Doctrinal Mastery: Mateo 5:14–16
“Paliwanagin Ninyo nang Gayon ang Inyong Ilaw sa Harap ng mga Tao”
Iniutos ng Tagapagligtas sa Kanyang mga disipulo na maging halimbawa sa iba sa pamamagitan ng pagsunod sa Kanya. Ang lesson na ito ay makatutulong sa iyo na gamitin ang mga alituntunin ng pagtatamo ng espirituwal na kaalaman upang maging halimbawa sa iba at mas mapalapit sa Tagapagligtas.
Pagrerebyu ng mga alituntunin ng pagtatamo ng espirituwal na kaalaman. Regular na iparebyu sa mga estudyante ang tatlong alituntunin ng pagtatamo ng espirituwal na kaalaman: kumilos nang may pananampalataya, suriin ang mga konsepto at tanong nang may walang-hanggang pananaw, at hangaring mas makaunawa sa pamamagitan ng mga itinalagang sources na ibinigay ng Diyos. Sa lesson na ito, ang pagrerebyu ng mga alituntuning ito ay makatutulong sa mga estudyante na magamit ang mga ito sa pagsasanay sa pagsasabuhay.
Paghahanda ng estudyante: Sabihin sa mga estudyante na mag-isip ng isang tao sa kanilang buhay na naging mabuting halimbawa sa kanila. Pagkatapos, sabihin sa kanila na tawagan o sulatan ang taong ito upang magpasalamat.
Mga Posibleng Aktibidad sa Pag-aaral
Isaulo at ipaliwanag
Bigyan ng pagkakataon ang mga estudyante na maisaulo ang reperensya at ang mahalagang parirala ng banal na kasulatan. Ang sumusunod ay isang halimbawa kung paano ito gagawin.
Basahin ang Mateo 5:14–16 .
Gumuhit ng isang paglalarawan tungkol sa mahalagang parirala ng banal na kasulatan na “Paliwanagin ninyo nang gayon ang inyong ilaw sa harap ng mga tao” at ang reperensya nito na Mateo 5:14–16 . Habang gumuguhit ka, pag-isipan kung paano mo maisasama ang reperensya sa paraang makatutulong sa iyo na maalala ito.
Habang tinitingnan ang paglalarawan, ulit-ulitin ang reperensya at mahalagang parirala ng banal na kasulatan nang ilang beses. Pagkatapos ay huwag itong tingnan, at subukang ulitin ang naisaulong reperensya at mahalagang parirala ng banal na kasulatan.
Para sa sumusunod na aktibidad, hikayatin ang mga estudyante na gamitin ang kanilang drowing upang maipaliwanag ang katotohanan sa doctrinal mastery passage sa halip na ilarawan lamang ang mismong drowing.
Ibahagi ang iyong drowing sa isang kaklase, at ipaliwanag kung paano nito inilalarawan ang mahalagang parirala ng doctrinal mastery at ang reperensya nito.
Kung posible, maaari mong isabit ang ilan sa mga paglalarawan sa loob ng klase upang mabalikan muli ng titser at mga estudyante ang mga ito sa mga susunod na lesson o aktibidad sa pagrerebyu.
Pagsasabuhay
Sa pagsasabuhay na ito, gagamitin mo ang mga alituntunin ng pagtatamo ng espirituwal na kaalaman upang malaman kung paano maging halimbawa sa iba at kung paano mo sila maaanyayahang mas lumapit sa Tagapagligtas.
Rebyuhin ang mga talata 5–12 ng bahaging “Pagtatamo ng Espirituwal na Kaalaman” ng Doctrinal Mastery Core Document (2022).
Basahin ang sumusunod na sitwasyon, at pag-isipan kung paano ka tutugon kung ikaw ang nasa katayuan ni Raul.
Kasama ni Raul, isang bagong inorden na priest, ang kanyang mga kaibigan nang magsimulang magbiro nang masama ang ilan sa kanila at mangutya ng isang taong kilala ni Raul. Hindi mapalagay si Raul at alam niyang mali ang ginagawa nila. Habang iniisip niya kung ano ang gagawin, nilapitan siya ng kaibigan niyang si Jesse, na miyembro ng ibang relihiyon at talagang hinahangaan ni Raul, at sinabing, “Uy, bakit napakaseryoso mo naman?”
Isiping gamitin ang bawat isa sa mga alituntunin ng pagtatamo ng espirituwal na kaalaman upang matulungan kang makaisip ng sagot.
Maaari mong anyayahan ang mga estudyante na makipagtulungan sa isang kaklase o sa maliliit na grupo. Maaaring makatulong na ipakita ang mga sumusunod na tagubilin para sa mga estudyante.
Suriin ang mga konsepto at tanong nang may walang-hanggang pananaw
Pumili ng isa sa mga tao sa sitwasyon (si Jesse o ang taong kinukutya).
-
Ano sa palagay mo ang nadarama ng Panginoon tungkol sa taong pinili mo?
-
Paano maaaring makaapekto sa pagtugon ni Raul sa tanong ni Jesse ang pagtingin sa taong ito nang tulad sa pagtingin sa kanya ng Panginoon?
Hangaring mas makaunawa sa pamamagitan ng mga itinalagang sources na ibinigay ng Diyos
-
Paano makatutulong kay Raul ang pag-alaala at pagsasabuhay ng mga alituntunin sa Mateo 5:14–16?
-
Sa palagay mo, ano pang sources na itinalaga ng Diyos ang makatutulong kay Raul?
Kumilos nang may pananampalataya
-
Bakit maaaring maging mahirap para kay Raul na kumilos nang may pananampalataya sa sitwasyong ito?
-
Ano ang maimumungkahi mong maaaring gawin ni Raul upang makakilos nang may pananampalataya?
Ipabahagi sa ilang estudyante ang kanilang mga sagot. Maaari mong pangalanan at purihin ang mga estudyante para sa mga alituntunin ng pagtatamo ng espirituwal na kaalaman na babanggitin nila.
Mag-isip ng sitwasyong katulad ng kay Raul na kinakaharap mo ngayon o maaari mong kaharapin.
-
Paano makatutulong sa iyo ang natutuhan mo ngayon para maging halimbawa ka sa iba?
Pagrerebyu
Tulungan ang mga estudyante na marebyu ang reperensya at mahalagang parirala ng banal na kasulatan para sa Mateo 5:14–16 sa susunod na lesson. Narito ang isang halimbawa.
Balikan ang larawang iginuhit mo para sa Mateo 5:14–16 . Habang tinitingnan mo ito, ulitin ang reperensya at mahalagang parirala ng banal na kasulatan nang ilang beses. Subukang ulitin ang naisaulo mo.
Mga Karagdagang Aktibidad sa Pag-aaral
Alternatibong aktibidad sa pagpapaliwanag ng doctrinal mastery
Magpakita ng mga larawan ng iba’t ibang pinagmumulan ng liwanag, tulad ng apoy, bumbilya, flashlight, at iba pa. Sabihin sa mga estudyante na pumili ng isang bagay at gamitin ito upang maipaliwanag ang katotohanang natukoy sa Mateo 5:14–16 .
Sabihin sa mga estudyante na gamitin ang mga sumusunod na tanong upang makatulong sa paghahanda ng kanilang paliwanag.
-
Anong ilaw ang dapat nating paliwanagin?
-
Paano natin paliliwanagin ang ilaw na iyon?
Alternatibong pagsasanay sa pagsasabuhay
Talakayin ang mga bagay na kung minsan ay nagpapahirap sa pagkilos nang may pananampalataya.