—Mo Tagata Taitoatasi ma Aiga mo le Ioane 2–4 e valaaulia ai i latou e sue ni meafaitino e maua i o latou fale e mafai ona faaaoga e aoao atu ai upumoni faaleagaga. Valaaulia tagata aoga e aumai nei meafaitino i le vasega ma, afai e mafai, sauni e faamatala atu upumoni faaleagaga e mafai ona aoaoina atu i nei meafaitino.

Gaoioiga e Mafai ona Fai e Aoao Mai Ai

Aoao e uiga ia Iesu Keriso

A faapea na aumai e tamaiti aoga ni meafaitino e faaaoga i le gaoioiga lea sa ta’ua i luga, mafaufau pe valaaulia tamaiti e faasoa mai ae lei iloiloina ata o lo’o ta’ua i lalo.

I lau suesuega o tusitusiga paia, atonu ua e iloa ai e masani ona aoao atu e le Faaola upumoni faaleagaga e faaaoga ai aafiaga ma meafaitino ua masani ai tagata. Iloilo ata o loo i lalo, ma mafaufau loloto i upumoni faaleagaga e mafai ona tatou a’oa’oina e uiga i le Faaola, e ala i le faatusa o Ia i le vai.

• O le a sou manatu e mafai faapefea ona fesootai le vai ia Iesu Keriso ma aoao ai oe e uiga ia te Ia?

A manaomia, mafaufau e fesili atu i tamaiti aoga i fesili o le a fesoasoani ai ia i latou e fai ia faatusatusaga i le va o le vai ma Iesu Keriso, e pei o le “Aisea e taua uma ai le lua?” “O le a le tele tatou te manaomia ai?” “O le a se taimi sa pito sili ona e galala ai i le fiainu? O le a se taimi na e matuā manaomia ai Iesu Keriso?”

Mafaufau i fesili nei ma mafaufau loloto i lou mana’omia o Iesu Keriso.

• Pe e te lagonaina lou matuai manaomia o Iesu Keriso e pei ona e manaomia ai le vai i lou olaga? Aisea na e manaomia ai pe na e le manaomia ai?

I lenei lesona, o le ā e a’oa’oina se tala sa fesoasoani ai le Faaola i se fafine ia malamalama e tele atu lona manaomia faaleagaga o le Faaola nai lo ona manaoga faaletino mo le vai na sau e utu atu. A o e suesue, ia mataitu ia uunaiga a le Agaga lea e fesoasoani ia oe e iloa ai lou manaomia o le Faaola, ma Lona finagalo mo oe ia maua faamanuiaga e na o Ia e mafai ona ofoina mai.

O le fafine i le vaieli

A o agai atu Iesu mai Iutaia i Kalilaia, sa ia ui atu i Samaria (tagai i le Ioane 4: 3-4). A faapea o ia te oe le Tusi Paia o le voluma a King James, e mafai ona fesoasoani le faailoa o nei nofoaga e faaaoga ai le faafanua 1, “ O le Faafanua o le Nuu Paia,” o loo i le vaega o Faafanua o le Tusi Paia.

I le vaitaimi o le Faaola, o tagata Iutaia sa femalagaai i le va o Iutaia ma Kalilaia, e tele ona ui atu i le auala mamao ina ia latou lē ui atu ai i Samaria; aemaise ona o le va feinoinoai o Iutaia ma Samaria. Masalo sa vaivai ma fiainu Iesu ona o Lana malaga na Ia nofo ifo ai i lalo i le vaieli i le vevela o le aso (tagai i le Ioane 4:6). A o iai o Ia iina, sa alu atu le fafine Samaria e utuvai mai le vaieli.

Mafaufau e faaali atu le ata o le fafine i le vaieli mai le amataga o le lesona. Atonu ua uma ona suesue e tamaiti aoga lenei tala o se vaega o a latou suesuega o le talalelei mo le Sau, Mulimuli Mai ia te A’u–Mo Tagata Taitoatasi ma Aiga. Ave se avanoa i tamaiti aoga e faasoa mai ai mea sa latou aoaoina a o lei aoao atua le anotusi lenei.

Suesue ia aoaoga a Iesu i le fafine Samaria i le Ioane 4:5–14, ma vaavaai mo mea na e aoaoina e uiga i le Faaola. Atonu foi e te manao e matamata le vitio “Jesus Teaches a Samaritan Woman” e maua i le ChurchofJesusChrist.org, e amata mai le taimi 0:00 i le 2:01, a o mulimuli ai i le faitauina o au tusitusiga paia.

• E faapefea ona e faamatalaina gaoioiga a lenei fafine i le Faaola i nei fuaiupu? Aisea na faapena ai ana taga?

• I lou mafaufau, o le a se mea na aoao atu e Iesu ina ua Ia fetalai atu faapea sa mafai ona Ia ofoina atu le vai ola i lenei fafine?

Pe a manaomia, faamatala atu o le vai ola o Iesu Keriso lava lea ma Lana talalelei. O le autu o le vai ola o le a auliili loloto i le isi lesona.

Faitau le Ioane 4:5–14, ma vaavaai mo le alofa ma le agamalu na faaalia e Iesu i le fafine a o faaauau le la fegalegaleaiga. Mafaufau pe faapefea ona faatatau ia te oe ia aoaoga a le Faaola. E mafai foi ona e manao e matamata i le vitio “Jesus Teaches a Samaritan Woman” mai le 2:02 i le 4:11, a o mulimuli i le faitauina i au tusitusiga paia.

• O le a sou manatu na faapefea ona fesoasoani le Faaola i le fafine ia iloa lona manaomia o le vai ola na Ia ofoina atu?

E aogā foi le faailoa i tamaiti aoga sa silafia e le Faaola ia agasala a lenei fafine, ae sa lei vaai maualalo i le fafine ona o ana agasala. Sa fesoasoani foi o Ia i le fafine ia malamalama i le natura moni e tapuai ai, ma o latou uma e tapuai i le Atua i le agaga ma le upu moni, e talia e le Atua e tusa po o le a lo latou lanu ma aganuu.

• O le a se mea e mafai ona e aoao mai le finagalo o le Faaola e fesoasoani i lenei fafine e ui i ona vaivaiga?

• E fesoasoani ai faapefea lenei tala ia tatou malamalama ai i le lagona o le Faaola ia i tatou taitoatasi—e ui i o tatou lava vaivaiga?

Faitau le Ioane 4:28–30, ma vaavaai pe na faapefea ona tali atu le fafine Samaria ina ua faailoa atu e Iesu o ia o le Mesia. Faatusatusa le vaega na e faitaua ma le ala na tali muamua atu ai le fafine ia Iesu i le amataga ole la talanoaga.

• O le a sou manatu e uiga i le tali atu a le fafine ia Iesu na mafua ai ona suia o ia?

• O le a se auala ua sui pe tosina ai e Iesu Keriso le auala e te manatunatu ai?

• O a ni au faaiuga e mafai ona fai i lenei aso e fesoasoani ia te oe e faalatalata atili ai ia Iesu Keriso?

Sa faasoa mai e Elder Robert C. Gay o le Au Peresitene o Fitugafulu nisi o upumoni e mafai ona tatou aoaoina mai lenei tala. Atonu e te manao e matamata i le vitio “Taking upon Ourselves the Name of Jesus Christ” mai le taimi 7:41 i le 9:23. E mafai ona maua lenei vitio i le ChurchofJesusChrist.org.

O se tasi o mau e sili ona ou fiafia i ai o le Ioane 4:4 lea e faitauina, “E ao ina ui atu o ia i Samaria.”

Aisea ou te fiafia ai i lena mau? Ona e lei manaomia e Iesu ona maliu atu i Samaria. E le fiafia tagata Iutaia i Ona aso i tagata Samaria ma faimalaga i se auala faataamilo i Samaria. Peitai na filifili Iesu e maliu atu iina e folafola atu i luma o le lalolagi atoa mo le uluai taimi o Ia o le Mesia folafolaina. Mo lenei savali, e le gata na Ia filifilia se vaega ua lafoaia, ae o se fafine foi—ma e le na o soo se fafine ae o se fafine o loo ola i le agasala—o se tagata na mafaufauina i lena taimi e aupito sili ona le taualoa. Ou te talitonu na faia e Iesu lenei mea ina ia mafai e i tatou taitoatasi ona malamalama e le aunoa o Lona alofa e sili atu nai lo o tatou popolega, o tatou manu’aga, o tatou vaisu, o tatou masalosaloga, o tatou faaosoosoga, a tatou agasala, o tatou aiga ua malepelepe, o tatou faanoanoaga ma atuatuvalega, o tatou ma’i tigaina, lo tatou mativa, lo tatou sauaina, lo tatou faavauvau, ma lo tatou tuuatoatasi. E finagalo o Ia i tagata uma ia iloa e leai se mea ma e leai se tasi e le mafai ona Ia faamaloloina ma aumai i le olioli tumau.

Ua lava ma totoe Lona alofa tunoa. Na o Ia lava na afio ifo i lalo o mea uma. O le mana o Lana Togiola o le mana lea e faatoilalo ai soo se avega i o tatou olaga. O le savali a le fafine i le vaieli e faapea na Ia silafia o tatou tulaga faalesoifuaga ma e mafai ona tatou savavali faatasi ma ia e le aunoa e tusa lava po o fea o tatou tutu ai. Ia te ia ma mo i tatou taitoatasi, ua Ia fetalai mai ai, “A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te Ia, e avea i totonu ia te ia o le vaipuna, e puna i luga i le ola e faavavau” [ Ioane 4:14 ].

(Robert C. Gay, “O Le Tauaveina i o Tatou Luga o le Suafa o Iesu Keriso,” Ensign po o le Liahona, Nov. 2018, 99)

Fai i tagata aoga e tali mai i fesili nei i totonu o a latou api talaaga mo suesuega. E ono fesoasoani foi mo le vasega ona faatalatalanoa tali a tamaiti aoga pe a maea.

• O le a se mea na e aoaoina mai po o sou lagona ia Iesu Keriso mai lenei lesona?

• O a ni faatinoga sa e lagona e tatau ona fai ina ua e suesue i le lesona i lenei aso?

Tala ma Faamatalaga o Talaaga

Ioane 4:4 . Aisea e tāua ai le malaga o Iesu e ala atu i totonu o Samaria?

E masani ona malaga atu tagata Iutaia e taamilo i tua o Samaria nai lo le ui atu i ai, ona o le va feinoinoai o Iutaia ma Samaria. Ua tele le va feinoinoai o le au Iutaia ma le au Samaria “ona o le au Samaria sa liliuese mai le talitonuga faalelotu a le au Iutaia” (Taiala i Tusitusiga Paia “ Samaria,” scriptures.ChurchofJesusChrist.org; tagai foi Bible Dictionary, “ Samaria ”). Peitai, sa faailoa e Ioane o Iesu Keriso e “manaomia lona ui atu i Samaria” ( Ioane 4:4), e faailoa manino ai le faamoemoe o le Faaola mo le galuega o le a Ia faia i Samaria.

Ioane 4:24 . Pe o se agaga ea le Atua?

Atonu e fenumiai nisi i le fetalaiga a Iesu i le Ioane 4:24 e faapea o le Atua o se agaga. O le faaliliuga a Iosefa Samita o lenei faitauga e faailoa mai ai se faamaninoga taua: “Mo e [talitonu moni] o se ta’utinoga mai e Atua lona Agaga” (Faaliliuga Iosefa Samita, Ioane 4:26 [i le Ioane 4:24, vaefaamatalaga a]). Ua aoao mai foi e faaaliga i ona po nei faapea o le Atua e i ai se tino o aano ma ivi (tagai i le Mataupu Faavae ma Feagaiga 130:22–23 ; tagai foi i le Kenese 5:1–3 ; Eperu 1:1–3).

Sa faapefea ona aafia le fafine i le vaieli i le la fegalegaleaiga ma Iesu Keriso?

Sa aoao mai e Peresitene Bonnie H. Cordon, Peresitene Aoao o Tamaitai Talavou:

Sa silafia ma le agamalu ma le agaalofa e Keriso ia le fafine i le vaieli ma ona mana’oga. Sa feiloai o Ia i le fafine i le nofoaga sa i ai, ma amata i le fetalai atu i le fafine e uiga i se mea masani ma taatele. Ana fai taofi e Ia iina, semanu e avea o se feiloaiga lelei. Ae semanu e lē alu atu o ia i le aai e folafola atu, “Ina o mai ia ina vaai … : pe le o le Keriso ea lea?”[Ioane 4:29]. Sa faifai malie, e ala i le talanoaga, na ia iloaina ai Iesu Keriso, ma e ui i lona taimi ua tuanai, sa avea o ia ma se meafaigaluega o le malamalama, na faasusulu atu le ala mo isi ia vaai ai.

(Bonnie H. Cordon, “Ina Ia Latou Vaai,” Ensign po o le Liahona, Me 2020, 79)

Gaoioiga Faaopoopo e Aoao Mai Ai

Sa suia le manatu o le fafine

Valaaulia ia tamaiti aoga e matau upu sa faaaoga e le fafine Samaria e faasino atu ai i le Faaola i le Ioane 4:9, 11, 19, 29 . E faavae i nei upu, talanoa pe na faapefea ona suia le malamalama o le fafine e uiga ia te Ia.

Ioane 4:34 . “O la’u mea e ’ai ia ou faia le finagalo o le na auina mai a’u”

O le taimi sa talanoa ai le Faaola ma le fafine i le vaieli, sa iai le au Aposetolo i le a’ai e faatau se meaai. Ina ua toe foi ifo, sa latou ofo atu ia Iesu ni meaai o a’ano o manufasi (tagai i le Ioane 4:31).Valaaulia tamaiti aoga e faitau le Ioane 4:32–34, ma vaavaai mo le mea na taulai atu i ai le Faaola, nai lo o le meaai. Mafaufau e talanoa po o a mea o aoao mai e nei fuaiupu e uiga ia Iesu Keriso, Lona alofa mo le fanau uma a le Tama Faalelagi, ma Lona taulai atu e fesoasoani ia i tatou taitoatasi ia alualu i luma.

Ioane 4:35 . O fanua “ua sinasina mai nei i le seleselegasaito”

O le faataitaiga a le fafine Samaria i le Ioane 4:28–29, 39–42 ma fetalaiga a Iesu Keriso i le Ioane 4:35 e mafai ona faaaoga e taitai ai se talatalanoaga i le faasoaina atu o le talalelei.Mafaufau e faaali atu se ata o le saito ua saunia e selesele, ma faamatala atu pe a saunia le saito mo le seleselega, e masani ona faamatalaina e “sinasina.” O fesili o loo ta’ua i lalo e mafai ona faaaoga o se vaega o le talatalanoaga:

• O le a sou manatu o le a se mea na mafua ai ona naunau le fafine e faasoa atu lana molimau i isi? E mafai faapefea ona e mulimuli i lana faataitaiga?

• O le a sou manatu o le a se mea na aoao atu e le Faaola i Ona Aposetolo ina ua Ia fetalai ua “ua sinasina mai nei i le seleselegasaito”? ( Ioane 4:35).

• O a ni auala ua saunia ai fanua o loo siomia ai oe e selesele?